31/3/14

31/3/14   MON   RAIN

琴晚行雷落雨落得咁勁, 都無礙兩位少爺瞓覺, 今朝起身跳完舞就餵柏仲啦, 有D趕咁出門口, 好在去到巴士站啱啱好有車, 入到去笨元又周圍走囉, 今日要去參觀金管局, 好在係室內都唔太影響! 我返工時個天都黑哂啦, 買完早餐仲勁大雨, 好在過多條馬路就到! 今日都係做吓自己嘢多, 一朝早係寫好D日記同執吓D相咁, 又要幫笨元曬相交功課, 午飯去埋銀行出糧, 順手買埋飯, 不過而家食哂一個意粉原來都幾飽吓, 下午茶都冇食! 下午老細返咗一陣, 比佢簽吓睇吓嘢又可以做自己嘢啦! 放工返到去睇吓我隻冇牙笨, 今日食午飯時喺學校已甩咗, 老公揍佢放學時就買埋雪糕啦! 陪佢玩咗陣睇埋功課, 又輪到陪柏仲, 而家的柏仲易搞好多呢, 食飯時放佢喺梳化佢就望住我地一副想食GE樣, 好搞笑! 食完飯我又忍唔住食咗杯雪糕, 罪過罪過! 返到屋企好忙好忙, 老公去咗過數, 我就捉笨元沖咗涼先, 跟住叫佢幫我睇住柏仲我去沖涼, 不過老公都好快返番嚟, 佢就提意我不如餵咗柏仲食奶先, 睇吓九點幾食完可唔可以頂天光, 咁見佢淨係喊, 哄佢又唔得咪開支奶囉, 初頭都唔多肯食架係咁典, 之後食食吓就食哂啦, 放落床喊咗幾聲瞓咗! 終於可以睇番我番笨元, 因為要餵柏仲, 冇時間同佢溫書, 睇嚟都要同佢準備定D工作紙, 等佢寫好, 叫佢出廳默咁我可以分身做好D嘢嘛! 兩個都瞓哂我都冇咩力, 10點幾喺梳化瞓咗1個鐘左右, 老公一關冷氣我就醒, 入房再瞓過!

30/3/13

30/3/14   SUN   RAIN

今朝老公一早起身去踢波, 我就瞓到八點幾先比柏仲D聲叫醒, 佢又唔係喊, 起身望吓佢原來係到食枕頭食到幾好味! 梳洗完就餵佢食奶啦, 都算合作, 食完放番佢入房, 自己扭咗一輪就瞓啦, 我就煮早餐同笨元齊食, 食之前要佢做好珠心算先, 佢做好我又煮好可以慢慢食, 柏仲瞓到10點幾老公返佢又醒啦, 所以咪要放佢出嚟玩吓囉, 我又要抺吓地先嘛, 雖則嫲嫲星期五抺咗, 但天氣濕要抺密D, 因為柏仲都會坐學行車落地架嘛! 差不多1點同柏仲沖涼食奶, 然後就去街街啦, 食飽同佢著埋衫放落車仔即瞓, 瞓足4個幾鐘呢! 我地只係去咗AEON行咋, 老公想食KFC, 咁食完再行過去就啱啱好囉, 都係睇吓玩具, 冇得比佢買呀, 諗住去旺角嗰間專門店買可能會平D! 反而就買咗好多柏仲D嘢, 都係D消耗品, 睇家品時老公睇中咗隻煎牛扒PAN, 見佢想買咗咁耐呢隻又OK咪買囉, 仲落去超市買埋牛扒即刻試吓, 當然仲買咗沙律呀壽司呀刺身呀咁啦! 返到去跳番轉鄭多燕先沖涼, 跟住餵埋柏仲同佢玩吓就食晚餐啦, 食完睇吓電視時, 子元話出面閃電, 初頭都唔係好覺, 後來落得好勁, 好似10號風球咁, 見住D樹吹到歪埋一邊咁滯! 後來喺whatapps睇到d人講話落冰雹, 又一城個天花又穿咗, 商場入哂水, 好誇! 老公之後仲帶笨元落樓下睇仲有冇冰雹, 咁梗係冇啦, 都溶哂! 最後睇埋電視9點幾佢就瞓啦, 我地就等到12點餵埋柏仲就瞓啦!

