31/12/21

 31/12/21     FRI     COOL

2021年終於嚟到最尾一日, 今年的變化唔洗講啦, 大到我自己都唔信, 就好似今日咁, 我就倒數咗兩次, 一個係香港時間, 一個係英國時間! 朝早9點多先起身, 自己食咗早餐先, 三位大爺都未肯起身, 到我差不多要出去接德仔先叫佢地唔該起身食早餐啦! 接完德仔返嚟玩, 食埋個午飯, 12點幾等佢差不多要瞓就揍番佢返去, 咁又唔洗OT, 反正我都要睇跨年倒數show, 邊整住嘢邊睇, 又要執拾又要食午餐, 4點倒數完要出門口啦, 約咗炮哥同另外兩個Family一齊去wet, 先去食韓燒自助餐, 子元最滿足啦, 我其實都好快飽啦! 食完都只係8點, 太早去到自然歷史博物館溜冰場都冇用, 咁炮哥就set咗條睇燈飾路線, 今日又唔洗收concussion zone fee, 就入到好入好入去睇吓, 但啲路係難渣的, 辛苦老公啦, 我都盡力影咗好多相, 連白金漢宮都影到, 總之又一秒變遊客咁啦! 9點去到泊車地點, 炮哥唔知點解肚痛, 痛到頂唔住, 買到藥食咗先好少少, 頂得到入場玩! 其實只係一個溜冰場, 不過我地呢啲老人家點玩到呢啲, 係老公辛苦要協助仲爺玩, 本身佢又有少少唔舒服, 更加攰! 終於12點半要散場啦, 可以返屋企, 老公返嚟馬上沖涼食藥瞓覺, 我就服侍哂佢地先, 已經過咗瞓覺時間都唔想瞓!

30/12/21

 30/12/21     THU     COOL

今朝瞓到8點左右又醒咗, 唯有自己起身hea吓先啦, 到9點幾叫佢地起身食早餐啦! 今日冇落雨, 就帶仲爺試吓佢架單車, 因為附有個場唔錯, 好似Mario賽車場咁, 就帶仲爺去玩吓, 估唔到又玩到一身一車都係泥, 返到嚟又要洗餐死, 咁就順手鋪好埋車箱個膠地墊啦, 跟住先出去Broadway, 老公話想買波鞋, 又同仲爺買埋籃球鞋, 食埋all day breakfast就回去, 車咗兩位少爺返去, 我地就去行超市買吓嘢, 夠鐘就去揍德仔返嚟, 都係等佢放吓電啦, 佢都係鍾意食飯多過粉, 下次都係比飯佢食好啲! 等佢閃咗我地就煮飯食囉, 今晚有曼聯睇, 明天又可以睇倒數出去玩咁, 唯有努力賺多日錢幫補吓!

29/12/21

 29/12/21     WED.    COLD+

今日都係無所事事架啦！9點幾先知醒，起身又好忙咁又要煮早餐，又要洗衫，仲收到遲來的聖誕禮物，Joyce寄來的包裹收到了，子元就收到禮物啦，其實得兩包清熱酷！忙完就休息吓摺衫睇吓電視咁，2點幾叫老公煮午餐，都係煮麵啦！3點幾出門口去買吓嘢，順手接埋德仔！今日隻豬仔唔太聽話，成日要入廚房，開始識發脾氣，食飯又唔太合作！好在每日都係兩個鐘啫！6點幾叫老公煮晚餐，又睇吓波咁又一日！

28/12/21

 28/12/21     TUE     COLD

今日都係瞓到自然醒啦, 但都係8點幾, 已經好好! 但我梳洗完佢地都未醒, 我咪整咗早餐自己食先, 然後睇番琴晚冇睇套新劇, 邊摺衫! 諗住佢地食完早餐就出去街街, 但因為一個朱古力事件, 又搞到我唔開心發火, 老公又話我發火, 子元就要學吓點溝通囉! 終於出到門口, 去咗好耐之前炮哥帶過我地去嗰個喺溫布利球場隔離個outlet行, 估唔到係買到朱古力囉, 其實衫褲鞋襪嗰啲反而買唔到, 最後喺間意大利餐聽食埋嘢, 都要40幾磅呀但係好食的! 回程前去龍鳳入埋貨, 又買咗160磅呀! 冇法啦, 好多嘢都要嗰到先入到貨! 回家後hea吓睇吓電視煎埋啲牛排做晚餐!

27/12/21

 27/12/21     MON.    COLD

今日本來諗住朝早去炮哥到整完嘢就可以去街，點知過得去都中午，老公又整咗好耐，最終喺炮哥到食埋晚飯睇埋波，咁又一日假期過咗！過到去佢地睇緊尋秦記，咁我又一齊睇啦，就係咁睇咗一個下午，因為老公都整到五點幾，咁事頭街街完回來都買埋嘢食一齊回來食，睇波的睇波，睇膠戰就睇膠戰，10點幾先回來呢！

26/12/21

 26/12/21     SUN.    COLD

今日係boxing day，完全hea過！䁁到自然醒，起身食完早餐就引仲爺拆埋啲禮物，因為包好喺放喺聖誕樹下，其實全部都係送俾佢嘅音響設備，都係爸爸嘅放縱啦！測完都11點幾12點，香港嘅朋友仔開聖誕party，所以我哋都視像左差不多兩個鐘，本來係我一條link，但係啲細路真係好麻煩，所以好多條link比佢哋自己喺房講我哋大人就自己喺廳傾！不過都係講吓啲生活日常，到3點幾鐘即係佢哋11點幾，都要收線啊！然後我就自己煮嘢食，因為都唔知佢哋想唔想食嘢，所以要食就自己煮啦，唔問你問去啦！跟住再繼續睇埋頭先未睇完嗰套蜘蛛俠，睇到六點幾叫老公煮飯，我就摺埋啲衫！食完飯，咪又係繼續去吓囉，今日真係太Hea喇！

25/12/21

 25/12/21     SAT     COLD

今日冇出過門口, 因為到事頭嚟我地到開party, 朝早諗住可以瞓晏啲, 但都係8點就醒咗, 好蝕, 瞓得4 個鐘咋! 自己整早餐食啦, 3個都唔願起身! 仲爺一醒咗, 就衝咗落嚟找我, 因為佢見到床邊有聖誕老人送佢的NURF GUN, 佢high到根本出唔到聲, 個樣真係好好笑, 好在有拍下啫, 佢堅係信係聖誕老人送, 真係夠哂天真可愛! 終於大家食哂早餐, 又要睇造星總決賽, 邊睇邊等張家來! 賽果冇咩驚喜, 都係大熱啦, 所以都係一般! 4點幾佢地過到嚟, 老公就負責整嘢食, 我地就攻打四方城, 真係好多年冇打過啦, 子元更加係第一次玩添, 唔覺唔覺四圈玩到9點先開飯呀! 食完飯都係吹吓水啦, 佢地11點幾都走啦, 琴晚玩到咁夜, 大家都冇咩力啦, 老人家眼瞓啦!

24/12/21

 24/12/21     FRI    COLD

今日係忙碌的一天! 朝早照常hea吓先, 老公返咗工, 我都要揍德仔, 10點幾出去入埋貨, 因為之後兩日超市咩都唔開, 仲誇張過年初一, 所以菜菜肉肉都要預備定! 買完德仔11點就過來, 又要煮飯早啲比佢食, 等佢瞓咗晏覺我就可以煮我地的午餐同食嘢, 2點幾佢爸爸嚟接番佢, 我又出埋糧啦, 今個星期OT咗4個鐘, 總共有200磅呢! 之後又忙於處理今晚party啲嘢, 整紅豆糕啦, 執嘢啦等等, 5點老公回來就可以出發, 過到去事頭到, 就幫吓手整嘢食, 7點幾party開始, 先係食嘢啦, 吹住水咁都好正, 啲細路又睇吓電視又打吓機咁, 食完嘢執好枱就要交換禮物啦, 仲爺抽到個LEGO人頭, 佢勁唔鐘意, 因為覺得唔係玩具囉! 之後一路傾偈到兩點幾先走, 返到嚟排隊沖涼都4點啦!

23/12/21

 23/12/21     THU.    COLD

今日都有啲hea過，朝早瞓到8點，啱啱知醒可以打電話去GP到幫子元攞藥，搞掂就整早餐然後叫佢哋起身，食完早餐咪各自自由時間囉，悶到我都唔知自己見咗啲咩。諗住3點幾出去接菊菊去處理先買餸，點知佢話佢重口味，咁我都係要出去買啲餸，所以都係要出去。德德過咗嚟，然後佢哋兩公婆就去買餸，我有放電專員同德德玩，夠鐘我就請晚飯俾佢食，佢又食到好似全日冇食嘢咁，所以真係唔明點解佢唔食屋企煮嗰啲！德德返咗屋企，我就開始煮晚，子元又話餓咪早啲食，所以好早又閒！老公就要整明天的羊腩煲，好忙！

22/12/21

 22/12/21     WED.    COLD

今輞都係瞓到自然醒，諗住hea吓，點知9點幾德仔爸爸打嚟求救，托兒所有人中咗要閂門，佢11點又要開會，咁我10點幾過去打救佢，返嚟比佢玩吓，諗住煮午餐比侷食埋先䁁，點知轉個頭佢就瞓咗，咁由佢瞓啦，我hea吓先，差不多2點佢先醒，咁就一齊食午餐，然後先送佢返去。我就去GP諗住幫子元攞支氣，點知原來同的一樣要先醫生問診，即係又要打電話！咁明天再算！回家hea到老公回來就準備出發，要去睇賓仔呀，因為用炮哥張飛，又要出示COVID pass，所以早啲出發，去到可以食埋嘢，食吓pizza，漢堡咁，因為臨近聖誕節，仲有聖誕禮物比小朋友，又有得畫面，仲爺簡直全副武裝上陣！最終對車仔輸0-2呀，仲爺有啲失望啦！返屋企食埋個丁麵做宵夜，滿足。

21/12/21

 21/12/21     TUE     COLD

今日係冬至, 即係一年入面日照最短的一日, 平時喺香港又唔覺, 過到嚟其實冬天咗之後成日都4點左右就天黑, 所以都唔係咁覺得! 今朝老公起身返工我都醒埋, 咁啱阿妹又話佢地今日係食午餐做冬, 所以我仲可以襯佢送阿嫲返屋企時講幾句啦, 8點左右起身, 照正常食早餐啦, 但仲爺又話冇胃口喎, 所以同阿媽講完電話, 同子元去剪頭髮時順手去買吓藥! 同阿媽講開電話先知, 姑姐原來早幾年走咗, 但表哥佢地完全唔講, 之前打比佢地又唔接電話, 阿媽都係向阿嬸打聽先知, 雖然而家4家人分開咗喺四個國家, 冇咩可以做, 亦唔想比阿嫲知, 但都應該要比我地知道, 得個知字都要嘛! 唉...講咗比老公知佢係咁喺到話唔知佢地咩諗法! 講番今日先, 出去剪完頭髮買埋嘢就回家, 又要準備今晚做冬啲餸, 2點開始整到差不多4點多要去接德仔, 回來就冇咩要整, 等德仔閃咗就同老公再煮, 張家7點幾嚟到, 差不多8點開得飯啦, 真係好豐富, 做唔到我都有一日要負責做冬大餐, 平時一向都係食就得架啦嘛, 最後食埋湯圓, 團團圓圓! 

20/12/21

 20/12/21     MON     COLD

今朝可以瞓到自然醒, 因為唔洗返學嘛, 8點幾先起身慢慢梳洗整早餐, 然後同阿媽佢地視像吓, 今日佢地去表弟嗰到做冬嘛, 不久又要煮午餐啦, 多兩把口食, 真係冇咁方便, 要洗要煮的多好多, 2點多行出去Broadway買嘢, 已經退化到要寫低要買咩先記得到, 主要買咗星期五抽獎用的玩具啦, 本來諗住去買定退燒藥看門口, 點知冇仲爺年紀嗰隻, 唯有再找, 去埋幫事頭買勤少個冰袋就回程, 本來想去埋超市, 但仲爺又嗌攰, 我都冇力啦, 咁就返屋企先啦, 夠鐘我就去接德德, 回來都係比佢地玩, 夠鐘我就煮飯比佢食, 等佢爸爸接走我又預備晚餐了!

19/12/21

 19/12/21     SUN     COLD

今日都係節目比較豐富, 朝早子元去比賽, 咁我同仲仲喺屋企做吓家務啦, 等佢地踢完回來, 又要預備出去, 但唔知整咩咁, 總有嘢阻住出唔到, 仲仲又話覺得唔係好舒服, 但今日遇咗出遠門喎, 係咪玩嘢呀! 最終佢嘔咗一次又好啲, 比咗藥佢食, 希望冇咩啦! 終於出門口已經點幾, 先去letty嗰到買嘢食買埋條喉上去整, 3點幾終於出發到, 今日落Kingston upon Thomas, 都要差不多一個鐘車程, 去到泊好車都4點幾, 原來仲有Bonnie一家, 大家跟住炮哥行, 先去影吓相, 再去市集行吓, 但都唔係好大, 都係睇吓嘢食吓嘢, 子元食咗個朱古力又飲咗個朱古力奶, 仲有買咗熱狗, 跟住就再行咗去食晚餐, 今次係食西餐, 都幾好味! 回來後都沖涼瞓覺啦, 今日都攰!

18/12/21

 18/12/21     SAT     COLD

今日係老公生日呀, 但好似唔係好有咩驚喜咁, 係食咗餐日本嘢, 仲要都幾貴呀! 有啲赤架但都冇幾何呢! 講番今朝, 3點多起身出發接埋事頭去魚市場, 同上次差不多5點多過到去, 今次熟路咗, 好快都買齊嘢, 有帶子, 蝦, 青口, 螺! 食埋個帶子煙肉包就回程, 返得去都8點幾架啦, 仲要分裝埋攞到入冰櫃先掂, 老公就去咗補眠, 我有喺梳化瞓咗陣, 但點解啲細路都係唔明我地要補眠係都要嘈呢! 到老公瞓醒整埋個午餐, 試埋個鹽焗花螺就出門口, 先去買咗蛋糕, 再去事頭到整喉, 跟住就去食日本嘢啦, 係幾好食但有啲貴囉! 回家影相食埋蛋糕其實我已經冇咩力啦! 真係要休息!

17/12/21

 17/12/21     FRI     COLD

今朝子元已經唔洗返學, 咁我揍完仲仲就馬上回來, 準備9:15 interview, 其實都係In飯堂姐姐, 之前都見過, 所以點都有啲經驗, 最搞笑係個zoom連唔到, 最終就咁喺電話到IN, 我都估唔到自己完全明哂對方講咩, 真係有進步, 咁都IN咗20分鐘架, 今日內有消息, 都係等吓啦! 跟住就出去GP攞藥, 子元啲藥要再等下星期先有, 咁就攞咗我嗰啲先! 跟住行返去超市行吓買吓嘢先返屋企, 又要催子元去跑步, 又要煮午餐, 趕住1:30接番仲爺, 佢今日放半日呢! 回來各自自由時間, 照樣check 吓email啦, 竟然收到今朝in 嗰間學校的電郵, 成功咗啦, 請咗我做飯堂姐姐啦, 有份工可以踏出一步真係好好, 馬上同事頭佢地喺group分享呢! 夠鐘我先去接德德回來, 玩吓食埋飯就走, 我地都趕住出去, 約咗事頭佢地去Costco入貨,  一來怕真係lock down, 二來過節啦要入定貨! 先去食咗熱狗做晚餐, 跟住就買買買啦, 淨係肉都多到得人驚, 希望夠頂到兩個月啦! 差不多9點返到去, 已經快手去pack肉, 仲要將個凍櫃倉庫翻咁, 沖埋涼11點幾12點先瞓! 但唔夠一陣又要起身, 因為約咗4點出發去魚市場!

16/12/21

 16/12/21     THU     COLD

今朝老公仲要早啲起身試吓返7:30可唔可以, 所以6:30就要出門口, 返早啲放晏啲, 攞多啲OT! 我就揍仲爺返學然後去買餸啦, 返到嚟整好埋隻雞都係10點咋, 又係時間上吓網, 又要打去GP問埋啲藥, 12點多煮定午餐, 子元早放回來一齊食, 我就睇電視啦, 夠鐘就去接仲仲, 回家清潔吓, 整埋個湯, 4點幾又要出去接德德, 有玩具返嚟比佢地玩, 我就可以嘆住咁揍! 整好飯準時食, 第一個揍一個叫做醒目的小朋友真係好彩! 等佢走咗我就煮飯, 好早食完飯又可以休息吓, 明天又有一份工網上見!

15/12/21

 15/12/21     WED     COLD

今朝老公自己知醒返工, 我都放心佢自己架啦, 所以我都好快瞓番, 但到我起身啦, 子元又話今日想放假, 仲仲又咳到嘔哂痰咁, 真係好得人驚, 好在都冇咩, 就照返學啦! 然後我又去超市入貨, 買完返去又要搵工, 差不多時間又要整午餐, 真係好忙碌! 飯後都係睇住電視再找工咁啦, 今日都send咗幾份架啦! 夠鐘又去接仲仲放學, 回來要預番時間去接德德, 先揍咗仲仲去學結他, 又再行番轉頭去接德德, 再去行咗陣超市先去接番仲爺, 返到屋企又要開始整定飯仔先, 有仲爺幫我揍住先, 時間都過得好快! 6點食哂飯仔佢爸爸又到, 我又可以收工啦! 跟住又到我要煮飯, 老公今日OT, 所以都6點先返到, 都好呀開多啲工收多啲錢! 

14/12/21

 14/12/21     TUE     COLD

今日老公要正常時間返工啦, 搞到我都瞓得唔好, 3點幾又醒咗喎, 聽到電視聲, 個電視又自己發聲, 又唔知邊個制short咗, 搞到我要落樓閂番佢, 順手覆咗幾個whatsapps先再瞓, 但都瞓得唔好, 怕老公唔知醒嘛! 朝早個行程都要重新習慣番, 調配吓啲程序點做! 揍完仲仲返學就去超市買嘢, 又要諗買咩餸咁真係好攰! 回來後收拾吓就上吓網咁, 午飯後又娛樂吓, 夠鐘就去接仲仲, 回家後要佢預備好哂打波啲嘢, 等炮哥嚟接佢, 因為我出咗去接德德, 揍人地個小朋友感覺真係好得意, 可能係呢個小朋友都醒目, 所以都唔算太辛苦, 都算好彩! 加上今日佢阿爸唔再喺到睇住, 佢又free啲我又free啲, 整埋通粉比佢食, 今日仲要食得好好, 比之前多, 可能冇人喺到令佢分心! 6點多爸嚟接番佢我就可以預備晚飯啦, 今日又好有心機咁整吓餸, 大家都7點幾先返到嚟, 食完飯又要幫老公睇吓合約咁, 夠哂攰!

13/12/21

 13/12/21     MON     COLD

今日老公開始返工啦, 朝早啲時間要開始再調教過, 因為子元又要自己返學, 老公又要早出門口, 真係有啲手忙腳亂! 今日仲爺又有聖誕表演喎, 揍咗佢返學就真接喺學校門口等夠鐘先入去, 其實都係一啲好簡單的表演, 唱聖誕歌啦, 朗誦啦, 仲有跳舞咁啦, 我覺得仲爺真係好可愛, 好投入咁表演, 其實真係好開心! 睇到10點幾就去超市買嘢, 明天要幫仲爺整聖誕餐呢! 回家後收拾吓整個午餐, 跟住只係睇電視打機, 完全冇做啲有益嘢! 夠鐘先接仲仲放學, 回來安頓吓又要出去接德德, 今日試吓佢爸爸唔一齊佢都冇喊, 我屋企又有小幫手, 所以都好順利! 老公要去炮哥到攞埋嘢先回來, 又要煮飯咁, 都遲咗先食飯呢, 明天開始佢就返8點, 所以6點幾就要起身啦, 要早啲瞓!

12/12/21

 12/12/21     SUN     COOL

今日見天氣好好又暖喎, 咁就一齊去支持子元比賽啦, 因為今日作客去哈囉, 順手去遠少少! 快手整好早餐食就出門口, 都唔算太遲, 去到先泊好車, 10點開波嘛, 原來都幾好睇架喎, 最終贏2-1咋, 好險! 11點幾就完場, 等子元換好衫就近近地去番上次個商場算, 找到一個類似三餸飯的食店, 只係啲餸全部都係雞咁解啫! 食完就行咗陣買咗車用地墊同垃圾袋! 返到屋企都係好早, 老公又話要瞓陣先, 咁我咪摺咗衫先叫佢整埋後院個cover, 然後又試吓整牛丸但失敗咗, 可能真係要拍打得佢好勁,要有火雞姐咁大力先得! 晚飯老公負責, 明天起佢都要返工啦, 都要開始帶飯! 

11/12/21

 11/12/21      SAT.    COLD

今朝有一齊出去打籃球踢足球，不過琴晚落完雨，又係周圍都濕晒，唔係幾好玩。加上球場隔離間咖啡冇開，我哋又要再揸車去買咖啡，所以都冇乜打過波，同婆婆傾吓電話咁啦，反而時間過得快啲。12點幾返到屋企，哥哥唔再出去喇，咁我哋就湊埋仲仲去Broadway，先去食嘢，試咗間韓國嘢，有少少貴，但係都好好食。然後仲仲話要影聖誕裝飾，影完先至去買嘢，老公要買食物盒，下星期開始佢要帶飯，跟住再幫仲仲買咗件聖誕衫，咁佢下星期表演就可以着聖誕衫啦，返到去接埋衫就捉仲爺做功課，等佢聽日可以一齊出吓街，唔好嘥晒啲時間，老公睇埋波先至煮飯所以八點幾先有飯食。

10/12/21

 10/12/21      FRI     COLD

今日係值得慶祝, 因為老公終於有工返, 今朝去咗面試, 星期一返工, 而我呢揍咗兩日仔終於收到第一份糧, 雖然只係60磅, 但都係錢呀, 所以晚上炮哥佢地過咗飯! 講番朝早啦, 其實我都見咗份工, 好在而家主力都係視像見工, 咁我就唔洗出去又可以出吓貓睇咗住資料嚟見, 都盡咗力架啦, 唔知點呢! 見完工就去買餸, 回來後整餸之餘又預備午餐, 都係食廚餘加啲菜咁啦! 下午就睇吓電視做吓家務啦, 夠鐘又要去接仲爺放學啦, 回家後轉個頭又要出去接小朋友, 今日都好順利, 起碼冇咩喊, 係仲爺出去打籃球時先喊, 好搞笑! 食完飯仔一陣佢都走啦, 係星期一試多日佢阿爸喺到之後就只係我, 反而覺得仲好, 冇外人喺到自在啲, 希望阿B醒目啲啦! 佢地走咗我地就開始煮飯啦, 炮哥佢地過嚟食嘛, 咁又要加餸啦, 好在冰格有預備! 一路食一路吹水咁都玩到10點多, 以後兩個男人要返工, 生活又有大轉變!

9/12/21

 9/12/21     THU     COLD

今日老公要上網見工, 所以揍完子元返學佢就回來, 份工好似有下文, 叫佢明天見真身! 我就明天要網上見, 希望都有希望啦! 事頭話Broadway嗰邊超市有米賣, 所以順手過去食埋午餐, 老公就去事頭新屋整啲嘢, 我就返屋企, 今日開始要揍BB, 約咗4點喺托兒所門口等, 佢呢幾日都會過埋嚟先, 一來等個小朋友適應, 二來都要有個交接咁啦! 不過佢喺到又揍得冇咁自在, 幾日啫算啦! 煮埋飯仔比佢食, 因為個小朋友放學前先食完茶點, 所以其實晚飯佢食好少, 搞到我都唔知點煮, 不過佢都食得好比面, 算係咁! 差不多6點多佢媽媽都嚟埋接埋小朋友一齊走, 咁我地都預備晚飯啦! 

8/12/21

 8/12/21     WED     COLD

今日都係如常咁揍仔返學啦, 跟住去咗超市買嘢, 老公話要買糖整埋個西米糕, 咁我又買吓啲肉呀菜呀咁! 回家後都係上網睇吓嘢, 又有一間打嚟有得見工, 好事嚟, 努力加油呀, 可能我都要同天父傾吓, 要啲精神支持! 午餐後就睇吓電視啦, 二線劇時間全部變咗我啲婦女新姿時間! 睇完就揍仔放學, 回來預備晚飯煲湯, 又要揍仲去音樂咁, 老公又要一齊出去, 要去買椰汁喎, 順手又買咗雪糕先去接仲仲, 回來又要預備煮飯, 老公話今日喺炮哥到凍一凍咁, 又想逃學, 咁就休息一晚啦! 但係點都要出一出門去炮哥到攞番個袋, 老公成日都漏咗個袋喺人地到, 比佢激死! 晚上問吓子元啲書溫成點, 條友啲BIO都唔肯去背咁點會識, 而家積埋兩個月啲嘢啦, 我睇佢點清, 聖誕假咁長啱啦, 每日背番10個生字記吓啲theory, 希望追得番! 

7/12/21

 7/12/21     TUE     COLD RAIN

今日落咗一日雨, 只係有時大有時細, 朝早揍仔返學, 嗰條天橋又鋪滿哂沙, 真係仲唔方便囉, 都唔知邊個諗出嚟! 揍完佢同Christy行返去啦, 有人竟然向我地問路, 我都盡力答咗佢架啦, 但最終見佢行唔啱我都追番佢帶佢盡量行少啲又近啲目的地, 幫得人就應該幫! 回家後都係先做吓家務, 跟住繼續找工, 都有啲回應, 盡力再找啦, 總會成功! 午飯後睇住電視嚟用電腦咁, 夠鐘就去揍仲仲, 嗰時都開始大雨, 好彩行快啲, 成日又跟住呢個跟住嗰個咁, 快啲行仲好啦! 返到嚟開始愈來愈大雨! 等老公回來就揍仲仲去打波, 我就邊過埋啲相邊睇電視, 6點多先去煮飯, 時間啱啱好! 

6/12/21

 6/12/21     MON     COLD

今朝心情一般, 琴晚好似大家都未嬲完咁, 最終都我出聲問老公係咪未嬲完, 佢話唔係喎, 咁就當佢唔係架啦! 揍完仲仲返學, 去大街買埋嘢就返嚟, 都冇亂買嘢, 諗咗買咩就買咩! 返到嚟咪係咁做嘢囉, 家務又要做, 找工又要做, 時間都過得好快, 11點幾整個午餐食埋就睇住電視咁找工, 差不多時間就預備吓見工, 3點要teams見呢, 呢份工都唔係太有心去見, 係做加密貨幣的CS, 最得意係佢叫咗個chinese嚟同我IN, 原來要識講普通話要打中文, 突然覺得好有優勢呢, 點都好啦, 多個機會就係多個, 試咗先啦! 老公揍咗仲爺回來就準備晚飯, 今晚唔可以再逃學啦, 食完飯好好返學啦! 

