14/10/15

14/10/15   WED   WARM

今日係結婚周年紀念, 不過我就好忙要開會, 老公就病咗請病假, 帶住兩隻嘢又唔會出去架啦, 所以都決定買正嘢返嚟食, 都食咗1K呀, 不過睇番原來上年冇慶祝, 因為我病咗, 所以今次食埋啦, 哈哈! 朝早如常咁揍笨元返學啦, 跟住就揍埋柏仲入去, 我就返工啦, 朝早都係做吓自己嘢, 然後午飯去買咗麥當勞, 睇埋電視就出發過去商會啦, 仲先喺city super買埋刺身先上去, 其實3點多都上到去架啦, 但已經有人到咗, 咁咪開工囉, 派好文件開埋張票咁, 3點半正式開特別會議, 唉…都係自己衰咗, 冇為意到衛生署個會, 不過都盡量去補救番啦, 都係要通知會員, 出問卷調查, 總之大家就好嘈啦, 睇住個鐘, 講到5:30先有人話完場, 咁我都借D人執定嘢閃啦, 好在我整得嘢嚟D人都走, 咁都冇咁礙眼! 行去撘948, 等咗一陣先有車架啦, 不過架車真係超快, 6:10已經返到青衣, 去接埋柏仲就返屋企, 攞住好多嘢都幾狼狽! 返到去先沖涼啦, 老公都準備緊晚餐架啦, 先比兩隻細食咗烏冬先, 到我地食刺身時柏仲又走埋嚟搞事, 比我丙到佢喊…佢坐咗喺梳化唔開心, 其實好搞笑囉個樣, 唔洗一陣咪又過嚟搞過! 食完哂刺身生蠔, 有D飽, 所以牛扒等柏仲瞓咗先再食, 期間都係幫子元睇功課溫習啦, 柏仲瞓咗就叫老公可以煎牛扒啦, 真係好大塊的和牛, 笨元食到好開心, 冇話吞唔到囉! 最後食甜品雪芭, 就趕佢去瞓囉! 我就要洗碗抺地, 10點幾再慢慢坐定食埋我個柚子雪芭, 想好好打陣機, 已經眼瞓! 咁就過咗個結婚周年啦!