31/7/15

31/7/15   FRI   HOT

今日子元學童保健健康檢查, 由於嫲嫲朝早有嘢做, 又廢事佢專登走出嚟睇住仲仲, 所以我一揍二去老遠的慈雲山健康院, 其實都幾吃力架! 時間關係我食唔切早餐, 子元就可以邊行邊食蛋糕, 趕到6號但趕唔到架40號, 結果等咗3個字先再有車, 去到黃大仙好在勁近轉到小巴又到健康院門口, 否則的住隻仲都幾吃力吓! 去到健康院剛9點半, 登記後度高磅重, 125.9CM高, 27.89KG重! 跟住就係驗眼驗耳, 全部都正常啦, 最後見醫生, 都係好求奇咁摸吓望吓, 問吓你有冇嘢想問咁囉, 半個鐘搞掂哂所有嘢走得, 但因為老公未見完工, 所以我地唯有等, 誤打誤撞行咗去慈雲山中心, 找到架車去又一城, 咁咪撘嗰架囉, 先去找地方食個早餐先, 已經超餓, 跟住去咗HNM望吓, 最後去咗反斗城, 等老公走得都11點幾, 嫲嫲已搞掂佢D嘢返咗屋企等我地, 咁咪撘MTR返去囉, 找到荃新天地先有一點幾嗰場, 於是分頭行事, 老公同子元去買飛, 我揍仲仲去嫲嫲到, 再去戲院會合, 時間剛剛好! 蟻俠都真係幾好睇, 唔算太難明, 睇足兩個鐘, 睇完去咗食咖哩, 都幾好味喎! 食完去埋銀行就行過去愉景新城, 因為子元要玩嗰個咩鬼工程師, 但由於時間關係, 只比佢玩咗個吹氣滑梯, 玩幾分鐘就收你$50, 收錢嗰個真係抵! 差不多5點, 又要分頭行事, 老公去揍番柏仲, 我就揍子元去小童合唱團! 然後又要返去攞游水嘢, 揍咗佢去游水又要去買米線, 老公已經揍咗仲仲返去, 隻仲瞓埋添, 咁我地就食嘢先, 8點去接番子元回來, 沖完涼到佢食嘢, 柏仲決定瞓唔食晚餐, 咁由得佢啦! 10點趕笨元去瞓, 我地睇多陣新聞都瞓啦, 但半夜4點幾柏仲又醒, 因為條片又濕透咗所以醒, 換過哂佢又唔肯再瞓, 係要我中佢先肯瞓番, 唔係咁我就真係冇得瞓!

 

 

 

 

30/7/15

30/7/15   THU   HOT

今日都係如常咁閒閒啦, 老公揍子元去乒乓球, 所以我就揍柏仲入青衣, 時間尚早食埋早餐先返工啦! 返到嚟都係做吓自己嘢又做吓公事咁啦, 之後都係悶悶悶囉, 午飯後睇電視啦, 吹水上網都冇咁多嘢睇啦, 好在有人提D IQ題出嚟玩咋, 等到放工就去接笨元啦, 然後直接去愉景新城, 子元一落車就話急V, 好在而家都忍到啫! 等佢去完就直接去食嘢啦, 老公話食Outback喎, 不過我覺得好似已經冇以前咁好食, 食完本來諗住去比子元玩嗰個咩工程師, 但原來收7點, 冇辦法啦, 好在佢有嗰D卡可以去玩吓, 仲仲就遊吓反斗城囉! 玩到八點幾返屋企啦, share的士咁返去抵好多, 100蚊搞掂! 返到去沖涼食奶瞓覺, 仲仲半夜醒咗好幾次, 真係比佢玩死!

 

 

 

29/7/15

29/7/15   WED   HOT

今朝等嫲嫲出嚟, 本來唔洗咁早起身, 但晨早比柏仲突圍到上床, 所以都瞓唔得晏! 嫲嫲嚟到就出門口, 佢都同兩隻嘢一齊去食早餐, 我就同老公去到長沙灣先食, 跟住佢就去見工, 我就返工啦! 朝早都係做自己嘢吹吓水咁, 午飯後睇吓電視, 下午sales返咗咪要開吓會囉, 都係吹埋D無聊水, 悶死我! 開完都就5點, hea到夠鐘就返屋企, 去咗美心訂咗tsumtsum個月餅, 8月尾先有得攞! 返到去仲仲瞓緊, 我就沖咗涼先, 沖完涼出嚟仲係醒咗, 但仲呆緊, 食飯又衰, 我都算壓得住把火架啦, 係等老公食完就叫佢餵埋嗰兩啖, 我先再去食飯囉! 之後都冇咩心機做嘢, 只係吸塵抺地就算! 9點到捉仲仲去瞓, 子元就玩到10點先瞓, 我地就睇吓電視hea吓咁啦! 12點到就瞓, 入房照樣見到仲仲瞓咗喺老公個位啦, 佢愈來愈鐘意爬上嚟瞓, 到咗呢個時期就係咁!