5/12/21

 5/12/21     SUN.    COLD

今朝9點先知醒，明知要比賽就較早啲鬧鐘起身，結果咪趕頭趕命咁囉！結果要等佢哋出晒門口，我先至再煮早餐比自己同細佬食，跟住仲爺做功課慢個慢世魔王，結果佢哋踢完波返到嚟點幾鐘都未做得起嗰幾頁紙，老公又想出去食飯，我又想去做埋先，係呢個矛盾之下就鬧交啦，始作俑者咪陸柏仲囉，都唔知佢幾時先識反省！激動我又走咗出去佢又走咗出去，由得佢兩個細喺屋企火到我呢！過咗嚟咁耐我真係未試過嬲得咁緊要，下星期開始，每日都要陸柏仲寫下字，等佢知道咩叫做功課，佢過得太輕鬆啦！最終去咗龍鳳隔離飲茶，第一次試呢間，係幾好食但都係貴，最終喺龍鳳同超市買完嘢就返屋企，個天都黑晒！返到嚟都唔知自己做咗啲咩，叫仲爺作篇文好似叫佢起間屋咁，有冇咁難呀！

4/12/21

 4/12/21     SAT.    COLD

今朝子元要踢波，整得早餐出門口都有啲趕，去到我哋就同仲仲打下籃球，不過琴晚落完雨地下都濕，所以都唔係好打到，加上好大風，其實我想返上車吹來多啲，不過仲仲唔打波佢都要玩遊樂場，所以我都係食風食足個幾鐘！返到屋企安頓好，完全唔記得咗要打電話俾阿媽，唯有明天先至打，反正仲仲一定要喺屋企做功課！出去買午餐再買啲其他用品，但係食完午餐就各自修行。我就摺完衫清潔屋企做吓家務然後就睇電視休息，子元應該有溫下書又打機。7:00食晚飯，食完就係自由時間，我都係做我最鍾意嘅節目睇電視！

3/12/21

 3/12/21     FRI     COLD

仲爺朝早真係愈來愈唔合作, 慢到8:45都未出到門口, 比佢激死! 回家後用吓電腦啦, 老公又話要去銀行, 所以又出咗轉broadway, 中午回來自己煮嘢食啦, 老公就去事頭到, 我就邊睇電視邊拪搵工, 又send咗啲咁啦! 夠鐘就去接仲, 行到去waitrose時見到Mandy佢地, 因為要等細嗰個放活動, 見佢又係要等, 就請佢嚟屋企坐吓, 仲仲同Maegan玩得好開心呢, 差不多4點半佢都要過去接細仔, 老公都回來揍仲仲去打波! 我就煮飯囉, 今晚煮咗肉骨茶, 好正! 

2/12/21

 2/12/21     THU     COLD*

今日仲爺生日啦, 8歲啦, 但仲係好細個咁, 同8歲的子元都唔同, 果然同一條腸出係唔關事! 揍仲仲返學, 佢好興奮今日可以著便服, 又可以返去派蛋糕! 放學時佢同我講番, 佢一入課室, 老師話今日係Kadin生日, 一齊同佢唱生日歌, 佢開心到面紅喎, 又真係幾窩心, 小學都十足幼稚園咁, 你話幾開心! 揍咗佢返學, 我地就返嚟執埋啲箱, 我要搵番我啲沖涼液同snoopy毛毛拖鞋, 開哂啲箱終於都搵到, 跟住再搬番好啲箱, 20個放咗喺房, 其他太重的就喺地下算! 總算收拾好啦, 可以出去食午餐同買蛋糕比仲仲! 今日本來仲爺學攝影唔洗咁早去接佢, 但老公話都係行去睇吓佢派蛋糕派成點, 所以就過去囉! 睇完唔洗接佢咁又行番屋企, 夠4:30先接佢, 然後預備出去晚飯, 睇咗一間又係喺Broadway的食西餐, 冇得book枱啦太遲, 所以只可walk in, 仲仲都食得好開心, 少少地叫咗4份嘢食大家share吓啦, 又叫咗可樂, 我地大人飲咗啤酒, 趕住8點幾要回來睇波, 回來快食埋個蛋糕影相打卡出post, 就沖涼睇波啦! 

1/12/21

 1/12/21     WED     COLD

今朝又係趕佢地起身返學啦, 然後同老公去超市入貨, 跟住就回家收拾吓, 等我啲船運到, 佢話12-3點送, 最終2點多嚟到, 用咗1個鐘左右落哂54箱貨, 其實都算快架啦, 感覺上冇想像中咁多, 落齊貨係時候去接仔放學先, 回來後開始執, 執咗都唔知幾耐, 老公就煮飯, 主力我同子元執, 有啲未咁急切都冇開箱, 望咗一望個面就算, 可能就係咁有啲我想要的就未找到出來啦! 食完飯繼續清埋廳嗰啲箱, 我覺得好勁呀, 一晚就叫做執好哂, 起碼歸位先唔會阻住自己! 不過陸生好似冇咩幫過手囉, 雖然佢有煮飯, 但平時都有煮飯架啦! 好在隻大寶食我咁多嘢識做嘢啫! 有咩唔見明天再搵啦!

30/11/21

 30/11/21     TUE     COLD

今朝老公要我去埋炮哥嗰邊幫手, 結果搞到我有啲感親, 佢屋企實在太凍, 仲要室外幫手, 真係唔掂! 11點幾叫老公車我返去, 買少少餸就行返屋企, 邊睇電視邊做好多嘢, 又摺衫又整午餐, 又要問埋明天啲shipment幾時到, 仲要答覆埋個香港人幫佢揍仔啲嘢, 賺番少少幫補吓都好! 夠鐘就去接仲仲, 返到嚟又要趕仲爺快啲收拾好, 炮哥夠鐘就嚟接仲爺去打波, 我就煮晚餐, 老公今日又吹親, 係咁話頭痛, 回來咩都冇做, 沖咗個涼就等食等瞓! 唔通我就唔攰唔痛咩, 我都凍親背脊痛啦, 咪又係要做哂全部嘢, 有時真係幾火! 

29/11/21

 29/11/21     MON     VERY COLD -2度

今朝真係凍呀, 我都開咗件雪褸出嚟著啦, 買咗梗係著盡佢! 掛住幫架車溶冰, 子元唔記得咗帶飯, 搞到我揍完仲仲又要返去幫佢入錢等佢買飯, 然後老公logon去銀行又入唔到, 原來係因為嗰次佢過錢比我, 個額太大佢怕佢比人呃, 就唔比佢logon, 最終打電話去set番哂開通番個戶口都搞到10點幾呢! 佢就去炮哥到整嘢, 我就上網搵吓工, 食完午飯就摺埋啲衫睇電視, 夠鐘就去接仲仲, 返到嚟就預備吓晚飯啲嘢等老公回來煮! 食埋飯食埋碗就去上堂, 返嚟食個麵做宵夜, 幾充實!

28/11/21

 28/11/21.    SUN.    VERY COLD

今朝出晒太陽都係得零度，子元仲要去踢波比賽，好彩我唔使出去。差不多九點先至醒，快手叫佢哋起身，子元又要食啲藥，因為仲有少少咳。佢哋出咗去我先煮早餐同仲食，跟住就開始出去做功課，我都唔明啲功課咁少點解都仲可以做咁耐，嚟緊都要逼佢每日寫下字先得！如果子元踢完波返嚟佢都未做好，逼住要出完街先至返嚟再做，因為約咗事頭去接佢然後去Costco入下貨，今日Costco都好多人，又唔算買咗好多嘢，好目標為本咁買齊，買埋熱狗就回程，其實都係五點多，個天已經黑到半夜咁。返到去仲要買菜，老公今晚負責煮飯，咁我就開套個電視睇吓啦，不過佢又煮飯又要分返啲肉，結果九點先開飯，真係好慢！所以10點幾11點先至可以休息！

27/11/21

 27/11/21     SAT.    COLD

今朝子元都係話唔去練波，所以唔洗急趕，慢慢煮早餐食！10點幾出門去同仲爺買生日禮物，佢唔係要玩具，而係要結他，所以就去買咗支木結他！突然接到炮哥電話，話玻璃屋漏水，所以我地就過去睇吓，仲爺好搞笑，係咁幫佢地手砌傢俬，最終佢留咗喺到幫手，然後我地就去B&Q換貨買料，再去埋買生日汽球今晚party用！回去接佢已經3點幾，回家快手佈置，4點多佢地都過來，可以早啲玩吓，我哋就整吓嘢食，炮哥仲帶埋一大堆生蠔過來，食得好開心呀！然後就係打邊爐食蛋糕吹水，快樂不知時日過，仲爺收埋佢嘅禮物，係Harry potter洗樽，開心到佢呢！佢好喜歡今日的生日會！佢開心就得！

26/11/21

 26/11/21     FRI     COLD

今朝仲爺又唔合作, 加上子元唔洗返學我又唔知行程係點, 都唔知點煮早餐, 最終老公車我地去學校, 車我去買埋菜就回家, 佢就直接去事頭到, 我就開始吹水時間, 同IVY又傾咗一輪, 又同Nicho Whatsapps吓, 因為佢下年2月過嚟啦, 暫時佢係最近我嗰一個, 渣車都係大半個鐘車程算好近架啦, 都真係開心, 又叫佢幫手買啲藥! 之後都係煮吓午餐找吓工睇吓電視咁啦, 夠鐘去接放學, 真係勁凍囉加埋落雨! 今日炮哥車仲爺去打籃球, 然後老公煮晚餐, 咁我可以努力在電腦上啦! 

25/11/21

 25/11/21     THU     COLD

今日子元家長日, 但都唔係好知啲家長日係點, 成績表又唔似成績表咁, 但都有佢有quiz過的科目得咩級數, 都唔係好架啦, 不過好多科都冇讀過, 第一次讀係要啲時間, 但我希望佢學期尾可以去到6-7啦, 咁先有機會考好個GCSE! 返屋企等佢換番套便服就出去broadway買番條練波用的長褲, 今個星期六日得番2度, 都要準備吓! 然後去咗榮業行食嘢同入貨, 因為星期六同仲爺開surprise birthday party, 所以要準備吓打邊爐嘢, 仲再去broadway睇多次蛋糕氣球等物資, 返到嚟又再找吓工, send吓CV, 老公就整羊腩煲! 收到上次喺超市撞到個香港人的電話, 問我可唔可以幫佢揍小朋友, 其實而家未有工, 賺番少少外快都好, 幫補吓嘛! 多多少少都好! 見今日有時間就同仲爺一齊整埋棵聖誕樹, 但啲燈唔夠長圍哂全棵樹, 唯有明天等老公去換過長啲的款! 

24/11/21

 24/11/21     WED     COLD

今日整早餐先發現冇奶, 所以揍完仲仲返學又要去超市買嘢, 順手去買埋豬肉, 咁就可以包雲吞囉, 所以又用咗一個上午喺廚房, 試埋用隻英國皮去包都係唔得, 但就似普通鮮蝦雲吞嗰種囉, 唔係上海雲吞, 睇嚟我都要學自己整皮先得啦! 午餐就係咁試食囉, 試唔同皮唔同厚度等等, 咁就當一餐啦! 睇完電視開始又再send 吓CV, 希望有回音啦! 揍咗仲仲放學又要預備晚飯煲湯, 再揍仲仲去學音樂, 回來又趕吓煮飯咁啦, 因為今晚又要去上堂, 都係嗰句幾廿歲嚟學英文, 真係覺得自己好好學啫! 今日事頭佢地又偷懶, 因為炮哥想油埋間屋先! 上完堂返去笨元已經喺床瞓咗又唔閂燈, 仲爺就係咁彈ukulele, 明天子元家長日, 唔知有咩講呢!

23/11/21

 23/11/21     TUE     COLD

今朝諗住去附近個job center睇吓係咪有得找工, 點知嗰到係社署唔係勞工署, 所以只係幫找唔到工的人申請福利, 唔會幫人搵工, 得個吉! 咁就去龍鳳買嘢啦, 我地都成個月冇去過中超啦, 入完貨老公又去幫炮哥整屋, 我就返去收拾好買回來的, 再煮午餐食, 不過都係食廚餘咋! 食完邊睇電視邊send 吓CV, 跟住又做吓清潔咁, 因為廁所都幾dirty, 佢地三個真係可以唔理照用嗰吓好嘢, 我諗我死鬼咗真係會冇人做家務囉! 夠鐘又要揍仲仲, 回來比啲嘢佢地食吓, 老公又打嚟叫我買賓福特對車仔的波飛, 買親飛我就好緊張架啦, 最終只係買到兩張飛, 要明天再睇吓買唔買到! 等佢出咗去打波我就煮飯, 要煲湯仲要係三文魚頭湯都要啲時間! 等佢地返到嚟啱啱好食得, 食完洗碗沖涼休息, 咁又一日!

22/11/21

 22/11/21     MON     COLD

今朝起身都好凍呀, 又得番體感2度! 揍咗佢地返學, 老公要去攞郵件, 跟住就返屋企整吓銀行嘢先, 想開個Saving account, 但又開唔到, 反正都要去broadway寄嘢食嘢買嘢, 咁就順手去銀行問埋啦, 先去寄件再去食嘢, 然後就去銀行, 老公又要入番張票, 問埋位小姐點處理個戶口, 佢要改番我個課稅地點做英國入埋NI number, 再返屋企自己申請啦, 完成哂去買少少嘢就返去, 老公又要過去幫炮哥手整屋, 我就回家睇陣電視再去揍仲仲, 回來不久又要開始煮晚飯, 今晚要上英文所以要早啲食飯呢! 事頭今日唔舒服呀所以佢地今日冇上, 得我一個咪專心啲囉! 上完堂有糖水食, 事頭煮咗木瓜雪耳呢, 好好味呀!

21/11/21

 21/11/21.    SUN.    COLD

今日時間都過得快，朝早瞓到9點先起身，又趕住叫佢地起身，子元要去比賽，食完早餐捉仲爺做功課，但係做咗好耐啦，做到子元踢完返嚟都未做完，真係唔明點解要做咁耐！叫老公煮午餐食完差不多出門口，炮哥帶我地去wet，之次central London soho嗰頭睇燈飾，炮哥最鍾意影相，我地又可以痴相影，邊行邊睇邊影吓相咁，仲買咗間好好食嘅河粉返去，今晚可以炒牛汀河。玩到5點幾6點回程啦，天都黑哂！返到嚟啲細沖涼先，仲爺終於迫到我去臨界點，因為佢又玩哂支洗身水，我打完佢要餐再罰佢企咗出花園食西北風，再喺屋入面企，然後全晚唔啋佢，唔知佢係咪真係會記住自己錯咩！

20/11/21

 20/11/21     SAT     COLD

今日8點幾起身啦, 子元要去練波, 仲仲就跟埋去打吓波再玩吓遊樂場咁, 玩足兩個鐘啦佢, 12點多先走, 返屋企買埋午餐啦, 食完就開始hea, 不過要先打電話同婆婆嫲嫲傾吓電話, 都傾咗好耐呀! 跟住就無咩做, 等開飯咁! 食飽飽咪洗碗沖涼休息! 明天炮哥約出去睇燈飾, 又有節目!

19/11/21

 19/11/21     FRI     COLD

今日都係過得好平凡啦, 朝早都係嘈嘈閉咁叫佢地快啲快啲, 趕哂返學就去買餸, 都係簡單買啲菜呀肉呀咁! 回家後咪又係找吓工, 傾吓whatsapps咁囉, 八掛問吓我個位請咗人未, 終於請咗人囉, 咁Ivy就唔洗咁辛苦! 到佢要走時可以pass哂啲人比條新人, 阿姐應該冇咁黑面! 午餐後都係睇吓電視算啦, 工找得七七八八, 睇完就接仲爺放學, 返到嚟又激我, 可唔可以好好做好回家後的每一個程序唔係啲嘢周圍飛呢! 到佢出咗去打波我就煮飯啦, 邊睇番造星2邊煮, 感覺輕鬆愉快! 回來食完飯沖埋涼就休息吓啦!

18/11/21

 18/11/21     THU     COLD

今日終於有人嚟換新boiler, 所以一日都要有人喺屋企, 我地都未出門口工作人員就嚟咗, 咁老公先車咗笨元返學, 我就等佢回來接更我先揍仲仲, 然後去買少少餸就回來, 跟住就一直喺屋企, 找吓工睇吓電視, 中午老公出去買埋午餐回來, 因為廚房用唔到呢! 食完繼續用電腦, 夠鐘就各自揍仔, 最終整到6點幾先完成哂, 但就有番個溫暖的家! 清潔完先可以煮飯, 還要吸塵抺地做清潔呢! 好在預咗今日會遲煮飯所以諗定啲簡單嘢煮! 

17/11/21

 17/11/21     WED     COLD

今日又有得見工, 然後又失敗啦, 不過今日係又in得好咗啲, 算啦, 都係要儲吓經驗架啦, 一定會得架! 朝早揍仲仲返學, 發現其他同學著啲衫唔同, 一問之下先知佢地今日有活動出去跑步, 咁佢著西褲點跑啫, 所以送完佢上課室馬上返去攞衫比佢換, 趕得切閂門前入去幫佢換埋先走! 回來後抖抖老公就車我去見工, 我今真係有準備架, 條條問題都得到, 做份Paper又做得好架, 但都係冇學校工作經驗啦! 見完行去Westway cross 買玩具比仲爺做聖誕禮物, 去食埋午餐, 再去炮哥新屋, 等老公整陣嘢先, 我就陪loletta吹吓水, 3點到就車番我地去揍仔放學, 然後又要去學ukulele, 回來又要趕煮飯, 因為今星期三又要去上堂啦, 簡單煮腸蛋飯咋! 今日上堂講grammar, 有啲唔明但了解吓都明, 臨尾阿sir問我地新嚟幾個有冇唔明等等, 我就話可以解釋多啲, 因為我啲Grammer好weak, 但佢就話我係冇自信啫, 佢唔覺得好差! 呢到啲人真係好有禮貌! 成日比到人自信!

16/11/21

 16/11/21     TUE     COLD

今朝又凍番好多, 但都有四五度, OK啦! 整好哂早餐又要催佢地快啲出門口, 仲要倒埋垃圾咁, 成日叫佢地做都唔郁, 好可惡! 揍完仲仲返學, 回來後老公車我去埋買餸, 佢就去事頭到, 我就返屋企準備吓啲餸, 今日唔係好願搵工咁, 又想抖抖先, 明天又有一份要見, 心理上又要準備吓! 跟住見肚餓又煮午餐, 子元今日放早, 佢返嚟又要整飯佢食, 跟住我就係到睇電視, 夠鐘就揍仲仲放學, 回來又要預備佢去打波, 我就放慢嚟整晚餐, 期間終於等到門口架車走咗,馬上攞紙皮出去霸住個位, 然後又準備吓明天見工嗰啲, 其實睇咗都唔係好記得, 但都叫做盡咗吓力! 

15/11/21

 15/11/21     MON      COOL

今日有兩份工要IN, 但好不幸兩份即日回覆唔成功, 除咗只可當多個經驗, 都冇咩可以講, 我知從頭嚟過係唔易, 但又唔可以周圍講尤其事同遠方的親人時, 朋友就成了舒發途徑, 好在都仲有啲朋友喺呢到, 諗番都幾得意, 有時中學的朋友當年未必最FD, 但十幾廿年後, 你會發現當年的情宜到今時今日係會成為一個根基, 你會放心同佢講, 因為大家都人在異鄉, 明白都係要個人呻吓! 好啦, in完哂就要開飯, 食飽再努力過, 果然又收到通知星期三又有得IN, 加油呀! 今晚要返夜校, 老公話佢回程我就已經開始預備晚飯啲嘢, 有少少趕但都準時去得切返學, 同老公分開兩班上堂呢, 今日你話好難又未算但都會有啲覺得需要用腦, 幾廿歲先嚟學英文真係好搞笑, 果然係學海無涯呀! 話唔定過咗嚟, 人生又有一番新氣象, 幾廿年後諗番會覺得我的人生都算有唔少回憶, 唔係返工放工唔知做咩咁就過咗! 放學有事頭的蕃薯糖水做宵夜, 雖然返到去仲要洗碗清潔, 但都幸福呀!

14/11/21

 14/11/21     SUN     COLD

今日心情唔好, 一起身就心情唔好, 所以之後樣樣都覺得唔好! 好地地一個星期日好似就咁浪費咗咁! 搞到我都唔想再提起今日, 總之就係食完早餐, 老公帶子元去比賽, 我同仲仲做功課囉, 跟住同阿媽傾咗陣電話, 仲仲又做咗好耐功課啦, 可以出得門口出去食嘢都已經2點幾, 但今日啲嘢閂5點, 又要出去又要泊車又要食嘢又要買餸又要同仲爺買褲, 得兩個鐘點做得哂呢, 一諗到咁又心情唔好啦, 跟住又黑面啦! 最終都算做得哂, 分頭行事囉, 返到去又冇咗個車位叉電啦! 然後都係做摺衫洗衫, 督阿哥做埋啲功課咁啦, 之前咁多時間唔做, 做唔掂又係到唔高興咁, 好麻煩!

13/11/21

 13/11/21     SAT     COOL

今朝隻隻都慢吞吞, 梗係趕唔切出門口, 所以都遲咗少少到球場, 時間關係未飲咖啡, 就試吓球場呢間小店, 味道幾好係貴咗少少, 同埋我都係鍾意濃味啲! 飲完就要陪仲爺打波, 不過個波愈打愈dirty, 所以11點多就收工, 仲爺又話要玩遊樂場, 咁就比佢玩啦, 同佢拍吓片咁! 等子元差不多踢完就上車等佢地, 因為炮哥話今日去Costco, 所以回家煮麵食先, 佢兩個就沖涼! 老公洗吓車咁, 事頭問食唔食lunch, 咁老公又話一齊食, 有啲趕咁過到去Hounslow食嘢, 然後先去咗間叫B&S Store, 佢地要買聖誕樹裝飾, 買完先去Costco入貨, 但次次入親貨出嚟都係買漏嘢, 加上今日有啲趕, 得番個半鐘就要閂門, 人又多咁, 所以都唔買得痛快呢! 買埋熱狗食當晚餐, 回程時炮哥打嚟, 話平時教開仲仲籃球個後生教練, 琴晚教完波返屋企時因為救個老人家, 比個壞人用刀殺死咗, 仲仲一聽到就開始大喊, 老公就由得佢喊, 返屋企再慢慢解釋比佢聽, 唉...人仔細細就經歷咁多呢啲死別, 都唔知好定唔好! 咁佢沖完涼抖吓都復完番, 希望冇咩啦!

12/11/21

 12/11/21     FRI     COLD

今日好似又冇咩搵工咁, 都係唔急得架啦, 而家間中有啲回音有得IN吓其實已經算唔錯! 今朝如咁揍佢地返學啦, 然後老公回來一齊去咗買餸先, 再去埋銀行問吓點樣開saving account, 銀行都係話你自己上網做, 咁冇法啦唯有自己上網搞! 然後去Broadway買衫, 始終本身都冇咩帶冬天衫過來, 都係要買架啦! 去M&S買咗啲料回去煮午餐, 12點幾返到去就煮啦, 可以慢慢邊食邊睇造星呢. 夠鐘就去揍仲放學, 去程時見到小路有疑似道友, 所以回程時都係行去大路嗰邊安全啲! 仲爺跟住就去打波, 我就喺屋企hea吓, 預備埋晚餐啲嘢, 今晚煮雞煲, 正!

11/11/21

 11/11/21     THU     COOL

今日本來係話嚟換熱水爐, 但最終因為個工人病咗要改期, 咁你出聲嘛, 要我打去問先知, 可惡! 咁揍咗佢地返學老公就回來, 我邊摺衫邊睇吓戲, 睇咗雷神囉! 本來老公叫我一齊過炮哥新屋嗰邊, 但我又冇嘢幫到, 不如喺屋企算, 找找工睇吓電視! 仲仲今日放學有得上課外活動放4點半, 咁老公揍咗子元回來, 我地先出去買埋餸再去接放學. 返到屋企已經黑哂天, 但都差不多6點先煮飯, 仲爺肯睇英文書同聽phonics, 但就要我陪佢玩天天玩樂園! 晚飯後都係7點多, 早天黑就係咁, 早咗好多眼瞓.

10/11/21

 10/11/21     WED     COOL

今日老公唔過去炮哥到整嘢啦, 因為我今日有份叫kitchen assistant的工有得IN, 佢車我過去, 但去到我都係接受唔到做要做的工作, 洗嘢其實係OK, 但今日所謂試其實又冇錢收架喎, 我又覺得蝕, 加上我又真係接受唔到日日咁洗嘢, 若果好近唔洗撘車的或煮咁做3個鐘都可以, 但又要撘半個鐘車去做, 總之我都係放棄咗! 等我再試吓係咪找唔到Admin工先啦! 結果15分鐘我就上番車, 諗住去食拉麵, 但原來12點先開, 唯有去行咗日本鋪, 買咗少少食材咁啦, 再去starbuck飲埋咖啡, 夠鐘先去食接麵! 食完去咗B&Q買咗啲聖誕樹掛飾就回家, 各自揍仔放學, 仲爺又要去學音樂, 我地就去超市買晚餐材料, 喺超市撞到個香港人, 佢想找人幫手揍小朋友呢, 但老公話其實可能要請有註冊的childminder, 睇吓點先啦! 返去煮好飯早啲食, 因為今晚要去返夜校呢, 免費有得學喎都好呀! 同埋炮哥佢地一齊學, 今日先係做assignment先, 分咗班下星期一開始上! 

9/11/21

 9/11/21     TUE     COOL

今朝又比陸生激死我, 明明我琴晚問佢回收係咪今朝佢攞出去, 到今朝叫佢時佢又話要揍子元返學, 咁係咪可以快手啲做埋先呢, 根本就係借口, 然後我攞埋啲紙皮出去啦, 架仆街垃圾車又話唔收, 因為入面夾住咗有少少發泡膠, 頂佢呀! 白做! 好嬲呀! 因為我係去完超市回來發現, 再追到出大路嗰到問, 幾耐冇跑過咁遠路, 真係好嬲呀! 返到屋企又要做公事啦, 問吓呢樣問吓嗰樣咁, 12點又要電話interview, 為放鬆心情, 之前就睇咗膠戰輕鬆吓! 見咗半個鐘, 我都覺得自己算係咁, 喺電話聽其實都幾辛苦, 但我都聽到7-8成算係咁, 又答到都可以啦! 見完可以食午餐啦, 然後睇造星, 跟住揍仔放學, 老公回來就揍仲仲去打波, 我就睇住造星2煮飯! 仲仲又咳番, 藥就食哂, 最後比埋氣佢聞好似好啲, 都要準備定多啲藥先得.

8/11/21

 8/11/21     MON     COLD

今朝又凍番, 不過都開始習慣到, 揍完仲仲返學, 返去同老公會合, 先去郵局幫個FD寄嘢, 最終都係寄空郵, 其實都真係幾貴, 件貨先4磅, 運費就23磅! 寄完就去broadway, 老公要買褲, 買鞋, 嚟緊凍我地對波鞋都頂唔住, 都要買到防水防滑先得! 買完一齊去買埋餸就回家, 佢就過炮哥到! 我又上網啦, 今日冇找工啦, 因為有幾份有回音, 呢幾日都有得見吓咁, 好事, 咩都好啦都有啲機會先嘛! 所以搞完一輪食埋午餐又要出去揍仲, 返到嚟見子元仲未返又有啲擔心, 打比佢先知冇巴士, 因為佢今日打完針, 怕佢辛苦啫, 老公又過唔到去接佢, 最終都要等巴士架啦, 返到嚟沖完涼就一路瞓到食飯, 陰公豬! 仲爺開咗尤魚遊戲一齊睇, 老公又遲返, 樣樣都慢慢咁, 9點先食完餐飯呢! 

7/11/21

 7/11/21     SUN     COLD

星期日子元要踢波, 咁食完早餐老公就揍佢出去, 我就同仲爺喺屋企做埋啲功課, 又同婆婆佢地視像吓, 佢地同阿嫲食生日飯呢, 等老公回來佢又喺到整個羊腩煲啲嘢, 約咗炮哥佢地今晚過來食飯! 佢地又問打唔打波, 但去遠啲, 應該係因為佢地喺啲group到有約人, 咁叫埋我地一齊去, 咁都係打吓波啫, 係仲爺成日覺得自己好勁可以同埋啲大人一齊打, 冇諗到人地一撞佢就飛開! 但就真係有人比人飛開, 勤少竟然推到炮哥先撞埋鐵絲網再踢波地, 仲要爆缸, 眼眉爆咗, 好在都仲肯到血, 我又有膠布咁頂住先啦, 真係比佢嚇鬼死! 打完返去準備啦, 6點幾過到嚟食到9點幾要走啦, 明天要返學呢, 又吹水吹咗一晚.

