31/5/18

31/5/18   THU   VERY HOT

今日老公放假, 不過我都係咁早起身架啦, 整好午餐比子元送校車, 仲爺冇跟落嚟因為有老公睇住, 吹水吹到8點先返上樓, 老公已經準備好出門口去攞車, 仲爺今日去聽音樂會返下午, 所以食完早餐一齊揍咗我返工佢兩父子就二人世界, 我就繼續返工囉, 今朝要面對工作分配部份, 其實都冇咩好驚, 我已經寫得好詳細啦, 有啲嘢唔係要執住你隻手先識做嘛, 要搶的你都搶哂去做, 點會唔識做! 叫埋總監佢負責寫reference letter, 基本上都冇咩嘢搞! 午飯個個都冇帶, 於是一齊出去D2食, 試咗間新嘢, 真係唔錯喎! 返到去下午開始執吓嘢啦, 其實你話好多嘢執走又唔係, 但都要D時間, 收拾物件亦收拾心情! 放工後叫老公同子元上嚟幫我攞嘢, 其實嘢就一箱啫, 反而有幾袋膠袋紙袋, 之後裝修完都冇攞番走! 落到樓嫲嫲同大包都喺到, 咁早就去食大牌檔, 都唔算太餓架! 食完返屋企, 叫佢兩個沖涼, 我就hea住打吓機, 然後咪睇埋電視8:30先沖涼囉, 仲爺唔洗做功課, K.O.埋佢就同子元睇功課同練習, 錯好多又唔係, 只係又錯唔小心囉! 10點幾K.O.埋佢本來應該摺衫架啦, 但我眼瞓到一個點…喺梳化已經瞓咗, 所以連J2套劇都冇睇就去瞓啦!

30/5/18

30/5/18   WED   VERY HOT**

今日都係趕趕忙忙咁跟車返學啦, 天氣真係好熱, 喺學校門口等都夠熱! 買埋早餐返工啦, 今朝都唔算點忙, 經理叫我唔洗開會啦, 唔好sai我時間喎, 又問我係咪有路數, 我真係唔會講真話囉, 同你好熟呀! 唔開會我咪自由吓囉, 再finalize吓個list, email比總監囉! 午飯怕鬼咗老細一早返嚟, 因為佢一早又出咗去食, 所以都係喺番位食! 下午做吓嘢啦, 繼續keep住開心吹水! 係4點幾叫好tea啦, 衛生署就嚟查牌喎, 搞咗半個鐘有多, 餓死我啦! 放工老公嚟接我, 啱啱食完嘢真係未食得落飯, 又未諗到去邊, 最終咪去AEON行吓囉, 買咗好多冇益嘢, 排隊等比錢都九丈遠, 老公襯空檔就比仲仲去睇一睇玩具, 然後去咗幸福邨食飯! 返到去都係8點多, 有時間沖好涼同佢地睇功課等等, 都真係攰架! K.O.哂佢地後, 起初衫都唔想摺勁眼瞓, 不過刷完牙又好似醒番咪摺埋先睇埋J2套劇先瞓囉!

29/5/18

29/5/18   TUE   VERY HOT-

今日都係跟車返學啦, 有種倒數揍仲爺返學的感覺真係唔鍾意, 似係我有分離恐懼症多啲! 揍哂返學就買埋早餐返工啦, 今日都係寫好埋啲jobs duties先, 跟住都做吓自己嘢, 反正都冇咩公事可做架啦, 午飯都係睇吓電視笑吓咁啦, 下午繼續做自己嘢! 今晚同office幾位去食散水飯, 訂咗朗豪坊食德國嘢, 慢慢過得去行吓先去食嘢, 影吓相咁, 其實我自己就唔係太敢撩起那份離愁, 所以都係閒聊吓啫! 8點半要交枱, 諗住影吓相先, 但阿媽打嚟話佢好暈好唔舒服, 都要返去睇佢, 又打比老公叫佢去會合, 係怕佢又耳水不平衡, 但上到去睇佢再問吓今日做咗咩等等, 估算係中暑呀, 又唔開風扇冷氣, 今日又頻撲, 又未食晚飯, 唉…最後等工人返到嚟, 我買咗保礦力比佢飲, 叫佢要沖涼再食啲嘢補充水份先瞓, 安頓好回家都9點幾, 仲爺喺車瞓咗, 老公佢地都仲未食飯, 買咗飯返屋企食, 我就沖涼先, hea到咁上吓瞓啦, 我勁攰!

28/5/18

28/5/18   MON   VERY HOT

今日好似忙忙碌碌咁, 朝早老公翻瞓咗, 6:30我醒一醒推佢先知道, 好在趕得切! 咁我就搞掂兩個出門口返學, 痴程生車坐舒服好多! 買埋早餐返公司食, 跟住都係開吓會! 今日公司個冷氣唔知做咩勁熱, 真係熱足一日! 午飯後老細返咗嚟, 我就好如常咁同佢講嘢, 反而佢唔自在多啲囉! 下午好努力咁寫個jobs duty list, 有咁多寫咁多, 等佢成日話我冇嘢做呀啦! 只係一路寫一路諗, 嚟緊真係要離開stay咗十幾年GE地方, 有種唔知點收拾的感覺! 不論實物定心情, 原來要收拾都唔易架! 放工老公嚟接我, 去揍埋子元就去咗荃灣食飯, 嫲嫲話出去食喎, 去咗食泰國嘢, 睇咗陣玩具就回家, 仲有好多功課要跟, 搞到十點幾先沖得涼! 老公要早啲瞓, 所以摺衫時都係得我一個, 吽到最眼瞓先入去房!

