31/1/15

31/1/15   SAT   COLD

今日返工都好忙, 星期六都咁忙真係慘! 因為要prepare明天Annual Dinner D嘢, 做到點幾先走, 老公都有先見之明, 揍埋柏仲去球場等我, 咁我放得工就行過去球場搵佢地, 又撞見程生佢地喺附近午飯, 於是齊齊過去食埋先, 跟住等子元踢完波仲有車載我地返去! 老公負責柏仲瞓晏覺, 我就負責子元溫書, 不過都比佢玩吓先, 算係咁啦! 晚飯同程生佢地去咗食辣蟹坊, 超正囉! 不過都幾貴, 叫咗避風塘炒蟹, 辣酒海螺, 咕嚕肉, 娃娃菜, 黃金蝦, 要千一蚊! 不過真係好好食, 最好係可以揍咗柏仲上阿媽到再慢慢食, 真係舒服好多! 食完仲去麥當勞食雪糕, 肥死! 回家後快手沖涼瞓覺, 都10點幾囉!

<球場陪哥哥踢波!>

 

 <陪食辣蟹中!>

 

 

 

 

30/1/15

30/1/15   FRI   COLD

今日都唔算太忙啦, 朝早揍埋柏仲送子元校車, 因為佢實在太嘈了! 跟住就返上樓飲完奶我就試吓用曲髮器夾吓頭髮, 都OK啦不過整親手囉, 於是今日就變咗個曲髮look啦! 入到青衣食埋早餐就返工啦, 朝早都係做吓自己嘢又忙吓Annual Dinner D嘢囉! 午飯後老細好早返咗嚟阻住哂! 之後都係搞Annual Dinner嘢, 實在太多細節嘢要處理, 老細當然唔覺得嗰D係嘢啦, 真係好PK! 傾好咗就做嘢啦, 放工我都走啦, 因為要返屋企攞埋游水嘢再去接笨元敏瑩佢地! 老公同柏仲, 程太同婷婷都嚟埋, 齊齊過去, 老公買米線, 我地去換衫, 遲咗到泳池, 要call阿sir出嚟接番佢地! 跟住返上樓就對吓有咩功課等等, 夠鐘又要落去揍佢地, 返上樓快手同子元沖涼, 咁就可以快D開餐, 柏仲冇瞓晏覺, 8點幾就係到顛, 最終都係餵支奶K.O.埋佢就算, 可以安安樂樂咁食! 等佢地走咗就沖涼K.O.埋笨元, hea陣都瞓!

29/1/15

29/1/15   THE   COLD

今日終於可以悠閒D, 朝早勁唔願起身, 因為琴晚同老公吹水吹得太夜, 都係鬧老細啦! 起身之後就搞掂笨元啦, 帶埋柏仲送校車, 佢就走埋上校車坐! 返上樓食埋奶過去嫲嫲到啦, 食完早餐我又返工啦! 返到公司可以做吓自己嘢, 午飯後就睇吓電視囉, 下午都係做吓Annual Dinner D嘢, 一般忙啦! 老細冇返叫做自在D, 不過都要做嘢! 食埋TEA放工, 因為未買餸, 一路行返去接笨元一路諗囉, 最終買咗塊平牛扒煎, 仲買足一斤菜! 返媽到攞埋個夾曲髮夾就回家了, 快手沖涼煮飯食埋拖地都8點9, 又要睇功課等, 真係夠哂攰! 今晚都好早攰啦, 喺梳化瞓吓陪老公一陣, 11點幾都瞓啦!

28/1/15

28/1/15   WED   COLD

今朝如常揍子元校車啦, 跟住又要揍柏仲入青衣啦, 食埋早餐返工等等! 朝早都OK, 都係做吓自己嘢可以閒吓咁, 但都要預備吓下午開會D嘢! 午飯食飽飽睇星星大結局, 又睇多次囉! 跟住又繼續prepare開會嘢囉! 3點幾開咗SALES會先, 跟住就傾Annual Dinner, 自己開咗陣先, 4點幾production嗰邊都嚟到就再繼續啦, 如果我手上有D利器同樽, 我諗我已經打爆咗我老細個頭, 佢真係冇嘢搵嘢嚟挑, 我估production出到LIFT口已經係到叉佢! 仲要搞到7點幾先走到, 真係好慘, 叫佢決定就決唔到, 個人又假扮嘢嘢, 總之要幾白痴有幾白痴, 要幾低B有幾低B! 本來我今晚諗住同子元睇醫生,結果要叫咗老公揍佢去睇, 咁柏仲就留番我搞掂先入去揍, 8點幾先返得到屋企, 叫咗老公去買米線, 食完再好忙亂咁搞掂佢兩個瞓覺我先沖涼, 10點幾先可以坐下休息, 真係好攰, 但又唔眼瞓喎, 睇咗J2套新劇“沒關係是愛情”, 幾好睇呀! 之後仲睇埋宮銷連城就瞓啦!

