30/9/15

30/9/15   WED   HOT

返埋今日又放假, 今個星期邊有心機做嘢呀! 朝早要拖笨元起身, 今日咩鬼運動全接觸, 頭輪得一至三年級返咋, 所以遲咗就冇車撘! 揍咗佢又要準備入嫲嫲到啦, 都係食埋早餐就返工啦, 朝早都係做吓公事又做吓自己嘢啦, 午飯後就去咗銀行, 順手去萬寧換埋禮卷, 又再比我找到平的濕紙巾喎, 梗係點都要抬啦, 下午老細返咗一陣, 侍候完佢又可以做自己嘢啦, 放工就直接返屋企, 嫲嫲揍咗仲仲出來, 阿媽又揍咗子元過來, 返到去等我收拾吓, 老公又上咗巴士返來, 就出去大家樂會合, 今晚去食大家樂打邊爐, 都好味呀! 食完慢慢行返去, 消化吓, 返到去又係沖涼瞓覺啦, 不過子元又未咁早肯瞓, 明天放假就由得佢!

 

29/9/15

29/9/15   TUE   HOT

 

放咗幾日假, 又要返工返學啦, 今日都算夠精神啦, 柏仲齊齊鬧鐘響就起身啦, 送咗笨元返學又要返上樓做家務, 摺得衫嚟又趕唔切車, 咁就撘下一架算, 不過下一班就食唔切早餐, 但奶奶已經買咗, 咁就攞番公司食啦! 今朝努力寫哂D日記, 老細淨係返嚟食咗飯就走, 仲要我去幫佢買飯啦, 不過都好, 喺我地開飯前閃了, 可以自在吓! 下午都係做吓公事又做吓自己嘢啦, 放工去接笨元啦, 阿媽話佢未做哂功課架, 不過我返得去佢都做哂啦, 算係咁啦, 成日掛住瞓, 豬嚟架! 返到屋企照日常行程咁做嘢啦, 我都比佢玩多過做啦, 係要找假期同佢溫吓書囉, 成日以為做哂功課就算! 老公返來差不多食得飯, 我發覺除非食肉餅嗰D, 否則留番放工買平餸係仲抵架! 食完飯做起哂嘢已經9點, K.O.咗柏仲先, 跟手睇子元功課, 有嘢又係做錯哂囉, 有D錯完都唔知自己錯咩先火呀, 玩就識玩! 教咗佢一輪架啦, 希望佢唔好再錯D無謂嘢! 等佢瞓埋覺到我hea啦, 今晚冇等老公就瞓, 佢要update部手機呢!

 

 

28/9/15

28/9/15   MON   HOT

柏仲今朝好比面, 8點幾才叫醒我, 醒咗一定要出房, 要我開埋奶, 咁我都比佢整醒咗啦, 子元同老公都起咗身, 咁就諗不如找個地方去吓街啦, 先去板板到食早餐, 問子元想去邊, 佢提意話去Mega Box, 咁我地又諗唔到去邊於是就採納佢建議, 撘40號過去超快, 先喺德福行吓, 老公買咗克勤隻CD, 跟住去二期再行吓, 睇夠玩具就行去Mega Box啦, 由下層慢慢向上行, 教識子元唔係吓吓都就佢睇玩具先架, 咁佢都聽教, 睇完IKEA上到5樓有佢D LEGO嘢啦, 就去玩同換禮物啦, 跟住就再去童真天地嗰層行, 柏仲係時候午睡, 等佢瞓醒都3點幾, 食咗D嘢就去反斗城, 玩到5點幾才走呢, 真係玩哂睇哂咁多嘢, 好耐未行過咁耐, 連子元都叫攰, 所以行返去德福時就買咗豆漿白糖糕佢食囉, 撘地鐵返長沙灣去阿媽到做節, 都係食餐飯玩吓啦, 8點幾回家啦, K.O.哂佢兩個我地可以休息吓, 叫老公執吓嘢, 佢近來都好咗D, 叫佢都肯郁! 12點多都瞓啦, 呢3日玩夠皮啦!