<一早起身就見柏仲食緊手!>

 <光頭仲伏喺到好搞笑!>

 <都仲係成日縮埋一舊!>

 <等哥哥幫你做吓運動啦!>

29/3/14

 

29/3/14   SAT   WARM RAIN

今日子元學校參加跳舞比賽, 8點就要喺學校集合, 好在有程生車佢地入去, 我就喺屋企等嫲嫲嚟, 不過嫲嫲唔知醒, 9點多先過到嚟呢, 柏仲已經食飽再瞓過! 返到公司食咗早餐, 人在公司但個心就喺比賽場地, 大家的現場直擊報真係令人覺得身處其中, 最後佢地攞咗亞軍, 都唔錯啦! 點幾佢地出番嚟一齊食午飯, 因為今朝勁大雨所以踢波取消, 咁食完飯就可以輕輕鬆鬆咁返屋企換衫再去剪頭髮! 返去揍埋柏仲就過荃灣啦, 都等咗1個鐘先有得剪, 柏仲都等到瞓咗, 瞓醒就變咗光頭仔囉, 好在我唔洗剪咋, 唔係仲耐! 剪完就先返屋企, 餵埋柏仲6點餐奶, 再過長沙灣同程生佢地食飯, 今次試松記隔離嗰間, 好好食呀, 子元同敏瑩都添飯, 幾誇呀! 食飽飯仲要去隔望食埋糖水, 所以之後要行返去消化吓! 返到屋企沖完涼比笨元玩陣先瞓, 反正明天星期日!

<chok王笨!>

 <同敏瑩又係到搞咩呀?!>

 <個個都好可愛!>

 <攞咗亞軍, 影番張靚相!>

 

 <咁靚仔同我合照吓啦!>

 <父子裝!>

 <等剪頭髮, 無所事事! 留意我同佢著咗鞋架!>

 <光頭仲!>

28/3/14

28/3/14   FRI   WARM

今日係bling bling Party, 我6點半起身跳舞笨元又跟住咁早起身, 加上今日嫲嫲過嚟, 我唔洗餵柏仲, 所以都可以好好幫笨元著好佢件bling衫, 型到爆咁啦, 攞齊嘢7:45就出門口啦, 返到去當然係咁同佢地影相啦, 一個二個都好誇張呢! 今日子元都算郁少咗, 因為怕D珠會甩! 揍咗佢入去我又要返工啦, 今日都係勁hea, 雖則老細已回HK, 但冇咩特別嘢找我, 所以都仲可以free 吓, 午飯後去咗行吓萬寧咁啦! 喺網上hea足一個下午, 老公打嚟話笨元贏咗最具創意大獎, 又係咁比老師問件衫點整, 睇得出佢好開心囉, 放工喺美孚會合一齊返去, 執吓嘢咁到夠鐘就出門口又去合唱團, 琴日做哂功課今日可以free d囉, 我同奶奶去冰室攞住先, 老公揍咗笨元去小童群益會後, 再帶埋程生佢地過嚟晚飯! 食飽咪又去接兩個小朋友囉, 回家後快手K.O.笨元瞓覺, 明天要8點返到學校呢! 柏仲就完全唔肯瞓, 咁由佢等到10點半食奶啦, 都係食到衰衰咁, 成日要搵番個mood先食到, 一食完又暈咗啦!

<超正bling bling look!>

 <女仔們都好靚!>

 <係善孜的閃爍度有得同子元揮吓!>

 <成班都係pose王!>

 <後面咁靚當然要影吓!>

 <又轉pose!>

 <拉埋芷柔妹嚟影!>

<我隻好味道柏仲!>

27/3/14

27/3/14   THU   WARM

今日以為要入青衣, 點知原來係嫲嫲出嚟, 搞到我一早起咗身跳埋舞就快手叫醒柏仲食奶啦, 個衰仔又係到扭喎, 所以我餵咗一半就交咗比嫲嫲啦! 今日都少少趕啦, 出到去差不多有車, 入到去咪又係周圍走咁囉, 都管唔到咁多, 跟住同老公一齊食個早餐先返工, 因為佢要去郵局買嘢! 咁我就返工啦, 朝早都係上吓網hea吓咁, 午飯約咗phoebe 去食, 比咗少少嘢佢, 又吹吓水咁啦! 下午都係hea, 因為老細不在香港, 真係hea好多! 放工就要即閃啦, 因為要去揍笨元呀, 老公今日有嘢做揍唔到笨元放學, 嫲嫲又喺美孚喎, 好難要佢入去揍, 於是叫咗敏瑩公公揍埋子元去元州邨等我放工去接, 咁啱老公又到長沙灣, 佢咪喺樓下等埋我地一齊返屋企囉! 返到去柏仲醒咗啦, 食飽搵人玩, 但我地真係好忙, 又要搞掂笨元沖涼, 然後要佢做功課先, 因明天開party所以今日派哂功課, 咁就今日要佢做哂先, 柏仲就好慘咁一時比人放喺梳化一時比人放喺學行車, 總之到我地食完飯之後先有人理佢, 都陪佢玩咗好耐, 跟住到我要睇笨元功課, 老公陪柏仲玩! 九點幾笨元終於做哂功課就比佢玩一陣囉, 老公仲要為明天的bling bling衫作最後加工, 貼實D! 到11點就叫醒柏仲餵埋餐奶, 其實放番佢入房之後都冇瞓架, 不過佢又唔嘈都冇咩所謂!

