15/7/14

15/7/14   TUE   HOT

今日要揍柏仲入青衣架嘛, 老公以為嫲嫲出嚟, 叫極都唔起身, 其實琴晚柏仲5點醒嗰吓都係我搞咋嘛, 佢都唔知, 都唔明點解咁賴床! 好在出得切門口買得切早餐上車, 揍咗佢地返去就返工啦, 朝早都係做吓自己嘢, 係午飯後先開始做商會D數, 好叻架啦, 已做到12月! 放工馬上返去啦, 因為笨元要去學游水, 6:45集合, 返去執好嘢就出發, 都冇時間同柏仲玩! 去到泳池安頓好佢地阿sir就帶入去, 家長們攞番個證陣間接就走得, 咁我就要比錢入去游啦, 勁傻地冇帶散紙放locker, 好在有個婆婆肯比$5我咋! 換好衫冇咗副眼鏡, 又唔記得哂D路, 唯有問D嬸嬸出口喺邊先上到泳池, 跟住又要再問訓練池喺邊先識去睇吓笨元佢地, 見佢熱身時又掛住搞個泳鏡, 阿sir都忍唔住出手幫佢整完後叫佢唔好再搞! 睇咗佢一陣我就自己去游啦, 可能做得唔夠熱身, 加上太耐冇郁, 真係好攰, 游到手都痛, 同埋人多係游唔到自由式, 所以都係蛙吓就算! 夾夾埋埋都游咗5個來回算係咁啦, 跟住去換番衫再去接子元囉, 阿sir話子元都好驚, 最好笑係話佢一驚就係咁講嘢, 唉…我個口水佬! 本來諗住同佢換好衫就走, 但去番更衣室要經過水簾會濕身, 結果經過咗條職員通道走, 都真係難搞, 下次都係我游完唔換衫住同佢一齊返更衣室換好過! 買埋嘢飲, 返屋企馬上沖涼啦, 柏仲又已經扭瞓, 都冇咩機會理佢, 要笨元練一練珠心算就放佢玩一陣先瞓! 我都要休息, 嗰5個來回已攞我命, 手都斷! 喺梳化瞓到11:45先知醒, 原來老公都瞓埋, 咁捉柏仲起身食埋支奶就齊齊瞓啦!

<冇嘢食唯有食杯!>

 <游水訓練開始!>