31/1/16

31/1/16   SUN   COOL

今日一日都好頭痛, 都係晚上瞓得唔好囉! 8點多子元已換好哂衫出嚟, 咁我地都要快手D, 準時出到門口, 揍咗佢地上去我地就去食早餐啦, 然後就去買D家用品, 係欠子元的拖鞋未買到囉, 過年真係好多嘢要買! 終於買好就接埋子元返去啦, 點知上巴士嗰吓先發現佢個八達通冇咗, 漏咗喺畫室, 又要daddy上番去攞, 我就鬧到佢死, 因為實在係好可惡, 成日都係咁! 返到去本來想抺咗房個窗先比仲仲瞓, 點知拉到個簾都跌咗落嚟, 老公又要做工程咁裝番上去, 我要抺住出面先, 但抺得嚟老公又要揍子元去踢波, 冇時間哄仲仲瞓, 咁我12點幾開始哄佢, 但點都唔肯瞓, 我已經皮質純勁升, 最終冇再理佢, 但一話佢又喊好淒涼咁, 真係頂佢唔順! 之後我都冇理佢, 我有我抺嘢算, 之後仲仲又好乖自己玩, 咁咪好囉! 等老公買得飯返嚟食都差不多4點, 真係好餓! 食完老公捉咗仲仲入房瞓, 我就捉子元去做埋D功課仲要執屋摺衫, 又換埋個床單, 做到6點先停落嚟, 個頭仲係好痛又瞓唔到, 柏仲瞓到7點, 因為約咗程生佢地食CoCo, 最終我都要食止痛藥, 咁食咗又真係好快冇事, 不過只係唔想成日靠藥! 過到去Aeon佢地都到, 排隊等入去時子元敏瑩就去玩卡機, 食完就去行吓但都冇買到咩, 打的回家快手沖涼細嗰兩隻即刻瞓覺, 我地就睇電視睇到點幾呢!

30/1/16

30/1/16   SAT   COOL

今日本來要請假架, 但因為老公琴晚返咗, 今日可以照返工啦, 揍咗子元去體操就買早餐返工, 都係做吓自己嘢, 又要整柏仲D相去曬, 再唔交相就比吳老師追! 本來柏仲話唔上嚟, 老公叫我落KFC找佢, 但最終都揍咗仲仲上嚟, 玩咗陣就走啦, 我都係要去買午飯, 仲仲慣咗買完嘢就要我抱, 真係手都軟! 但最終都係唔瞓, 不過落車後肯自己行返去都OK啦! 先打暈咗佢我先食lunch, 然後都係摺衫執吓屋咁啦, 老公揍子元踢兩轉波, 所以直接去嫲嫲屋企等, 仲仲瞓醒後同咗佢落去玩遊樂場, 淨係千秋佢都玩咗好耐, 同老公商量完就決定去買壽司入青衣食, 不過我要order定先再去曼坊攞, 但過程超辛苦! 加上仲仲又扭疴屎, 見到佢就辛苦但仲要比我揹住喎, 終於攞到外賣仲要撘巴士入去, 真係好好好攰先入得到去, 但柏仲仍然扭緊屎, 點都扭唔出, 老公嚟到, 子元沖涼, 嫲嫲就叫老公出去買金油條, 柏仲一用…即去, 疴得出佢都即刻生猛番哂! 食完壽司執吓嘢收拾吓8點幾就返去啦, 子元要睇Ironman, 反而我好眼瞓, 頂唔順11點幾就瞓, 冇理佢地之後點!

29/1/16

29/1/16   FRI   COOL RAIN**

今日都係忙忙亂亂咁出門口啦, 因為柏仲一早醒咗, 又要同埋佢落去, 我都唔同佢換衫啦, 著件褸就行! 子元順利上咗校巴啦, 返上樓同柏仲換衫返學, 撘到8點班車, 但因為落雨又等唔到小巴, 所以過哂8點半先返到去, 程太要自己揍婷婷入去, 好在佢都趕到返工啫! 今日係開生日會, 唔知柏仲玩咗咩呢! 買早餐返到公司都係hea吓唱吓水啦, 午飯後去咗萬寧shopping, 睇中咗D洗頭水呀等等平可以買, 下午都係做吓自己嘢啦, 老細返咗一陣比佢簽吓嘢咁佢就走啦, 明天佢就全家返老家, yeah! 放工即閃返屋企, 執好間屋整埋少少餸先出門口去小童接更, 仲仲同D小朋友玩緊, 當然實有爭架啦, 不過最搞笑係話哥哥放啦要走啦, 佢有扭之餘仲要去放番好D玩具先上車, 真係好可愛! 齊人執好嘢就過去體育館換衫, 但因為更衣室又有幾個姨姨係到, 佢地要求子元去番男更衣室換, 咁我都算啦, 相信子元應該OK GE! 同敏瑩換好先出去同佢會合, 執番好D衫再過去泳池, 睇住佢地入咗去我就返屋企煮飯啦, 呢一個鐘入面做咗好多嘢, 先煮咗飯同蒸蛋, 然後就同仲仲一齊沖咗涼先, 跟住再餵仲仲食咗飯先, 我就再蒸魚炒菜, 佢地上到嚟主力是Fiona同佢地沖涼, 我同程生就開飯啦, 咁3個外星人沖好涼就食飯, 食完佢地就入房玩, 我地就吹吓水啦, 柏仲喺開飯前已經比我K.O.咗, 食到9點幾執碗洗碗抺地, 10點多時突然有人拍門, 原來係老公返嚟呀, 今晚有船就提早咗返, 好嘢! 佢地10點半閃, 我就煮丁麵比老公食佢就沖涼, 子元就已經瞓咗! 今晚有人一齊暖住我半夜真係冇凍醒呢, 嘻嘻!

