9/7/16

9/7/16   SAT   HOT

今日係第一次放短周呀, 打死都唔咁早起身啦, 本來今朝要去買書, 買全套仲要8:30-9:30喎, 所以琴日比定張票程太順手買埋, 約咗10點佢地揍完囡去學嘢就一齊食早餐, 順手交收埋D書, 食完早餐本來想去睇吓有冇櫃啱放子元枱底, 但始終都係冇咁矮, 放棄了, 老公話度好size佢返公司整, 咁就最好啦, 度身訂造! 順道喺附近睇吓D玩具鋪, 仲仲近來愈來愈硬頸, 又成日唔比人拖, 真係好難搞! 睇完玩具就買咗份醫生套裝比仲仲, 因為佢之前嗰份都係子元架咋, 咁見有份50幾蚊都ok啦咪買比佢玩吓囉! 返到去真係玩極都唔肯瞓呀, Daddy帶子元12點幾已經出咗門口去踢波, 得番我同仲仲喺到, 其實都一路由得佢玩, 因為我要執吓二年級D舊書舊作業, 唔係邊有位放新書! 到2點幾諗住捉佢瞓, 但條友又係都唔肯瞓, 走過一次出嚟, 咁啱老細打嚟話接佢阿哥幾接唔到, 又要我找, 原來全世界都以為佢今日到, 但其實係明天, 真係比佢地玩死, 係我死囉! 都唔驚得咁多啦, 反正都係誤會! 搞掂番佢單嘢就再捉仲仲入房瞓, 係唔洗捉架, 攞個衣架出嚟佢已經第一時間跑番入房, 衰格到呢! 終於瞓咗我就係到包好D新書啦, 幾十本包起上嚟都唔少嘢架, 到老公佢地返, 仲仲瞓醒我都未包完架, 食咗個午餐先, 但都已經4點幾架啦, 仲仲醒咗老公餵番嘢佢食, 我就繼續包啦, 到6點幾7點, 問程生佢地今晚點, 最終去荃灣食上次食甜品嗰間café, 今次試個餐, 有兩個食品兩個甜品, 係冷氣唔夠熱咗D啦! 食完去咗AEON行到10點幾回家!