29-30/4/17

29-30/4/17   SAT-SUN   SUNNY

今日係幾廿年後再有機會露營的日子, 不過朝早依然係要返工, 所以琴晚就要執好哂D嘢, 今朝只係搬落車, 我就買早餐返工, 老公就揍住兩個細! 差不多放工老公放咗兩個細上來, 玩咗一陣夠鐘就走啦, 先去KFC食嘢, 然後再去同柴sir佢地會合, 我地都未算最遲, 2:15左右已齊人, 一齊出發啦! 由於塞車, 都差不多3點多先去到營地, 不過營地方面的安排都幾差, 我知我地係團體book係平D, 但你都唔係咁大細超架嘛, 叫我地去D草高到keens咁高的地方札營, 冇病呀嘛, 又話會有幾多人, 會冇位, 根本就冇D咁GE事囉, 我地自行選擇咗另一個位, 佢又過嚟要我地搬, 咁好啦應佢要求搬囉, 但佢要我地搬過去個位, 根本唔合適, 今次係好多蟻, 唔係幾隻喎, 係人地一族族喎, 點可能喺上面瞓呀! 最終都係去番我地選擇咗嗰個位照札, 話知佢! 結果4點幾終於札好營啦, 可以去玩第一個活動 – 氣槍射擊, 連仲爺都有得玩, 真係難得! 玩完射擊就到另一重頭環節 – 睇日落! 不過要渣車過去再行, 條山路都幾斜, 落山係最難, 因為要同埋仲仲! 終於行到去平地, 個境真係好得意, 因為望到深圳嗰邊係高樓大廈, 但香港呢邊就係田, 好大對比! 睇吓個日落幾咁細啦, 大家影吓相咁, 又行返去上車返營地, 開始要煮飯, 但原來喺嗰個環境煮飯真係幾吃力, 因為已經天黑哂, 叫做夠燈夠枱已經好好, 我地都算分工, 程太睇住兩個細, 算係精神上最吃力, 我地3大2小就負責煮, 又要洗菜又要攞水, 營的位置同水源嗰邊又遠喎, 真係行都腳軟! 大家切切煮煮洗洗咁, 到9點終於食得啦, 真係好肚餓! 食完又要洗, 堅多嘢洗, 洗個環境又麻麻, 所以都幾辛苦! 我同程生洗碗GE同時, 陸生就同兩個細沖涼, 程太就同兩個囡沖涼, 所以我地合作無間地, 仲可以煮埋個腐竹糖水, 煮GE時候我就去沖埋涼, 得凍水涼真係最攞命, 個環境已經幾差仲有凍水, 我真係凍到震, 但露營有得沖涼仲想點! 食埋個糖水執好D嘢, 我個小幫手已經搞掂咗仲爺公瞓, 真係好叻仔! 搞到12點多我地大人先瞓, 好好彩我地嗰個營係大少少, 都算瞓得OK, 係地吓硬囉, 我呢D老人家會瞓得幾辛苦咁解啫! 瞓到5點幾聽到仲爺喊醒, 老公過去抱咗佢過嚟瞓, 好在都瞓得番, 到7點幾我聽到子元已經起身, 咁仲爺又瞓到, 我見都要起身梳洗煮早餐, 同埋捉子元去梳洗, 返到嚟陸生仲瞓緊, 仲仲就醒咗, 又到同佢去梳洗囉, 9點前要煮好食好早餐執好埋嘢, 因為要準備導賞團, 開場只係喺營區內, 但兩個細似乎唔適合行, 因為預計要兩個鐘, 所以陸生好偉大咁帶兩個細上車休息, 我地就去行, 睇草睇牛食豆腐花餵羊咁啦, 話唔辛苦就假, 不過都係體驗嚟GE! 返番營地已12點, 開始要收營放番嘢上車, 好在帶咗吹泡泡比D細玩, 咁只要見佢地喺視線範圍內就可以, 時間關係子元要趕2點前去到踢比賽, 所以先車咗我同仲爺返屋企, 老公去小童還物資然後去球場啦! 我同仲爺沖好個涼本來想捉佢瞓, 點知條友喺車瞓咗就唔肯瞓, 初頭趕咗佢入去我都可以做嘢, 十九幾萬樣嘢要洗, 又要摺衫等等, 做到3點幾叫做做好啦, 咪捉仲爺上床瞓囉, 點知佢都係唔肯瞓, 總之就激慶我啦, 好在4點幾老公佢地返咗嚟, 咁我都冇再理, 點都瞓吓先, 因為個頭真係好痛! 6點多老公話要起身出去食嘢, 因為佢又要踢波喎, 所以出咗去食完米線返嚟, 就叫兩隻豬沖好涼玩吓, 9點前就K.O.咗仲爺先, 子元都唔係太夜瞓, 呢兩日體力消耗咁勁, 仲唔快D休息咩! 我就等老公回來食埋糖水先瞓呢!