15/11/16

15/11/16   TUE   WARM*

今朝如常咁趕趕趕啦! 揍咗佢地返學就返工啦, 返到去都係做吓自己嘢, 午飯後想好好睇埋個大結局都唔得, 因為老細返咗嚟, 係咁講講講嘢, 完全阻住哂! 跟住下午都好忙, 大老闆娘話要check定2018年annual dinner海景嘉福有冇場, 講吓講吓講到要明天去睇場, 我本來都話我睇咗架啦, 唔洗去睇, 但老細喺後面嘈嘈嘈, 係都要我去睇, 咁明天又冇咗好幾個鐘, 所以要快手做定商會開會的文件囉! 放工遲咗少少閃, 喺惠康買完餸比緊錢時收到阿媽電話, 好緊張咁驚呼話子元跌親個後尾枕, 我即刻跑返去啦, 佢仲喊到好淒涼咁, 阿媽已經打緊比老公, 老公教佢敷冰, 真係好腫, 成隻雞蛋咁, 敷咗冰好似好少少, 但睇睇吓有傷口有血喎, 都係睇一睇醫生穩陣D, 反正佢有買意外保險, 咁等老公過嚟接我地囉, 去到都要等呀, 7點去到, 等咗成個鐘有多先有得睇! 醫生都話只係皮外傷, 不過就觀察吓有冇暈嘔抽筋囉, 開咗D消毒藥水, 攞埋藥都八點幾九點, 快手去食個打冷, 就返青衣接仲仲, 佢已經瞓咗啦, 抬豬仔咁抬返去, 佢繼續瞓, 我就要幫個傷者洗頭啦, 快手叫佢搞掂瞓覺啦, 我地沖埋涼仲要摺埋衫先瞓, 已經12點幾呢!