7/1/16

7/1/16   THU   COOL

今朝仲仲唔知係咪發夢, 周身唔自在咁, 又爬上我地床又爬番落去, 總之搞到我6點多就陪佢醒咗! 起身後諗住教佢去廁所, 點知點企都唔疴, 一出番廳就疴, 又一地都係, 馬上叫老公起身抺, 我又要蒸飯又要叫子元起身! 順利出到門口, 返上樓仲要梳頭執嘢, 其實都7:45出門口, 約咗程太喺巴士站等, 但佢話佢已經到咗, 嚇死! 好在我都趕得切啫! 老公今日要出差, 今次只係上廣州但都要3-4日, 咁我又要一拖二啦, 冇法啦為咗$! 揍咗佢地入去, 程太又係要早走, 婷婷本來都冇咩, 但入到學校除鞋時, 佢就開始喊, 真係估佢唔到, 連陳副校都話點解婷婷同柏仲調轉咗, 不過我覺得婷婷都係時候成長, 媽媽狠唔到心就等姨姨嚟啦! 睇吓柏仲出埋課室去廁所我就走, 剛好有巴士返工! 買埋早餐返去食, 今日都唔算好忙, 午飯食食吓大老闆娘就返, 真係食都食得唔自在! 下午老細只係返到樓下攞嘢比佢簽, 都好唔洗見住佢! 放工返屋企啦, 今晚阿媽喺到食埋飯, 因為老公唔喺到食, 佢可能怕我一個搞唔掂又煮又睇仔, 咁襯機佢就再同子元溫吓書, 我就邊揍住柏仲邊煮飯啦, 7點幾都食得架啦, 食完就比佢地玩吓, 8點半沖好涼就K.O.柏仲, 再比D數學子元做我先去沖涼, 今晚都放過佢因為我見婆婆都有同佢溫書, 咁我寧願佢瞓覺啦! 我就睇明珠有套講天才兒童, 都幾好睇架! 之後都係邊做家務邊睇電視, 睇到1點先瞓, 想自己真係好攰馬上瞓到, 因為得我一個瞓嘛, 掛住老公架嘛!