 

26/3/14

26/3/14   WED   WARM

今日我地兩個都請咗假, 冇法啦, 兩位長老都有事, 人手唔夠! 朝早我如常咁起身揍笨元返學, 老公喺屋企照顧柏仲, 咁我揍咗笨元就買早餐返去一齊食, 柏仲食奶食得好少咋, 莫非佢知自己生長線上到90%, 所以食少D減肥? 食完早餐佢又再醒咗, 不過我地仲忙緊嘛, 喊都冇用! 到11點已經坐立不安咁, 梗係啦, 食咁少梗係餓啦! 不過我都由佢到11:30先沖涼, 差不多12點先食奶, 結果咪食得勁合作囉, 仲馬上瞓埋添! 我2點就要出門去尖咀接阿媽, 佢要整白內障, 而家科技真係先進, 半個鐘搞掂架啦, 去到診所其實佢已經搞掂, 不過話有D暈所以再坐吓先, 落到樓好難先截到架的士返去, 再買個飯比佢食, 我陪到佢4點先走, 點知等咗好耐先有巴士入到青衣接笨元放學, 返到屋企柏仲剛食完奶, 咁我同笨元沖好涼, 跳埋10分鐘甩油操自己先沖涼, 老公已出咗去踢波, 沖涼時柏仲有喊架, 但都冇辦法, 仲要睇埋笨元功課, 柏仲係扭眼瞓架啦, 因為老公話佢2點幾醒咗一路都冇瞓, 咁梗係攰啦! 快手煮埋個意粉晚餐就趕笨元入房做珠心算, 再噯埋柏仲瞓覺, 其實八點幾我已經開始眼瞓, 不過都要K.O.埋笨元先, 我就喺梳化瞓到隻豬咁, 係豬到連老公打過返嚟都冇為意自己接過電話, 到佢返到屋企我都唔知, 一路到差不多12點佢叫醒我問係咪要餵柏仲我先有番D意識, 足足昏睡咗幾個鐘! 咁醒一醒自己, 餵埋柏仲就再瞓啦!

25/3/14

25/3/14   TUE   WARM
今朝開始早起身跳鄭多燕減吓肥, 6點半起身, 選咗個10分鐘甩油操, 真係好甩油, 跳咗1SET好似仲有力, 咁就跳多SET, 點知頂唔住啦, 差D暈低出哂汗, 叫醒咗笨元我就去沖個涼先, 仲要梳埋頭先餵柏仲, 勁趕囉, 加上塞一塞車, 於是送車尾, 鑑於上次等咗太耐, 今次馬上撘地鐵就算, 都好快返到去, 入到學校見到校長, 出咗少少口術8月會幫柏仲交表報N班, 咁佢就話佢會留番個位, 幼稚園都有兄姐就讀必收呢, 咁都安心D, 超細B真係好難找學校! 買埋早餐返公司, 好肚餓呢, 今朝做完運動果然係餓D! 之後都係吹水多過做, 午飯後大老闆娘返咗一陣, 都有做過嘢做吓樣咁啦! 放工返青衣接埋笨元佢地一齊去青衣城食Mr Steak, 柏仲瞓咗一陣, 食完佢又醒咗, 回家後我地有我地沖涼, 柏仲喊咗陣放佢落學行車坐吓, 之後又要入番房喊吓, 好快又投咗降, 老公就專心整佢個blingbling衫for 星期五子元學校生日Party!

24/3/14

24/3/14   MON    WARM

今日又要返工返學啦, 入到LIFT先發現笨元除咗書包咩都冇攞, 於是我就即刻出番LIFT幫佢攞, daddy帶佢地落樓下先啦! 搞到勁趕囉, 好在都趕得切咋! 返到學校佢地又走嚟走去啦, 到我趕唔切巴士又要等啦! 買埋早餐返去食, 又吹吓水咁啦, 老細唔係香港真係好free, 基本上唔急GE嘢都冇做過, 完全放肆! 午飯後都係睇吓電視啦, 下午繼續吹水啦, 等放工之餘又睇吓D減肥嘢, 今日開始晚餐唔食飯嘛, 或者係少少啦, 跟住朝早就開始做運動, 跳鄭多燕, 目標用1年時間減15磅, 希望我堅持到啦, 咁出年著晚裝時就可以好靚啦, 嘻嘻! 返到去先睇笨元功課, 跟住又要抱吓柏仲啦, 食飯時柏仲好唔滿意咁, 要人陪佢玩呀, 但都要食完先得架! 差不多又係回家時間, 柏仲喺車已瞓咗, 一路到屋企都仲瞓緊, 咁就沖涼呀做珠心算呀等, 再比佢玩咗5分鐘就要瞓啦! 我地hea到11點再叫柏仲起身食奶, 又係勁喊囉, 比人嘈醒嘛, 下星期返健康院都要問吓若咁係咪都要照餵定點樣! 餵完未夠12點我地都瞓啦, 爭取時間休息!

