15/3/16

15/3/16   TUE   COOL

由於想阿媽方便留喺長沙灣照顧阿嫲隨時有需要, 所以暫時都係安頓放學後仲仲喺嫲嫲到! 阿媽只係接子元放學! 朝早仲仲竟然掛住睇電視唔肯出門口返學, 好搞笑! 返到公司今日大解放, PK妹跟咗D老細返大陸開會, 今日真係自由講呀! 所以冇咩特別趕GE嘢都冇做住, 大家都好想講多D嘢! 到午飯時間, 大家都冇飯仲出咗去食添呀, 真係要慶祝吓囉, 唉…以後日子點過! 下午都係自由吓啦, 只係嗰十日八日啫, 大家就已經頂唔住, 呢條PK真係好PK! 放工喺公司樓下同阿媽會合, 佢揍子元過來我可以直接回家, 嗰時佢先講原來琴晚佢明明睇住阿嫲瞓咗架嘛, 但原來佢半夜走咗出街, 比警察找到送返屋企咋, 所以都懷疑佢腦退化, 不過真係會退得咁急咁快GE咩, 咁阿叔就找咗個醫生, 結果都係要阿媽帶佢去咗睇先, 咁我地都諗住見步行步先! 買埋餸返屋企就煮飯啦, 都已經差不多7點, 8點幾食完飯洗碗抺地, 9點前K.O. 咗柏仲先, 我就梗係又要睇功課啦, 個人都燥燥地啦, 子元明明話做哂功課, 咁錯就遇咗架啦, 佢仲要做漏喎, 想點呀大爺, 返到屋企咁耐又唔檢查, 我就嚟顛啦! 同佢睇得七七八八啦, 都10點左右架啦, 收到阿媽電話, 故事很複雜, 一句講哂遠在天邊嗰D就叫阿媽喺阿嫲到過夜或者帶埋佢過去瞓, 但阿媽冇好寧靜的環境根本瞓唔到, 又怕佢今晚又走出街喎, 咁本身老豆喺到架嘛, 叫佢今晚睇住佢又係十萬九千個原因, 因為阿媽明天要陪阿嫲入院, 咁今晚唔瞓到佢明天根本冇能力去做嘢, 我地要返工返學又做唔到D咩, 我打去問老豆佢係咪淨係欠D藥冇喺身唔可以留喺阿嫲到睇住佢, 但佢嗰D原因真係令人發火, 最終我真係小爆佢再cut線, 老公幫我問朋友做開老人服務的可以點, 但最終今晚咁急都係冇咩可以做, 都係叫媽返屋企休息, 叫樓下看更睇實D, 明天再算! 我搞到11點幾先沖涼, 沖完出嚟都瞓, 我已經冇哂力啦!