6/7/14

6/7/14   SUN   HOT*

今朝老公好似6點幾先走入嚟瞓, 不過佢約咗奶奶10點半喺沙田, 因為大包喺馬會有食自助餐D卷, 但唔夠咁多個人, 所以留吓我地1大2小食西北風! 柏仲同子元都8點幾醒咗, 咁我都要起身服侍兩位主人, 梳洗完餵埋柏仲就出去麥當當食早餐, 我排隊時柏仲喺位扭計其實子元都好乖拍吓佢心口, 但佢又好鬼大力呢, 好在附近有位阿太教吓子元, 之後吹咗陣水, 原來佢囡囡都係入咗荔天, 咁又識多位同學仔啦! 食完去惠康買埋嘢就撘巴士返去! 想餵柏仲食粥佢又扭瞓, 咁就由得佢瞓, 我同笨元睇電視, 然後到咁上吓就煮午餐, 柏仲又醒咗, 咪餵咗佢我同子元先再食囉, 食完要笨元做埋珠心算先, 唔係冇得睇running men, 4點多打暈咗柏仲諗住佢點都瞓番一個鐘啦, 點知半個鐘左右又醒咗, 老公就5點左右先返嚟, 佢實話D嘢唔好食架, 又話好攰, 同D仔喺房所謂玩最終咪又係瞓咗, 睇完一輪電視子元又掛住玩唔改正埋D珠心算, 柏仲夠鐘食奶又唔食, 大嗰個又喺房掛住瞓, 最終我爆發了, 走咗出走廊發顛, 大叫到隔離屋想走出嚟睇吓咩事時我就走番入屋, 不過仲未顛完, 笨元仲醒水過DADDY, 最終喊完平伏番D啦, 老公識得死出嚟安慰吓囉, 幫手哄豬仲食奶, 然後等我地沖好涼就叫外賣食, 又主動同柏仲玩, 唔洗我同時睇兩個囉! 9點幾K.O.咗笨元, hea到12點叫柏仲食奶, 期間Barry 上咗嚟攞嘢比老公, 一齊睇咗陣電視咁囉, 1點左右搞掂D嘢就瞓啦!

 <係咪好驚?>