6/11/21

 6/11/21     SAT     COOL*

今朝7點就醒咗, 假期可唔可以瞓晏啲呀! 今日子元要練波, 咁食完早餐收拾吓又差不多出去, 仲爺就可以打籃球, 陪吓佢玩都要力, 但唔玩就好凍, 所以都係要郁吓! 練完就去broadway, 好多嘢要做, 先係食午餐, 跟住買衫, 終於都買咗件最重裝備, 雖然要50磅, 但已經係算平, 落雪都冇問題嗰隻! 跟住就買埋睡衣同帽等等, 都要要置冬裝架啦, 本身帶過來的又唔夠, 寄船的其實亦唔多, 因為喺香港都唔洗著冬天衫! 幫仲爺捚埋眼鏡就回程了, 放佢兩個喺屋企我地就去買餸, 明晚約咗事頭過來羊腩煲呢! 

5/11/21

 5/11/21     FRI     VERY COLD

今朝起身見到個氣溫, 真係好難想像0度係點, 體感仲要-2度, 除咗著多件衫都冇咩可以做! 整番啲有溫度的早餐比佢地食咗先出門口, JEEP塊玻璃窗結哂霜, 要淋熱水先可以快速解霜, 到我揍仲爺出去, 揍完都快啲返屋企, 唔想留喺室外! 返到去咪又係好努力咁找工作囉, 而家日日都係咁, 希望快啲成功啦! 午飯食咗牛肉河粉, 煮咗個菜咁啦, 睇吓電視咁又夠鐘去接仲仲, 老公點幾就返咗嚟, 因為有份工話會打比佢, 原來係我睇到幫佢send嗰份, 但原來佢啲英文真係只聽到一兩成, 其實幾出事, 冇諗過佢真係咁聽唔掂, 都真係要努力上嗰個英文班先得, 就算比佢找到工都聽唔明人地叫佢做咩! 炮哥幫我地揍仲仲去打波, 咁我地可以煮好晚飯佢返嚟就有得食, 10點未夠就已經眼瞓, 早天黑果然係會令人早啲休息!

4/11/21

 4/11/21     THU     COLD

今日好似冇琴日咁凍, 但對香港人嚟港, 已經係一個嚴冬架啦, 再凍啲點算呢! 揍咗仲仲返學我就行咗去遠嗰間Lida查探吓, 但原來都係嗰啲嘢, 所以都唔洗特別嚟呢到買. 返到去咪又係整吓嘢食搵吓工咁啦, 時間都過得好快, 飯後就睇電視摺衫, 3點多又要去揍仲仲放學啦! 老公今日都好早回來, 所以又早啲準備晚飯, 因為今晚又成就解鎖, 整咗滷水豬大腸同金錢肚, 好好味呀, 真係可以攞去賣! 

3/11/21

 3/11/21     WED     VERY COLD 1.8度

今朝起身得番1.8度, 唔出間屋其實都冇咩, 屋入面都真係夠暖! 揍完仲仲返學就回家, 都係狂上網搵工, 又做吓公務咁啦, 12點幾整番熱個雞湯加麵做午餐, 真係好正! 睇完造星差不多又要接仲爺放學, 4點幾佢又要學音樂啦, 同老公一齊去揍佢, 又去超市行吓, 老公話要試埋上次買到炒飯嗰間的炸魚薯條, 都幾好食! 7點多食埋晚飯就hea吓啦!

2/11/21

 2/11/21     TUE     VERY COLD

今朝一睇天氣, 竟然得番3度, 真係要著夠衫先好出門口, 揍仲爺返學係要行過去呢, 一出到門口就口都出煙, 仲爺玩得好開心呢! 揍完佢返學我去買埋餸先回家, 凍凍地食花膠雞湯就最啱, 買好嘢回家就邊睇機邊整好晚飯啲材料, 預備埋午餐個粥, 又係時候找工, 努力加油! 12點幾又係時候食午餐睇電視, 接仔放學咁, 回來又忙忙亂亂, 要預備晚飯, 又要準備仲爺出去打籃球, 老公叫我跟埋炮哥車過去, 怕今日太凍仲爺唔抺汗唔著會凍親, 咁咪跟埋去囉, 佢自己就去咗剪頭髮! 吹吓水咁同炮哥, 又兩個鐘啦! 回家仲未有飯食呢, 老公都唔識遇時間! 

1/11/21

 1/11/21     MON     COLD

今日子元仲未要返學, 所以淨係我揍仲爺返學, 老公就出去整炮哥間屋, 子元就喺屋企, 我就去買吓餸, 跟住都係上網找吓工, 夠鐘就煮午餐, 食完睇吓電視, 然後又夠鐘揍仲爺放學, 佢話要去遊樂場玩就比佢去, 但下次我都係著夠衫好啲, 條友又係唔肯走, 都唔知我有幾凍, 個遊樂場得佢同小姐喺到玩咋, 人地就話等細佬放school club, 人地返去學校接細佬佢又要跟, 我梗係唔比啦, 佢就發脾氣, 真係迫我爆佢! 返到去都係繼續上網, 老公回來就煮飯啦, 天開始早黑, 有時真係要睇鐘先知咩時間!

31/10/21

 31/10/21     SUN.    RAIN *

今朝6點幾就醒咗，因為今朝剛轉冬令，某程度上係多咗一個鐘，所以我都係7點幾先醒咁解！整好早餐子元佢地倉完就出去比賽，但又風又雨咁，最終取消11號返咗嚟，咁就諗吓去邊，去咗榮榮行食茶記兼買嘢！有啲嘢始終要中超先有得買，都係要幫襯。去完中超就去咗就近的商場，但原來都係冇咩行，見佢免費泊車就算，4點多就回程，今日又會早天黑，早啲返去玩哈囉喂好過！行咗兩條大街，都有幾間成功，我仲識咗後街一家人添。食埋晚飯都係8點幾咋，冐天仲爺要返學啦！

30/10/21

 30/10/21     SAT.    COLD

今朝八點幾先起身，跟住煮早餐，然後老公就湊哥哥去練波，我就同仲仲喺屋企，都冇咩做，就捉佢讀吓英文書計吓數，然後睇吓機咁囉。然後做同婆婆嫲嫲傾吓電話，差不多一點佢哋就返嚟喇，等子元沖完涼，就去Broadway 食嘢買嘢 ，搞掂晒啲嘢就去睇 Halloween，原來都要排好長龍，我哋排咗半個鐘，其實嗰個地方只係農莊，但佢有好多萬聖節佈置，仲仲最驚就見到蜘蛛，子元就全程睇電話打機都唔知佢睇唔睇咗啲咩。行完就去超市買埋野返屋企，係咁嘅佈置吓個萬聖節門口，等聽日啲小朋友會嚟敲門攞糖，跟住老公就煮晚。

29/10/21

 29/10/21     FRI     COLD

今日又係冇出過門口啦, 瞓到8點幾9點先起身, 少有, 可能知道下星期佢地要返學啦, 又冇得瞓咁晏! 起身食早餐啦, 跟住老公就出去, 我就開始繼續找工作, 做工公務等等, 到點幾細佬叫餓就煮午餐, 都係食吓餐肉烏冬咋, 食完繼續做咗陣公務就開始邊摺衫邊睇劇, 又睇啲舊劇咁啦, 到老公回來就煮晚餐, 今晚仲有蟹食, 上次喺魚市場買嗰啲呢, 不過殼好硬, 下次要再出力啲打碎佢先! 

28/10/21

 28/10/21     THU.    COOL

今朝瞓到八點幾先起身，兩隻豬仔起咗身喺度睇機，咁我咪煮早餐食囉，食完捉哥哥做吓功課先，都叫做做咗啲有益嘢，仲爺就掛住食雞，等啲衫乾好埋哋就準備出街啦，今日炮哥介紹咗我哋去Central倫敦嗰邊玩，不過佢哋冇咁早過去，咁我哋就自己過去先。都揸咗大半個鐘頭車先過到去，又要泊車，食埋午餐，佢哋差不多過到嚟，先去超市買咗嘢，咁先可以免費泊車，炮再帶我哋去另一個地點泊街標，跟住就可以行市集啦，影吓相睇吓啲嘢食咁都冇乜買嘢，只係買咗珍珠奶茶。行到五點幾六點要返去攞車啦，返屋企就整燒雞等等嘅食物，快手快腳食完就可以休息。

27/10/21

 27/10/21     WED     COOL

今日忙忙地咁啦, 老公今日冇過去整屋, 因為boiler下午嚟整, 咁朝早就去寄信買嘢, 仲爺終於都寄咗佢封比聖誕老人的信! 寄完就去broadway, 都係買吓生活用品, 時間關係12點幾都要回程, 去埋samsam買午餐, 同買啲奶呀菜呀咁, 返去邊睇上流戰爭邊食嘢, 跟住就上網睇吓盤同等整boiler的人嚟, 其實佢都整唔到啲咩, 因為先天不足, 首先個爐根本就support唔到7個radiator, 加上偷工減料啲喉用窄咗, 咪出唔到水去咁遠囉! 即係冇得救, 好在喺broadway見有曖爐減價已經買咗個細細地頂住先! 然後我要休息了, 今日又好攰咁, 等老公監督完子元跑步, 個bolier又F9, 好在老公最終找到辦法處理, 唔係熱水都冇呀! 近來情緒有啲depress, 可能真係要找到工個人唔再屈埋先好啲! 

26/10/21

 26/10/21     TUE     COOL

今日冇出過門呢, 朝早已經好番好多, 又要做工人, 煮早餐比佢地食, 然後老公就出咗去啦, 我最終都食咗粒止痛藥叫做好啲, 開始做吓家務郁吓個人, 午餐煮個米粉配番琴晚食唔哂的魚蛋同菜, 但都未係好有胃口, 下午開始hea吓, 仲爺就係咁痴住我唔放, 就陪吓佢啦! 黃昏時仲爺又瞓咗, 好驚佢病囉, check咗冇發燒, 好在啫! 可能係琴晚瞓得唔好呢! 等老公回來煮飯, 然後都係沖涼休息啦!

25/10/21

 25/10/21     MON     COOL

今日係因為要去超市買肉先出一出去咋, 兩隻豬開始term break, 老公又出咗去整炮哥間屋, 咁我唯有喺屋企, 朝早食完早餐就上網搞咗一大輪嘢, 都係學校呀維修呀咁啦, 出去買埋嘢回來煮午餐, 邊食邊睇電視啦, 黃昏開始愈來愈唔舒服, 又肚痛又骨痛咁, 食飯前沖咗涼先, 就連晚飯都食唔落, 一早就上咗床瞓, 手凍腳凍咁, 瞓到唔知幾時先好啲!

24/10/21

 24/10/21     SUN     COOL

今朝7點幾就醒咗, 但都hea到8點多先起身, 又要快手梳洗整早餐, 因為子元今朝場波比較早, 9點幾要過到去, 仲要作客喎, 好在都喺10點前去到, 上半場我都有睇, 但真係凍呀, 都係同仲爺上番車穩陣, 最終贏5-3, 但子元話佢啲隊友踢到好差囉! 近近地去Harrow附近商場食嘢, 行咗陣, 2點幾就返到嚟! Loletta打嚟話出公園玩, 咁就出去玩吓啦, 玩到4點就走, 因為今日曼聯對利記, 炮哥要趕返去睇呢, 上半場個台係咁斷, 搞到睇唔到嗰4個入球, 係曼聯比人入4球, 下半場睇到啦, 都比人入咗1球, 最終輪5-0呢, 好得人驚! 睇完老公就煮晚餐, 專登去買咗bb波菜同芝士, 加埋煙肉炒通粉真係好正! 宵夜食埋啲生蠔, 幾串!

23/10/21

 23/10/21     SAT     WARM

今朝又暖番啲, 好在暖番咋, 因為3點半就要起身, 4點炮哥嚟接我地, 出發去魚市場, 一個鐘多啲就過到去, 又係新奇好玩的地點, 見到啲嘢10磅有5條倉魚, 2kg蝦都係12磅咁, 點都要入番夠貨, 因為平時真係好難買到海鮮, 我地最後買咗5條倉魚(10磅), 4條青衣(10磅), 2KG蝦(12磅), 1KG帶子(25磅), 1KG蟹鉗(12磅), 生蠔3盒(35磅), 應該夠食個幾月, 魚我地又唔係日日食, 一星期都食到一兩次! 買完就要食早餐, 喺番魚市場入面, 食咗個煙肉帶子burger加咖啡都係6磅, 好好好好食! 差不多7點要回程了, 返到去已經差不多8點, 啲細都起哂身, 老公將啲海鮮分好就冰咗佢, 跟住佢又要揍子元去練波, 我就同仲仲喺屋企, 先比早餐佢食, 然後就叫佢寫信比聖誕老人, 佢超認真咁又搵想要咩玩具, 封信雖然啲字係抄, 但其他都係自己寫, 其實都好叻仔! 然後又話要同我打機, 就陪佢打吓! 然後午餐就炒飯, 等子元踢完波返嚟食! 食完我就啱啱好時間睇903風火雷電, 姜B真係好好好吸引呀, 比佢迷死! 睇完叫醒老公出去中超入貨, 存夠糧, 呢幾個星期應該買菜就夠! 回家後就煮晚飯, 試埋生蠔帶子等等, 滿足! 今晚要早啲瞓, 我好攰了!

22/10/21

 22/10/21     FRI     COLD

今朝起身得6度唔夠, 真係要出動羽絨先掂, 不過都係著咗3件衫啫, 喺香港若果6度, 我諗已經著到好誇! 仲爺今日唔洗返學, 所以趕咗佢兩仔爺出門口揍咗子元返學, 老公先返嚟車我同仲仲出broadway, 要去郵局囉, 順手再入咗啲冬天貨, 主要係仲爺買咗件大褸同保暖底衫, 我就買咗手套! 買齊我同仲爺就返屋企, 老公去炮哥到! 我淨係處理電郵都搞到3點幾, 呢到有時啲做法真係令人好困惑, 點解想叫人嚟整個boiler都咁難, 4點幾老公揍仲仲去打波, 我就預備今晚用肉骨茶打邊爐, 真係好正呀! 事頭一家都過咗嚟食, 炮哥又試幫我地睇吓個boiler, 但都係冇咩辦法, 都係等下星期睇吓點覆! 今晚唔玩咁夜, 因為半夜我地又出動, 去魚市場, 真係又一個體驗, 諗起都眼瞓!

21/10/21

 21/10/21     THU     COLD

今朝起身好凍呀, 明明琴日仲好熱架嘛, 但今朝得番8度, 真係可以好誇張! 快啲叫佢地起身, 仲爺還要變身做伊之助呢! 揍完仲仲返學, 炮哥嚟幫我地整番好部printer, 所以兩家男人各有各長處真係好事! 今日冇咩心機找工, 喺琴日見完agent個網頁睇咗同send咗啲, 但完全冇feedback, hea吓先啦! 煮個午餐食埋睇吓電視咁, 又要接仲仲放學, 應承咗今日比佢去公園玩, 但一玩又唔肯走, 佢就跑到出哂汗, 我就吹到變雪條! 4點半都要捉佢走, 返去沖涼啦, 又要準備晚飯, 子元比老公捉咗去跑步! 晚飯後又可以沖個涼暖暖咁休息!

20/10/21

 20/10/21     WED     WARM

今朝都係要揍仔返學啦, 然後就返嚟準備見工啲嘢, 有得見都係好事, agent又好公司又好, 試試吓就會有進步! 見完兩轉冇力啦, 整個午餐食吓先, 試吓新買嗰隻河粉, 似樣喎好好食, 配埋牛肉好正! 食完又係時候睇劇, 老公兩點幾返咗嚟喎, 咁揍完仲仲放學, 去學音樂時一齊去買埋菜今晚輕輕打邊爐, 係花膠冬菇雞煲配牛肉生菜同蘿蔔! 食完都係沖涼休息啦, 近來都好攰咁, 成日都瞓得唔好!

19/10/21

 19/10/21     TUE     WARM

今日都有啲忙碌, 朝早揍完佢地返學, 就同老公一齊去Broadway買啲嘢飲埋咖啡就回家, 佢就去炮哥屋企整嘢, 我就為工作做了解, 今日有份類似要上堂咁, 睇咗個email見到要睇片做吓卷咁, 係做餐飲的, 但一路做就一路覺得自己唔適合, 所以到1點login去聽佢講時更加唔願聽, 最終電郵比嗰邊話我冇興趣, 其實都好的, 了解清潔知道自己想要做啲咩, 方向清楚啲就目標明確啲! 跟住咪睇埋電視就去接仲仲放學, 然後返到嚟又繼續再搵工咁! 4點幾老公揍仲仲去打籃球, 我就準備煮飯, 佢地返到嚟就可以快手開飯, 早啲沖涼! 然後子元竟然叫我幫佢溫書, 可能見自己英文成績出嚟唔多理想, 其他科想有交代掛, 盡咗力架啦, 我指我盡咗力幫佢溫呀, 因為都係我未學過的, 或者已經唔記得哂啦, 都係考我呢!

18/10/21

 18/10/21     MON     COOL

今朝個安博盒子唔著, 真係嚇死我, 冇電視仲唔世界末日咩! 老公叫做整得番著, 我全日都唔敢閂機呢! 揍咗仲仲返學我就去超市買埋雞蛋先, 返到去又開始搵工啦, 中午後食完凍冰冰的午餐開始抖住嚟睇資料, 跟住直情睇劇算啦, 夠鐘又要接仲, 老公send message嚟話陣間去costco, 正呀又可以買肉! 揍咗仲爺佢又話唔見咗件風褸, 又要幫佢搵一餐, 好在都搵到啫! 返到屋企又要預備出門口喎, 但有間agent又打嚟, 搞到我手忙腳亂, 總之有機會都要試吓架啦, 找到文職我就得架啦, 心滿意足! 4點幾過到去costco, 先食咗熱狗再入去睇嘢買嘢, 4個細路成日掛住玩, 大人就係咁睇嘢囉, 唉...喺呢到行呢啲超級市場已經係娛樂嚟架啦! 玩到都唔知幾點啦, 係時候返去, 簡單焗pizza同雞食咋, 因為要做肉類分割, 將買返嚟啲肉分裝再雪, 清潔完沖埋涼就休息吓!

17/10/21

 17/10/21.    SUN.    WARM

今日都係悶架啦，又冇去咩地方，朝早比炮哥msg嘈醒咗，hea到9點都起身煮早餐，子元要去踢波，仲仲就要做功課，又要迫再我火起先肯做，又文盲又唔肯學想點！終於做到點幾先做得完，子元佢地都踢完返嚟！跟手就出去買埋嘢食，去埋超市，再幫仲爺買啲咳水。返去都搵啲嘢做，執吓屋，搬番啲行李箱上所唔好阻住地方。今晚食埋塊斧頭扒，因為午餐都好遲先食，所以晚餐都好遲先食呢！

16/10/21

 16/10/21     SAT.    COOL

星期六真係放吓假先，早上老公食完早餐就揍子元去練波，我就同仲爺喺屋企做功課，然後預備午餐同睇電視，跟住搜尋吓要去嘅地方，因為今晚約咗炮哥佢哋去食buffet。老公話佢要瞓陣覺先，所以我哋四點幾先出門口，點知Google又點我行山路，明明一個鐘路程變咗兩個鐘，搞到我哋去到已經天黑，又影唔到相又睇唔到景，激死！趕到去食buffet的地方入座，算係幾多嘢食，得個半鐘食咋，不過都夠架啦！食吓吹吓水咁，諗住趕得切去睇煙花，但車程上已放緊，去到公園只睇到水尾，又要回程啦！跟車尾行公路快好多，一個鐘多啲就返到，又要捉佢地快手沖涼休息！

15/10/21

 15/10/21     FRI     COOL

今日都係無所事事咁, 係搵工搵到個人好灰咁, 好似有啲反應又唔係好啱咁, 唯有繼續努力! 朝早一路都喺屋企整吓嘢食餵飽自己, 再係咁上網上網, 努力努力! 然後夠鐘就出去接仲放學, 比佢去公園玩陣就返屋企, 等老公回來就接佢去打波, 我就出去買餸煮飯, 明天星期六應該可以出吓去啦掛, 我就嚟悶死!

14/10/21

 14/10/21     THU     WARM

今日係結婚周年紀念, 但只係出去食咗餐西餐啦, 都冇去咩地方有咩禮物咁, 係咪有啲唔開心呢實有少少架啦, 但我自己都諗唔到可以點慶祝呢, 算啦! 揍完仲仲返學就去咗行超市, 行咗大半個鐘先返屋企, 又係時候找工作, 12點幾就食午餐, 今日食沙律同罐頭魚同湯咋, 然後都係找吓工睇吓電視, 夠鐘就去接仲仲, 佢好想去公園玩就比佢玩到4點先走, 又同家長吹吓水咁! 返到屋企都係繼續上網, 老公捉咗子元去跑步, 跑完返嚟又死狗咁樣啦好乞人憎! 6點幾要出門口啦, book咗7點喺broadway附近間意大利餐廳慶祝, 都係食餐飯啫, 仲要食得麻麻地開心, 一啲氣氛都冇咁, 叫做慶祝咗有post出咁啦, 然後咪返屋企囉! 

13/10/21

 13/10/21     WED     WARM

今朝都係各自揍仔返學啦, 跟住老公返屋企整理要寄的郵件, 本來想print地址, 但搞好耐都搞唔到, 最終都係要放棄, 直接去郵局寄算啦! 去到又要買盒又要排隊, 又搞咗一大餐先寄到啦, 肚餓啦快啲去食嘢, 再去買埋少少嘢就回程, 睇埋電視就去接仲放學, 回來一陣又要揍佢去學音樂, 開心得佢呀! 我就襯嗰半個鐘去超市買雪糕返屋企再過番去接佢, 啱啱好呢! 但之後都係要出多去一次, 因為老公話事頭有烏冬心比我地食, 唔好煮飯, 咁明天帶漢堡就要出去買料! 6點多諗住老公差不多返, 點知睇GPS見佢愈行愈遠, 最終忍唔住打比佢, 佢先話車炮哥去攞嘢, 咁我又要遇時間煮餸啦, 心情麻麻...沖完涼個人先舒服番啲!

12/10/21

 12/10/21     TUE     WARM

今日都係自己一個人過咁, 朝哂佢地起身返學, 老公揍完子元就直接去炮哥到整嘢, 我就揍仲仲返學, 佢可以踩滑板車返學好興奮, 見佢而家咁鍾意返學都好, 雖然都唔知佢讀咗啲咩係有啲不安, 但都要接受! 回家後有嘢做, 廚房要清潔, 仲有預備吓晚餐啲食材, 跟住就出咗去買餸買飲品等等, 返到嚟就大清潔, 真係好dirty! 12點幾就煮個午餐, 食完再準備食材, 跟住就睇吓電視等夠鐘去接仲仲放學, 下午都可以hea吓, 因為啲嘢都準備好哂, 老公又揍咗仲仲去打籃球, 咁我就預番時間煮飯囉! 咁又一日啦, 真係好無聊!

11/10/21

 11/10/21     MON     COOL

今日又係困在家的一天啦, 朝早辛苦地揍完仔返學, 因為周圍都塞車, 最終都係要同仲爺行返去! 回家後老公本來等電話等見工, 但人地話嗰間公司未覆, 所以佢就出門口去炮哥到整嘢, 我就喺屋企等人嚟整我間屋! 寫9-2點, 佢真係1:45先嚟, 本來以為係嚟睇個暖氣系統, 點知係整上次嗰啲, 終於換咗個抽油煙機, 廁所燈嗰堆, 雖然換唔換都係咁用架啦, 但有得換吓都好啦! 因為知佢有排整, 所以都要通知老公早啲返, 我可以去揍仲爺! 4點去攞埋架滑板車比仲爺, 又可以免費攞到有用嘢! 老公回來又去瞓, 咁我就煮飯囉, 反正都無所事事! 今晚都煮得幾好, 佢地好比面呢!

10/10/21

 10/10/21     SUN     WARM

今日終於可以去吓街, 子元今日有波踢, 8點幾起身整早餐, 再收拾吓咁, 10點幾要準備出門口, 今日去仲仲平時練籃球附近踢, 所以都要早啲去泊定車找找地方, 仲爺就唔想留喺到睇, 咪同佢睇吓附近有冇遊樂場玩囉, 見到有個都唔係行好遠就去睇吓啦, 一玩又玩咗個幾鐘! 隔離仲有個市集, 又買咗啲食物先返球場找佢地, 仲未完場就睇吓啦, 本來輸2-4架, 之後子元都助攻到兩球追平, 算係咁啦! 清潔完就去我找定的地方行吓, 但原來都冇咩行架咋, 同Broadway差不多! 不過就食咗間泰式小型自助餐, 都算幾特別! 回家後冇咩做, hea吓睇吓電腦咁啦, 最辛苦咪要教仲爺做埋功課囉! 簡單地晚飯後, 都係上吓網睇吓有咩平樓咁啦!

9/10/21

 9/10/21     SAT     WARM

今日都係悶悶地啦, 朝早又係三催四請先起得哂身食早餐, 明知10點要練波都唔快手啲, 子元踢兩個鐘, 仲爺又打兩個鐘籃球啦, 我都要陪佢打吓咁囉, 回家後快整漢堡, 老公食完就出門口, 去幫炮哥整屋, 咁我地食完就出去買餸, 仲爺陪我啦, 子元話做功課唔出喎! 買完回來都係趕仲爺去做功課啦, 係做咗好耐架啦, 勝在功課夠少可以比佢慢慢做! 我就預備晚飯的材料, 然後開咗套戲睇吓咁啦, 老公回程又唔出聲, 我可以早啲煮定嘛! 佢食完一陣都瞓啦, 我就hea到11點幾先瞓呢!

8/10/21

 8/10/21     FRI.    WARM

今日都有啲悶啊，揍完佢哋返學，返屋企食完早餐，老公就同炮哥去咗新屋度整嘢，我就一個人喺屋企喇，上咗一陣網，做出超級市場買送，然後返嚟整吓呢樣整下個樣食完午餐，見到子元點解咁早放學嘅，佢話唔知點解有得早放喎，所以點幾就返咗嚟，返到嚟先食嘢。兩點幾過去揍仲爺放學，跟住佢就要準備打籃球，四點幾老公返咗嚟，但都要等炮哥車仲仲過去，都係準備晚餐啦，等仲爺打完波返嚟先可以開飯，所以都有啲夜！明天放假，但老公又要過去繼續整屋，冇得去街。有啲唔開心。

7/10/21

 7/10/21     THU     WARM

今朝食完早餐揍仔返學, 回來上咗陣網, 又出吓去, 去咗IKEA主力想買番啲香味candle, 廁所抽氣唔夠就要點, 冇法! 咁當然都有再買其他嘢, 行到12點幾返番去食SamSam, 再去超市買埋餸, 返屋企抖陣又要出去揍放學啦! 返到嚟又係休息吓, 同仲爺睇咗書, 叫咗子元溫書, 我就準備煮飯, 食飽飽睇埋電視沖埋涼又休息啦!

6/10/21

 6/10/21     WED     COOL

今朝都係如常咁揍哂啲仔返學, 就返屋企食早餐啦, 炮哥叫我地去新屋幫手, 咁食埋早餐就過去啦, 我初時以為係幫佢睇吓要裝啲咩, 咁去到又買鎖又度尺咁, 最終啲男人去買嘢, 我同loletta喺屋企面就鋤牆, 因為上手將啲保暖膠痴哂喺出面, 我地就要鋤番哂佢落嚟, 手都軟! 等佢地買埋嘢返嚟食, 2點幾要走啦, 因為各自又趕揍放學, 本來諗住揍完子元再揍仲爺就啱, 點知子元今日遲放喎, 搞到我遲咗接老師打電話嚟, 真係勁唔好意思! 返到去準備晚餐, 今晚想煲栗子雞湯, 所以要早啲準備, 5點老公就帶子元去跑步, 仲爺跟埋去玩, 我就喺屋企! 老公回來差不多又煮晚飯, 咁又一日啦!