28/7/15

28/7/15   TUE   HOT

今日悶悶地過啦, 朝早我負責揍仲仲入青衣, 老公就揍子元去乒乓球, 柏仲撘巴士好有一套, 但坐坐吓又要我抱囉! 入去放低佢就再去攞之前換嗰隻復仇者公仔, 換到笨元想要的鷹眼呢! 返到公司食個早餐, 都係hea吓咁啦, 午飯後吹吓水睇吓電視咁, 下午又係冇咩做, 琴晚又比笨元嘈醒, 本身又瞓得唔好, 所以個人都吽吽地! 吽到放工就過美孚, 老公佢地出嚟食壽司喎, 我換埋另外兩隻復仇者, 都係未有的款, 子元見到幾開心呀! 我去到叫定嘢食等佢地嚟到就有得食啦, 柏仲食食吓又搞家啦, 所以叫定都係好, 快手食完返屋企, 沖好涼佢地咪玩住先囉, 柏仲先好笑, 見我沖好涼就叫我沖奶, 因為平時我沖好涼就係食奶, 但嗰時8點幾咋嘛, 佢話瞓咪照比佢囉, 食完就瞓啦! 咁我地就好自在囉, 冇咗個顛佬喺到搞搞震, 教吓子元穿鞋帶, 佢初頭都唔願學, 但試咗幾次成功咗又有D心機! 9點幾瞓, 我地就hea吓睇吓電視啦, 12點多瞓覺! 但子元3點幾又嘈醒我, 今次係我瞓之前睇完佢順手得滯lock咗佢房門, 所以佢半夜去廁所出唔到嚟, 好在我又聽到佢叫喎!

27/7/15

27/7/15   MON   HOT+

琴晚瞓得唔好, 深層睡眠唔到咁, 所以今朝好攰, 還要揍仲仲入青衣, 因為老公仲病病地, 我問佢係咪揍到子元去學嘢, 咁子元又起咗身我先出門口囉! 架42要9點先入到青衣, 所以我都要快手仆返工啦, 買埋早餐返去食! 朝早都係寫吓日記做吓自己嘢啦, 咁都已經一朝架啦! 午飯要去買嘢食, 但之前滯親仲未回復胃口, 只係食咗D米粉咋! 下午都係hea啦, 又做吓自己嘢咁, 真係等時間過, 放工直接返屋企, 因為要抬番D書返去, 買埋包書膠要包埋D書! 返到去, 咩都唔順眼咁, 見到間屋亂七八糟, 我個人又攰, 又好似好多嘢未做咁, 就開始keep住燥嗰個狀態啦! 望到咩都唔順眼, 去咗沖涼時喺個廁所喊喎, 我諗我真係谷得太耐, 我個阿愁真係要出吓嚟! 食飯前我仲吸埋塵先, 咁食完飯就咁抺地就OK! 胃口仲未恢復番, 所以都係好求奇咁食吓就算, 飯後都仲係唔多好心情, 老公8點幾就同子元去咗踢波, 嫲嫲又閃咗, 得番我同柏仲好似心情好番D, 或者人太多真係太嘈, 我都係適合靜靜地一個人! 9點仲仲自己叫食奶咪餵埋佢囉, 放佢入房後關實門, 佢走唔到出嚟, 最多只會爬上我地床瞓! 9點幾兩父子返嚟, 我就係到準備包子元D書, 不過只係包咗中文咋, 好攰, 咩都唔想做! 打機到11點幾12點, 入房瞓, 搬番柏仲上BB床, 本來都冇咩, 但講講吓開始呻陸生唔合作唔自動自覺等等等好多好多缺點, 跟住就講到喊啦, 阿愁又走出嚟啦! 喊咗一輪喊到個人醒哂, 等條友氹又唔識做, 咪中佢囉, 帶住阿愁我實瞓唔到架, 叫做抒發咗瞓到啦, 又到笨元走入嚟話唔見咗一隻tsumtsum, 但我都冇理佢, 打發咗佢走!