3/3/16

3/3/16   THU   COOL

今朝又要帶埋仲仲落樓送子元校車啦, 因為老公又係瞓到豬咁樣! 今日唔洗咁趕揍仲仲返學, 因為程生請咗上午假睇婷婷表演, 仲仲就好搞笑囉, 見到程生架車佢竟然認得, 仲話瑩爸爸喺到, 佢真係好西利! 有得痴程生車返工, 不過先要車咗程太去油麻地先, 可惜今日勁塞, 返得長沙灣都已經9:20! 今日都仲自由GE, 因為老細唔知去咗邊, 朝早都係做吓自己嘢, 但都要做公事, 因為要寫老細嗰篇講辭, 真係好傷腦筋架! 午飯後唔記得去入票, 搞到要下午蛇出去入, 不過下午都好忙呀, 因為要諗商會D嘢啦, 放工都遲咗D走, 又要諗買餸, 因為冇咩上網睇過, 完全冇頭緒, 行咗幾轉都有D求奇, 仲買緊時老公打嚟話佢已返到美孚, 所以車埋我返去, 佢問我有冇錢因為星期六約咗換車部音響連裝cam, 但我要留番D錢交學費喎, 同埋票都係今日入, 可能要星期一先有, 我話你要預咗有現金先去換, 唔係諗都唔諗就做, 所以我係唔會比佢架, 等佢自己諗清楚個洗錢模式, 我就一邊係咁慳, 佢就一邊係咁洗, 咁唔會成功架喎! 我而家都練緊控制每晚晚飯70蚊內完成啦, 所以我都要佢學吓應該點洗錢, 小學生都有教啦, 需要買定想買係唔同架嘛! 返到去阿媽就可以收工啦, 老公睇住兩隻仔我就煮飯, 之後都係洗碗抺地沖涼啦, 搞掂仲仲我就要睇子元功課, 始於都係有嘢錯, 不過係好咗少少GE, 係咁二溫咗進評要默的字就比佢去瞓, 老公一早喺梳化瞓鬼咗, 所以我沖完涼出嚟都叫佢去瞓先, 我仲有大把嘢做, 做得嚟都差不多12點, 仲睇埋神鵰先瞓!