5/10/21

 5/10/21     TUE     COLD

近日起身都真係開始凍, 出一出門口都好大風! 起身都係勞勞氣咁又要叫佢地起身又要整午餐又要預備早餐啦! 揍哂佢地返學, 我又開始找吓工, 但都係冇咩回音, 反而幫老公send咗幾個, 即時有人覆佢, 希望成功啦, 我都唔介意佢要返工, 我都揍得掂啲仔架啦! 食完午飯睇吓電視, 夠鐘又去揍仔囉, 回來後仲仲要去打波, 我就去再買啲餸, hea住咁等老公回來, 先煲好飯再等佢煮埋其他嘢, 咁又一日啦, 捉啲仔做埋每日應該做的基本功課啦, 我都覺得我太hea咁, 唉, 但喺到就係唔想咁逼迫啫!

4/10/21

 4/10/21     MON     COLD

今朝又要整午餐又要捉佢地起身, 真係好趕, 都準時出發到, 揍哂佢地返學先返屋企煮早餐, 做吓公務咁, 又出去買吓餸! 回來就換哂全部床單, 食完午餐睇吓電視, 又係時候出去接仔, 仲爺話佢今日終於有得上體育堂, 又要跑步又要踢波, 好好笑! 本來老公諗住要子元去跑步, 點知落雨喎又放咗佢一馬! 然後子元發現whatsapps, FB全部down哂, 但都冇法, 再睇番先知應該係FB比人hack咗, 都係唯有等, 好在仲有signal可以通訊到! 晚飯後洗白白休息啦!

3/10/21

 3/10/21     SUN     COLD

星期日冇咩好做, 所以朝早煮咗個銀芽火腿炒麵, 仲煲咗粥, 但個粥就冇人食架啦, 留番我午餐! 10點幾老公揍子元去足球比賽, 我就同仲爺喺屋企, 找咗陣工就同仲爺做埋啲功課, 然後就煮午餐, 仲仲食牛肉漢堡我食牛肉粥, 各有各喜歡! 跟住就hea啦, 星期日冇咩想做, 又冇地方好去, 2點幾佢地返嚟, 都係繼續hea, 6點多叫老公煮晚餐啦, 今晚有蒸魚食, 連內臟都要自己處理, 老公都搞得掂好叻叻! 

2/10/21

 2/10/21      SAT.    RAIN

今朝子元要踢波，就帶埋仲爺去打籃球，不過又落雨咁都打得好辛苦，條友又唔聽人教，真係好勞氣！今日都同婆婆嫲嫲傾咗電話，但佢兩條友都唔係好多嘢講咁。打完就帶佢地食番琴日嗰間日本嘢，不過冇咗set冇咁抵食！食完買埋超市嘢就回家，收拾好就同仲爺做功課，都算合作架啦。做完就走咗去做八婆仔，因為出面街有車唔讓路，但原來對頭車係警車，結果好大陣像咁幾架警車，最終咪又係咩事都冇！晚飯食西餐，食斧頭扒呀，好正！

1/10/21

 1/10/21     FRI.    COLD

今朝抽咗佢哋返學，跟住就去入油，同去中超買嘢！收到事頭電話，想我地一齊去睇吓新買間屋，睇吓可以點整，咁就一齊去。睇完就去食午餐，帶咗我地去Acton食間日本嘢，抵食又好食！倉完仲去埋窮人四寶嘅集中地，又放咗大血啦！買完各自去揍仔女放學啦！仲仲今日要打籃球，老公整定今晚諗住食的咖哩，等佢回來先煮埋下半場。我今日就好攰，睇睇吓超感應學園都瞓咗！所以晚飯後收拾好都早啲瞓。

30/9/21

 30/9/21     THU     COLD

今朝由得老公繼續瞓, 佢琴晚3點幾先返到嚟! 所以要早啲起身整午餐, 又要叫子元自己出門口返學, 然後到叫仲爺起身返學! 咁我回家就自由了, 又send 咗幾份工啦, 但都係冇咩方向, 我真係做嘢咁邊個揍仲爺呢, 真係好矛盾! 12點多老公終於肯起身, 去咗broadway食午餐, 老公再買番兩件長袖衫頂住先, 然後又要去接放學啦! 返到屋企本來都冇咩特別, 突然收到Drayton Manor的電話, 話收子元喎! 真係玩死, 早兩星期唔好咩, 子元都習慣咗, 但呢間又勁啲喎, 的確選擇困難! 問吓事頭啦, 佢地話今日學校evening opening喎, 試吓過去睇吓有冇得入去八吓! 無端端又聽多一次升中講座, 但呢啲講座實係sell學校, 唯有問吓啲老師, 選科呀等等, 再返去反覆了解吓, 思前想後加上子元極之唔想, 最後應該都係放棄架啦, 但就迫吓子元呢Brentside要努力啲囉, 希望佢明啦! 晚飯後我都好攰, 局佢吸塵抺地, 等我可以休息吓!

29/9/21

 29/9/21     WED     COLD

今日係啲男人北上的日子, 咁細路繼續返學, 女人嘛梗係去shopping啦! 老公9點多出門口去接炮哥北上啦, 我就揍仲仲返學, 子元就自己撘巴士! 返嚟食個早餐就同Loletta去行Broadway, 今日主力係買衫買褸, 喺broadway都行咗3個鐘, 食埋午餐添, 又洗咗好多錢啦, 不過就買咗兩件長袖比自己, 一件大褸比子元, 仲買咗套Snoopy的厚睡衣, 跟住又去poundland買咗萬聖節的裝飾同糖果咁月尾先有得玩架嘛! 回家放低戰利品又出去接仲爺放學, 所以返到嚟已經攰到咩都唔想郁, 放咗佢地一日! 休息吓再check吓email咁又要煮晚餐, 簡單煮粉咋, 食完咪沖涼睇電視囉, 8點轉台睇波, 老公現場睇曼聯, 我咪喺電視睇囉, 仲爺都陪我睇埋先瞓, 預算老公都要3點先到嚟啦, 明天都係比佢瞓晏啲啦!

28/9/21

 28/9/21     TUE     COLD

今朝都係大大風咁啦, 真係開始凍啦! 時間夠可以車咗子元返學同仲爺, 跟住我地就去咗賓福特嗰頭試吓入油, 但原來都係冇, 因為資料已經係十幾個鐘前! 唯有回家同jeep叉電, 我地就去大街嗰邊買吓嘢, 去超市入吓貨, 子元今日放早, 咁老公明天又去曼城睇波接唔到仔, 就帶佢去撘一次巴士, 希望明天唔會唔識路啦! 回家前買埋fish and chips先返去, 本來諗住安心睇吓電視, 老公突然話有油站有油, 叫我一齊去, 幫佢睇路嘛, 咁都要即刻行架啦! 終於都比佢入到油, 明天可以自己駕車上曼聯啦! 入完油回家可以休息吓, 老公煮好飯食飯啦, 跟住都係沖個涼上吓網咁! 又一日啦!

27/9/21

 27/9/21     MON     COLD

今朝起身好大風, 又落雨咁凍好多, 不過之後出番太陽就好好多啦! 快手整好飯盒又要趕出門口啦, 揍哂佢地返學就返屋企煮早餐食, 然後都係找吓工咁啦, 點幾鐘開始餓就整麵包食囉, 本來老公叫3點買賓福特啲飛, 但因為聯賽太難買啦, 我又要趕住去接仲爺, 所以最終都係冇買到! 揍完放學返來都係睇住電視找陣工先, 跟住就同仲爺做埋啲功課, 到子元時仲以為佢真係自己溫哂, 但一問佢就又係冇睇, 真係激死, 搞到我食飯都食得唔開心! 好在食完飯佢都溫埋先, 算係咁啦! 

26/9/21

 26/9/21     SUN     WARM

星期日梗係瞓到自然醒啦, 都係瞓到8點幾啫, 跟住起身整早餐, 食完冇咩做, 就同佢地跟吓功課先, 教完仲爺做又要同子元溫吓書, 佢條友都係唔明教嗰啲嘢係要睇哂先得, 睇完唔明就要找, 同佢跟嘢真係好攰, 成日西面咁, 頂! 午餐叫老公煮麵算啦, 唔洗出去食啦, 下午睇明珠930有transformer睇, 但呢集再睇一次都唔多明囉! 襯超市未收前買埋雞同乳酪, 明天佢地帶三文治什餐啦! 跟住全個下午都係hea啦, 晚上就食咗雞煲, 初頭要唔spicy因為要就番啲細, 之後可以加spicy, 好好好正! 明天又要返學日子了! 

25/9/21

 25/9/21     SAT     WARM

今日都有活動, 子元10點踢波, 我地又要去睇樓, 都係去搞吓事啦, 因為都唔夠錢買, 要找到工才可上會! 今日去Hayes睇, 地點係幾靚, 屋苑設計但太走馬看花, 唔係太了解到, 又要趕住返去接子元, 因為琴日吹完話冇油供應後基本上今日所有油站唔係排哂長龍就係已經冇油, 好在我地係行電, 唔入油住嗰1小時生活圈仲頂到! 12點接咗子元就直接返屋企, 等佢沖咗涼就行出去食咗午餐先, 然後再行過Broadway, 因為要攞眼鏡! 其實本來都好快, 但因為仲爺嗰副只係換鏡片, 要放低一個鐘, 咁就要行住街等囉! 飲咗珍珠奶茶, 買咗飯袋比仲爺, 子元又話要返去打機, 咁就佢同老公返去先, 我同仲仲行吓瑪莎等囉, 我仲換埋條免費麵包, 真係抵! 終於攞埋眼鏡可以回家, 老公預備吓今晚個蘿蔔牛腩, 然後就走咗上房補眠, 我就搵吓工囉, 又迫咗仲爺做咗啲數學功課先, 星期三先交可以慢慢做! 8點左右它公先肯起身開飯, 飯後都好攰了, 沖涼休息!

24/9/21

 24/9/21     FRI     WARM

今朝揍咗佢地返學就回家食番個早餐先, 然後填咗陣表搵工, 又同IVY吹咗陣水啦, 都幾開心! 11點多出門口去咗Greenford嗰頭買咗塊白板可以貼吓資訊咁, 跟住去咗龍鳳買今晚打邊炵爐啲嘢, 買完本來諗住入油, 但見排哂隊就放棄咗, 晚上先知原來鬧油荒, 好在我地叫做半電半油, 一小時生活圈都仲可以! 不過明天都要找地方入埋嗰半缸穩陣啲! 買齊嘢食埋午餐就回家, 其實放低嘢又差不多要出門口, 各自揍仔! 今日仲爺收到張貼紙但跌咗, 佢好想攞番但又唔可以, 所以幫佢問老師, 老師話下星期一比番佢, 但點解佢會有貼紙呢, 係因為今日spelling佢識寫呀, 雖然佢都知自己選嚟默的字係淺啲, 但佢攞到成功感嘛, 係比所有嘢都好! 4點幾炮哥嚟車埋仲爺去打籃球, 我地就自由吓, 預備埋今晚打邊爐啲料! 炮哥要入埋油先嚟, 所以都8點幾, 一嚟到就開火啦, 食都係side dish, 主力都係吹水啦, 吹到11點幾都唔覺囉, 難得大家異鄉生活嘛, 要互相扶持! 收拾埋沖涼休息都2點!

23/9/21

 23/9/21     THU     WARM

今朝我地又去wet啦, 朝早分頭行事, 老公揍子元, 我揍仲仲返學, 因為仲爺真係好慢, 大家都出得門口佢都未食早餐, 結果咪要我同佢行過去囉! 然後佢去學校同我會合番, 仲爺好似好快已經融入咗學校生活咁, 幾好, 起碼佢話佢鍾意番返學, 已經係最好! 約咗炮哥佢地9點3集合, 今日去個幾鐘車程的outlet睇名的, 都係睇唔買架啦, 但最終買咗LC的 pepper and salt樽, 都幾貴架但又真係幾靚! 最後仲幫May買咗套! 行吓食吓嘢咁, 玩到點幾就要走啦! 回程渣番公路走快好多, 因為去程時google map指咗我地行小路, 係遠咗但境就好靚囉! 2點多返番去Ealing, 大家又分頭揍仔啦, 仲爺今日又係好開心咁啦, 等我地買完餸回來同佢睇書佢都肯睇肯讀, 已經係非常好! 子元雖然仲要督, 但都肯睇番今日教嗰啲嘢, 慢慢嚟啦冇得急! 晚飯好正, 老公整咗土匪雞翼, 明天佢地試吓帶飯, 試吓個熱飯盒!

22/9/21

 22/9/21     WED     COOL

而家朝早起身就凍凍地啦, 一到中午又熱番! 今朝有點趕揍返學, 又要叫起身又要整午餐盒, 好在都趕得切, 先放低子元就趕去仲仲到, 跟住就喺學校等囉, 等有人帶仲仲去課室, 佢未入課室都仲係要拖住我仲好緊張咁, 好好笑! 佢地返哂學, 我地就可以去食早餐, 慶祝嘛要食餐好, 去咗間高級餐廳試吓, 但真係好好好食, 杯咖啡又好好飲呢! 慢活完個早餐, 事頭又約我地去威, 今次近近地去Hayes行吓outlet, 兩點多又要走啦, 因為大家都要趕接放學呢, 去埋買炸魚, 就分頭行事, 老公去接子元, 仲仲就我行過去接, 因為想同老師溝通吓, 仲爺竟然比老師話佢好靜, 咁梗係啦, 都唔識講! 但老師話佢計數好, 真係估佢唔到, 仲爺又可以小息時打籃球, 總括嚟講仲爺話令到佢鍾意番返學, 咁已經足夠! 回家後settle好啲嘢就要教子元學習方法, 老公煮好飯就食飯, 明天又跟事頭去wet啦!

21/9/21

 21/9/21     TUE.     COOL

中秋節快樂！今個中秋第一年喺英國過，冇做節飯冇月餅食，但最緊要人齊平安！今朝出車時，車頭玻璃出哂水，應該係因為琴晚太凍，車內就暖所以有露水！揍咗笨元返學就回家，都係諗住hea吓，11點多事頭打嚟，話去榮業行買嘢兼食茶餐廳，我食咗羅漢齋炒麵呀，好正！仲爺一每人食哂個炒飯！最後去超市又大買特買，仲買咗腸仔包同菠蘿包，比佢地做tea同早餐！開心完返屋企放低啲嘢又要去接子元放學，返屋企又係一陣咋，又要出門口，先係揍仲仲去練波，跟住去睇波，又買咗飛睇賓福特，因為又要泊車又要行，所以6點半就要走，去到買埋熱狗食，就睇咗一場一面倒的比賽，最終勝6-0，勁呀！返到屋企都10點幾，叫佢地快沖涼瞓覺，明天兩個都要返學！

20/9/21

 20/9/21     MON     COOL

今朝開始要早起啦, 子元要返學, 又要整飯盒咁, 8點多先出到門口, 好在都唔係好趕, 回家休息吓又要出發, 終於到仲爺要去學校註冊, 星期三有得返學啦, 其實都等咗好耐, 差不多3個星期! 去註冊完再要幫仲爺買校服, 佢條腰真係好難買褲, 好在最終都買得齊, 買埋少少午餐回來食, 填吓表咁, 兩點幾又要出門口去接子元放學! 回來後忙這忙那咁, 又試吓用電飯煲煲粥, 又要幫仲爺改短條褲, 6點多叫老公起身煮飯, 食完都係洗碗休息吓咁啦, 明天又要早起啦!

19/9/21

 19/9/21     SUN     RAIN

今朝子元要踢比賽, 所以8點多都要起身, 出得門口都9點幾, 去到球場都可以啦, 我同仲仲去咗隔離遊樂場玩, 比佢玩足兩個鐘都係開心, 差不多踢完都12點多, 開始落雨, 我地就上車等啦! 回家後我地要出去買餸買午餐, 應該都夠食幾日架啦! 回來食完個午餐就hea, 真係坐咗幾個鐘睇機睇電視咁! 子元仲好笑, 條友瞓鬼咗, 叫佢時佢以為天光, 走去換校服落嚟, 笑死我! 仲要呆咗幾廿秒先明而家只係黃昏6點幾7點唔係朝早, 激鬼死! 煮好飯食完洗埋碗我又快眠咗半個鐘先沖涼, 明天開始要早起冇得瞓到自然醒啦!

18/9/21

 18/9/21      SAT.    WARM

今日有點舟車勞頓！朝早要揍子元去踢波，本來諗住可以返屋企等，但仲爺又想玩遊樂場，老公又想睇，咁咪喺遊樂場陪仲爺玩咗兩個鐘囉！回家後老公又忙於整下午去一齊picnic的牛肉，我就收拾吓，3點幾出發去公園，玩到7點先走呀，有得打網球同遊樂場，踢波就邊度都踢得！大家咪食吓吹吓水咁囉！返到屋企已經好攰，都要煮啲嘢食，好好休息吓先！

17/9/21

 17/9/21     FRI     WARM+

今日係子元開學的日子, 7點就醒咗, 梳洗整飯盒整早餐等等, 8點出門口, 因為唔知條路塞唔塞, 所以都係預早少少好! 知佢喺學校門口實唔比我影架啦, 咁就喺屋企門口影番張開學相啦! 送咗佢入校, 我地先返屋企食早餐, 本來諗住要去睇樓, 約咗1點但又改咗, 所以冇咩做, 就出去買嘢整明天野餐啲嘢, 老公又忽發奇想啦, 整威靈頓牛肉月餅, 咁佢整啫又唔係我我唔阻佢啦! 回家我咪專心諗吓點整好份cover letter找工, 萬事起頭難! 2點幾又出門口去接仔放學啦, 聽佢講番學校啲嘢, 都覺得天父已經安排好呢學校比佢, 起碼佢鍾意先, 科目同模式都啱佢, 上堂講嘢討論唔會比人鬧, 可以踢波, 數學又明又識做等等, 又冇咩功課, 總之希望佢讀到又讀得開心啦! 回家後我繼續做陣嘢, 4點幾又出門, 今次係揍仲仲去學籃球, 係佢要求咁就踢勤少去試吓先啦, 1個月50磅有8堂, 打足兩個鐘, 減吓肥都好! 過到去咪同炮哥吹住水咁等囉, 見到仲爺個BB樣打波真係好可愛! 返到嚟到7點幾, 老公快手煮飯, 仲爺叫餓啦! 我都係繼續諗埋我個cover letter, 又找吓工作咁, 因為要借錢買樓先要有工, 好! 努力加油!

16/9/21

 16/9/21     THU     WARM

今日都有啲忙, 朝早起身食完早餐就叫佢地執嘢出門口, 約咗幫仲仲攞裇衫, 但最終回來試咗喺唔啱囉, 條友真係太肥! 攞完衫去boardway幫子元買底衫, 仲爺就買埋對返學鞋先, 因為西褲又係唔啱囉! 買完就去食午餐然後攞車準備過西邊, 今日約咗睇樓, 順手去埋我地目標嗰間屋的agent到問吓, 原來已經有人offer咗, 唔怪得唔覆啦, 唯有留咗資料等人有盤再通知囉! 跟住就去要睇樓嗰到等, 因為早咗成個鐘, 喺附近行咗一圈, 其實都唔啱feel架啦, 加埋入屋睇埋更加覺性價比太低, 睇埋第二間係靚呀, 但一來又貴, 二來又冇咩發展空間, 除非佢減一球啦! 睇夠回家啦, 買埋餸返去, 又再睇吓樓咁, 食埋好味的晚餐, 有粟米魚肚, 棉花雞, 好正! 

15/9/21

 15/9/21     WED     WARM

今日都有安排哂節目, 不過7點幾突然有條友上門話唔知找邊個, 我真係聽唔明, 但佢又要我證明我唔係佢講的人要睇passport, 事後諗番都唔知有冇問題, 早知影咗佢個工作證, 但比人嘈醒係唔會諗到咁多嘢! 就照比佢對咗就算, 但就瞓唔番囉! 8點多起身煮早餐叫佢地食, 食得嚟又要準備出去配眼鏡, 第一次喺英國同佢地驗眼呢, 廿年冇喺瑞興以外的地方配眼鏡啦, 仲要係英文版, 子元都算handle到, 仲爺就要翻譯, 總算個幾鐘之後順利完成, 本來係唔洗錢, 但要配防反光鏡就要比20磅, 咁比起香港點都抵架啦, 配完子元就去咗剪頭髮, 第一次比Ann以外的人同佢剪頭髮呢, 16磅都OK啦! 去食埋午餐就到去子元學校參觀啦, 要先登記, 然後就等個老師帶我地行, 去咗佢office, 講埋選咩科, 好似好簡單咁, 但子元啲英文比我想像中退步咗! 我聽老師講嘢都聽到9成, 答嘢其實都已經唔洗諗, 佢地真係要努力啲學! 行完就可以去買埋校服, 最貴係校服架啦, 買咗130磅! 星期五可以返學! 返到去又睇吓樓咁啦, 再send咗幾個request! 食完飯就沖涼休息!

14/9/21

 14/9/21     TUE     WARM   RAIN

今朝好早醒咗, 都唔知點解, 係大雨得滯嘈醒定點, 都唔係好瞓得番, 到8點先起身, 梳洗完老公又要處理銀行滙錢等等, 所以叫子元落樓準備早餐, 都係食脆片啫, 食完就等睇整屋嗰條友嚟, 12點左右佢就到, 算係好準時, 佢睇完都係主力report番返去等報價, 可以整吓佢都整咗啦, 都遇咗佢啦! 跟住就等老公煮早餐, 今日用埋啲雲吞料老公整咗蛋角, 加埋烏冬真係好好食呀! 跟住就等事頭嚟借冰櫃放嘢就去IKEA, 要買番子元個床頭櫃同我張櫈囉! 塞吓車咁一來一回, 返到嚟又差不多要煮晚餐, 老公發現冇肉又解唔切凍, 咁就出咗去買, 回來又要睇埋波先煮飯, 所以都8點多先食!

13/9/21

 13/9/21     TUE     COOL

今朝6點幾醒咗架啦, 好在瞓得番, 8點幾起身, 煮好早餐叫佢地起身啦, 食完早餐又上吓網睇吓屋啦, 但都係冇咩啱! 12點幾出咗去郵局寄嘢, 又係等一大輪先寄得到啦, 真係幾慘! 順路去食埋午餐先, 記得啲丁麵得番幾包, 不如去龍鳳入吓貨, 買到上海雲吞皮, 今晚又可以整啦! 返屋企就收拾整嘢啦, 又要睇吓電郵覆吓嘢, 啲人成日打嚟就話係邊間地產, 鬼記得咩, send電郵唔得咩! 跟住終於收到一封我想收的電郵, 就係仲爺學校啦, 終於約星期三去學校, 加埋子元又係星期三, 兩個應該都可以好快返得學啦, 太好! 今晚晚餐食銀芽肉絲炒麵同雲吞, 仲有腸仔, 好唔夾! 飯後都係休息吓咁啦!

12/9/21

 12/9/21     SUN     WARM

今朝都係自然醒, 比子元打機時的講嘢聲嘈醒! 可惡! 起身打吓機摺埋啲衫先, 等老公起身煮早餐食, 然後都係無所事事, 老公就話帶仲爺去睇玩具, 比佢找到間玩具店呢, 20分車程啫, 咁除咗玩具店仲有其他嘢行, 咁就去睇吓! 車程中, 阿妹打嚟視像, 佢地今晚食中秋飯呢, 都係吹吓水咁啦, 唔係太多嘢講! 落車我地就收線啦, 先去食午飯, 去咗上次同Letty佢地去食嗰間雞, 今次叫少咗啲平番少少, 跟住去咗行玩具店先, 我就要買回神啡先, 唔係行到落去! 睇完玩具就睇埋其他店, 本來諗住買番個屋企用水瓶, 但都係睇唔啱, 反而買咗個細廚餘桶, council訂嗰個for每個細袋放落去就得, 但放廚房都係要個細的先啱! 買完返屋企, 發現廁所最後一個燈都燒埋, 唯有叫老公快手出去買, 啲鋪頭收5點呢! 之後都係上網睇吓嘢, 上Amazon訂吓嘢咁啦, 晚飯老公又煮好嘢食! 

11/9/21

 11/9/21     SAT     WARM

今朝子元要去踢波, 所以9點多要出門口啦, 去到公園真係個金園嚟, 後來問番話之後會去球場, 今日呢個係暫時場地! 子元踢波仲爺就可以玩公園, 都比佢玩咗成個鐘啦, 等子元踢完就返屋企, 簡單煮咗烏冬咋, 又諗唔到去邊就唔出去啦, 又收到啲電話打嚟約睇屋等等嗰啲, 因為琴晚send 咗啲request出去, 睇吓先囉試吓嘛! 黃昏時份出去買埋今晚明晚啲餸, 因為明天星期日, 啲鋪頭又好早閂! 回來等老公煮好嘢食!

10/9/21

 10/9/21   FRI     WARM

今日本來都冇咩特別嘢做, 突然好掛住Joyce同Joey, 就問佢地可唔可以視像吹吓水, 咁就傾咗大半個鐘, 食埋早餐要去GP攞藥, 去親GP都好似雞同鴨講咁, 終於攞到藥但名又唔同量又唔同咁, 好在查完字典見都係同一隻藥, 問埋晴爸話冇咩問題, 食完冇血壓過低同頭暈就冇問題! 都未諗到有咩做, 炮哥就打嚟問去唔去Costcor, 梗係去啦, 等咗好耐啦! 今次去另一間再大啲喎! 半個鐘唔洗過到去啦, 今日目標都係肉類啦, 但都買咗好多其他嘢, 我連毛毛鞋都買咗, 行咗兩個鐘左右, 買埋熱狗返去食, 本來老公話再出去, 但又諗唔到去邊咁就算啦! 佢地兩個細上哂房打機, 我地就開電腦睇樓, 睇到7點幾send咗幾個request, 老公就去煮晚餐, 今晚食牛扒呢! 食完咪沖涼瞓覺囉!

9/9/21

 9/9/21     THU     WARM

今日要較鬧鐘8點前起身, 因為今朝有好多電話要打, 首先第一時間8點就要打去book GP, 真係好難打, 打到去又要等, 佢記錄咗你打來再會叫醫生覆電話, 跟住到9點又到打去council問學校嘢, 子元終於都有學校收, 唔係勤少嗰間, 但都係唔錯的一間, 其實有學校收就得架啦, 我都冇咩所謂! 再等GP醫生打嚟問埋診, 咁都算係完成任務, 明天可以去診所攞藥啦, 已經算好有效率! 無聊吓咁差不多兩點先出去買嘢食, 順手買埋今晚啲餸, 回來食完呢間新試的炸魚薯條又要出去, 幫炮哥車勤少去練波, 回來沖好涼就等食飯, 老公今晚煮牛尾洋蔥湯, 肉醬意粉同炒雜菜! 但我地煮西餐都未識預個量, 成日都煮多咗, 唯有留番明天再食埋啲菜!

8/9/21

 8/9/21     WED     HOT

今日又做咗好多嘢啦! 8點幾起身聽住收音機咁梳洗準備早餐, 跟住就處理吓要寄去NI的文件, 因為老公今日都要寄番喺Amazon買錯咗條叉電線, 咁順手寄埋NI的文件啦! 終於print好填好, 12點左右先出去, 喺郵局又企咗大半個鐘先寄到, 跟住去食埋午餐買埋珍珠奶茶就回程, 返超市買啲晚餐料就返屋企, 老公喺到玩洗車, 我就收拾吓, 再同子元仲爺佢地登記埋驗眼, 因為今朝終於收到GP#啦! 差不多4點要出門口, 仲爺book 咗音樂試堂, 估唔到音樂真係咁世界語言, 仲爺可以講番哂佢嗰半個鐘學咗啲咩, 唔知係老師用好簡單英文定佢真係識我唔知, 總之就好神奇啦! 跟住去攞埋仲爺嚟緊新學校的外套就去coco park同炮哥佢地會合, 約咗去公園玩呢! 玩到差不多7點先回家, 沖得涼嚟煮飯又夜咗先開到飯呢!