23/3/14

23/3/14   SUN   WARM*

今朝七點幾柏仲叫食, 局住要起身啦, 老公又出去踢波, 得番我一揍二, 不過都冇咩所謂, 餵咗柏仲放番佢去瞓就煮早餐同笨元食, 食完要佢繼續做埋珠心算先可以玩, 我就洗好碗再摺衫執嘢, 又要執子元下午去踢波D嘢, 又要執柏仲出街D嘢, 執得嚟都換衫出門口, 約咗阿媽阿叔佢地食午餐, 去添好運食點心, 因為阿嬸識人, 又唔洗等又貴賓房咁, 咪當見識吓囉, 老公直接喺球場過去, 我就miss咗班車最遲先到, 其實都唔係特別好食啫, 講到咁誇, 柏仲就梗係要招呼吓人啦, 係食奶後瞓咗一陣囉, 子元佢地點幾就走, 因為又到佢去踢波, 我地都係食到2點左右啫, 撘巴士返去都仲趕得切睇running men, 抱咗柏仲一陣就瞓咗, 不過都唔係瞓好耐, 個幾鐘就醒咗, 等到5點幾先同佢沖涼食奶, 老公佢地7點多先返到嚟, 柏仲就完全冇再瞓過, 所以我地煮飯時唯有由得佢喊, 但佢喊得好堅持, 係都唔肯瞓, 所以我地食飯時就比佢喺學行車坐吓, 食完飯老公就打暈咗佢, 搞掂埋笨元9點幾瞓覺, 我已經勁眼瞓, 喺梳化瞓到11點老公一定要我起身, 好辛苦咁令自己醒番, 就同柏仲換片啦, 不過佢仲瞓得冧過我, 叫咗好耐都係瞓, 終於叫一叫醒咗佢, 食咗幾啖就瞓住食咗4安囉!

<同叔公影番張相先!>

 <好似飯團仔!>

<好耐冇練伏伏啦!>

 <我識企啦...>

22/3/14

22/3/14   SAT   COOL

今日家長日, 我又請假一天啦, 朝早又係晨咁早起身, 搞掂笨元就餵柏仲, 等老公揍佢去畫班我就餵埋柏仲先, 然後喺美孚會合入青衣, 為咗唔洗成日抱住, 所以推車仔, 入到去喺學校樓下茶餐廳食早餐先, 柏仲已經醒咗就抱住佢啦! 食完10點半上到去剛剛好, 不過就要等囉, 足足等咗45分鐘, 即11點3先到我地見, 都遇咗架啦, 早知揍埋笨元放畫班先去都仲得! 其實都冇咩特別嘢講, 因為學習上子元真係不大問題, 只係成日控制唔到自己啫, 我地見緊時柏仲就喺BB車瞓覺, 算佢合作啦! 見完程生佢地已揍咗笨元入嚟, 咁我地又可以返屋企啦, 執齊嘢笨元又要去踢波, 我就同柏仲喺屋企啦, 洗完白白食埋餐奶就瞓咗, 本來諗住放佢喺梳化落吓格先, 我就吸住塵先, 點知我吸完間房出嚟佢已經瞓咗, 好搞笑, 於是等我吸好塵先放佢入房瞓囉, 我就開始做家務等等! 隻豬今日又好好瞓喎, 一路到5點多先醒, 咪同佢玩吓, 最好笑係我放佢坐喺隔離時又唔理佢, 佢就會喊住咁講BB話, 咁見佢咁多嘢講諗住拍下啦, 點知佢見我拍佢又唔出聲, 於是幾次之下我就唔正面拍佢, 反而照樣唔啋佢, 佢就開始喊住叫媽媽, 唔止叫一聲, 係叫咗幾聲, 當佢真係叫媽媽架啦! 估唔到都唔係第一次比人叫媽媽, 都會覺得咁開心! 等老公佢地買埋晚餐返嚟食, 柏仲就自己喺車仔伸展吓啦! 食完嘢沖埋涼比笨元睇吓電視就K.O. 佢啦! 柏仲梗係又比老公K.O.埋啦, 不過12點都係要叫醒佢起身食奶先再有得瞓!

<唔洗一分鐘瞓咗!>

 <笑得好可愛呀!>

 <仲識望鏡頭!>