31/7/16

31/7/16   SUN   HOT

今朝如常咁學畫啦, 但佢兩個都係好早就起咗身, 揍咗子元去畫室就去食早餐, 然後再上婆婆到hea啦, 接番子元就返屋企, 食完藥全部瞓吓覺先, 我就執吓屋, 其實本來諗住洗吓廁所, 但見個五筒櫃又比老公放到滿哂, 於是都係執咗呢個先, 差不多兩點叫老公起身執番佢嗰D, 不一會仲仲都醒, 咁搞掂哂就出去食午飯, 見鳳城開咗咪試吓囉, 大快活咁食一餐都唔平! 食完就出發去街, 去咗九龍灣, 今次唔行mega box, 行吓德福, 子元買番個水樽啦, 我地就買咗燒賣! 過番一期有VR遊戲試玩, 又係要用分換, 咪換一次比子元玩囉! 玩完就去咗試間新嘢叫抹茶館, 都幾好食又夠新奇! 食完就返屋企啦, 仲仲又要玩火車, 但時間關係唔比佢玩咁耐, 又要瞓覺啦, 我地就睇埋電視先囉, 子元又要敷吓mask咁!

30/7/16

30/7/16   SAT   HOT

今日是長周呀, 好在老公唔洗出差, 因為子元要去睇醫生, 先放低仲仲喺婆婆到, 跟住才帶子元去見葉醫生, 再返屋企瞓餐覺先, 夠鐘放工先嚟接我, 然後再去接番仲仲, 跟住去咗食KFC, 再出咗旺角, 因為老公要去訂波衫, 兩隻細就睇LEGO, 最終都買咗比佢地, 仲仲嗰架火車抵買喎, 買完就去咗行新世紀, 因為車泊咗喺嗰到嘛, 老公買咗條褲, 見唔夠泊車優惠, 就再買埋部吸塵機啦, 都要買好耐架啦, 折完6百多咋喎, 愈來愈平, 早半年睇要差不多8百喎! 去咗遊樂場玩陣, 見有攤位同坐船仔喎, 咁反正買咗嘢又唔多人排咪玩吓囉, 仲仲玩船仔玩得幾叻呀! 玩完再行多陣就走啦, 返長沙灣食晚餐就回家! 返去沖完涼仲仲第一時間要砌LEGO, 咪比佢砌埋先瞓囉!

 

 

 

 

 

 

 

 

29/7/16

29/7/16   FRI   HOT

今日老公揍哂兩隻入去, 咁我可以慢慢搞掂先返工啦, 返到去唔太忙GE, 開個會咁都係hea吓啦, 午飯後都係打吓機睇吓電視咁, 下午老細返咗嚟, 但都係捉住嗰兩個開會啫, 唔關我地事, 不過最估唔到係佢竟然過嚟講長毛壞話, 其實佢講GE嘢我地一早就知啦, 唔知佢係咪忍咗好耐呢! 佢話長毛係學歷好, 但轉數慢呢, 仲要喺唔適當GE時候講唔適當GE嘢! 佢終於知道長毛的問題了, 不過已經捉咗隻老鼠入嚟囉, 睇吓點囉! 放工直接返屋企, 因為子元打比我話佢唔舒服, 唔去合唱團喎, 咁都冇法架啦, 佢講到明自己唔舒服喎! 不過要幫程生揍敏瑩, 所以都係要老公車出車入搞掂, 順手去長沙灣食晚飯, 子元都唔係好胃口, 都啱架啦唔好食咁多! 送咗嫲嫲返屋企先我地再返去, 因為老公要踢波, 我又一揍二啦, 先沖好涼打暈仲仲, 跟住就服侍子元啦, 條友食咗藥又唔瞓, 係都要睇埋9點半套劇, 到睇完去瞓啦, 跟住又話瞓唔著, 原來發燒, 好在老公返咗嚟啦, 咪又要一齊服侍佢囉, 食藥冰袋等等, 到11點幾就捉番佢上床瞓, 到我地臨瞓前去睇佢, 已經出咗汗, 又要同佢抺汗啦, 出到汗就已經好好多架啦!