7/9/21

 7/9/21     TUE.    HOT

今日好熱呀！瞓到8點幾起身，叫老公煮早餐，我就上網搵吓嘢，睇吓今日可以去吓邊，睇到有間日超，就去八吓，老公話想買麵豉醬嘛！買完八完就去番上次個商場，因為今日實在太熱，搵商場行吓都好！去到行完食埋午餐，3點幾走啦，回程時經過Letty學校，竟然見到炮哥接女呢！返到去上網整吓嘢打吓機又準備晚飯，咁又一日啦！

6/9/21

 6/9/21     MON.    WARM

今朝未夠7點就醒咗，但睇機睇到8點幾先煮早餐，倉完又有啲無所事事，差不多12點先出門口去Broadway，要處理埋張電話卡，老公叫帶埋份合約去比佢睇，先發現到係個開始日期去咗17/9，真係比佢玩死，又要認證一輪，最後要再等開通，好在食完每午餐就開通到，等佢整埋個code明天應該可以cover咗個新number！跟住喺Broadway 買咗好多褲，一路再行返去買埋啲日用品就返屋企！返到去老公等架車叉好電就開始玩高壓水槍，洗咗門口個地下，真係乾淨咗好多，然後佢就開始整今晚嘅重頭戲枝竹羊腩煲，真係好像樣，食到好滿足，洗埋啲嘢打陣機又係時候食下雪糕準備瞓覺！

5/9/21

 5/9/21     SUN.    WARM

今日都瞓到八點幾先起身，整好早餐叫佢哋起身食，然後就準備吓陣間出街，今日book咗去睇英國皇家空軍博物館，要揸大半個鐘頭車過去，都算順利泊到車，個博物館都好大，有六個展場，估唔到係仲爺睇得最開心，子元就掛住打機！行咗兩個幾鐘，終於行晒睇咗好多飛機同戰機！跟住就揸返車落去IKEA，要幫子元買枕頭，食埋熱狗就返屋企。放低佢哋，我同老公就落去買餸然後返嚟煮飯，食完飯就係咁打機，子元有個新game介紹咗俾我哋玩，都真係幾好玩嘅！老公就話佢頭暈早啲瞓，我今日都好攰喇，我到早啲瞓！

4/9/21

 4/9/21     SAT.    WARM

今日瞓到7點幾起身，子元有波踢，食完早餐車佢去，睇佢踢咗陣，場地都可以啦，但啲細路好hea咁，都應該唔啱。因為佢踢到12點，咁睇咗陣就找節目，琴晚喺Rightmove睇到有間屋唔錯，就去附近睇吓環境，仲同目標屋隔離吹咗幾句，都真係幾吸引。然後仲爺話想去公園，就陪佢去玩，老公就去球場接番子元，然後就去食Sam chicken。跟住返去睇力圖打排球，好正呀！本來諗住去IKEA，但老公又想瞓覺，最終冇去，等老公瞓醒就去買餸煮飯！

3/9/21

 3/9/21      FRI.    WARM

今日都係忙於砌傢俬，因為未夠8點IKEA就送哂3張床嚟。所以一食完早餐就開始砌！估唔到原來床都幾難砌，所以老公成日要幫我同子元手，10一點幾炮哥佢哋過咗嚟，睇吓使唔使再幫我哋set 上網，仲一齊去Broadway食午飯，佢哋再去接勤少放學，我地買埋嘢就返屋企，整埋下半場，終於完成哂，今晚有床瞓啦！晚飯前沖涼，飯後可以hea吓休息，明天帶子元去踢波！

2/9/21

 2/9/21.     THU.    COOL

今日都係公務為主，瞓到8點幾起身，叫老公煮早餐，然後我就做公事，追貨呀，問學校等等，諗到咩就做咩！老公就整閉路電視，兩點幾再出Broadway 先食個午餐，再去睇埋個電話點解唔work，最終無功而還，咁就返去繼續工作囉！老公終於裝好哂啲閉路電視，佢突然醒起啲電話可能係因為帶number過台，冇咁快運作到，叫我換番張舊卡，果然收到啦，香港嗰套喺呢到都一樣！今日收到電郵仲爺有學校收，回覆咗大再等詳情呢！做好嘢可以煮飯食，今晚有仲爺嘅粟米肉粒飯，佢食得好開心呢！清潔完沖涼休息，打埋機佢地肯瞓啦。

1/9/21

 1/9/21     WED.    COOL

今日都忙碌，book 咗今日去掉垃圾，要掉recycle 嘢就要自己運去！食完個早餐收拾吓差不多就出發，原來去到make sure你有book 到就入去自己掉，全自助！搞掂就去埋GP登記嗰度問清楚佢我地全家個登記係完成未，因為仲未收到信，個女仔好好人咁幫我找，但一時間未必得，就叫我5點先返去幫我print埋個summary, 咁就返屋企接埋兩個落broadway先食個午餐，然後去整個電話卡，又要買衫買日用品，但張電話卡係唔得囉，老公淨係叫我等，等咗全晚都係唔work，明天再攞落去再處理啦！跟住去龍鳳嗰頭間油站入埋油，買埋餸就回家，煮飯沖涼食埋都係七點幾，老公就一路等門口個車位吉出來可以泊番埋嚟叉電，等到10點多比佢等到，Jeep今冕有得叉電啦！最後打咗陣間玩咗陣啤牌就休息。

31/8/21

 31/8/21.    TUE.    COOL

今朝一旪就起身，去超市買嘢整野餐食物，今日約咗事頭佢地去Oxford，有草地嘛咪野餐囉！買完返嚟仲要整早餐收拾等等！10點多出門口，會合後出發，開始40幾英里的旅程！渣咗個幾鐘呀，真係幾遠！去到先找地方泊車，然後去博物館外的草地野個餐先，跟住就去參觀Pitt river museum，係睇啲自然嘢，恐龍骨咁，都好睇嘅但我覺得個建築仲吸引！下一站去睇Christs Church，係Harry Potter其中一個場景參考，真係好吸引，又係好宏偉，係咁影相！行咗個幾鐘，去埋買手信囉，買咗件衛衣比子元，扮吓嘢嘛，Oxford喎！最後一part分開行，侷地去書局，我地行商場，6點去番車位會合，本來諗住一齊晚飯，但最終煮係各自回家煮，買咗牛扒煎吓，還要清潔吓呢！

30/8/21

 30/8/21     MON     COOL

今日bank holiday呀, 所以本來都冇諗住去啲咩地方, 瞓到9點幾先起身, 真係好好瞓, 跟住叫老公整早餐, 冇哂奶啦要煮嘢先有得食! 跟住叫子元幫手找找點到可以車啲紙皮去掉, 等佢唔好無時無刻攞住部電話唔停! 食完早餐本來冇咩細藝, 老公諗住裝咩後園的閉路電視, 點知炮哥話佢地今日去東倫敦Greenwich玩, 問我地一唔一齊, 咁有人帶路又諗埋節目, 點解唔去呢, 於是馬上訂埋museum啲免費飛, 就換衫出發, 要個幾鐘車先過到去, 都真係幾遠吓架! 先去咗格林威治天文台, 睇吓GMT 0係咩, 又買咗啲post card諗住寄比嫲嫲婆婆佢地, 然後我地就去咗睇兩個Museum, 一個係睇National maritime museum, 一個係Queen's house, 你話超吸引又未至於, 但新奇感係有, 事頭婆間屋又係好大, 但我地太遲去到, 睇得嗰幾分鐘! 只係見好多畫啦, 好多好特別的建築, 影吓呢啲都夠! 去番攞車嗰到, 比佢地踢陣波, 我地餵吓鴿咁, 子元又衰扭親腳, 跟住仲要去行泰吾士河行人隧道架嘛, 最終都有完成但叫佢影相就係到多多事實咁! 喺河邊有間餐廳食雞, 排咗大半個鐘先入得, 但又真係好食! 食完要渣番1個鐘車返去, 夜車又另一鍾玩法, 好在都算順利返到去, 快手趕佢地沖涼瞓覺, 明天還有活動!

29/8/21

 29/8/21     SUN.    COOL

今日都係冇去咩地方，因為朝早又要砌傢俬，9點幾先起身，食埋脆片做早餐，我同子元就砌嘢，老公就油門口。不知不覺整到點幾兩點，煮午餐比佢地食，然後我就包雲吞，好正呀！雖然皮唔係上海雲吞皮，但都試吓囉，個樣呃得吓人！4點幾諗住出去買牛腩，老公叫我買啲油刷，點知好多鋪5點就閂，叫做買到急需用嘅，仲買到新鮮牛腩！回來就煮飯，等老公油好油就開飯，食完就沖涼打機休息。

28/8/21

 28/8/21     SAT.    WARM

今日只係砌大積木，因為Ikea送貨嚟，9點幾先起身，食脆片做早餐。然後全日砌！但IKEA又送漏咗兩張櫈嚟，又要打去講番等佢安排再送嚟！老公又要整電線同閉路電視，所以只可靠自己砌，子元砌咗侷自由張書枱，我砌咗電視櫃同客廳櫃，已經腰都赤！午餐快煮咗丁麵咋。所以晚飯唔煮啦，出去買咗pizza同炸雞，今次試間新嘅，又幾抵食喎！快食完繼續砌。今晚應該好好瞓！

27/8/21

 27/8/21     FRI.    WARM

今日半日喺屋企，半日出咗去！朝早等老公整早餐，食燒賣蝦餃呢，仲有炸菜米，好正！跟住上咗陣網，再執好哂啲衫入衣櫃，等埋IKEA送貨嚟就可以出去，老公要去B&Q買工具類嘅嘢！揸車過到去，喺食物車食咗個午餐就去行，都行咗兩個幾鐘，算買到需要嘅嘢！回家又係時候拆箱，襯老公煮飯我砌咗仲爺張書枱，其實都幾攰！老公就終於等到條叉電線，可以喺屋企叉電了！食完飯都係洗碗食雪糕！隔離屋Spencer又找我們吹水，佢應該好悶。最後打埋機就趕佢地去瞓。

26/8/21

 26/8/21     THU     WARM

今日去遠地方, 要去IKEA買嘢, 順手去埋榮業行. 8點幾9點點先起身, 食埋早餐就準備出門口, 第一次喺英國靠自己渣車啦, 第一站都算順利到達, 始終撘過巴士過去都認得吓路, 去到泊好車就開始找要買的東西, 都係要由頭行一次架啦, 最終都算買齊要買的, 再買埋熱夠餐當午飯, 跟住就去榮業行, 本來10分鐘路程, 因為係咁睇錯GPS, 行多咗好多路, 因為上咗公路, 要好遠先調頭呢! 終於去到又係買呀買咁啦, 呢到有酒樓架, 有機會都要嚟飲吓! 買咗都幾多嘢吓, 都好滿足, 有個冰櫃係好啲, 可以入好貨! 最後走嗰時見到一家香港人, 就吹咗兩句, 佢知我地仲未派學校, 就叫我打去council問, 可以追到早啲有位架, 咁即管試吓囉, 又冇蝕! 回家後都係執貨沖涼煮飯, 炮哥突然打來講買9月14日曼聯波飛, 勁緊張咁買到, 老公佢地去睇, 到9點先煮好飯食, 之後仲要打埋機先有得瞓.

25/8/21

 25/8/21     WED     WARM

今日嘛, 差不多黃昏時先出去! 起身後叫老公處理吓啲銀行嘢, 但對家又放咗假, 唯有再等啦! 咁我自己嗰啲就處理咗先, 都係找埋啲卡數呀, 用積分換埋超市卷比阿媽用! 老公就去整早餐, 今日食簡單all day breakfast, 都OK啦, 食完咪又係不停上網諗到有咩要申請要跟進就做, 登咗煤氣同電, 又追咗GP嗰到啦, 原來話我比少咗來英日期, 咁就冇理跟, 真係比佢激死, 唯有接受呢到係咁! 下午架車真係送到嚟啦, 老公好努力同佢了解, 我又繼續處理吓啲文件嘢啦, 真係做到好攰! 5點幾過去接炮哥, 佢帶我地去龍鳳入貨, 佢都順手教吓啲駕車技巧, 有佢帶路就好好多, 買咗成千蚊嘢啦, 無法啦, 丁麵同檸檬茶一買就一箱, 再加啲唔喺中超買唔到的調味, 係咁上吓! 帶我地去入埋油就回程! 返到嚟都係沖涼煮飯啦, 今晚真係煮飯啦, 有飯有雞翼有豬扒啦, 雖然唔係好中式但都好啦, 包米5公斤都係5磅幾, 算合理價錢! 食完睇吓電視打吓機, 電視方面都係冇法, 要睇番最愛的VIU, 有安博盒子, 咩都有得睇, 值得買! 最後同仲爺打盤機佢先肯瞓!

24/8/21

 24/8/21     TUE      WARM

今朝好似冇咩方向, 起咗身食咗早餐淨係喺到hea, 不過之後又開始上網登呢樣登嗰樣咁, 又搞一大餐, 午餐又係去食Sam's飯, 然後買日用品, 跟住個list買, 都唔會買多好多, 同埋而家近好多行得快好多就返到去, 又要執吓嘢啦, 兩個細就自娛, 我地就上網整嘢, 整極都唔完咁, 老公4點幾就煮晚餐, 因為今晚要去睇賓福特聯賽杯, 佢地過嚟車我地, 咁就唔洗捱巴士, 總共4家人行過去, 買咗紀念品, 仲爺買咗波衫, 子元買咗track suit, 貴貴地啦, 嚟緊午餐都唔好出去食啦! 去埋個廁所就入場, 真係好夢幻, 我喺英國睇波呀, 好神奇呀! 我都好投入睇架啦, 又影吓相吹吓水咁, 個幾鐘好快就完, 最終賓福特win 3-1呢, 行返去攞車炮哥車我地返屋企, 快手沖涼食個宵夜休息! 

23/8/21

 23/8/21     MON   WARM

今日係搬屋大日子, 正式要move in 啦, 搬行李都走咗3轉! 起身馬上執嘢, 先推咗6個行李加埋啲背包, 真係走難咁款! 到達後淨係拆貨都有排搞, 上上落落咁, 先安頓好仲爺等佢有個路宿者床位, 可以放番哂佢啲毛毛喺到瞓佢就算瞓地下都心滿意足! 老公同子元再走一轉搬嘢, 我就喺新屋做reference check, 又係check出個人生系列, 好在我地冇傢俬, 都係睇牆天花地下, 廚廁係最多嘢有問題要處理囉, 唔覺唔覺都做咗5個鐘, 期間等老公回來後出咗去食飯先, 食完佢地又去搬嘢, 炮哥就嚟幫我地裝router, 又玩咗一輪, 老公佢地最後一輪去搬埋啲嘢回來, 都執唔到幾多, 就出去買嘢食先, 只係食咗pizza同沙律, 所以之後咪要宵夜囉, 食咗好邪惡的辛辣麵! 飯後先清潔啦, 拖咁大間屋的地真係好攰! 沖完涼打埋機就趕佢地去瞓, 我地又上網睇嘢啦, 同炮哥吹開水, 佢撩我地明晚去睇波, 真係買到飛喎, 咩都好啦, 近近地喺賓福特就有得睇, 正! 明晚有節目!

22/8/21

 22/8/21     SUN.    WARM

今日忙碌處理新屋啦，朝早果然7點幾，IKEA就打嚟話送貨，老公馬上梳洗出門口去接貨，我就同兩隻細食埋早餐先過去，順手推兩個行李箱過去settle吓。第一部分先砌咗梳化床先，跟住到飯枱同櫈，我就去廚房settle吓啲水煲電飯煲咁，10點多就過隔離屋攞番個上網套裝，琴日又話5點前送到，最終7點幾先嚟仲比咗隔離屋，頂！硬住頭皮去問，隔離屋係個大叔應門，唔知係咪獨居老人，總算攞番，呢度文化係興冇人收貨就比隔離。最後等電器送埋嚟就出去食飯，然後我同子元就拖行李箱返去pack部分嘢過來先，每人一大一中徰李都幾吃力，子元仲要唔聽教，叫佢落樓梯時一定要拿起不能用轆落，最終咪爆咗囉可惡！所以佢唯有死死地氣拖到去屋企，等機械人出來掃埋地，係未研究到個電視點搞，唯有問炮哥，仲有要將運過來的家檔安排好位置，又做餐死。執好就返去沖涼煮飯休息！明天繼續！

21/8/21

 21/8/21     SAT     RAIN+

今日終於要收key啦, 加上又話訂咗啲嘢有送嚟, 咁食完早餐我同老公咪過去睇吓順手等囉, 點知等到10點幾都仲未有聲氣, 咁我就先返BNB, 收拾吓要用的東西再叫埋兩隻嘢換衫, 11點半出門口同老公會合先, 去食啲嘢收埋條key, 終於見到間屋真身, 唔算太大但都夠用, 殘就一定架啦, 租屋啫仲想點呢, 都要頂住架啦, 行咗個圈, 收樓嗰位還收樓嗰位, 有咩都係叫你問番agent, 冇咩幫到你, 咁唯有簽收咗key先, 佢會再send check list過來比我地check! 咁又要出番去買清潔用品啦, 買完返去分頭行事, 老公清潔二樓, 我負責廚房廁所, 老公又係咁睇啲位點裝閉路電視, 其實佢交樓前都有清潔過, 又唔係好dirty, 同埋所講啲牆好嚴重, 我又唔覺得, 反而我覺得啲lock嚴重啲囉, 好在有買WD40, 盡吓力啦! 清到3點多其實已經差不多, 諗住等埋啲寬頻, 但完全冇送過嘢嚟, 好灰, 唯有明天再算! 返嚟沖好涼等老公煮飯, 今晚食雲吞, 焗豬同午餐淨咗的薯條, 食完打吓機食吓雪糕咁, 明天再繼續努力.

20/8/21

 20/8/21     FRI.    WARM*

今日最後一日去玩踢波，估唔到仲爺會玩得咁開心，揍咗佢地去就要搵節目，但真係冇咩特別野睇，於是行咗去新屋睇佢地要點執漏交收，聽到聲係有人做嘢，都係唯有靜觀其變。返屋企休息吓先，上網買埋個空氣清新機，都要買定，怕咗阿大帝！12點幾肚餓啦，出去搵嘢食，順手過Broadway睇吓嘢，買咗襪，帶來的都殘！跟住周圍八吓，差不多夠鐘接番佢地，仲爺要求同啲隊友影相，又要同阿sir影咁，好搞笑！不肻已經叻仔咗好多，問完我點諩自己同人講！咁就帶佢去Lammas Park玩遊樂場，呢個玩繩網多，都唔易！玩到差不多5點先肯走。返去都係上吓網等老公煮飯，食完就打機，係8點屋主嚟收埋多咗3日嘅租咁，又話埋比佢聽個廁所真係好唔掂囉，咁佢都冇咩，因為佢都知係有問題！

19/8/21

 19/8/21     THU.    COOL

今日都係放低佢地喺球場我地又有洙動，去Curry’s買電器，今次唔遠，撘8個站轉一次車，唔洗卷個鐘就到，主力要買乾衣機，仲有電視，睇中埋個冰櫃，咁建放血啦。但最慘係問開租樓個agent關於新屋啲電器，佢先話琴日收番間屋時發現啲牆畫到花哂，可能入住咗先再執，咁都有法架，都要頂住先架，有理电再花錢住BNB，見步行步啦！買完返Broadway食午餐，周圍又行吓咁，閒吓啦，人生有幾多日子可以咁閒！差不多夠3點去球場等佢地放，仲爺又係好開心啦，聽佢肯講咗英文，竟然識用where，難為我之前教到隻嘢咁佢都係唔明。約咗Letty佢地去公園玩，大人吹陣水咁啦，竟然又撞番早幾日喺另一個公園見到嗰兩母女，又吹一輪水囉，玩到6點幾散啦，返去沖涼煮飯休息吓！

18/8/21

 18/8/21      WED.    WARM

今日約咗炮哥佢地去wet，朝早放低咗啲細喺球場，就去同炮哥佢地會合，佢地帶我地北上，先去行巨型超市，巨到真係嗟煮有，outlet咁 feel，電視洗衣機都有，但我地買凍肉嗰啲真係忍唔到手，又平又大又靚，加上要買埋自己用的廚具，夾夾埋埋又買咗二百幾磅，但今次應該夠食到幾個星期，睇完食就到衫嘅outlet，不過時間關係只係行咗陣，買咗件波衫同石地boot比仲爺咋！又要趕回程接仔，接完仲要行去Broadway，交子元oyster card的verification，同佢出埋電話號碼，最終撘車返來，我都好攰！回來沖好涼又整吓電腦嘢，等老公用新穫整牛扒，个有水牛芝士番茄加三文魚！食飽咪又打吓機囉，咁又一日啦！

17/8/21

 17/8/21     TUE     COOL

今日出遠門啦又, 但係淨係我地兩個, 起身食完早餐揍咗佢地去球場, 諗住時間充足去老遠試車啦, 因為老公琴Enquire咗, 今朝即時有人覆啦, 咁咪去囉, 但要撘個幾兩個鐘頭巴士喎, 計過都可以就約12點半, 點知上車前老公先發現自己冇帶oyster card, 咁點呀! 子元又冇喎, 想借佢嗰張用都唔得, 唯有行番去Ealing Broadway買囉, 咁又搞咗大半個鐘, 最後11點左右先出發到, 叫做遲咗10分鐘, 但人地又做緊第二個客啦, 唯有再等, 差不多1點先到我地, 講完一輪終於可以試車, 老公話好正, 我唔識分, 行到就得啦! 試完返去決定買, 又要等佢問十輪上司幾時有期運架車過來, 又等咗一輪, 終於落實咗23號朝送來咁我地就可以搬屋用! 但時間已經兩點有多, 好在一早諗到實返唔切去接子元佢地放學, 叫咗炮哥去球場同子元交代一聲, 等我地嚟! 咁經過個幾鐘車終於4點返到球場接番佢地, 馬上去食嘢, 今朝個早餐到而家哟! 好在喺車行有服務沖咗杯咖啡頂住先啫! 食完Sam's雞就回家, 沖涼休息又整吓銀行嘢, 8點左右先煮晚餐, 又於都唔係好餓, 今晚食咗菠菜煙肉粉同焗埋個慢煮豬用, 好好味! 瞓之前諗住叫炮哥睇睇子元張Oyster card點解apply唔到, 但佢IT人都冇辦法即係冇, 唯有登完基本嘢明天去郵局交埋資料!

16/8/21

 16/8/21     MON.    COOL

不經不覺嚟咗英國都兩星期，感覺已經實在好多，路熟咗點買嘢亦知道，算係暫時適應！今朝要較鬧鐘起身，因為今個星期同兩隻豬報咗足球camp，都係踢10-3啫，自己帶lunch box，都係想佢地郁吓！快手食完個早餐，簡單地食脆片咁就夠快，老公就整午餐盒，準時9點幾出到門口行過去，原來唔係太多小朋友同埋係5人場，啱仲爺唔多啱子元，不過郁吓先啦，好過喺屋企打機！放低咗佢地，我地可以自在吓，但咪又係去超市買吓嘢，回家搞埋啲銀行嘢，又登記吓水電煤咁，1點出番去食個午餐，然後買埋飲品就去接佢地，兩個興高采烈咁講今日啲嘢，仲爺話佢識到朋友仔，仲教人講中文，點都好啦肯去試，子元就講自己點勁，都唔諗吓呢啲根本係玩波。回家後又休息，沖好涼到6點幾叫老公煮飯，今晚試咗炒米，掂啦！食埋雪糕抲埋機就瞓覺！

15/8/21

 15/8/21     SUN.   HOT

今日星期日，應該要休息吓，瞓醒就食個早餐，都係食埋啲火腿包咁啦，跟住諗去邊，想行啲大啲嘅商場，老公又話想睇埋電器，找到一個喺Acton嗰邊，都係Broadway嗰邊撘巴士一程車到，咁都可以試，都唔洗一個鐘就到，算方便喎！䢬再去見個商場真係好大，感覺似Elements結合又一城咁feel，都真係有排行，我地徰到3點左右食嘢，都係食foodcourt，但就有越南嘢食，我同老公梗係嚟碗河粉，兩個細就食pizza！倉完再行，又去咗飲珍珠奶茶，可以用廣東話落單，好親切呀！跟住行去商場附近有個公園，細細地但都好玩，有繩網喎，香港邊有。差不多5點要回程啦，返去沖涼宴飯洗衫打機咁，又一日啦！

14/8/21

 14/8/21     SAT.    HOT

今日瞓到自然醒，差不多9點先起身，冇咩特別趕做，就叫老公煮吓早餐，又叫仲爺打電話比嫲嫲傾陣，食完早餐就睇吓去邊，都係出Broadway行吓，食吓雪糕買咗個足球，去咗食炸魚薯條，去M&S買咗大盒雪糕，仲買咗個冰袋嚟裝，仲有買咗炒米粉嘅材料，明天試吓先。返屋企執拾吓出去附近個公園玩，呢個公園得草地咋，咁老公就同子元踢波，我同仲爺行吓草地，見遠處有好大棵樹，就叫老公一齊過去有陰頂嘅地方踢，仲爺走咗去樹下玩，見有人放狗，佢又走埋去八，人地媽媽就比佢玩，又同我吹吓水咁，傾吓咁都幾好，佢地真係nice得好緊要，感覺真係好好！吹完一輪人地走啦，我地差不多6點寔囡返去，沖涼煮飯，今晚老公煮意大利飯，正！可能真係太多日冇食飯，平時唔嗅米氣的都好想食呢！洗埋碗又食吓M&S個雪糕，然後係時候打機，但大笨好奸，人地都唔識玩，佢又睇輸贏睇得好重，都唔講明玩法，根本就唔公平！不過兩條友都好煩，嘈到死！

13/8/21

 13/8/21     FRI.    WARM

今日都係朝早等老公煮早餐，我就上網睇吓有咩可以登記可以做，今日就做咗學校登記，因為有地址證明先得嘛，跟住又報吓有咩球㑹可以玩啦，倉埋個早餐，又要出去採購日用品食物啦，今次都買咗好多，不䢬應該都夠食四五日架啦！買完又周圍睇吓其他日用品點買，最後喺pizza鋪食埋午餐先回程，呢餐個量多到呢，餘下的打包返去今晚食埋都得！返到去兩隻豬又掛住打機啦，我就上傢俬網睇吓嚟緊仲有啲咩傢俬要訂，save咗佢先囉！7點幾老公煮埋個冕餐，係蕃茄薯仔湯呀，食埋午餐淨咗嗰啲都夠，因為真係好飽啦，琴日輕微腸胃炎完都係唔好食咁多嘢！最後hea吓打咗陣mario cart就要瞓覺啦。

12/8/21

 12/8/21     THU.    COOL

今日冇出過去，因為琴晚食得太多，今日腸胃炎，好在有藥，食咗藥疴完嘔完叫做好啲，但都唔想出門口，好在仲有糧，瞓吓休息吓咁，5點幾老公煮晚餐比佢地，我食咗啲菜同粉咋。今朝捱住痛都登記咗網上銀幕，交咗ToR1 form，明天繼續。

11/8/21

 11/8/21      TUE.    WARM

今日又係早上做吓公務，中午就出去，今早叫做登記咗council tax，跟住就去銀行問埋點登記網上理財，跟住就去食午餐，再喺Ealing Broadway買吓嘢，最後買埋餸買埋蛋糕就回程。返去收拾好就換衫去公園。今日約咗喺另一個公園玩，呢個仲好有球場可以跟隊。玩到差不多7點先回程，返去沖涼宴飯食，我就set埋iPad個vpn娛樂用。飯後休息吓食埋個蛋糕等仲爺拍埋片，佢可以安心瞓覺。

10/8/21

 10/8/21     TUE.    WARM SUNNY

今日係我生日，每㐿主力都係去海洋公園慶祝，近兩年疫情冇得去，今年我竟然去咗另一個時區，重生咗咁，幾廿歲人先嚟越洋過海，都算係新玩意！今年生日喺倫敦過，仲要去埋zone 1 市中心London bridge，真係夠哂特別！撘咗十幾個站轉咗一次車去到倫敦市，行去睇埋條電影中才出現的大橋，真係好唔真實！老公找到一個叫borough market的地方行，真係市集咁款，有得食有得買，今日當自己遊客咁啦，周圍參觀吓！老公仲找咗間食生蠔架，為番十幾蚊隻，真係好唔錯！食夠睇夠煮回程啦，返到Broadway幫仲爺買咗啲踢波裝備，下星期一起報咗踢波summer course郁吓玩吓啦！跟住要行去事頭到攞啲文件，仲要買吓嘢咁，其實都開始行到攰！6點幾先返到去，快手沖涼等食，老公買咗牛扒，返去自由煎抵食嘅！今個生日就咁結咗啦，算是一個新開始呢！

9/8/2021

 9/8/2021     MON     COOL RAIN

今日都算安排好活動, 當然唔係玩嗰類, 都係要做啲公務! 瞓到7點多醒咗, 等叫得哂佢地起身梳洗, 叫老公煮早餐, 咁我又搵吓關於銀行開戶的資料, 食完早餐執好嘢又可以出去啦, 除咗開戶仲要去埋登記咗的GP交資料, 仲要去入貨, 咁都搞咗大半日架啦! 先行去Broadway嗰頭的銀行, 話哂有齊3間, 第一站都係HSBC 先, 之前申請咗HSBC UK個戶口, 原來張卡到咗但又冇通知過, 都真係幾搞笑, 咁我地就攞卡入咗啲現金入去先, 叫做有個戶口, 過幾日可以滙埋啲錢過來囉! 再問埋其他銀行都係要交咗council tax先可以, 咁到時先再算啦! 下一站就去食啲嘢先, 因為都已經12點幾, 近近地見到有間麥記咪去試吓囉, 價錢比香港貴啲, 但款式又唔同咁啦, 兒童餐有生果, 唔要薯條可以要沙律, 都幾好, 但咪道都係咁咪囉, 都係食番小店穩陣啲! 跟住行番去間GP嗰到交埋passport同住址證明做登記, 跟住就去埋超市買嘢, 有間叫Iceland Food的超市, 啲嘢真係平到冇人有, 果然係窮人恩物, 我地買夠飲品等等, 回程時又落雨, 呢到啲雨真係唔會停! 返到去都係網繼續找吓資料咁先啦, 6點叫老公煮晚餐, 食完咪又hea吓囉, 慢活嘛!

