26/9/14

26/9/14   FRI   HOT

今朝拖咗子元起身, 再同柏仲沖咗涼先出門口, 都仲覺得佢喺有D嘔味! 子元又慢吞吞啦, 冇我不停叫佢快D就係慢! 好在落到樓校巴剛到啫, 咁返上樓後先摺哂衫先再餵奶, 撘唔到42啦, 睇住喺對面走咗, 不過42A都好快入到去! 食埋早餐就返工, 都係做吓自己嘢吹吓水啦! 睇番D家長講開食飯, 個個返去都講子元琴日午飯添咗4次, 真係太誇張! 老細上午返咗嚟, 好在一陣就走, 話咁快食午飯, 之後都係睇吓電視打吓機咁啦, 老細下午係冇返呀, 但就係到搖控你做嘢囉, 都真係幾煩, 要處理大選D嘢就煩架啦! 放工馬上去買餸, 然後仆返屋企整好部份嘢, 再仆返出去接佢地合唱團, 程太趕唔切嚟, 所以我要幫兩個換泳衣, 好在子元可以自己搞掂大部份! 送咗佢地入泳池就等埋程太, 原來佢去咗揍婷婷, 返上樓就快手煮飯啦, 咁啱喺lift口都見到老公, 大家齊齊返去! 煮好大部份嘢又落去泳池接番佢地, 今次到等埋程生啦, 返到上去等兩個沖好涼就食飯, 然後都係玩啦, 我就繼續做阿四, 洗碗抺地等等, 9點半搞掂哂可以沖涼都真係算快手! 柏仲等我搞掂就食奶即暈, 程生佢地都閃啦! K.O.咗柏仲就要睇子元D功課, 係未溫多次默書啫, 但已經就嚟11點要瞓啦, 所以都由得佢瞓, 我就繼續執埋柏仲D行李, 執吓坐吓咁, 差不多12點啦, 終於可以停落嚟, 自放工去買餸起, 我都好似冇停過咁, 真係超攰! 所以hea到12點幾就瞓啦, 勁快瞓著, 但柏仲2點左右又喊醒, 又咳咗幾聲, 馬上抱起佢啦, 又嘔咗D痰出嚟, 都係好事GE!