29-30/8/16

29-30/8/16   MON   HOT

兩天澳門充實之旅開始! 7點幾起身, 琴晚已經執齊哂嘢, 去兩日一夜都帶行李箱都唔誇呀, 一家4口D嘢放哂入去啦喎! 在美孚食埋個早餐先去上環, 過到去剛剛好, 去到等候室仲有15分鐘上得船! 其實我都好怕撘船, 不過呢種船其實已經好穩! 由於朝早, 仲爺好精神, 所以全程都好煩, 好在只係1個鐘啫, 終於落得船, 好快有車就去到酒店, 先存行李然後去Kids Club比佢地玩, 工作人員話有confirmation #有半價, 都係$150左右, 咁又要落去check in, 好在可以比佢地玩住先, 我就去排check in囉, 終於搞掂攞埋房卡, 嗰時先知原來行政套房包埋有幾餐食, 不過子元嗰份要加錢, 明知佢食得唔多但唔加又唔得! 不過呢個價包幾餐又唔洗專登出去食, 抵啦! 攞好房卡, 上去kids club搵番佢地, 人唔多其實都幾好玩, 佢係一邊遊樂場咁, 一邊係遊戲機, 不過遊戲機就要比錢, $5一個game都算平! 玩到2點到就走啦, 上去攞房settle好, 就落去食tea, 原來tea真係只是蛋糕同麵包幾件, 不過就好好食GE, 同埋都去玩水唔好食咁飽啱! 返上樓換衫出發啦, 咁樣上上落落其實都幾浪費時間, 因為我地在尾房, 好長好長的走廊! 終於settle好落到水, 先玩漂流河, 真係幾好玩喎, 我又要顧住個電話等等又冇戴住個泳鏡, 有D位都太大水有D顧忌! 仲仲就好high咁唔肯用水泡, 著住件救生衣就周圍浮, 初頭未平衡到都差D, 好快已經平衡到就唔比人扶添呀! 浮完一圈就上水去玩其他, 有個兒童滑梯但唔多夠衝力, 所以玩咗幾次就去游咗一陣, 然後又入番去天浪嗰邊, 今次玩小沙灘, 兒童區, 子元同老公就去咗排勁嗰D滑梯, 難為我同仲仲喺下面等, 我又要安頓住仲仲喎, 見住D人有時落咗水但唔識上番水面要救生員幫手都幾驚! 不過子元又冇事喎, 真係叻仔咗好多架啦! 玩到5點幾都開始涷, 咁就返上去沖涼啦, 因為有個冷盤時間, 本來諗住唔好蝕, 點都食少少先再出去食嘢, 但所謂冷盤根本就係晚餐咁, 只係兩隻細眼瞓到食都唔願, 所以比D飯佢地食咗就由得佢地瞓, 本來諗住快手完帶佢地上去瞓, 但點知都係等唔切, 咪由得佢地喺到瞓囉, 我地就慢慢食飽佢, 唔洗再出街食囉! 食到7點左右返上房啦, 點知一郁子元就嘔, 真係比佢玩死, 嘔完醒哂就冇咩啦, 仲仲返到上房都唔瞓啦, 咁咪hea陣7點半到先出發去官也街囉, 行過去時子元就成日嗌攰, 反而仲仲好好力, 其實都係行去買吓手信食吓雪糕大菜糕咁啦, 買齊嘢都返酒店啦, 諗住等埋9點送個蛋糕上嚟先沖涼, 點知9點半都未送嚟, 就比兩個細沖涼先, 玩一輪水沖好哂, 蛋糕10點多才送嚟, 咁快D影相食蛋糕, 10點半捉咗仲仲去瞓, 我可以慢慢沖涼嘆吓, 子元已經喺梳化瞓咗, 我地就睇埋電視, 12點先瞓呢!

酒店床始於都唔及自己床GE, 所以都係瞓得一般, 兩個細keep住一早就醒咗, 咁我地都8點要起身, 換衫執嘢食早餐都10點先落得切水, 我都醒架啦, 打定電話去話delay check out, 咁就可以玩到11點先返房, 其實都係玩番琴日D嘢, 不過今次電話都唔帶啦, 唔鬼影相唔洗顧住部機! 其實唔多夠皮架但都冇法要閃架啦! 返上去沖涼執嘢, 12點前可以checkout, 寄存咗行李先, 然後去咗百老滙大街食嘢, 子元終於有番D胃口, 食完嘢冇嘔! 去咗食間新加坡嘢, 都幾好食喎! 食完就閃啦, 行咗返去本來諗住撘shuttle去機場再行上去滑草場, 咁老公話不如撘的士, 都好快上到去, 但原來2:30先開, 唯有等囉! 已經過咗隔離有個遊樂場玩, 但天氣真係熱同埋個遊樂場真係唔好玩! 所以嗰一個鐘都幾難捱, 終於開門啦, 咁又真係幾好玩GE, 子元可以自己滑, 但柏仲就要大人抱住滑, 初期都唔太多人, 但滑到第4次開始排到第三行啦, 所以叫老公幫手排唔洗再影相, 咁最尾嗰次就daddy同仲仲滑囉! 玩到3點幾走人, 諗住有個幾鐘慢慢撘車返酒店攞行李都可以, 咁啱有的士上嚟, 咪撘返去酒店囉, 攞完行李行返去總站撘shuttle去碼頭, 可以排後補, 4:30有船走得! 喺船瞓哂, 都係時候休息吓! 返到屋企6點幾, 沖個涼執吓嘢開機洗衫才出去食晚飯, 簡單地食米線後就回家, 9點幾就捉佢地瞓啦, 仲有手尾要執, 終於叫做完成哂就可以hea吓睇電視, 12點幾就瞓啦!