8/8/21

 8/8/21     SUN.     COOL RAIN

英國天氣都係雨多，日日都要落過雨先安樂！朝早起身食完沙嗲牛肉煙肉蛋出前一丁做早餐，跟住就處理要去警署報到嘅問題，因為要網上登記，但有個number係BNO VISA冇架喎，咁點登呢！好在最後事頭唔知問到人定記得，比咗每方法我試就得咗，終於登記到，要排到出年1月先有得登呢。搞掂老公就話出去睇車，又要撘兩轉巴士去，去再睇咗幾眼又走啦，佢話主要睇真有幾大喎，撘番巴士返Ealing Broadway食啲嘢，去買番件防水風褸先掂，實在係太多雨水！回家後沖涼煮晚飯，食完休息吓啦，明天繼續努力！

7/8/2021

 7/8/2021     SAT     RAIN

今日星期六嘛, 都冇咩公務可以做, 咁就不如去入貨, 頂唔住日日西式早餐啦, 係時候去入吓貨買啲中超嘢, 咁就查好地圖搵巴士, 本來想去榮業行, 但真係太遠, 好在炮哥提意咗間幾近的, 一程車撘20分鐘唔洗就到, 去到最重要梗係入貨買丁麵, 另外仲買咗嘢今晚打邊爐, 又要撘番車返去, 再去番大街嗰邊食午餐及買吓肉類咁, 應該夠食1星期架啦! 因為咁行出去其實都幾遠, 真係幾攰架! 食完買完返嚟, 又換衫出去, 約咗Letty佢地去公園玩, 我都唔知幾耐冇玩過公園, 仲要有可以踏的草地, 佢地都玩咗兩個鐘呀, 踼吓波追逐吓咁就已經夠啦, 有埋Letty佢地啲親戚朋友, 夠哂玩啦, 6點落雨啦馬上返去, 仲爺話佢好開心呢! 返去沖涼先, 老公整打邊爐料, 食完就我清場囉, 其實咁都幾合作呀! 9點幾佢地都瞓啦, 某程度上時差係未習慣哂, 平時子元點會9點幾就瞓!

6/8/21

 6/8/21     FRI     HOT RAIN

今日又係5點就醒, 但琴晚12點幾先瞓喎, 所以某程度上係勁唔夠瞓, 今日仲要設計路線去IKEA買床, 所以醒咗睇咗一輪機就上吓網搵吓嘢! 7點幾叫老公起身整早餐, 食完仲要做埋Covid個Test, 最終11點幾先出門口, 先要行去Ealing Broadway買oyster card, 先可以撘巴士去Wembley, 塞吓車咁都要撘半個鐘先, 真係好大間IKEA, 但其實係啲嘢巨大化咗啫, 廚房唔係公屋居屋款咁, 咪又係咁行! 然後找到床嗰部份, 開始睇邊啲平邊啲啱瞓, 又要排隊訂, 要等到3/9先有呀, 但點都訂咗先啦, 再諗辨法! 喺IKEA食埋個簡單午餐就再行埋下層, 然後就撘番車返去, 本來話諗住去Letty嗰頭踢吓波, 點知出門口就落雨, 唔通連個天都唔鍾意我, 咁咪返屋企hea囉! 老公又6點幾先肯煮飯, 都等到唔餓囉, 食飯前都沖咗涼先, 因為實在仲係會好早眼瞓, 所以沖咗食完洗埋個碗就算, 都唔想清潔啲咩, 早啲瞓啦, 明天到試吓去搞銀行開戶睇吓得唔得啦!

3-5/8/2021

 3-5/8/2021     TUE-THU     RAIN

只係3日冇寫日記, 我就已經由一個時區去咗另一個時區, 真真正正的奇妙之旅! 

3號日頭, 我仲係熊貓酒店hea緊, 食番個最後港式早餐, check out 埋就返荔欣組裝埋啲行李, 去食啲嘢再買多部pat以備不時之需, 返去美孚同兩位長老食個晚飯就返荔欣call車去機場! 差不多8點先入到去, 還要推住行李, 同老公會合, 因為要分兩架車先至夠坐! 終於可以埋櫃位check in啦, 原來都要搞好耐, 寄好埋9大件行李, 就開始話別時刻, 一直吹到10點先入閘, 其實大家都好忍得, 係仲爺影完大合照, 真正feel 到要離開, 就摟住嫲嫲唔放啦, 搞到大家都喊呢! 我覺得自己算係忍得到, 最後都冇喊到呢! 入到閘口, 過海關等上機, 開始已經冇咩啦, 只係怕起飛嗰吓囉, 終於上到機都好快就起飛, 但可能睇住戲又塞住耳仔, 比想像中冇咁大反應, 12小時的旅程正式開始! 

4號朝早就喺架機上過, 全程播咗3套戲又半瞓半醒咁, 食咗餐再瞓過, 到差不多落機前先食早餐, 當地時間5點半已經落機, 係等過海關最耐, 眼見8成都係香港人就知要搞幾耐, 好在我文件印好哂, 算快搞掂去攞埋行李, 等埋接機架車嚟, 8點未夠我地已經離開機場去BNB啦! 幾經辛苦找到個地點, 跟住就入屋, 了解吓啲嘢點用等等屋主就走, 係咁狂處理事務, 炮哥嚟接我地行個圈, 買埋食物, 跟住全日都喺BNB做清潔啦, 煮飯啦沖番個涼咁啦, 好耐冇沖涼咁呢! 4點幾時瞓咗一陣, 食完晚飯捱到8點幾都頂唔住要瞓, 好在都瞓到5點先醒!

5號一早5點就醒咗, hea吓到7點多煮早餐食, 跟住都係search吓嘢, 研究緊不如自己去一轉supermarket買番啲急需品先, 因為啲水真係好多雜質, 點都要買啲清水回來頂一頂先, 所以睇地圖行咗去最近的超市, 都係15分鐘啫, 買完就返去, 煮埋個午餐食就再去, 今次去遠啲去Ealing Broadway, 算係一個大啲的商場, 買到風筒和過濾水器, 咁就可以放心啲, 再比佢地睇吓嘢食吓雪糕咁先回程, 返去梳洗休息吓, 又準備過Letty家, 洗個塵嘛! 問嘢傾嘢, 玩到11點炮哥車我地返去, 就快手沖涼休息啦! 希望明天一齊順順利利啦!

2/8/21

 2/8/21     MON.    HOT

今朝早八點就起身，因為老公要過嚟荔欣等啲人嚟刷傢俬，我就帶住兩隻嘢同嫲嫲食咗早餐，然後就去攞報告，搞掂就返酒店開始整電腦啲嘢，又整到頭都大埋啦，午飯老公叫我哋自己食，咁就買咗麥當勞比佢哋，我就自己買咗粥。食完繼續做嘢，兩三點之後老公返嚟，繼續填表到五點幾六點，叫做完成晒應該填嘅嘢。跟住就搭30號返荔欣，因為今日約咗Barry佢哋食晚飯，仲有要幫我哋set up埋啲電腦野。餐飯都食得幾開心嘅，亂亂龍咁啦，啲小朋友又玩到盡晒大龍，九點幾十點真係要走啦，返去嫲嫲度攞埋啲衫，老公約咗阿Joe買埋宵夜返上嚟，我哋就去沖涼先。執埋野等佢哋上到嚟食下野吹吓水，都成點鐘佢哋先走。喺香港嘅最後一晚就咁樣過咗啦！期待喺英國第一個夜晚！

1/8/21

 1/8/21     SUN.    HOT

今朝要去做檢測，所以8點幾我就起身，梳洗完捉佢地起身出去食早餐，然後行去做檢測，都算快手，11點前搞掂，返酒店搞吓電腦啲嘢，12點幾出門口返美孚，老公返荔欣攞嘢，我地等埋阿媽就去橋底樓下茶記食，然後就打的去摩士，今日係子元告別賽，大家都玩得好開心呢，仲爺負責音樂部同娛賓呢！踢到4點半再影吓相玩吓就走，去咗土瓜灣食，有爸爸有地方呢，除咗地方迫啲都好玩好食嘅！9點幾先散，撘小巴返酒店沖涼休息啦！

31/7/21

 31/7/21     SAT.    HOT

今日都係吃喝玩樂！朝早瞓到9點幾，出去攞衫俾嫲嫲洗，然後一齊去食埋早餐，跟住約咗子行佢哋，去咗食錢樂園放血。講完就等阿Joe放工，喺熊貓食埋午餐，老公同子元去咗東涌踢波，本來我係帶埋仲爺一齊入去玩吓遊樂場。但見真係落雨喎，都係留喺酒店hea吓，再上Joe到hea吓，6點幾返酒店會合老公佢地，去食泰國嘢，小圈子聚會，先食嘢再打保齡球，咁就差不多廿年，喺link場都好多回憶呢，到到11點再食埋糖水先散場，返酒店還要收拾收拾先瞓得。

30/7/21

 30/7/21     FRI.     HOT RAIN

今朝瞓到八點起身，都算係咁生寶床都瞓得到，跟住出去食早餐，然後攞衫去嫲嫲度俾佢洗，仲爺就喺嫲嫲度等我哋，我哋就返屋企執嘢，仲有好多嘢要拆，我又要將啲行李排好號碼，貼好號碼等等，原來都幾要時間，老公同子元就拆傢俬，係咁搬落去。午飯出咗橋底食，食完子元就抬個空氣清新機返酒店搞搞佢先，夠鐘就自己去踢波，我地要等Barry返來先搬埋個電視櫃落去，咁就可以閃人，返去接釋仲爹，再去球場接埋子元，等佢踢完去食丸龜，再撘巴士返酒店，沖涼休息，明天繼續努力！

29/7/21

 29/7/21     THU     HOT RAIN

今日終於要搬離住咗咁多年的屋企啦, 不過有屋企人在的就係屋企, 唯有係咁諗! 起身出去食個早餐, 買埋紅白藍返去再狂執嘢, 真係好多嘢都未執咁, 好痴線呀執極都執唔完, 1點幾都要閃啦, 因為要2點check in 呢, 落大雨咁落樓call的士過酒店, 2點前過到去酒店check in, 幾經辛苦上到房, 又要噴一輪消毒先, 老公就返咗屋企拆嘢等等, 我就喺房執嘢, 又上網整吓嘢先, 6點幾7點過嫲嫲到食晚飯, 又係豐富到你唔信咁啦! 食完坐吓乾埋啲衫就返酒店, 仲爺最期待就係浸浴, 仲要係用浴球, 比佢玩一次啦, 但浸到皮都甩先肯上水! 老公食埋飯買埋糖水返來, 沖好涼做吓嘢先得呢!

28/7/21

 28/7/21     WED     HOT

今朝起身竟然突然覺得感觸, 喊起上嚟, 捉咗兩隻細起身, 嫲嫲嚟咗接佢地去飲茶, 趕咗佢地出門口就開始胡思亂想, 最後忍唔住打咗比Ivy, 話哂呢3年有咩唔開心, 有咩開心佢差不多都係第一個知, 一企起身轉個頭就可以同佢講, 所以嚟到呢個時刻, 我都係第一時間諗到佢, 呢大半年一路走過的每一步都係佢陪住我, 所以去到呢個終於忍唔住離別的眼淚要流時, 都係想搵佢! 之後傾咗差不多一個鐘, 我都有啲唔好意思, 但傾完係好咗啲! 叫醒老公起身煮埋丁麵佢食就開始又再執嘢再做吓其他嘢, 訂咗test kit咁, 兩隻豬唔喺屋企都執得快的! 仲爺回來後都係喺房玩啫, 咁2點幾過去等老公去埋律師樓就去食嘢然後回家, 都有再收拾吓整吓銀行嘢, 6點多老公就出門口去咗踢波, 我就用電腦過埋啲相, 8點幾出門口去球場會合, 佢地仲踢緊, 仲爺又要喺隔離玩遊樂場, 等佢地走得就去食嘢, 去咗食海南雞嗰間, 原來好好食架! 回家後沖完涼收拾多陣又12點幾啦!

27/7/21

 27/7/21     TUE.    HOT.

今日真係好熱，朝早瞓到9點幾10點先起身，叫咗佢地起身出去食早餐，時間關係只可去橋底食，跟住老公就去整嘢先，我同仲爺返屋企，子元又去咗人哋屋企打機，咁我地又再執吓嘢囉！叫做又執咗多兩個行李箱，都係唔夠用，要再買紅白藍裝衫。執吓雪櫃又散吓貨，攞咗啲辣椒油過去比晴媽，另外又攞咗啲嘢比阿媽，仲爺又同咗溫𧘲朗去遊樂場玩，我地又要跟，但真係好熱，返到屋企我都覺得好攰，絕對有中暑的感覺！差不多7點又要出去食飯，去食上海野，順手攞埋嘢比嫲嫲，未食完老公就返去接應葉生攞個櫃走，我地返到樓下都撞到佢剛搞掂走啦！返到屋企都係沖涼休息啦。

26/7/21

 26/7/21     MON.    HOT

今日其實都冇咩好寫，因為大半日都係得我一個喺屋企，雖然有啲失落感，但靜靜地咁又幾好，食個早餐咁又做吓家事，睇吓奧運咁囉，都要諗吓有咩執吓，肚餓啦又煮嘢食囉，都幾悶，但佢地返嚟我又好燥，真係好矛盾！6點多出去食飯，約咗休同程詠食，都係傾吓偈咁啦，食到8點幾9點散水啦，撘西鐵返去，心情都係麻麻地，因為叫老公做嘢佢就好唔合作咁，算啦我自己做番好過！

25/7/21

 25/7/21     SUN.    HOT

今日冇咩做過啲有意思嘅嘢咁。朝早瞓醒老公揍咗子元去踢波，咁我就煮早餐比仲爺食，然後執咗兩佃飾櫃，等老公送過去比Gloria，等老公回來就可以出門口，約咗舊同事Tim哥去食個lunch吹吓水咁，都傾到3點先散，我返到美孚買埋M巾等就返去！休息到子元踢完波回來，7點多就去May屋企，歡聚3·0嘛！食嘢吹水等埋炮哥，隔住半個地球，7小時時差，慶祝678月生日的人呢，真係好正！玩到點卷先走，我都真係好攰啦！

24/7/21

 24/7/21     SAT     HOT+

今日好似冇忙咩但又好似好忙咁, 好佛系! 朝早醒咗就自己打陣機先, 3個男人都未醒, 9點幾捉佢地起身食早餐, 食完回家冇咩想做, 子元又話打機, 咁就一齊打mario party, 都幾好玩喎! 不過之後就有啲趕咁去觀塘同舅父佢地飲茶, 本來撘到架6號可以轉得切40號, 但就係差少少, miss 咗架車局住轉地鐵, 可惡! 去到係有BB玩幾好呀, 我都變咗表姑媽呢! 然後都係吹吓水啦, 3點幾老公佢同子元閃先去動漫展, 我就同仲爺回家, 阿媽跟埋返嚟, 佢攞埋個磅走呢! 然後我都係上吓網, 再睇吓仲有咩要做, 未做等等! 老公佢地提早回程, 因為根本入唔到場, 等下星期一再試試! 嫲嫲去法國覆完診就過咗嚟找我們食晚飯, 最終去咗新世紀食, 因為我想買埋對涼鞋過去著, 去咗food court食就算! 回家後都好攰啦, 雖然唔洗再執屋, 但始終心情等都係好複雜, 其實精神上都好攰.

23/7/21

 23/7/21     FRI     RAIN HOT

今日係船運搬貨的日子, 朝早依然發顛咁執緊嘢, 已經8點幾起身架啦, 但好似做極都做唔完咁! 出去食完早餐回來, 我都有啲顛顛地, 因為仲係百廢待興咁! 唯有盡力做! 12點幾運輸打嚟話可以過嚟, 唔洗等到2點, 咁就梗係好啦快啲搞掂! 最終用咗3個鐘就完成哂, 有啲嘢我都後悔冇自己pack定先, 如果唔係可能可以再快啲, 同埋再少啲箱, 因為飾物櫃啲嘢若果就咁用膠袋pack咗就用少啲包裝紙,到時唔洗拆得咁辛苦! 4點幾搞掂哂就出去同煊交收幫我買的仲爺禮物, 同埋去橋底食嘢! 之後老公帶哂兩個去球場, 咁我就可以返屋企執番好同清潔好間屋, 話哂都仲要住多一星期嘛! 做完真係覺得自己好叻, 又亂又dirty我都可以回復原狀咁! 睇吓奧運開幕, 睇到8點多要出門口去樂富同老公佢地會盒, 約咗剛sir佢地食飯, 又食到10點趕先走! 回家後都係沖涼休息啦, 我今日已經好攰啦!

22/7/21

 22/7/21     THU.    HOT

今日都係執嘢日啦，朝早又瞓到10點先起身出去食早餐，然後去埋幫事頭買齊嘢，跟住就返屋企執嘢，梳妝櫃同飾櫃囉，但其實都好多嘢，加埋衣櫃都執到7點幾，期間老公去買咗啲嘢食囉，佢6點多出門口去球場睇埋子元，我就等交收荒失失幾隻公仔，8點幾先出到去！食咗間日式丼，唔算貴又好食，等子元同啲隊友食埋啦先返屋企。

21/7/21

 21/7/21     WED     HOT

今日瞓到10點幾先知醒, 子元已經出咗門口, 約咗去人地屋企打機喎, 由得佢啦! 咁我地起身梳洗就去食早餐, 近近地美孚食就算, 然後返屋企又係時候執嘢, 今次到床下底, 某程度上算係最難執的一部份, 因為太多唔知仲要唔要好的東西, 我有好多人生喺到呢! 所以都執足一個下午, 太多太多好耐冇見的相呀人呀簿呀咁, 好多我已經掉咗就算, 連信都掉哂, 算啦, maymay有句講得啱, 回憶在心中! 梗係啦, 我send 咗張佢的舊相比佢, 佢個樣呢, 嚇鬼死, 叫我燒咗佢, 我就話梗係唔好, 帶過去英國供奉! 總之處理好呢啲回憶啦, 而家只欠兩個梳妝櫃, 明天應該搞得掂! 6點多出門口去黃金放血, 應承咗細佬買Switch, 加埋要買電腦呀, 其他配件等等, 放咗好多血呀, 但都要買架啦! 子元打完機過來同我地會合, 一齊買完就去咗食台灣嘢, 滿足回家! 還有好多嘢要做呢, 家務啦, TT交租啦, 又要成就解鎖等等, 仲有個幾星期咋, 完全想像唔到之後生活係點, 只可積極面對! 

20/7/21

 20/7/21      TUE.    RAIN

今日大停電，所以要安排好節目！8點多起身出門口，先去康傑樓下食個早餐，跟住上去探老師，唔覺唔覺都講咗成個鐘，由申請到過到去點呀，又影吓相咁，10點多先走，都要快腳，因為買咗飛10:50睇黑寡婦，剛剛好趕得切。其實呢套講好多劇情，所以仲爺根本唔明！見完戲梗係去食飯，然後攞個眼鏡去較番好，跟住就去按腳啦，荃灣呢間又按得幾好喎，仲爺又要跟埋嚟！按完就回家，應該有番電，返去都係休息吓，因為6點又出門口去phoebe 屋企，撘巴士入去大圍，而家啲豪宅真係誇，子元仲話酒店咁！上到去就開始準備食海鮮蒸，吹水吹到11點半先走，Phoebe仲話嚟送機添！到時再算啦。call Uber返去超快，沖涼休息！

19/7/21

 19/7/21     MON     RAIN 1號3號風球

今朝要去打針, 所以8點多就起身, 本來諗住食咗早餐先, 但時間關係, 都係打咗先去君日食, 打嗰時都係好驚啦, 不過好快就打完, 去食完早餐子元就陪我返嚟, 老公出咗去買嘢, 我返到嚟都輕輕執咗少少嘢, 然後睇番幾集大叔的愛, 子元11點幾約咗FD出去睇嘢買嘢, 都係佢啲動漫嘢啦, 佢用自己錢唔理佢咁多啦! 跟住我就試圖打去轉番麗寶的水費電費單個名, 但原來個電話係好難打, 可惡! 唯有專心睇大叔的愛, 今日叫做完成咗, 安樂哂! 老公回來執咗佢嗰啲工具, 2點幾出去食嘢, 喺樓下撞到笨元就叫佢一齊出去食, 食完回來都係再執啦, 完成埋個衣櫃, 5點幾出發去Joe屋企打邊爐, 仲爺下午已經去咗佢屋企玩! 又食到10點幾拉先捨得走, 明天又有活動啦, 希望打完針的攰明天冇咩事!

18/7/21

 18/7/21     SUN     RAIN

今日都係瞓到自然醒啦, 見佢地慢吞吞咁, 我就出去買麥記返來食, 佢地又可以執住嘢先, 慳番啲時間, 因為老公11點又話要揍子元出去踢波, 咁就得番我同仲爺喺屋企, 仲爺就好悶咁啦, 我就執咗個廚房, 都算清得七七八八, 淨番啲工具唔係我範疇我理唔到啦! 2點多求奇煮咗罐頭湯意粉食咋, 然後繼續執, 老公佢地差不多5點先返到嚟, 都要執吓嘢, 6點幾出門口同嫲嫲佢地食飯, 去咗悅來食泰國嘢! 仲爺食完就跟咗嫲嫲返去瞓, 因為明天我要打針, 老公又要去買嘢, 大家都有嘢忙呢, 仲爺最好跟住嫲嫲啦!

17/7/21

 17/7/21.    SAT.    HOT

今日都係掉嘢同執嘢啦，瞓到10點幾先起身，快手趕出去荃灣食埋個早餐再去攞眼鏡，去荃灣廣場買埋戲飛先返屋企。又開始執吓掉吓嘢，子元間房佢自己繼續，我地算係執咗個電視櫃，因為我要握衫做唔到咁多，明天繼續。5點幾出門口過阿媽到倉飯，預早的生日飯，阿媽仲諗住比錢我帶走，我叫佢留番解封時過嚟英國探我地仲好！食完飯食埋蛋糕hea吓就走啦，老公話食埋糖水，子元就自己返屋企先喎！咁食埋咪返去囉！

16/7/21

 16/7/21     FRI.    HOT

今日都係執行李的一天！瞓到9點幾10點起身，諗住睇吓晴媽幾點過到嚟攞嘢，但未夾到，我地就出去食咗早餐先，再去埋惠康買嘢，去埋銀行攞嘢，跟住就追去又執過！今日進度算唔錯，入咗電器入一個行李喼，執哂子元張床下底！掉咗無限咁多嘢！6點幾要出門口，今晚約咗Carlie、楓、Stella佢哋晚飯，又係完全傾唔完啦，入完入咗閘都再講咗半個鐘，10點半先硬著要散！回家上樓上攞埋之前喺公司淘落件T shirt，辛苦同事幫手攞返嚟呢！

15/7/21

 15/7/21     THU.    HOT

今日都係忙忙碌碌啦！9點多起身梳洗，醒起要交文件比阿May，就馬上打去問做宣誓要點，原來夾啱時間過去就可以，咁就去深水埗食早餐，去黃金買埋cam就過去登記，12點半可以宣誓，勁快搞掂就先回家，叫子元放學回來食個午餐就回家，又係處理事務的一天，忙咗好耐咁，將仲爺間房還原，搞到差不多六點先出橋底茶餐廳，約咗May、Gloria、Tammy一齊食飯聚吓，老公買海鮮去加工，食到咁上吓老公要去球場同子元會合，今日係最後一課Konter啦！食到8點幾意尤未盡就上咗May屋企玩，估唔到玩到1點先散，仲要又約咗25/7提貨再去Gloria到BBQ！

14/7/21

 14/7/21     WED.    HOT

今日係仲爺期待已久的迪士尼之旅，點煮係熱爆架啦！朝早瞓到9點先起身，出得門口去長沙灣食早餐都已經有啲遲，所以11:30先入到迪士尼！煊帶我地入場，唔覺唔覺都十幾年啦！影埋相就開始去玩，先係去明日世界，但Ironman都好多人，不過有冷氣咁等都可以！再去玩蟻俠都係要排，不過見再仲爺個童真樣就冇咩所謂！仲爺又話要去胡迪嗰邊玩，係最熱嘅時候呢！真係熱到溶，本來想去食corner cafe，但原來要訂位，咁算囉去買個包食，仲抵！同Barry會合咗，就埋佢地一齊玩，但主要都係去啲啱BB玩的地方，最好有冷氣添啦，玩咗小小世界、米奇狂想曲、獅子王且、迷離莊園同士兵降落傘，咁就已經8點要走！最後一次嚟啦，就算再返香港，仲爺都未必有興趣再嚟玩！返美孚買埋外賣返屋企食，子元就玩咗一日機啦，唉！

13/7/21

 13/7/21     TUE     HOT*

今日嘛, 終於有點我真係冇工返的感覺了! 瞓到自然醒, 都9點幾啦, 起身梳洗去食君日食早餐, 食完就回家, 因為都嘢做呀, 今日要收紙箱Pack吓嘢啦, 老公就帶仲爺去睇戲同玩, 我就等子元放學買飯回來比我食, 然後執嘢執咗一個下午, 其實唔係好多嘢架咋, 只係仲爺啲書呀校服呀等等, 還有要處理啲口罩, 咁又整到5點幾, 子元出去練波, 我就出去荃灣會合, 同Joe佢地食嗰間有芫茜煲的火鍋, 咁又邊食邊吹咗個幾鐘, 然後老公去買埋個之前一直唔捨得買的按摩機, 因為過去就冇得買, 就嚟買哂個香港過去咁! 跟住上佢地屋企接番仲爺回家, 明天又要準備去迪士尼呢!

