15/12/17

15/12/17   FRI   WARM

今朝請咗假, 因為仲仲學校聖誕Party, 但早上如常係要晨早起身GE, 因為子元都係要返學! 仲仲Party11:30先開始, 約咗9:30去健康院驗眼, 出得門口撘巴士入得去已經9:20, 咁就去咗健康院登記先, 咁又好快有得眼喎, 仲爺食咗藥, 所以個人吽吽地, 加上去一個佢唔認識的地方, 所以都好合作乖乖坐定喺到, 驗眼時唔知佢係真睇唔清定玩嘢定悶, check到第二隻眼時開始唔合作亂指一通又唔望人, 唉…搞到又要再check過, 先叫做過到關, 不過我都係要帶佢去眼鏡鋪睇多次架啦! 度高磅重後差不多10點多搞掂, 條友都係得15.25公斤, 99.3CM, 點都過唔到100CM! 落去麥記食早餐, 一入去竟然見到嫲嫲喺到, 咁咪買早餐食囉, 仲有好多平時佢先見到的婆婆喺到, 食完就去買聖誕卡, 佢又話要回比人, 但寫得兩張又唔肯寫, 比佢激死! 咁咪慢慢行落去學校囉, 11點多已差不多到, 去買埋嘢飲先去校門外等, 又顛吓影吓相咁啦! 入到去都係先睇表演, 跟住入課室玩遊戲聽故事睇魔術, 最後就係食嘢, 不過食物都係一份小餐盒, 好在我早餐食夠咗啫! 抽埋獎我要快手走啦, 因為要趕返工, 真係好對唔住仲爺, 但我真係好多嘢做請唔到全日假, 喺學校門口同嫲嫲交收時佢竟然唔想跟嫲嫲, 好淒涼咁! 買咗份三文治返公司, 都做到3點幾先有時間食, 我其實都好淒涼, 鬼叫你窮呀頂硬上! 做足一個下午都遲咗走呀, 不過老公就可以來接我, 因為佢早放喎, 揍埋仲爺再接子元放畫班再去合唱團, 我地就返咗屋企一陣先, 返到去我喺到執好哂D家檔又要出門口, 接到同學仔媽咪電話, 表面話唔係投訴但我覺得都係囉, 話子元放學等校車時打架, 又踢爛佢個女個書包個輪, 又扯個男同學頭髮又推人落地……! 老實我覺得如果以上全部做齊, 就算現場點冇大人喺到, 都係引到有人過嚟囉, 咁我喺電話梗係冇講D咩GE, 照話會問問佢先, 因為我都要了解吓發生咩事! 另外又話子元之前坐佢個囡前面時成日攞佢D筆用, 咁呢樣我就信, 因為笨元以為講句就等於人地同意借比佢, 所以唯有教佢文具係要自己預備好, 唔應該要借! 接咗子元送咗敏瑩返去先再詳問, 佢個版本係, 佢同個男同學玩包剪揼, 個男同學捉住佢隻手喺到轉, 咁笨元失平衡就跌咗喺投訴人個書包上, 再壓甩咗個輪, 其間冇打架冇推人, 真係唔知投訴人點解會咁長個故事! 本來諗住去小童報NERF, 但見日子都未必夾到, 都係放棄去食飯, 送嫲嫲返屋企, 我地返到去都差不多10點, 快手K.O.咗佢地我就自由了!