28/1/16

28/1/16   THU   COLD RAIN

今朝柏仲好好瞓, 所以子元要自己落樓啦, 咁啱對面個婆婆出去, 就叫佢幫吓眼睇住, 我執定嘢等仲仲起身就換衫返學, 都有D趕架但好在冇咩雨, 冇咁狼狽! 返到學校就接手啦, 然後我就買早餐返工啦, 返到公司都係做吓自己嘢, 午飯後都係睇電視, 下午真係要做吓嘢啦, 4點多收到阿媽電話, 話子元仲未返到屋企, 真係涼一涼呀, 打比校車姨姨話正常時間落車, 再打比月希媽, 話子元同月希一齊返上樓, 咁仲驚! 再打比阿媽問時, 就收到管理處打上嚟話子元喺管理處, 原來佢拍門冇人應佢就返咗落去等, 以為婆婆唔喺屋企, 咁最終佢都安全返咗上嚟, 真係嚇到我個月涼哂呀! 叫咗阿媽以後開定門等佢, 唔好再咁嚇我! 放工去美孚街市買埋餸先返去, 堅係貴囉, 魚反而平過超市, 但菜真係貴, 菜心$24/斤, 咁我又買埋明天的餸, 明天唔洗咁趕! 返到去都開始煮飯啦, 由於佢兩個一齊玩就嘈, 所以叫咗子元入嚟幫手煮飯, 婆婆睇住仲仲又OK, 7點幾食得飯, 之後都有點趕, 因為叫子元執玩具時佢就掛住睇電視, 最終都係要我出手, 跟住叫佢同仲仲入去沖住涼先囉, 我快手抺埋個地就接仲仲出嚟抺身食, 食奶瞓覺! 子元話明天冇嘢要執, 就叫佢執好校服刷定牙, 比佢睇陣電視先瞓囉, 我就要摺衫啦, 又要執掂仲仲個書包, 因為我仲未帶揮春呀毛巾呀嗰D, 仲有回條喎, 仲有同老公喺whatsapps傾陣啦, 搞得嚟可以休息時已11點, 叫做可以坐定定睇“你們被包圍了”大結局! 12點瞓覺!

27/1/16

27/1/16   WED   COLD RAIN

今朝真係得我一個頂哂啦, 結果都係要揍仲仲落埋去上校車, 好在冇之前咁凍, 整件太空衣佢包住就算! 返上樓後都冇咩睇幾點有車, 一心諗住8點有但點知架車早咗, 最終我都要撘的士, 因為咩車都趕唔切架啦! 揍咗佢地入去, 但因為太大雨我又冇遮, 最終去咗買遮先撘巴士, 不過返到去都唔係好大雨, 買埋早餐返去食, 都係吹吓水咁, 午飯都係睇吓電視, 但老細返咗嚟阻住哂睇唔得哂, 好在佢都好快走, 下午都係做吓公事又做吓自己嘢, 放工只係買少少嘢返去煮就得啦, 快手煮飯食, 又係8點幾同佢地沖好涼, K.O咗仲仲就搞掂埋子元功課執嘢等, 佢自動話要瞓, 咁我就可以去沖涼摺衫睇電視, 12點到就瞓啦, 今晚暖番D, 上床嗰吓都冇咁凍!

26/1/16

26/1/16   TUE   VERY COLD

今日老公要出差啦, 今晚就得番我一個頂! 朝早凍到隻嘢咁, 一定要同子元換校服, N咁多件衫要著, 等佢著得嚟都天黑, 仲要企喺暖爐前著先掂, 好在仲仲未醒我可以快手揍子元落去, 但上返嚟就見到仲仲擺哂pose咁企喺到, 又唔識著褸, 好在我開哂暖風機唔太凍啫! 快手同佢換校服食奶啦, 老公仲懶洋洋咁未捨得起身, 我就好忙囉, 仲仲飲奶時先梳吓個頭, 又要執好嘢 出門口, 叫做趕得切8點班車, 8:20入到去啱啱好, 不過入學校時老師話婷婷未有醫生紙, 結果被遣返, 坐咗喺校務處等, 本來諗住幫佢揍出去荔枝角等婆婆嚟接, 但都係唔好啦, 我都想hea吓! 今日仲未有mood做正經嘢, 都係做吓自己嘢, 午飯凍冰冰都係要去買飯架啦, 食飽睇吓電視, 下午都係做自己嘢, 都係好凍, 凍到唔願郁! 放工閃人本來想去美孚街市買餸架, 但真係太凍, 都係快手撘巴士返去喺樓下惠康買就算, 但行返去嗰段路又落住雨粉, 真係要跑住返去! 返到去執吓嘢先, 阿媽就落樓去執D藥同開奶茶, 我就準備煮飯嘢, 今晚阿媽喺到食, 咁佢可以睇住佢地我先煮囉, 8點前已食完, 咁佢就返屋企, 我先洗碗抺地, 8點幾同佢兩個沖埋涼, 仲仲食咗奶就瞓我就睇子元功課, 書又冇同佢溫, 好在上學期都就完, 放埋年假先再努力啦! 搞掂佢我先沖涼, 佢自由時間冇話睇電視, 反而係到畫嘢, 估佢唔到呀! 沖好涼陪埋佢上床瞓我又要摺衫啦, 邊摺邊想瞓, 但摺好又想瞓埋電視, 結果又喺梳化瞓咗大半個鐘, 好在有蓋被, 一醒咪馬上執嘢入房瞓囉, 超凍呀我真係蓋住被都凍!