27/9/14

27/9/14   SAT   HOT*

今日係澳日之旅呢! 柏仲6點就醒, 真係攞我命! 7點多都要起身啦, 梳洗完餵柏仲食多次猴棗抖陣先食奶, 馬上洗番個奶樽蒸咗佢先, 再摺衫! 8點幾出門口揍笨元去畫班, 跟住買早餐返公司! 都係hea住等收工, 又搜集吓澳門資料先啦! 未夠1點就落樓去地鐵同老公佢地會合, 快手過到去上環食KFC, 然後就出發上船了, 由於早到, 可以撘2:15嗰班船, 大家齊齊瞓哂, 出海關後就撘旅遊巴去酒店, check in攞房上到去都係4點幾, 換好衫齊齊去泳池, 子元開始變得唔怕水, 仲好大膽咁行到好出, 柏仲又係唔怕啦, 係咁玩浪! 於是主力我睇子元老公睇柏仲, 又影咗好多寫真啦, 之後又交換我帶柏仲去浸溫泉, 玩到6點先返上去沖涼, 餵柏仲食埋餐奶就出發搵食, 但笨元捱唔到太餓, 於是買咗個starbucks包頂住先, 行到去官也街終於食到山度士, 唔知係肚餓定真係咁好食, 總之我地食得好滿足! 柏仲喺門口都仲係醒架, 但入座後就瞓咗, 所以我地上半餐可以食得安樂D, 後半段醒咗就比咗少少飯佢食, 然後又去食甜品啦, 我食咗榴槤雪糕, 笨元食咗燕窩雪糕, 老公就食椰子, 之後再去排隊買手信, 分頭行事買齊手信就行返酒店啦, 本來都諗住去睇煙花架, 但兩個細都攰, 又找唔到點過去, 於是都係放棄了! 返酒店後要沖涼執嘢, 搞得嚟柏仲10點多食咗奶就瞓, 佢有佢張BB床, 幾舒服! 子元同老公就掛住打機, 我要執好D嘢先有得休息, 真係超攰! 11點幾要捉子元瞓啦, K.O. 咗佢到我地要瞓啦嘛, 今日咁hea玩真係幾正!

<出發過大海啦!>

 <海船仔!>

 <打卡先!>

 <落去海灘玩, 又有草地可以玩!>

 <子元幾型!>

<柏仲完全唔怕水!>

 <係咁向前爬!>

 <兩兄弟玩水水!>

 <美圖後見得吓人!> 

 <士度士晚餐 - 葡國炒蜆>

 <焗鴨飯>

 <馬介休炒菜!>

 <子元著得好好睇!>