27/5/18

27/5/18   SUN   VERY HOT

今日老公係放假, 但佢琴晚去咗睇波, 基本上係今朝先返, 所以我9點左右起咗身都盡量叫嗰兩個唔好嘈, 但真係好難, 我個人又唔多好心情, 所以冇咩理佢地, 最終10點多叫陸生起身, 冇煮早餐呀, 直接出旺角, 子元買麵包食, 我地揍咗佢上去鼓室就食早餐, 然後返屋企溫書, 考試嚟講我覺得今次好似冇幾個鐘喺房溫咁, 定之前真係溫咗啲可以唔洗迫埋一次呢! 返去先溫咗中文先, 然後就做數, 我亦找找英文有咩卷啱, 之後可以做! 4點幾真係要出去食啲嘢啦, 叫番老公起身就出去, 食完嘢再去咗AEON行吓, 老公今晚要踢波, 我買埋餸返去簡單地煮飯食咋, 仲爺係咁叫我同佢玩, 但我一來真係攰,二來真係要煮飯點玩啫, 唔知佢明幾多! 飯後家務完都K.O.仲仲, 子元又多多事實囉, 做好欠我的練習後又睇電視又打機咁, 10點幾都唔捨得瞓, 好可惡!

26/5/18

26/5/18.    SAT.    VERY HOT

今日老公返早，仲爺又有重頭節目父母親節獻禮，我都係要一揍二！早上8點多要起身，揍子元去英文，空檔同仲爺食個早餐再去公園玩，點知過雲雨搞到濕哂冇咩得玩，係咁二玩吓咪去接子元，返到屋企收拾吓又要出門口，預45分鐘入主恩表演，都算預得準！去到交低仲仲比老師就去坐好，其實都同平時表演差不多，本來最期待仲仲跆拳道，但佢企到勁後根本睇唔到咁滯。唱完跳完影吓相，3點幾落到青衣城食啲嘢就回家，子元又要游水，仲仲咪搗蛋囉。等子元游完水就去咗旺角新都會，食food court 行咗陣回來，終於打暈佢地可以休息，老公就半夜去睇波。

25/5/18

25/5/18    FRI.   VERY HOT

話咁快又到星期五，某程度上都冇咩特別，朝早老公返咗工，我都係要搞掂兩隻，最終都係同仲爺撘地鐵算，時間上易預又化算。揍咗佢返學我咪返工囉，返去都係吹吓水開心埋佢，又整吓個工作表等人跟，都講多咗比人知我唔做架啦，遲早的事。午飯喺位食咋，因為老細喺到阻頭阻勢12點幾出去食，咪一早就返嚟囉！下午都係公事吓又私事咁，放工直接返屋企，老公去揍子元踢波我回去幫仲爺做功課先。今日比笨元第一次試自己撘巴士去畫室，都算順利，話哂都冇馬路我又放心少少。做好功課佢地都返嚟，就去長沙灣食晚飯再回家，睇吓電視都瞓啦！

24/5/18

24/5/18   THU   VERY HOT

今日要過去商會開會, 開最後一次會啦! 朝早都係要揍仲爺返學, 今次撘巴士轉小巴, 行係行少咗但真係好貴, 係地鐵的三倍幾, 咁我寧願行去撘地鐵啦, 而家時間上又冇長啲! 結果8:40先返到學校, 買埋早餐返工啦, 今朝都係吹水多, 11:30要過商會啦, 先去食午飯, 再去買吓嘢飲等等, 去到寫少少票就OK, 跟住都係講是非啦, 2點多開始有人來, 最PK係老細嚟到佢真係眼尾都冇望我, 想同佢講聲你陣間要同理事會交代, 但最終都要Nicho開口講, 你話佢係咪PK! 其實佢都真係好乞人憎架啦, 佢主持會議時D人坐吓去枱尾囉, 有人直情知佢到就缺席添! 開到尾局住同啲會員講我唔做時, 幾輕輕帶過呀, 算…我唔會再理佢咁多, 只係講到咁我的工作邊個頂時, 佢叫Nicho頂埋, 話請全職係養懶人喎, 幾想講粗口! 終於人就哂啦, 我都走啦, 話哂都8年啦, 點都有啲唔捨得! 不過都唔到我唔捨得, 因為跟住又好忙咁去接仔, 老公突然要OT到11點多一更, 所以我要揍咗仲爺再返去, 阿媽已經揍咗子元返荔欣, 返到去執好嘢就抖吓先, 可能太熱我真係好攰! 6點幾開始煮飯食, 簡單咋! 7點幾食得嚟再捉佢地沖涼, 仲爺明天生日會唔洗交功課, 但都要佢襯我沖涼時做咗一份先, K.O.哂佢地我就摺衫啦, 點知11點多子元又開始話瞓唔著, 最後我估佢係有壓力, 因為佢話發夢見到兩個點要連又連唔到咁, 唯有摟吓佢同佢上床蓋被, 多啲關注番佢囉, 咁又冇再走出嚟瞓到啦! 老公11點幾返嚟仲買咗糖水比我食!