20/7/14

20/7/14   SUN   HOT

今日係子元幼稚園畢業典禮, 喊就真係冇, 攰就真係堅攰! 朝早柏仲都算比面, 七點幾先嘈, 起身餵奶後就hea陣然後出去食早餐, 然後兵分兩路, 老公揍子元去理工, 我揍柏仲返屋企, 就咁行返去都真係幾熱吓, 執好嘢吸咗塵先, 柏仲頂唔住係到扭眼瞓, 又要哄咗佢先可以做埋下半場, 老公都好快返嚟, 去攞埋相機架啦, 返嚟一陣柏仲就醒, 叫佢揍住先囉, 我完全未執嘢呢! 跟住叫嫲嫲過嚟時買兩個飯盒比我地就算, 1點幾餵埋奶先出門口, 咁就可以頂到去酒樓先再食! 最終嫲嫲都係話撘的士過去, 去到都係2點左右, 等到接近2點半先入得場, 我地個位真係超前, 呃咗個前位上嚟又唔洗跳舞, 真係衰! 坐定定本來都幾舒服, 因為豬仲瞓咗, 點知開咗場不久佢就醒, 仲要醒足全程, 老公抱佢抱到手軟呀, 期間仲要出去哄佢, 因為人地講嘢佢係到大叫! 子元冇咩嘢係做代表我都知架啦, 個位係前呀但變咗有時睇唔到後面囉, 若佢企嗰D位係排一直行, 就完全睇唔到啦! 出嚟攞證書時子元唔知係咩心情, 板起塊面咁, 最估唔到就係佢喺交隊到負責操喎, 等我仲係咁搵佢企咗去邊, 佢又唔話定我知, 搞到影唔到相! 之後到講嘢嗰D就真係悶, 大家都期待臨尾4場表演, 馬鞍山同海怡分校D舞真係不敢恭維, 我敢講我地青衣班K1跳得仲好! 終於等到我地最後出場啦, 真係超正, 又型又IN, 原來子元初頭個中間位係負責打鼓, 唔怪得佢hea啦, 其他係彈結他好玩咁多, chok到佢呢! 接番佢地後影吓相咁啦, 要佢地企好影相真係冇可能, 終於上咗旅遊巴可以返青衣去酒樓啦, 坐好位後就先餵柏仲, 佢都瞓咗陣GE, 開席先嚟醒, 子元當然搗亂啦, 成班小朋友一齊就顛架啦! Apple安排好小朋友點樣迎賓啦, 奶奶就噯吓柏仲咁啦, 終於老師們都嚟啦, 可以開始啦, 我覺得都係喺忙亂中渡過咋, 睇吓片, 大家講吓嘢咁, 又要控制吓D小朋友, 食方面真係唔擔心, 反而怕子元食得太多嘔咋! 食到10點左右就開始散啦, 我地都要走啦, 返得去仲要沖涼食奶, 講咗幾句都走啦, 我一袋二袋好似走難咁, 梗係打的啦, 笨元又激動得滯已經咳架啦, 為免再犯一次同樣錯誤, 我要佢全程攞住個膠袋, 好在都冇事! 返到去沖好涼就打發佢瞓, 我終於可以沖涼, 仲要餵柏仲食奶, 執埋D手尾, 差不多1點先瞓!

<全部畢業生!>

 <子元領畢業證書...的呆樣!>

 <交通安全隊造型!>

 <花式手號操!>

 <好型呀!>

 <結他造型一流!>

 

 <End post!>

 <烈火戰車look!>

 <混亂合照!>

 

 

 <與老師們合照!>

 <難得影到全家幅!>