5/3/16

5/3/16   SAT   WARM

出席小朋友的活動, 一向都係令人好吃力的, 還要是運動會喎, 點會唔攰呢, 因為根本就係玩大人唔係小朋友玩! 7點起身快快手梳洗收拾出門口, 先去程生樓下車埋佢, 一齊入青衣食早餐, 老公食完就先揍子元上嫲嫲到, 然後才來和我們會合, 大家影吓相咁, 等老師call就上車去運動場, 其實都係去城門谷啫, 好近! 去到就先找地方集合, 還是等等等, 再唱吓歌做吓熱身, 就分組遊戲, 所謂的運動會還不是玩, 總共有10個遊戲, 很大體力勞動呢! 我地又唔記得帶小食比柏仲喎, 失策! 所以玩咗一半其實佢已經唔耐煩, 唔肯排好等, 查實我都明, 因為我都真係好攰, 幾經辛苦終於玩哂10個game啦, 都係頒吓獎牌仔, 人人有份咁囉, 跟住就可以走啦, 返去青衣會合番程生就再去接子元, 然後去咗長沙灣吃飯, 柏仲醒咗…食咗D飯, 結果返到屋企就唔肯瞓啦, 我陪咗佢一個鐘都係唔瞓, 我頂唔住啦出返廳, 做我的家務, 最終柏仲都係出埋嚟, 老公打嚟問係咪一齊出去食咗晚飯先, 跟住佢就同子元去踢波, 本來沖好哂涼都唔願出去, 但因為咩餸都冇都係冇得食, 咁咪出去囉, 又係入返青衣仲要食譚仔喎, 食完我就同仲仲撘巴士返出去, 子元就跟老公去踢波! 返到去都差不多8點, 執吓嘢同仲仲沖個涼基本上就可以K.O.佢! 我就要同子元對功課, 寫下佢錯咩等佢返嚟改, 然後繼續摺衫等等, 兩父子11點多才返到嚟, 食埋糖水就去瞓啦!