8/7/14

8/7/14   TUE   HOT

今日依然要揍柏仲入青衣, 真係好熱, 揍到子元返學校我都已經濕哂, 仲要上埋嫲嫲到, 柏仲又瞓咗, 食咗藥係攰D, 去到嫲嫲到我都換一換衫先得, 跟住就返工買早餐啦, 朝早都係hea 吓咁啦, 午飯要去買飯呀, 食咗米線咋! 下午老細冇返過嚟, 完全hea過, 係咁上網吹水睇嘢等等, 放工就返青衣啦, 返到去柏仲瞓咗, 笨元睇緊機, 我見都考哂試就由得佢, 點知食嘢時就衰衰咁啦, 老公叫佢去房瞓陣佢又唔肯, 但明明已經勁攰, 最終咪換嚟比人鬧一餐, 喊一餐囉, 真係令人好煩, 只可以諗嚟緊小學, 個模式又唔同咗, 希望佢有改善啦! 上到巴士站後發現班車遲開, 咁老公又話要去銀行, 就不如撘42A, 喺巴士隻笨元咪又係要瞓, 搞到我落車後又要轉van 又要一拖二咁, 返到去仲要搞隻周身屎, 兩個細沖好涼老公都返到嚟, 咁等佢都沖埋先, 我就可以悠閒D咁沖個涼休息吓! 叫笨元收拾好書包校服, 講埋故事就可以K.O. 佢, 然後再餵埋柏仲, 終於完成哂真係可以休息!