5/7/14

5/7/14   SAT   HOT

今朝7點幾局住起咗身, 因為本來諗住見柏仲醒咗就抱佢上大床玩陣先起身, 點知一開張被就知出事, 爆石爆到背脊都係, 老公即刻開水, 我就小心咁同佢除好衫抺咗先再放落水過吓啦! 搞掂就食埋奶我先換衫梳洗囉! 笨元都起埋身, 全部搞掂就去樓下食個早餐再撘的士過荔天, 敏瑩同靜瑜已經到咗, 傾咗一陣就開咪集隊, 3個都分開課室, 好事呢! 家長們就上禮堂悶, 唔知lift喺邊唯有抱住柏仲再抬車上去, 不過要分組坐, 唯有各有各, 好在同程生佢地前後組咁就可以前後坐啦, 仲傾到偈! 柏仲開頭瞓咗半個鐘, 之後就周圍搞搞震, 坐咗個幾鐘佢先開始大聲叫, 都算係咁啦, 老公推咗佢出去行, 原來辦咗大事, 咪換埋片囉, 跟住見某D家長已走去訂校車買書, 我地又偷走埋出去囉, 因為都講到尾聲, 係咁開票訂咗校車啦, 買埋書等等, 但程太佢地又未搞掂所以咪等埋佢地先囉, 所以落到去課室接笨元時佢差不多喺最後一個, 都有少少埋怨, 但一出課室見到敏瑩就冇嘢, 仲過份咗唔識停, 入去訂校服時又係控制唔到對手周圍搞, 呢樣真係唔識點教, 佢而家衰到會“妙”我, 訂好校服後咪出去同佢講數囉, 佢真係想迫到我顛! 大家都搞掂哂就去Aeon嗰邊食午飯, 邊間有位去邊間, 柏仲食咗3安又罷食, 比烏冬佢又唔係好食喎, 最終等老公食完就打暈佢, 終於可以慢慢食吓嘢, 到2點左右各自散水啦, 我地都打的返去, 抖一陣老公又要揍笨元去畫班, 我就打掃啦, 柏仲喺學行車到跟住我周屋行, 我拖地拖到邊佢就跟到邊, 其實好可愛, 咁搞掂清潔同佢玩咗就打暈佢啦, 到佢瞓醒先食奶, 老公就買材料返嚟整炒飯! 之後都係睇吓電視咁啦, 9點半就捉佢瞓啦, 我都唔夜瞓, 餵埋柏仲就瞓啦, 但老公話要睇波, 唔理佢啦!

<學吓企啦!>

 <企得好開心!>

 <被玩中的DADDY!>