2/10/15

2/10/15   FRI   HOT RAIN

今日都係如常咁返工返學啦, 但一朝早醒咗時柏仲又燒番, 我又肚痛, 子元又流鼻血, 完全係亂哂大龍, 都係要大叫老公出嚟幫拖, 光速梳洗換衫出門口, 趕得切校車呀! 返上樓我都冇摺衫啦, 夠鐘就出門入青衣, 柏仲食咗退燒藥吽吽地, 全程車都冇咩出聲呀陰公豬, 不過入到去又冇咩事啦喎, 食完早餐就返工啦! 朝早都係做吓自己嘢, lunch去咗買飯啦, 食完就睇奇皇后, 下午老細返咗嚟一陣, 佢走咗就開心囉, 因為佢又返老家一個月啦, 哈哈! 下午開始又自由啦, 放工第一時間返屋企啦, 返到去柏仲瞓緊, 咁我就整吓餸先啦, 不一會柏仲醒咗, 要我抱住佢喎, 樹熊咁痴住唔放, 我話要出去揍哥哥啦佢都係唔肯, 最終我話出去撞婷婷返嚟佢先好D, 但到我真係出咗門口, 醒起冇攞遮想返轉頭時, 已聽到柏仲喊到隻嘢咁, 嫲嫲都話未見過佢喊到咁呢, 揍咗佢地去泳池就返屋企啦, 本來柏仲好可憐咁伏住喺嫲嫲到架, 但婷婷撩佢就肯落地啦, 嫲嫲就閃啦, 我就開始煮飯, 程生就睇住佢兩個, 不過都唔係好睇得住, 柏仲又搞事呢, 最好笑係我鬧緊柏仲時, 婷婷已經我鬧佢, 低哂頭行咗去梳化坐! 程生落咗去接佢地時我一揍二仲要煮飯, 咁就攞D通粉出嚟比佢兩個食住先, 叫做控制到, 可以煮埋個飯, 順利準時開飯, 今日子慧媽有嘢做, 變咗爸爸上嚟, 咁都好快手食哂飯, 先K.O.咗柏仲, 洗好碗抺好地就沖涼, Gloria嚟埋就食雪糕, 細路玩到11點多先肯走, 老公出咗去過數比我找卡數, 返嚟先沖涼呢, 我就好似仲好忙好多嘢執咁, 終於可以坐下休息都差不多想瞓!