3/7/14

3/7/14   THU   HOT

今日如常咁返學啦, 老公諗住早D落樓撘早一班42入嫲嫲到, 點知美孚出面炒車, 基本上完全唔郁得, 我地都醒架啦喺油站就落車行過去, 打比程太問改唔改撘地鐵, 咁啱架41A到喎, 又見呢邊終於郁郁地, 咪博一博囉, 都好唔洗行咁遠! 返工時都唔敢撘巴士, 因為塞到上葵涌道, 於是同程太一齊撘地鐵囉, 買埋早餐返去, 都幾多嘢做, 公私兩事都多, 好快又食lunch, 下午老細返咗嚟, 係咁吹水阻住哂, 想同笨元出吓英文卷都唔得, 放工返去時其實都唔多舒服架啦, 個胃頂住頂住, 返到去仲肚痛, 老公, 笨元同豬仲都瞓咗, 但我手都未洗完豬仲就醒, 奶又唔願食, 又勁嗲喎, 再比佢飲奶佢就嘔啦, 有得嘔都好過谷住! 清潔完就食飯啦, 笨元醒咗都唔願食, 玩都唔願玩就知大件事, 搞掂就諗住打的返去, 點知好嘔唔嘔, 上到的士先嚟嘔, 真係比佢玩死, 我諗個的士司機都係咁諗! 好在佢個身都接住咗大部份, 但都要賠錢比人囉, 好蝕! 幾經辛苦返到屋企好好清潔完佢, 到我沖涼前到我嘔囉, 今日真係嘔吐日咩! 終於大家都洗乾淨哂, 老公又要出去銀行入數, 得我一個頂, 又要搞掂笨元D嘢, 又要搞掂柏仲, 自己又周身骨痛, 真係超辛苦! 最終K.O.咗笨元, 但到柏仲就唔肯瞓, 我噯咗好耐都唔得, 終於等到daddy 沖好涼, 一陣就K.O. 佢, 我地都好早就瞓, 食咗藥好攰, 但柏仲完全唔放過我地, 每兩個鐘醒一次, 搞到我兩個冇覺好瞓, 都唔知佢扭咩!