9/10/15

9/10/15   FRI   HOT

今朝又係要一早起身揍仔啦, 揍咗子元上校車, 柏仲返上樓食埋奶, 我就摺埋衫咁, 就撘巴士入去搵嫲嫲啦, 然後我就返工啦, 今日都係冇咩嘢做, 吹吓水做吓自己嘢! 午飯要出去買嘛, 咁之前喺網又見到今日原來係免費寄信日喎, 於是就整咗封信寄比子元, 睇佢明天收到會點! 買埋午餐就返去食啦, 都係hea吓睇吓電視啦, 下午又係無無聊咁啦, 等放工就返屋企, 執好子元游水D嘢就去小童接佢地啦, 約咗程太喺體育館會合, 佢攞番敏瑩D嘢返屋企, 我就抬番子元D嘢返屋企, 跟手都係煮飯啦, 但個瓦煲都係一用就漏水, 我投降啦, 我用飯煲啦! 叫咗老公落去買嘢, 柏仲又痴身, 要我揹住佢嚟煮飯, 幾經辛苦煮起餐飯快手沖咗個涼, 剛好佢地就上到嚟, 咁又係混亂沖涼食飯時間, 食完就K.O.柏仲, 然後執碗洗碗抺地啦! 柏仲唔知做咩, 醒咗兩次, 到第三次大喊喎, 原來嘔到一面一床都係, 仲要係我地張床喎, 頂! 我同老公都好夾咁去搞番掂架啦, 處理嘔呢方面, 真係唔好彩地要認吓叻囉, 沖好身換好衫, 老公洗被洗衫, 我就換埋床單, 等佢地走咗就放番柏仲入房瞓啦! 我地兩個食咗藥, 都等唔到張被洗埋先瞓, 好淒涼咁攞子元張單人被打橫蓋就算啦!