7/7/15

7/7/15   TUE   HOT

今日子元都係唔洗返學, 所以我可以瞓D! 柏仲6點幾醒咗架啦, 係我冇理佢啫, 7點幾起身, 子元已經醒咗喺到睇電視, 唔洗返學就由得佢啦, 今朝諗住同佢去睇一睇葉醫生, 始終琴晚都咳得勁, 打咗電話去醫院知葉醫生有應診, 就馬上出發啦! 落到巴士站有42, 順利9點左右去到, 馬上有得睇, 攞埋藥閃人都係9點幾, 返到公司附近食埋早餐, 老公嚟接手揍番子元, 我就返工啦, 但竟然冇放低D藥比佢, 所以老公又要帶埋兩隻嘢上嚟攞番D藥先, 同事們又可以玩吓柏仲啦! 朝早都係如常地hea啦, 午飯後本來諗住去759買吓餅, 但實在太長龍, 都係要放棄! 下午老細返咗嚟一陣啫, 都唔算阻住啦, 所以都係做吓自己嘢, 寫吓柏仲的成長記錄咁啦! 放工直接返屋企, 3隻嘢瞓哂, 咁我咪沖涼先囉, 沖完出嚟子元醒咗, 佢坐喺梳化睇睇吓電視瞓咗囉, 好搞笑! 跟住佢叫我陪佢玩, 但我話我要煮飯, 問佢一唔一齊煮, 佢不知幾雀躍, 都係比佢玩吓, 咁今餐又冇咩煮咪比佢試吓囉, 煮咗一陣柏仲醒咗, 走出嚟叫媽媽, 可愛到呢! 咁子元又去咗同個細佬私片啦, 兩兄弟一同場就成日大叫打架咁, 查實都令人變炆! 開飯食飯啦, 食完老公出咗去買六合彩, 我就叫子元吸塵同裝拖地水, 然後睇住柏仲, 咁我就做埋D手尾! 之後陪佢地玩一陣就打發佢地去瞓覺啦, 咁我地又可以睇電視, 由於到11點幾時又肚餓, 最終老公蒸咗燒賣, 又整埋D涼粉嚟宵夜先瞓, 肥死!