28/7/16

28/7/16   THU   VERY HOT**

今日過商會開會, 因為深哥話好多嘢要寫, 所以咪早D過去做, 唔返公司啦! 朝早老公揍咗仲仲入青衣, 我就揍子元去長沙灣交收子元比婆婆, 然後就過海啦, 都算早過到去, 上到地面又捉吓精靈咁啦! 10點多上到去做住嘢先啦, 都真係好多嘢要寫! 11點多Nicho嚟到都叫佢快D找找商會數, 因為12點到又去食lunch! 回來做埋D手尾, 老細早咗上嚟, 當然帶咗佢條長毛啦, 仲要叫佢上嚟坐吓傾吓計喎, 唓! 當有其他老細嚟到時, 我都叫佢坐番後面, 有時D嘢都要分吓身份! 最好笑係佢開會真係好游雲, 老細喺枱頭叫到枱尾叫佢打返公司問嘢, 佢竟然如夢初醒咁, 問隔離位個會員, 而家講緊咩呀! 你話死未! 咁我都冇理佢最終點做, 我自己就打咗電話返去問咗答埋我老細啦! 一向過嚟開會都係好開心架嘛, 但而家就係呢條毛, 喺到篤眼篤鼻! 3點幾4點佢地走咗, 我都終於可以走, 最快方法撘地鐵返去啦, 買埋餸返到屋企抖一抖, 又要再去石硤尾接番我隻踢完波的子元, 回家後就佢沖涼我煮飯等等啦, 食完飯教佢執枱呀, 成日食完就全世界走開哂等我做! 搞掂佢地就沖涼休息啦!

27/7/16

27/7/16   WED   VERY HOT

今日係嫲嫲出嚟揍住佢兩隻嘢, 老公入去載嫲嫲出嚟, 我就推車仔出到地鐵口交收, 等佢地食早餐, 我就返工! 今日都唔算太忙, 做吓公事做吓自己嘢, 下午D「高層」出哂去, 我地就去咗執免費嘢, 同層有間賣碗碟杯的, 不過SIZE唔係太啱我都只係攞咗少少咋! 放工前接到阿媽whatsapp話子元未做哂嘢冇帶佢去小童學棋, 咁我就已經火火地, 火大家都亂咁嚟, 子元一日流流長唔做又係衰, 總之最終仲仲都醒咗嫲嫲就揍佢出去, 咁我都有話阿媽要罰都唔係話唔去學, 最終放工我就過咗去小童等, 一來冷靜吓自己先, 二來睇吓撞唔撞到冰miss, 同佢傾吓, 同佢傾完我真係claim down哂, 子元出到嚟我都冇鬧佢, 只係要佢講番發生咩事, 我真係冇鬧佢, 「鵝」佢為主, 已經鬧咗十萬九千次都冇用, 唯有又轉吓方法! 咁等佢執埋D手尾就出去食飯, 嫲嫲話出美孚食上海嘢, 地點關係冇渣車, 但就比佢兩個踩滑板車出去, 老公專登GE, 等我可以慢慢行出去捉吓精靈咁! 去到都要等位, 8點幾先有得食都餓死我! 食完嫲嫲同大包就撘車返去, 我地又慢慢踩車返去囉, 都捉到好多呀! 返到去沖涼瞓覺, 我就做吓家務咁啦!

26/7/16

26/7/16   TUE   VERY HOT

今日要出去太和洞新廠開動, 所以都要著靚靚啦! 朝早要先去小童攞番笨元D行裝返屋企, 老公就揍仲仲入青衣, 我就換好衫返工! 返到去都未做到D咩, 老細就call落去抬嘢, 原來佢整咗隻玉馬送賀人地新廠, 但又要自己裝喎, 搞一大輪先出門口, 去到都差不多11點, 明知人多就渣架van啦, 又要扮哂嘢渣跑車, 迫死人咩! 去到都係行行企企食飯幾味, 仲要等總監參觀埋廠, 佢地吹埋水, 點幾先走得呀, 好在茶點時間我都有食嘢, 唔係實餓死! 返到嚟咪食嗰間廳2囉, 唔洗錢就梗係食個最貴架啦, 哈哈! 下午回來就做吓自己嘢同寫埋後日的議程囉, 點都要找D嘢寫吓GE! 放工去石硤尾接子元啦, 然後都係撘地鐵返嚟, 行行吓竟然見到彩虹喎, 馬上影低佢post上網啦, 跟住撘緊地鐵時, 子元見到有個人又係玩緊捉精靈啦, 咁啱佢玩完又開番screen啦, 我望埋去張相咁熟面口, 原來係陳副校個老公, 我叫佢但佢好似聽唔到咁! 返到美孚同老公會合, 佢去買譚仔, 回家佢地沖好涼就食嘢, 食完老公陪仲仲玩時, 喺房玩得顛….反芻…又要換床單搞一輪, 我先可以沖涼, 之後子元都係砌佢喺書展買的太陽能車啦, 我地就係咁睇電視打機, 其實都幾hea! 12點幾才瞓!