 

 

 

 

 

 

 

 

27/9/15

27/9/15   SUN   HOT

今朝明明唔洗學嘢架嘛, 柏仲你可以瞓晏D喎, 又係要嘈醒我, 真係好慘呀, 大家輪流咁睇住佢, 叫做hea到9點幾先開動, 老公煮早餐啦, 食完抖陣就要睇吓子元D功課係咪真係做完, 本來想叫佢溫埋默書先, 但佢又唔願郁我又唔願郁, 老公同柏仲又瞓咗, 嗰段記憶冇哂時間概念, 出番廳再望鐘時已2點幾, 咁咪睇吓電視囉, 我只想hea吓, 頭又痛喎食咗藥咁好D! 等仲仲瞓醒就執吓嘢啦, 因為今晚入青衣食飯, 然後去東北公園玩, 執得嘢嚟入得去都已經5點幾, 子元入親去實係失控實係要我鬧, 柏仲食飯又食到衰衰咁, 可能我又攰攰地, 所以都燥底呀! 最終都係要我鬧穫金GE先走得GE! 撘巴士去青衣北公園會合, 搵到個靚位settle好, 今晚呢到始於係海邊有空曠D, 天氣又涼D, 地方又好跑D, 所以氣氛好似都好D! 唔係因為公園關燈都未必會走住, 除咗基本腳敏瑩同子慧外, 仲吹咗雞睇吓康傑的小朋友會否出來, 咁都有幾個GE! 11點幾執嘢, 我同柏仲跟程生車, 老公同子元跟Gloria車, 返到去沖涼執嘢等等, 由於老公同子元早我好多返到, 所以K.O.好柏仲就叫老公執好D嘢, 我就沖涼啦, 吃埋宵夜都2點幾3點先瞓, 希望柏仲明天瞓晏D!

 

 

 

 

 

 

 

 

 

26/9/15

26/9/15   SAT   HOT RAIN

今朝柏仲又係一早起身啦, 由於今晚會玩得夜, 所以改咗子元今朝去畫班, 咁我返工前就帶佢過去啦, 然後就買粥返公司食, 都係hea吓啦, 完全唔想做嘢, 嚟緊又放假啦, 12點幾老公揍咗仲仲嚟玩, 佢就帶子元去踢波, 我就同柏仲返屋企, 因為前晚淨咗盒飯, 咁咪唔買嘢食囉, 諗住柏仲快D返去瞓, 點知條友喺巴士冇瞓喎, 返到去發瘟, 同佢沖咗涼諗住要佢瞓啦, 佢又扭要奶, 咁飲完奶又係顛, 要我抱住佢, 咁抱陣放番佢喺床, 陪住佢一陣叫瞓咗, 終於可以整熱飯食, 想瞓又唔係好瞓到! 老公同子元3點幾返咗嚟, 我終於頂唔住去咗瞓啦, 不過係去子元張床瞓, 子元5點幾入咗嚟叫我幾次, 但我超唔起, 最終拖到差不多6點, 佢話佢揍唔掂柏仲啦, 咁都要起身! 因為約咗同學仔們先去晚飯再去荔枝角公園玩, 推咗一堆嘢出去呀, 真係好誇張, 先去板板到晚飯, 再一齊行過去, 行到去天幕劇場嗰邊終於找到個比較平的草地又喺行人路邊, settle咗一段時間先叫做搞掂, 細路們梗係玩咗先, 一於少理, 我地大人就食啦吹水啦睇住D細路啦, 不過氣氛一般啦, 10點幾老公先揍仲仲返去, 因為佢眼瞓啦, 我就繼續陪子元囉, 到11點多就開始執嘢, 張大餐枱交比程生放喺車, 明晚繼續用, 我地就各自行返去啦! 沖好涼瞓都1點多囉, 好攰!