27/1/15

27/1/15   TUE   COOL

朝朝都係咁拖子元落床換衫返學架啦! 跟住返去餵柏仲啦, 今日奶奶覆診, 所以朝早阿媽過嚟揍柏仲, 咁我就買早餐返工啦! 朝早都係做吓自己嘢囉, 午飯後都係睇吓電視咁啦, 老細唔返但就可搖控你做嘢咁啫, 下午都係要做吓公事咁啦, 食埋個TEA又係時候收工啦! 返去揍笨元, 個人都好攰, 冇咩精神同佢吹水, 返到屋企柏仲瞓緊喎, 咪叫笨元快D去沖涼囉, 跟住我就煮飯啦, 煮到咁上吓沖埋個涼就煮埋下半場跟住食飯啦, 柏仲有奶奶餵我可以輕鬆好多, 洗碗時奶奶已經閃了! 咁抺埋地就睇笨元功課啦, 完全係冇睇過有冇錯漏, 日期又冇寫, D字又衰, 總之又撩起我把火啦, 教而不善係最麻煩! 等佢執嘢時又輪到搞柏仲啦, 食完奶瞓覺但又唔要我噯, 就算放咗佢落床都係喊, 咪叫老公執手尾囉, 因為仲要執子元手尾, 又未執杯袋等等! 終於可以到自己啦, 試吓set頭但唔多成功, 搞咗一粒鐘都冇咩成果, 都唔知點算! 11點就要睇星星大結果, 再睇都係好吸引! 之後睇多陣宮鎖連城就瞓!

26/1/15

26/1/15   MON   COOL

今日都係如常咁起身揍仔啦, 返上樓搞掂柏仲就出門口入青衣, 食埋早餐返工! 朝早都唔算好忙, 做吓自己嘢又做吓公事咁啦, 午飯要去買飯食, 電視又冇咩好睇, 都幾悶吓! 下午要預備Annual Dinner的事, 都係煩架啦, 找咗好耐相都好似唔啱咁, 總之砌掂比佢就得啦, 反正佢都係要雞蛋裡挑骨頭, 比佢睇過一次就算, 吓吓咁挑法唔洗做嘢啦! 放工仲要遲走喎, 佢地勁開會咁阻住哂, 準時走好似唔啱咁! 返去接笨元時隻豬仔啱啱瞓醒, 完全唔清醒狀態, 都唔明點解咁眼瞓架佢! 激到我開始火了, 邊行邊鬧! 落到樓先叫做醒!! 返到屋企因為唔洗做功課, 完全放鬆狀態, 咁我就煮飯啦, 一路都OK GE, 食完飯我洗碗呀同預備埋明天的餸啦, 老公話整藥比柏仲食, 但又整得好慢, 子元又唔識同柏仲玩, 一係整到佢咁, 係陸生先對住佢地咆哮先架, 我聽嗰D聲已經聽到火起, 出去一人一巴, 兩隻齊齊喊, 放咗柏仲落床仔喊飽佢, 又開始要掟吓嘢先啦, 跟住仲要比人話我好發脾氣, 總之氣氛凝固咗個幾鐘啦, 佢有佢同子元溫珠心算, 我有我打掃, 最終K.O.完佢兩個之後已經冇事啦, 不過都係要再丙吓佢, 話我唔改火爆, 佢自己冇手尾咪又係唔改, 我唔執屋一星期肯定變垃圾屋! 今晚太攰睇唔到星星啦, 唯有明天再睇番!

25/1/15

25/1/15   SUN   COLD

今日都係冇去咩地方, 原來成日留係屋企真係好悶! 7點幾柏仲嘈醒我就起身餵埋佢先揍子元去畫班, 估唔到程太今日咁早, 我地只撘到8:40班車, 好在都唔算太遲! 跟住我就去買餸回家啦, 老公哄緊柏仲瞓覺, 咁我就可以收拾間屋整吓餸同執吓廚房了, 柏仲瞓到11點幾啦, 都算OK架啦! 同佢玩陣老公又返啦, 食完午飯就同子元對埋D功課同小作家篇文, 仲有包埋D書, 真係好忙! 到兩點幾老公就哄埋柏仲瞓, 我地可以比較舒服咁睇Running man, 今集好好笑呢! 睇到3點幾4點柏仲又醒啦, 放佢出嚟就係咁搗亂, 邊到都爬邊到都搞, 都唔知點算! 老公5點幾走咗去瞓覺, 作作地病喎! 咁我睇住佢兩個, 跟住心血來潮去試吓化一化妝, 因為下星期Annual Dinner, 又未得閒試吓大包比的化妝品, 於是試吓妝先啦, 搞咗一粒鐘叫做化得唔錯, 影番張相留念先! 之後就叫埋Pizza Hut啦, 自取又8折又快D! 7點幾就有得食, 柏仲又食Pizza又食哂碗粥, 算係咁啦! 沖涼前仲疴埋屎! K.O.哂佢地可以打吓機睇吓電視, 11點幾就瞓了!

<Chok仲!>

 <無聊自拍!>