19/12/17

19/12/17   TUE   VERY COLD

今日子元開聖誕Party, 我差D唔記得要整嘢返去比佢食, 好在只係滾番D丸啫, 快手搞掂出門口前仲爺又起身, 但天氣太凍啦唔可以出去呀, 叫老公睇住佢先! 返上嚟就叫佢地梳洗出門口啦, 我可以慢慢執好嘢先買早餐返工! 今日都忙忙地架, 不過時間好似過得好慢咁, 做咗好多嘢吹咗好多水都仲係未放飯! 終於到放飯啦, 老細又早返喎仲要黑哂口面咁, 成日要keep住咁黑人面我真係替佢塊面辛苦! 下午都係做嘢啦, 真係忙碌架! 不過放工我都準時走啦, 因為要揍子元去踢波, 北角真係好遠, 地鐵又迫人, 淨係地鐵車程都大半個鐘先到, 好在要到1月之後先再有練習, 再咁佢未攰我先死…!佢就喺到踢我就喺到吹風, 好在件褸有帽咋, 真係大風到傻! 老公7點幾8點先到, 好在有支熱麥精嚟慰勞吓我啫, 練到overrun哂, 8點幾先去晚飯, 去咗食間潮州嘢, 真係幾好食喎! 回程時我地全部都瞓哂, 但抱到仲爺返上去佢就醒咗, 都好GE沖埋涼先瞓啦, 子元就執埋佢聽日旅行D嘢, 我今日完全唔想做家務, 所以冇摺衫啦, 打咗陣機瞓覺!