12/7/21

 12/7/21     MON     HOT

今日都係要6點幾起身, 叫醒哂啲男人起身, 返學的返學, 由於佢地太慢手慢腳, 最終要撘的士先啱啱趕得切, 同埋唔洗熱囉! 喺學校門口影吓相出吓post咁囉, 跟住就同老公去君日食早餐啦, 食完佢有佢去運輸署做嘢, 我有我返公司攞票吹水, 都早咗, 9點幾就返到去, 快手攞完就過去OSO嗰邊吹水, 吹到差不多10點先走, 上德福入埋張票就行吓街先, 因為返屋企又唔係, 就不如行到夠鐘去學校接仲爺, 老公琴晚睇完波要休息! 12點去到學校, 接完仲爺影吓相, 仲爺講先知黃老師都走啦, 可以影番張相留念呢! 返咗屋企先, 諗住未夠鐘同Ms Lee食飯, 點知大家誤會咗, 佢以為12點半, 我地就等佢回覆, 所以錯失了, 咁就算啦, 我地照等子元放學回來換埋衫去四小龍食, 去咗飲茶, 飲完老公買埋嘢就回程, 叫子元帶仲仲返去先, 我同老公就去做嘢買嘢去銀行等等! 晚上約咗蘇sir食晚飯, 撘30號過到愉景新城食outback, 講吓學校嘢咁啦, 反正兩位都唔再係荔天學生, 知道吓學校秘密都唔怕, 今年淨係學生都41個人退學, 應該係前所未有吧, 加上老師都走四五個, 唉......! 食完餐飯都散, 我地去咗食錢樂園放血, 但今日手氣麻麻, 攞唔到啲咩, 玩到差不多10點佢地食埋杯雪糕就回家!

11/7/21

 11/7/21     SUN.    HOT

今朝都算瞓到自然醒，起身梳洗後食早餐，就去荃灣配眼鏡，主力係我配，子元驗咗眼都真係要配，但過到英國都有得配仲要免費，其實都應該過去先配。咁我配好都係12點幾，咁就過荃新天地食午餐，約咗KiKi。找到食咩，唯一唔洗排隊就食牛陣。可以食個半鐘，都係傾下偈咁啦！食完行埋去西鐵嗰頭就散，老公同子元去將軍澳踢波，我同仲爺返屋企，摺埋啲衫休息吓，7點幾過去將軍澳搵佢地食飯，同埋朱欣佢地一齊食，仲車埋我地返屋企呢，今晚要睇歐國盃決賽，唔知頂唔頂到呢。

10/7/21

 10/7/21     SAT.    HOT

今朝8點多起身，因為要去剪頭髮，揍埋仲爺去剪先，我去快食個早餐先，好在早去，因為慢慢都人多，好耐未試過染髮，都搞咗好耐，12點多先走得。帶埋仲爺去同衍食飯，都係嗰句，估唔佢會約我啫！食咗個幾鐘啦，去架部玩咗陣都要走，仲爺真係好煩！返到去諗住買餸，但仲爺又急呢樣嗰樣，算啦返屋企先！返去見到笨元hea住嗟都唔做咁又火起，即刻出咗去買餸算，我煮要冷靜吓！買完回程見到Janice佢地一家，傾咗陣啦！回家沖涼抖抖又要煮飯，清潔完執吓櫃咁，又掉咗一堆嘢，可以沖涼休息，但仲爺都係唔合作，攞咗Lego盒火車出來玩，又散咗砌唔返，激死我！

9/7/21

 9/7/21     SAT.    HOT

今日好忙碌咁！見時間許可，就今日去做咗清稅先。揍咗仲爺返學就直過灣仔，食埋個早餐就去稅務大樓，，幾經辛苦轉到lift去29樓，都唔係好多人，我即刻排隊處理，要填番3年報稅表，真係填出個人生，好在都帶齊料，只係怕填錯要好小心，交好等多陣就出釋款通知書，走得！撘巴士返去接仲放學，去Aeon食埋午餐，諗住返公司交咗份嘢可以收票，點知又未有票，唯有交低就算，仲爺本應返屋企，但又要跟我嚟公司，就由得佢比人玩吓。回家後主力執仲爺間房，掉咗好多嘢，真係執到死死吓先叫做執哂！笨元又帶咗同學上來玩，嘈死我！6點多佢地走哂，收拾好就出門口去Elements，約咗阿妹同老豆食飯，是但啦快手食完9點幾回家沖涼休息。

8/7/21

 8/7/21     THU.    HOT

今日係last day啦，好傷感又唔係，但感覺係複雜嘅！老公今日借咗車，方便放工幫我車嘢走。所以可以車埋仲爺返學，車埋我去南昌站先，返到公司打埋呢次卡，跟住就去KFC買早餐，買埋Ivy嗰份，食個豐富早餐！跟住全日都冇做嘢，係報埋更啦，然後都係吹水同吹水。跟住再執吓嘢咁啦，我已經好少嘢，但煮要時間執，感覺怪怪的。12點幾叫埋Joey陪我落樓下酒樓攞位先，今日最後一餐公司Lunch就同OSO食，咁都開心嘅！然後去德福攞埋餅返上去，再執吓嘢就準備派吓餅影吓相，跟住都係等放工，等老公嚟接我前就搬定兩箱口罩落去，到夠鐘先同佢地一齊彈閘，最後一次啦，Joyce陪到我等老公車，個傻婆bye後上咗shuttle喺到喊。有呢班曾經共事嘅朋友寵愛，我算是好幸運呢。回家後仲爺同我喺屋企，幾日冇理間屋已經垃圾崗咁，仲有一堆衫未摺呢，唯有邊睇大叔的愛邊摺，只是同仲爺食咗個烏冬就算。期間Barry 上咗嚟度吓個櫃，我都唔得閒理佢，叫佢自便。終於摺完衫，我要休息吓先，沖完涼還要收拾明天去清稅文件。

7/7/21

 7/7/21     WED     HOT

今朝好趕咁揍仲仲返學啦, 叫極都行得好慢, 好辛苦先叫得佢郁, 好在趕到8點前, 跟住我又要趕返工, 買埋早餐返去, 返去簡直係放假咁啦, 大姐二姐都唔喺到喎, 我都係得番個肉體喺到啫, 做吓自己嘢咁又放飯, 今日係同Ivy一班人食, 近近地落樓下飲茶啦, 吹吓水咁囉! 下午返去都係放肆架啦, 係做咗少少嘢, 然後都係吹水都執吓嘢, 放工就去奧海城同煊同小柏佢地食飯, 食到8點梗係傾得唔夠皮, 喺OC行吓先, 找地方食甜品, 最終去咗麥記食杯雪糕坐到10點先肯走, 同煊一齊撘巴士, 佢都送到我返樓下呢, 最乖仔係佢! 

6/7/21

 6/7/21     TUE.     HOT

今朝又要揍仲仲返學，都係揍埋呢幾日返荔天啦！今日行過南昌又係好熱，返去打埋卡去買早餐，吹完水做咗陣嘢，又要做吓自己嘢先安樂，反正阿姐唔喺到嘛！午飯同咗Ivy出去德福食韓國嘢，原來我同佢吹咁多水，都冇咩出去食過飯呢！食完幫老公買埋個足球就返去。下午本身做緊嘢，阿姐又返咗喎，佢最大作用咪同我簽咗文件囉，忙完一輪放工，過球場會合，今日有力等到佢地踢完先一齊去食KFC再回家。仲爺張床拆咗大半，佢嚟緊瞓地下啦。

5/7/21

 5/7/21     MON     HOT

今日處於唔想做咁多公事, 盡量做私事的日子, 朝早唔洗揍仲返學, 但都係咁早起咗身, 咪早啲出門口去買麥當勞囉, 食完吹吓水咁, 就報吓更做咗陣公事再做自己嘢, 係咁諗有咩要print! 午飯出咗去食牛陣, 本身係同監督食, 但最終同埋經理食, 又要聽佢廢話! 食到2點幾先返到去, 佢地話洗鬼理咩, 我而家大哂喎! 咁返到去都有做嘢架, 始終唔好咁衰仔! 放工試吓撘屯馬線, 但原來時間都差不多, 人一樣咁多咁迫! 返到去等開飯, 老公話子元派咗卷, 不過算啦, 遇咗佢唔得架啦, 希望佢過到去有番動力! 晚飯後都係睇電視, 大叔的愛真係好好睇! 同仲仲講佢張床差不多要拆, 佢又好唔捨得, 唯有同佢影吓相, 彌補吓心理囉!

4/7/21

4/7/21      SUN.    HOT

今朝老公揍子元去踢波，我就同仲仲係屋企食完早餐做功課，佢有兩個小日記未做，做好就邊摺衫咁睇埋兩集大叔的愛，但啲衫摺極都唔完咁，3點多老公打嚟話去君日食嘢，然後回家，佢又瞓覺囉，我就繼續家務，還有永遠未開始到收拾的行李。7點多我地出去食飯，再買外賣回來比兩隻唔願出去的豬食。沖完涼睇吓電視咁又一日！

3/7/21

 3/7/21.     SAT.    HOT

今朝瞓到9點幾，出去食個早餐然後去銀行，叫咗子元揍仲返去先。喺銀行搞咗好耐，叫做問咗應該問嘅嘢啦。返到去又要幫老公整埋佢個UK account，然後出門口入元朗，喺荃灣西同嫲嫲會合，入去先喺B仔飽食一頓，再Uber入去二姑姐到，其車入去都係坐，不過有bb玩，都幾好！食埋晚飯佢地繼續打牌，我地9點幾都走啦，又係uber！

2/7/21

 2/7/21     FRI.    HOT

今日又要返工，又要處理租屋銀行啲嘢，精神真係好攰！好在今日仲爺放假，我唔洗揍佢，咁都好少少。返公司買埋早餐，食完就開陣工，月頭煮係冇停手，啲嘢都係我做，午飯出咗去同其中一group同事食送別飯。下午回來真係要做自己嘢，唔係好想回億，一個字「攰」！放工行去球場會合，但企咗陣都頂唔順要去商場等，帶埋仲爺去，但我真係好攰，不過商場真係找張櫈坐吓都冇其實都幾無奈。等笨元踢完過來會合食埋晚餐，撘Uber返去。

1/7/21

 1/7/21     THU.    HOT

今日瞓到九點幾起身，捉佢哋出門口，喺1號冰室食早餐再買餸，跟住就一路行過去街市嗰邊買餸，買完就搭巴士返屋企，已經好熱好熱出晒汗。返到去都已經好攰，仲要處理埋返嚟啲餸，老公又叫子元去跑步，佢又唔想跑，總之就好麻煩！最終都係冇跑但就唔好打機，佢哋已經喺度黑面架啦！食得返嚟都咁上下時間我又要煮，都係雪櫃廚餘。食完我真係忍唔住，好攰，聽住電視機播緊音樂好吧都瞓咗！四點幾醒咗，又要開始預備晚餐打邊爐啲嘢，今日約咗康傑同學仔上來玩。五點多佢哋都開始上嚟，預備下一啲嘢食，set吓場地咁，齊人就開鑊打邊爐！邊食邊吹水，咁就11點起影埋大合照先至散場！佢哋走咗之後，要清潔先可以沖涼休息，又搞到點幾鐘。

30/6/21

 30/6/21     WED     HOT

返埋今日又放假, 揍咗仲爺返學就返工, 返去食埋早餐開工, 然後差不多全日做自己嘢, 淨係睇銀行呀, 等等都有排我玩! 午飯本來諗住攞Ivy張卷去買飯, 點知唔用得, 咁我都要買嘢食, 好在有張Starbuck卡可以用埋佢, 買咗個沙律. 下午都係做自己嘢啦, 睇到好攰好煩呀, 又要抖吓先! 放工回家有飯食, 阿媽喺到食埋先走, 我就做清潔, 老公帶佢地出去踩吓單車食吓雪糕先回來, 我又要搞租樓啲嘢, stuck咗吓比訂嗰到, 睇嚟要去銀行入錢先得, 今日叫做申請咗離岸戶口, 希望順順利利啦!

29/6/21

 29/6/21     TUE     HOT+

今日要返工啦, 都係間中做自己嘢, 間中做吓公事囉, 因為要同啲麻煩人hand over嘛! 朝早好努力咁做私事, 睇吓啲銀行嘢呀等等, 午飯都冇出去, 叫咗飯食完休息吓, 打完針原來真係好攰, 真係想今日放埋假! 下午又忙碌, 想做吓自己嘢都冇! 放工本來老公話去球場, 但係我真係好攰, 就話唔出去, 加上仲爺未做好功課, 所以等我回來後, 出去美孚食啲嘢就算, 回家後沖涼睇埋大叔的愛就瞓, 累積疲憊加打完針, 係要早啲瞓!

28/6/21

 28/6/21      MON.    RAIN

今日要打針，所以放假一天，撞正紅雨變黑雨，就連針都冇得打，唯有等落波先再去，阿媽就再過來接濟我哋！落到去打針都唔洗排，流程都好快，係打完等嗰15分鐘最耐。回家後開始攰，但都要煮飯收拾，阿媽過來就開飯，食完還要做家務冇得休息，一路到6點幾出門口前煮有啲忙。忙租樓啲嘢，有炮哥幫手睇樓，都係好感人。跟住去食晚飯，然後去踢波，係告別三角賽，老公叫咗好多人嚟，真係幾壯觀，大家都係開心咁去告別！踢完仲去咗轉麥當勞，食到阿健請嘅嘢呢！返到去沖涼已經好攰。

27/6/21

 27/6/21.    SUN.    HOT RAIN

今朝9點幾晴媽WhatsApp’s來問今日去唔去科學館，咁反正今日冇咩做， 就局佢做埋啲功課，可以出到去。𣎴過要做兩份小日記，真係攞我命，咪又係我作！12點幾終於搞掂準備出門口，撘西鐵過去又要行，終於去到可以入堤，但其實大人嚟講好悶，係佢地舋得好玩。中途我出咗去買三文治頂肚，但食嘢其實又要返出去，咁樣真係好攰。叫咗老公5點出來食晚飯，咁我地都可以閃。去咗食燒牛肉，係好得意嘅食法，一個牛肉球咁出場要自己燒，好味！食完去咗行通利，仲爺睇樂器最開心，跟住行咗陣Donki ，再去食甜品先撘巴士返去，間甜品又係好正，今日食咗好多好嘢！

26/6/21

 26/6/21     SAT.    HOT

今日都冇咩出過街，只係朝早揍仲爺過海怡學最後一堂音樂。今次見到地鐵又轉咗張poster,仲爺喺中間位仲要大頭，好正。仲要撞到龍sir可以影吓相。襯仲爺學緊我地仲唔快啲去食餐，shopping完一輪返屋企，子元已經補完英文返咗，聲稱溫緊書。不久佢同老公又出咗去，要出去比賽，突然間英國啲嘢湧出嚟，但最終我覺得太鬼，冇辦法唔向炮哥佢地求助，最終炮哥迫一迫我地，Loletta又幫我問吓search吓，又行前咗好多步，訂咗BNB，再問咵兩間租盤。但壓加真係好大！

25/6/21

 25/6/21     FRI.    RAIN

今日都係如常咁返工返學啦，冇咩特別，倉完早餐做好嘢就開始做自己嘢，午飯要膈阿姐食囉，點都要散一散水飯，局住吹吓水咁囉。下午返去咪再繼續做自己嘢。放工過球場會合，老公今日去簽埋大訂，又行多咗一步！去球場後食吓小食咁，我再帶仲爺去商場，車在唔想喺室外吽！又去咗unique 買咗衫換。等子元踢完就去食埋嘢回家。

24/6/21

 24/6/21     THU     RAIN

今日下午覆診, 所以朝早都冇咩心機做嘢, 揍咗仲爺返學再買個早餐返工, 食完吹吓水做咗少少嘢又係到睇屋, 完全無視阿姐, 真係要好好享受呢段日子呢! 等收工1點即閃過美孚同老公會合, 一齊食午餐, 食完我都閃先, 返去換衫攞埋覆診紙就上去覆診, 要佢寫埋去英國GP時用的藥物單等等, 攞埋藥回家, 又係要對功課, 執吓櫃掉吓嘢等等, 跟住老公跟咗子元去練波, 我同仲爺喺屋企, 條友玩到7點幾都唔捨得完, 同啲公仔開party喎! 8點幾過到去樂富同佢地會合食晚餐, 我好傻咁一講米線以為譚仔, 好在未叫嘢食仲走得! 食完又好似唔多夠, 唯有再出去超市買啲, 見到有盒刺身好抵, 即買啦! 

23/6/21

 23/6/21     WED     RAIN

今日都係咁返工返學啦, 子元竟然冇晨早起身睇機, 少有! 返去都係想食個好啲早餐, 又去咗買撈烏冬, 跟住咪做吓自己嘢囉, 因為阿姐出咗去嘛, 咁我就睇吓啲英國中學, 睇吓阿哥啱唔啱啲科, 午飯後阿姐都未返, 繼續做自己嘢先, 上去詩樂氏買埋阿媽要啲嘢, 阿姐就返咗, 咁咪扮吓工囉! 放工又落雨, 好在唔太大, 返到屋企還要煮飯, 老公琴晚更夜冇得瞓, 所以日頭全瞓, 食得飯叫佢, 飯後還要處理租屋啲電郵, 好攰! 笨元算醒抺好地, 咁我只係洗碗就得! 老公夠鐘就返咗工啦, 我就要搞掂埋仲爺啲功課, 還有淘寶的壓縮袋等等, 總之又係有排都未有得瞓啦!

22/6/21

 22/6/21     TUE     RAIN

今日真係唔係咁開心, 朝早已經叫仲爺快啲, 但都係趕唔切係大雨來臨前避得到, 佢返學嗰部份都仲可以, 到我行去南昌時就真係倒水咁, pat pat 都濕埋呢, 返到去食埋早餐就開工, 出埋啲通告, 快啲做好嘢先有時間做自己嘢! 午飯後上德福買餸, 因為老公唔買, 佢話好攰喎, 因為琴晚瞓唔夠, 本來今朝約咗Ann同子元剪咗啲頭髮先, 跟住話11點半先出門口過去, 因為佢要瞓, 但子元1點半要返到學校考試喎, 邊夠時間呀, 就算真係夠都要預鬆啲啦, 成日話夠夠夠, 夠佢條毛! 真係好激氣! 最終我叫子元叫醒陸生早啲帶佢去! 午飯上去買完餸, 下午有嘢做就做啦, 仲要hand over, 唔教唔知呢個世界有人蠢得咁緊要, 已經係最簡單嘢, 但都可以唔明, 救命! 不過我唔理啦, 教我就教咗, 反正到時都唔喺到做, 唔洗理咁多! 終於放得工啦, 返去又要煮飯仲爺又叫我教功課, 子元出咗去踢波, 老公又瞓, 我已經冇發火, 咪煮飯先囉, 佢又鬧個仔做咩唔做, 咁你明知佢跳制先自己做架啦, 鬧嚟做咩! 但到食完飯, 老公返咗工, 我開始要處理佢啲嘢就出事, 未做哂就梗, 跟住又郁得好慢, 最慘我係咁喺佢房發現偷咗好多子元啲嘢過來, 我都算唔係大打佢, 但偷嘢真係好錯, 必需嚴罰, 最終搞掂哂我要差不多十二點先沖到涼, 真係好攰! 

21/6/21

 21/6/21     MON     HOT

今朝又係要揍仲返學啦, 然後撘西鐵明知紅磡轉咗新月台, 但都係好迷網! 返到公司食早餐後就開工啦, 今日都忙呀, 朝早做好通告啲嘢, 下午又要教Mandy做handover啲嘢, 慘過自己做但又冇得唔教喎! 午飯又要諗食咩, 最終咪又上咗德福食super sandwiches, 忙足一日仲要趕車放工真係好攰, 但原來我返到去老公都已經出咗門口, 佢約咗人食飯, 直接返埋夜, 所以我超過一日見唔到佢! 返到去又要快手煮飯, 因為好餓, 食完又要清潔又要對功課, 仲爺竟然有同學幫佢做哂啲功課, 勁錯囉, 我梗係刷咗佢做過, 不過都冇刷哂全部, 但就嚴正警告咗佢, 再同嗰位同學個家長私apps, 叫佢個囡唔洗咁好人! 等佢地瞓哂我仲要摺衫, 子元已經好好幫我摺咗兩機, 可能佢唔想溫書掛! 跟住仲要覆埋睇樓啲電郵, 老公又唔喺屋企我自己都唔知點覆好, 啲時間好唔夠用囉!

20/6/21

 20/7/21     SUN.    HOT

今日節目都好豐富，朝早瞓到自然醒，九點幾先至起身，跟住去君日食早餐，食完返屋企同子元溫咗陣書，點幾鐘先至出發，去Yoko 屋企放低仲爺，我哋就搭的士去icon食榴槤High tea，估唔到食榴槤真係可以食得飽，佢哋開始睇落好少但係食落原來都幾飽，不過真係超滿足，食到飽到想頭殼頂。跟住你試吓搭返西鐵返去，紅磡站開始為全線通車做準備，啲位全部改晒，聽日返工都真係要預早啲。返到佢哋屋企，咩都唔使做等食飯，因為有姐姐。咁就同貓貓玩陣先，我覺得貓好玩過狗，食咗個好公司嘅晚餐，又係飽到捧住個肚，仲飲埋紅酒等等，真係好滿足啦。老公今晚要返夜，所以我哋九點幾先返屋企啦，幫你沖完涼都早啲瞓覺聽日又要開工啊。

19/6/21

 19/6/21     SAT   HOT

今日出出入入忙忙碌碌咁, 早上9點幾先起身, 都趕唔切食早餐, 簡單咁喺OK買咗三文治咋, 因為子元去踢波, 我就揍仲仲去學音樂, 過到去海怡個地鐵站時, 一上完電梯見到學音樂個廣告, 仲爺一走埋去就見到自己個樣, 雖然唔係最大個頭嗰啲, 只係細相入面其中一個, 但佢都好興奮, 又要影相又要點咁! 真係比佢笑死! 喺唐記買埋個布丁燒, 學完嘢先食, 我就襯時間去睇一睇嘢, 等仲爺學完嘢就同joyce食午餐, 佢都算係咁, 琴晚睇完波都為咗見吓仲爺出嚟! 食完吹完水都點幾先回程, 返得去又要趕做功課, 4點幾又要出發去踢波, 先攞咗書過去比晴媽, 跟住先一齊行去球場踢波, 今日最後一場啦, 完場時影吓大合照啦, 我都叫仲爺同3個阿sir影番張相留念! 回家沖涼後, 預番時間等子元踢埋波先, 出去奧海城食food court啦, 飲埋個珍珠奶茶就回家沖涼瞓覺!

18/6/21

 18/6/21     FRI     HOT

今日happy friday, 但都係要揍仔返學, 熱辣辣咁行餐死過去撘車返工, 又買個豐富早餐食, 然後就開工, 都要做吓嘢, 午飯出咗去food court食, 日日冇帶飯都幾煩, 食完基本上行多陣就要回程, 下午邊吹水邊做嘢咁啦, 又同阿姐講番個job arrangement點安排, 佢又開始喺到吹, 好心佢明知隻嘢係back up系列, 你咪片佢囉, 又想借我過橋, 局啲嘢比佢做咁, 不過是但啦, 而家冇人留難到我架啦, 咬我食呀笨! 放工過旺角, 諗諗吓都真係好耐冇呢啲時間出過旺角, 真係老啦! 去到餐廳等埋佢地先入座啦, 都係一般食燒肉嘢, 味道不過不失啦, 致在有地方坐幾個鐘吹水, 影吓相, 開心吓, 其實去到呢啲年紀工作上仲識到朋友都係開心事! 食到9點幾仲要落樓下12蚊店行咗陣, 買咗啲碗呀杯呀帶過去用. 落到樓見到人仲係咁多, 真係覺得得人驚, 等巴士仲有十幾人等緊, 估佢唔到! 巴士上仲爺打嚟, 但返到屋企佢都瞓咗囉, 好可愛!

17/6/21

 17/6/21     THE     HOT

今朝叫咗老公揍仲爺返學, 咁我就可以舒服啲行少啲, 返到去食埋早餐就開吓工先啦, 反正都要做架啦, 所以下午就有回報, 阿姐下午請咗假喎, 咁下午就放縱做自己嘢, 午飯後更加慢慢行到夠鐘先返去! 下午主要找資料, 睇吓睇吓又一日, 放工去Mega Box會合, 因為老公揍咗仲爺同阿Joe佢地去咗玩觀塘個半億水池, 玩夠就過去Mega Box食IKEA, 可以坐好耐吹水呢, 吹完去IKEA行咗個圈買啲嘢咁啦, 最後一齊撘42C返去, 又要對吓功課咁囉, 仲爺太可惡, 攞阿婷本中作就諗住去交, 以為可以暪得到我, 唔好傻啦!

16/6/21

 16/6/21.    WED.    HOT

而家咁熱揍仲仲返學，其實真係好辛苦！返去食埋個早餐就開工，今日真係有做嘢，要趕埋工啦，午飯同咗Ivy 佢地上德褔食food court，然後幫阿媽買埋嘢就回程。下午堅係趕工，但都係做唔哂，明天繼續。放工返去有嫲嫲包雲吞，咁我就努力仲爺啲功課，因為派咗卷，改正都出哂事，成個下午都冇人捉侷做，結果咪做到11點幾囉！

15/6/21

 15/6/21     TUE.    HOT

聽日都係返工返學啦，朝早抽重嘢返學跟住行去南昌搭西鐵，真係好熱好辛苦，返到公司食個早餐就開工做嘢，今日都算唔係吹咗好多水，因為啲嘢都真係要做。你看看上德福行過圈買咗麵包，仲去食sixty-eight買咗啲平嘢。下午做咗一輪野，先發現阿姐出咗去調理農務，咁就梗係狂吹水啦，佢到放工又係時候返屋企喇。我返到去老公就出去踢波，不過佢都煮咗炒飯俾我哋食，咁就快手食咗炒飯先，抖一陣對埋仲爺啲功課，跟住就會開始自由時間，我又要追劇，剪完返嚟整埋飯比佢食我做埋運動就沖涼啦，沖完涼仲要摺衫做家務，其實我又真係好忙！

14/6/21

 14/6/21     MON     HOT

今日都係可以瞓到自然醒, 不過唔想太遲起身, 所以9點多都叫子元叫醒我地, 不過佢又話原來今日要zoom補課, 唔出去食早餐, 咁我地咪3個出去食, 食完回來執咗仲爺啲家當先, 佢個書櫃啲書都要清, 跟住就要佢做埋啲功課, 我都好hea冇對到, 佢做完就算! 等子元用完電腦, 就開始計算買機票, 其實得3間可以選, 老實本身首選係維珍, 但佢近來貴咗好多, BA又好似冇咩優惠咁, 所以都係唯有選番國泰, 一家四口都係$15000, 再每人45KG行李, 即係夾埋有180KG, 應該唔洗再加錢, 就算再加都係60美金一件, 真係平好多, 無法啦, 走難唔諗得咁多, 要留番啲錢! 3點幾叫做搞掂又睇吓樓, 到仲爺叫餓先出去食啲嘢, 因為約咗嫲嫲食飯, 所以就去荃灣, 去咗千色店買電器, 嫲嫲話要我地買電飯煲同新電熱水壺過去用, 買完先去食晚飯, 去咗食潮州嘢, 好好味! 回家後又發咗陣顛, 因為好多嘢亂糟糟, 又要我做呀做, 仲爺又唔合作咁, 激死! 老公今晚又係返夜, 明天又要返工, 3日假期好快過!

13/6/21

 13/6/21     SUN     HOT

今朝瞓到自然醒的, 但真係瞓得唔好, 因為係咁發埋哂啲奇怪夢, 搞到瞓咗咁耐都瞓得唔好! 10點幾起身, 出得去食早餐都11點幾, 我想去食粥鋪, 食飽飽就出去行街, 又買咗好多嘢, 都係實用嘢, 子元波鞋唔啱, 又冇咩衫, 所以買完鞋就買咗UNIQUE的T-shirt, 都要買架啦, 啲衫成日winnie the pooh咁! 買完再去始創行個圈, 又買咗個波波風扇, 預備攞過去用, 因為見嗰邊好似冇咩風扇啱, 電子頭的東西都係呢到買穩陣! 回家後就hea, 老公同咗子元去踢波, 我就search吓資料等等, 睇吓啲租盤咁啦! 仲有老公話都係打埋針先過去, 佢打咗先喎, 兩個大人始終唔好一齊打! 廢事攰起上嚟冇人睇仔! 等佢地回來就出去食早餐, 最終去咗試美孚間越南嘢, 味道都OK但價錢始終有啲貴. 食完老公就返工, 我地就返去沖涼休息, 仲爺又激到我發火, 叫佢每日都唔好做嗰啲嘢又做哂, 激死!

12/6/21

 22/6/21     SAT.    HOT

今日都冇咩出過街，朝早老公同仲仲去學音樂，子元就去咗補習，我就自己食早餐。食完早餐摺埋啲衫，就同煮完開始溫中史，好頭好味尾點都要溫埋佢。但條友溫到又眼瞓又成咁，見差不多時間就落樓買飯，食完有啲精神先再溫過啦，阿媽12點幾一點就過咗嚟，因為今晚做節食飯，所以佢過嚟煮。咁佢有佢煮，我同子元溫書，仲爺學完嘢，老公帶佢去同,May姐食飯，然之後先返嚟，本來要踢波，但出咗門口先落雨又要折返。咁等齊人7:30就開飯啦，今次連舅父仔同舅母仔都上咗嚟食，都係阿媽條頸，咁一路食一路都係聽關於英國嘅嘢囉，到九點幾佢哋先走老公都同事返埋工啦。咁我就再清潔下然後就休息。

11/6/21

 11/6/21     FRI.    HOT

今日真係happy Friday囉，因為大姐二姐都放假，幾難得！所以食完早餐報埋更，就開始自电時間，你話做咗好多嘢又唔係，但心態上要定係輕鬆！午飯後上德福幫阿媽買嘢，買炮菜喎。下午返去開始又諗吓個行李清單，原來都幾冇頭緒，唯有再諗吓。放工撘地鐵返美孚，同老公去PHD會合，因為今晚開party要攞食物呢，返到屋企都嚟咗一半人，慢慢set up埋嘢就開餐，總共5個family在，10大11細呢！大有大玩細有細玩，我地有我地吹水，仲打埋視像比炮哥佢地地吹水，都係開心嘅！食吓講吓咁，1點幾影埋相，差不多12點真係要散。佢地走咗我地仲有排執屋！

10/6/21

 10/6/21     THU     HOT

今日都係如常咁揍仔返學然後返工啦, 食完早餐吹陣水先就開工, 整埋個job arrangement, 其實之後要教佢地做我嗰啲嘢都係煩, 不過都要搞! 跟住就係食飯再出德福行吓, 買吓明天早餐! 下午返去都係做, 因為知道大姐二姐明天都放假, 今日快啲做好啲嘢, 明天可以做自己嘢嘛! 放工直接去青衣城食晚餐, 賣甩咗子元, 佢要去練波呢, 本來話今日睇吓電器, 但豐澤冇啱, 所以都係下次去千色睇, 所以食完就返屋企啦! 

9/6/21

 9/6/21.    WED.    HOT

今日唔洗揍仲爺返學，老公放假嘛梗係佢揍，仲爺又喺到扭吓囉，好早去到紅磡，梗係買個麥當勞做早餐，返到去等機會，做個大決定的行動，遞辭職信！阿姐都冇咩可以做，問吓嘢咁啦，佢都話冇得留我啦，都走囉。咁之後都係如常做嘢，午飯後去買餸，下午回來本身諗住做吓相，但被要求做番份 duty arrangement，咁又冇咗一個下午。放工返去煮飯啦，阿媽喺到食埋先返去。我要睇埋套劇啦，開始入肉嘛！

8/6/21

 8/6/21     TUE.    HOT

今日要返工啦，揍咗仲爺返學先，又趕趕地啦！返到去都係食早餐先啦，朝早都有同我講，我阿姐又開會又去調理農務，咁梗係做自己嘢啦。午飯後上德福又要買餸又要買早餐都幾忙碌，下晝返去已經開始罷工，啦係咁睇關於Ealing中學嗰啲資料，睇到好攰眼都花埋！放工返到去接更，老公去咗踢波，我就煮飯啦，子元又係去咗練波，咁就同仲爺撐枱腳，我都冇再同佢溫書啦，做好清潔就算，趕佢去瞓。

7/6/21

 7/6/21.    MON.    HOT

今日放假，其實咪又係做阿四，朝早可以自然醒算係最好，同仲爺整早餐食，食完就開始溫咗常識先，12點幾出去買午飯，同埋去街市買今晚啲餸。食完午餐，3點要stop佢地自由時間，各自入房開波，兩頭走真係好攰，老公放工回來都係瞓覺，可惡！我仲要煮埋飯，好忙！清潔後仲爺又係執好耐都執唔完間房，又令人好炆！老公帶咗子元去練波，我又顛婆咁捉佢執嘢。

6/6/21

 6/6/21.    SUN.    HOT

今朝老公揍仲爺去踢波，我就先同子元溫書，不過都係瞓夠起身先算，同笨元去咗長沙灣食早餐，順手買埋午餐料，廢事又出去食！返去整好定啲餸，就同子元溫咗中史先，食完午餐子元又要出去踢波啦，咁就到仲爺溫書囉，今日失常地合作喎，到4點半佢講起話要練波，先記起5點開波，快手換衫出去，踢完去將軍澳同老公佢地會合，食埋晚餐回程，明天放假，yeah!

5/6/21

 5/6/21     SAT     HOT

本來諗住今朝可以同笨元溫吓書, 但佢補完習返來又食早餐等等, 之後又要吹大號, 咁諗住執吓仲爺間房到佢學完音樂回來可以溫書, 點知真係亂到你想擺一樣嘢時根本都唔知點放咁, 我又想佢掉咗啲唔要的東西, 方便到時清嘢, 最終冇溫書, 但掉嘢時, 又話呢樣唔掉嗰樣唔掉, 一堆垃圾咁想點, 掉佢就喺到眼濕濕, 激到我起火, 老公又係到話我! 佢唔諗吓佢自己根本就係呢種仆街, 啲嘢由呢個櫃面攞咗去另一個櫃面就話自己執咗, 我呢世都記得佢所謂的執嘢, 所以根本就係要掉掉掉哂啲嘢佢, 唉, 總之我又係情緒不穩呀! 最終出咗去食完嘢, 再去埋球場, 等仲爺踢完波就去買波鞋, 本來想去旺角買, 但最終去咗葵芳咋! 好快手買到, 想食嘢又未餓, 想行吓又冇咩好行, 去葵廣食咗啲嘢就回程!

4/6/21

 4/6/21      FRI.    HOT

今日老公好快放工返來接更，所以我都可以早啲出到門口，返到去整早餐，食完又開吓工，不過真係冇咩心機做！午飯出咗去食super sandwiches，但真係好多人，邊食近追番兩套未睇嘅劇，跟住去買埋麵包就返去。下午都係做吓嘢，阿姐喺到行嚟行去，都做唔再自己嘢，放工返去等開飯，食完一坐下來就唔願郁，已經洗咗碗已經好好！追哂兩套劇先沖涼，時間又好唔見用啦。

3/6/21

 3/6/21     THU.    HOT

仲仲今日停課，我可以唔使湊佢返學就返工，老公講得切喺我出門口之前返到，咁就無縫交接啦！返到公司食早餐，食完就開始做嘢啦，今日精神唔好集中，所以做嘢做得好慢，加上有好多唔多嘢做，所以時間過得好快。午飯過咗MegaBox諗住去食IKEA，點知好多人，搞到我行嚟行去都唔知食咩好，就去咗食韓國嘢，不過都係好一般。去IKEA試埋佢杯榴槤雪糕，但真係麻麻地，跟住去AEON買埋蒜蓉牛油做要返公司啦！咁都係渾渾噩噩咁做嘢囉，連阿姐去咗調理農務都唔知，總之罷工呀！放工又要行過去球場同啲仔會合，不過今日好多人喺地鐵站隔離嗰間，起碼散場之後有地方清潔，仲仲玩到一身汗可以沖下水！喺樂富食埋晚餐，老公就返工，我就湊佢兩個返屋企沖涼休息啦！

2/6/21

 2/6/21.    WED.    HOT

今日都係要揍仲仲返學然後返工啦，不過行過去南昌站真係好熱好辛苦，命都冇！返到去都唔食早餐呢然後吹一輪水就開工做嘢，真係好多嘢做，都未停過手做到食飯，，上德福行過圈，買埋早餐。突然收到荔天消息，因為二連班有一班超過三個人有上呼吸道感染，結果全部二年班都要停課，仲要去檢測，又要等佢啲通告，總之就搞到亂晒大籠，成個下晝WhatsApp’s 係咁喺度彈啲信息出嚟，老公又話帶埋仲爺去摩士，因為子元要踢波，咁就順手叫佢帶埋仲仲去做檢測，重點係最緊要免費。我就行過球場同佢地會合，但真係好熱好攰好熱好攰好辛苦！ ！ ！最終熱到竟然叫佢買嗰件衫玩先至得，細佬更加玩到成身濕晒，買咗件動森T恤俾佢開心到佢呢！食埋早餐就翻啦，老公返工我就同佢兩個返屋企，沖涼休息，真係好熱好攰！

1/6/21

 1/6/21     TUE     RAIN+

又係返工返學的日子, 月頭都係多嘢做架啦, 加埋Ivy冇返, 今日總係過得唔知點咁, 想找人講吓嘢都冇! 返去食完早餐, 就開工啦, 做做吓又有其他嘢煩你咁, 總之就係忙啦, 午飯後都冇出去, 因為啱啱再睇清楚個批核BNO email, 見到我嗰個要去警署登記, 但老公嗰個又唔洗, 有啲不安, 上網爬吓文, 其實好多款immigration都係要去警署登記, 可能我冇show過我個BNO Status, 只係用dependent的身份, 得個特區護照所以要咁囉! 咁都唯有照做架啦, 做好啲準備囉! 下午做得好公事都5點多, 再睇吓嘢check 吓email, 又有一間有offer, 但都係要我6月尾起租, 另外有一間又可以出offer, 比我想像中多選擇, 但成日要人咁快出offer, 好難做囉, 晚飯後老公又要返工啦, 所以我都早啲沖涼休息, 大細寶都好早打暈佢地算!

31/5/21

 31/5/21.    MON.    HOT

今日又要返工啊，做咗仲要返學，仲要好辛苦咁行去南昌站搭車，返到去梗係食早餐先啦， Ivy買咗炒米粉好嘢！食完早餐應該係做自己嘢㗎嘛，因為阿姐今日放假，但做咗成朝工時，真係遲咗。午飯因為冇嘢食，跟咗Ivy同ruby上德福食午餐，食完仲走咗去麥當勞買甜品，真係肥死！咁返到去決定罷工，完全做自己嘢，幫Joanne手派吓散水餅，當係預演下啦！放工搭巴士返去就有飯食，因為老公今晚返夜，佢負責煮飯！食完飯清潔埋睇緊電視，收到電話送行李箱🧳，係喎！都唔記得咗今日要收貨，大啦啦七隻喼真係幾壯觀！老公又返咗工，好彩我有隻大寶幫我手收拾，箱入箱咁叫做放篤晒入房啦！

30/5/21

 30/5/21     SUN     HOT

今朝好早就醒咗, 睇咗一輪手機, 仲爺走入嚟想攞ipad就比我發現咗, 叫佢唔好玩住, 上床一齊痴吓先, 跟住起身出去食早餐, 近近地喺美孚食就算, 然後去超市買埋啲飲品等, 又買埋午餐材料, 返去沖好個涼就可以繼續做嘢, 要換埋床單都真係幾大工程, 換完又要煮午餐, 食得嚟想叫仲爺溫吓英文, 叫做溫過吓, 老公放工回來又同子元出咗去踢波, 我都要揍仲爺去踢波, 跟住再去大窩口會合, 同嫲嫲佢地食飯, 梗係踢完返屋企沖個涼先行啦, 食完佢地又買夠玩具就回家啦! 明天又要返工返學啦!

29/5/21

 29/5/21     SAT.    HOT

今日都係如常的一個星期六，瞓到夠就起身煮早餐，食完就捉仲爺溫書，條友都唔感恩，我對佢嘅要求只係但求有溫過，但佢都可以激嬲我，完全係令人氣憤！點幾又要出門口去學音樂，早咗過到去仲爺又話未肚餓食嘢，咁就回程先食啦。我就去咗食台灣嘢，夠鐘接咗佢返麥記買嘢比侷食，返到屋企老公都未返，原來佢同咗嫲嫲去覆診，後來仲打比我話買家已批買樓紙，可以開始安排律師同交吉日期，但由於我地想7月尾走，所以都係寫咗8月12交吉，但錢係一上到㑹就過數，咁希望可以快啲啦！冕飯去咗D2食一間叫大公館，好貴呀但係好食嘅，食完送嫲嫲去撘巴士我地都返屋企啦！

28/5/21

 28/5/21     FRI.  HOT

今日放假啦，但都係一早揍仔返學，然後去咗君日食早餐，再喺長沙灣買吓餸先回家，摺衫都摺咗幾個鐘，12點多就出門口，去Aeon12蚊店買吓嘢，攞定位等晴媽揍埋兩個細嘅放學就食午餐，都係吹吓水咁啦。回家後沖好涼做功課，老公回來又補眠，子元回來話肚餓，咁就早啲煮飯，反正食完都想出去睇吓行李箱。笨元玩咗一日歷奇都休息下唔出去，我哋就揍埋仲爺去荃灣Aeon，用攄蚊，買咗7個行李箱，好痴線！最後行咗個圈就回家，反正送貨的。

27/5/21

 27/5/21     THU     HOT

返埋今日又放吓假, 所以都係無心工作, 早上都係揍仲返學啦, 係咁要提佢今日係哥哥接放學, 要佢聽話囉! 返到公司又買吓早餐啦, 好想食多啲嘢, 返到去又係熱到一身汗! 食完早餐做啲嘢又自由活動吓啦, 月尾有咩做呢! 12點幾同Joey Joyce佢地出咗去飲茶, 傾吓偈咁啦都冇咩機會, 食到2點多返到去, 下午都係吹水活動吓啦, 放工返到去, 又有好多嘢等住我做, 同阿媽傾咗陣佢就走, 都同佢講埋Visa批咗的事. 跟住都係開始要煮飯啦, 仲爺又掛住玩玩具, 子元又去咗踢波, 老公又約咗人食飯, 成日都係我做做做, 又開始懷疑人生啦, 跟住子元回來, 仲爺又未執嘢, 我叫極又唔聽, 我就燥底出咗走廊冷靜! 終於完成哂啲嘢可以做吓自己嘢! 

26/5/21

 26/5/21     WED     HOT

今日要返工啦, 唔知係放得太耐假, 定真係已經冇心機, 加上阿姐唔喺到, 真係完全無心工作! 返去食到個早餐, 做吓啲基本嘢先, 跟住就可以自由吓, 又唔可以太揚去傾, 都係要偷偷摸摸咁! 午飯後都係上德福行個圈, 買吓包咁! 下午又係吹水多過做啦, 都算好忍到口冇講比咩人知, 係睇吓文件嘢有咩要預備, 又計吓幾時辭工好! 放工約咗個agent 睇樓, 隔住7個鐘時差咁去睇英國樓, 感覺好得意! 不過今日先嚟冇車塞車, 7點正個agent真係打嚟, 可惜我只係返得到樓下, 所以佢問我洗唔洗10分鐘後先打比佢, 我就叫佢15分鐘, 咁起碼我有時間收拾好自己, set埋個ipad錄影埋比老公睇, 睇咗15分鐘, 傾埋啲細節, 佢就叫我啱可以填offer form 比佢, 咁佢就可以同個業主傾, 都好呀開個頭! 老公同啲老老嫩嫩去咗法國睇專科, 所以打的返嚟去咗食上海嘢, 食到差不多9點才回家, 沖涼睇功課等等, 開吓電腦睇吓嘢,都搞到12點幾.

25/5/21

 25/5/21     TUE     HOT*

今日都係放假呀, 朝早都係一早起身揍仔返學, 為咗食個靚早餐, 都係去君日食好啲, 所以喺學校門口見到晴媽等緊程生架車, 咁就梗係痴車坐啦, 起碼過到元州邨, 行少啲嘛! 食完早餐就返屋企做吓家務search吓嘢咁, 原來都會悶架喎, 會唔會我都真係唔適合做FTM! 12點幾過番去接仲爺, 晴媽又問我一唔一齊食晏, 咁就去咗食麥記, 因為祉朗要上堂, 所以喺街食, 等佢地兩個細路一齊玩吓. 本來叫子元自己買飯返去食, 但佢又話一齊過來, 咁咪一齊食囉! 2點幾先返到屋企, 清潔乾淨就好做功課啦, 我都冇力同仲爺再做功課以外的東西, 總之做哂就算! 跟住又要開始煮飯, 老公約咗人踢波, 子元又係去咗踢波, 所以得我同仲仲兩個食! 明天要返工啦, 好就好在避咗阿姐囉! 

24/5/21

 24/5/21     MON     VERY HOT

呢兩日都清假, 但原來都幾無所事事, 朝早都係要一早起身揍仲返學啦, 跟住去咗食早餐, 食完都係8點多啲, 咁反正要買餸, 撘車又唔啱路, 咁就不如行過返去啦, 沿路返去咪買吓各樣餸囉, 返得屋企都係9點多啲咋, 返嚟先處理好啲餸, 又要再打電話問實個船運應該要點做, 之後都係摺埋啲衫睇吓機咁, 12點幾又要出門口去揍番仲爺, 突然間落雨好在有帶遮啫, 去買埋午餐就返屋企食, 食完做功課, 喺我管朿下好難唔快, 4點幾都叫做做好啦, 比佢抖咗陣就要背乘數表, 成日想hea我呀啦, 煮完晚飯食又要洗碗清潔等等, 本來唔多想做運動, 但見到仲爺個身型, 即刻郁身呀!

23/5/21

 23/5/21     SUN     VERY HOT

 今朝老公揍子元去踢波, 我就同仲爺喺屋企hea, 9點幾都要起身啦, 煮埋早餐食就捉佢溫中文進評, 佢溫書係幾咁浪費時間的事呢, 我仲有衫要摺, 唯有叫佢溫詞語, 叫做可以自己溫囉, 我就襯機摺埋啲衫, 係咁二叫做溫完, 睇吓老公喺邊, 約咗去奧海城食嗰間蛋蛋, 本來諗住可以行一陣, 點知食得嚟又要仲爺踢波, 所以又要撘巴士返去, 喺球場等真係好熱, 所以等仲爺踢完波都係返屋企. 子元因為踢完波就跟咗剛sir去睇波, 所以唔洗理佢, 佢自己會返. 晚餐去咗買米線, 完全唔想出去, 但老公話一齊出去買咁就一齊啦, 真係好熱! 明天放兩日假, 但反而覺得唔知做咩最唔浪費咁!

22/5/21

 22/5/21     SAT.    VERY HOT

今朝子元去補習時又嘔，應該係腸胃炎啦，叫咗佢琴晚唔好食咁飽架啦。今晚咪又溫唔到書，踢唔到波囉。我地去食完早餐，老公就去睇跌打射波紙，我就返去睇吓我隻笨，都係比喇叭牌侷食飲保礦力啦。本來老錢揍仲去學音樂，咁我睇住子元，但佢又溫唔到書踢唔到波，最終咪我揍仲爺去音樂，仲同KIKI喺電話吹咗一輪水囉，夠鐘就接番仲爺回家，趕佢做埋功課，可以自由吓，叫老公去買晚餐，因為真係唔想出去啦。

21/5/21

 21/5/21.    FRI.    HOT

Happy Friday都係要返工啦，揍咗仲爺返學，又行到身水身汗咁去南昌站，返去食埋個早餐就開工，還有嘢未做哂，都要努力完成，下星期一二都放假！午飯後冇出街，掛住睇劇，幾難得！下午都係做嘢啦，Ivy又出咗OC，冇人陪我吹水，咁不如做好嘢下星期可以自由！放工回來又要聽笨元學校個talk，講下星期outdoor活動呢。食完飯清潔埋，捉仲爺做吓功課，做咗兩份，餘下的明天繼續。跟住hea吓睇吓手機，check email時見到home office send email來，見到successful呢個字，興奮到呆咗，即刻打俾老公，叫佢check email，不過佢可能做緊嘢，所以未聽到我電話。跟住最忍唔住就係要同其他人講，當然係公司同事先啦，一早講咗收到訊息就會即刻同佢地講，估唔到真係快到咁緊要，剛好三個禮拜就批咗，我之前仲擔心要去到6月尾。突然之間唔知應該要做咩咁，要好好整理下思緒，整理下應該有咩要按部就班咁做。

20/5/21

 20/5/21     THU.    HOT

今日都係咁過啦，忙忙亂亂咁！朝早揍仔返學自己返工，又行到一身汗咁，返去食埋個早餐咪開工囉，查實好多事都唔願做，公務好私務好，咩都唔想做但咩都要做，真係好矛盾！今日午飯後冇出去行，主要係跟大隊叫咗米線，又遲咗先食，食得嚟都晏啦咪唔出去囉，跟手又睇吓劇咁。下午時晚都過得快，因為忙嘛，放工返去都係要煮晚餐啦，叫咗子元幫我解凍三文魚又冇咗回事啦，咁咪煮其他囉，仲爺係做哂功課，但阿媽話佢聽日數學進評，佢咩都唔識，咁進條毛呀。終於做好晒啲嘢睇埋佢啲功課，諗住同佢溫下書，見到都係加減數時鐘等等，諗住同佢做吓練習姐，點知簡單到數下啲分鐘都數唔掂，佢話俾我聽仲可以點，我咪又顛咗囉，教又唔聽唔教又過唔到自己，我堅係想死咗佢算。大家唔洗辛苦，咁冇人迫佢啦，話知佢第時食屎。

19/5/21

 19/5/21     WED.    VERY HOT

佛誕都係多日假期啫，但7點又醒鬼咗，激死！老公一早就帶子元去踢波，我同仲爺差不多全日喺屋企，先煮早餐食，跟住做功課，我廼要影相比shipping公司報價，真係好忙。摺埋衫又煮午餐，所以4點幾攰到瞓咗，仲爺就成機攞iPad睇機！我今日都冇使䢬嗟，或者係應該hea吓！6點出門口去石門同佢地會合，食晚餐，倉完就回家，冐天又要返學，差不多啦。

18/5/21

 18/5/21     TUE.    HOT

今朝都係如常咁返工啦，返去食完個早餐就開始自由活動時間逗號因為阿姐全日training，我就可以全日做自己嘢，就係諗個packing list，原來真係好銷路，要憑空估算幾多紙箱，真係一個無從入手嘅計算。所以諗咗全日先至叫做完成到，午飯後上德福行完，下午返嚟諗住繼續做，不過真係好眼瞓，同埋好唔想做，只係想快啲放工。去德福同老公佢地會合，佢同Joe帶住兩個細玩咗幾個鐘！我同Yoko都推咗一輪膠，攞咗個小新公仔呢！之後去隔離間韓燒食，都幾抵食，係仲爺玩嘢，搞搞咗食啲醬料又嘔囉！差不多9點先走，都買唔切晚餐比子元，佢食自己啦。

17/5/21

 17/5/21.    MON.    VERY HOT

今日真係好熱，好在直接返公司，若要揍埋仲就慘！安頓好仲爺上堂就返工，返到去整早餐，倉完就開工，今日努力工作，冇人陪吹水嘛，Ivy呢兩日又放假，咁咪快啲做埋啲嘢佢先囉！午飯後閒遊吓德福，下午返去又再做嘢到放工。返到去跟功課很輕鬆，三幾樣功課咪好囉，小朋友根本就應該玩。食完飯有嫲嫲洗碗，咁我抡埋地就可以，同子元跟埋溫中史，趕埋仲爺䁁覺，我就做運動沖涼休息。

16/5/21

 16/5/21      SUN.    VERY HOT

今日真係好熱，出去倉個早餐都濕哂，同仲爺去麥記食埋早餐買埋餸就回家，又係時候開始整雲吞，原來真係要用好多時間！老公佢哋回來曬到燶晒，子元今朝去咗踢波，返嚟就瞓鬼哂，包好雲吞，仲爺都要去踢波，但又慢執嘢又唔郁啦，激死我啦！搞到我又顛哂，等老公揍咗佢出去，我可以冷靜吓，整晚餐，阿媽佢地今日過來食，補祝母親節，所以我建忙咗一晚！阿媽知道我地剛賣咗樓，幾個月內就會走都好不捨，但都冇咩辦法。

15/5/21

 15/5/21     SAT.    HOT

星期六可以瞓晏啲，所以八點幾九點先起身，子元已經去咗補習，我再叫醒佢兩個去食早餐，然後去街市買定聽日包雲吞嘅材料，今日真係好熱，出去一陣就出哂汗！返到嚟第一時間執好嘢葉咗啲玉仙，仲要再掛住玩玩具，等佢做晒功課唯有放佢啦。點幾鐘出門口去學音樂又去舟車勞頓的工作，食完午餐要去學嘢，我食午餐，回程時選擇咗搭巴士，因為真係好想休息吓。返到屋企，我就開始要接佢，一陣佢玩咗兩個鐘，真係好攰，七點幾整熱番啲燒雞食咗先，然之後又再繼續決賽佢哋兩個就做自己嘢。做嘢咪又係玩完啲功課做晒但係又未溫晒書啦，明天先局佢！最後再住你埋嗰跟菜，又搞到差不多11點先沖涼又食。

14/5/21

 14/5/21     FRI.    HOT

今日都算係重要又心情複雜的日子，因為今晚終於簽咗細訂賣樓，而家只係等Visa批埋就行得，真係好緊張，希望快啲啦！今朝再坐順風車，但比校車姨姨發現咗，下星期都係避吓先！返去食埋早餐就做下嘢，阿姐喺到嘛，原來佢下午又放假，咁我地又放肆！我又爬吓文咁啦。放工返老公已閃了，仲爺交咗比Barry，搞到我又要落去揍番佢，返上樓就整晚餐，今晚食漢堡包呢！老公9點多去咗地產經紀到簽約，祝一切順利！

13/5/21

 13/5/21     THU.    HOT

今朝真係勁無賴地揍咗仲仲返學，就痴校車坐返宏天，不過又真係唔可以日日坐，唔係咁好意思！早咗返到去整早餐食啦，今日阿姐唔返，又係時候作反！但其實都係做嘢囉，邊有咁多自己嘢做！午飯後去Mega Box行，睇仲爺個泳鏡，又比我執到平嘢，$79咋！跟住去超市買三文魚，又要返去啦！今日心情都幾亂，老公打嚟話琴晚嚟睇樓嗰個買家還價，老公都接受咗，而家等簽約就落實！所以只要批VISA就成行，又行前咗一大步！下午都係做住嘢等收工，放工時見龍翔有交外，馬上轉軚撘地鐵，返去又係要鬧仔囉，仲爺真係激到你死，所以臨瞓前都要捉番佢落床講清楚！

12/5/21

 12/5/21     WED     VERY HOT

今日真係堅熱呀, 揍完仲爺返學, 再行去南昌站真係好遠好熱! 返到去食完早餐就開吓工, 阿姐下午開會嘛, 所以朝早就做好工作先, 午飯後上去要趕買餸, 又要買啲易煮的, 因為今晚老公話有人上嚟睇樓, 仲要係8點半呢啲咁尷尬的時間, 返到去就要快煮! 下午完全冇做嘢, 實在係好想自由吓, 放工就快手返去即刻煮飯食啦, 咩都唔理啦, 7點9已經食完洗碗, 我自己都覺得勁! 快手清潔埋, 剛好8點半就嚟, 都係嗰句, 希望成功啦! 跟手做埋手尾, 同仲爺睇功課溫中默, 子元就要靠自己, 假期先幫佢啦!

11/5/21

 11/5/21     TUE.    HOT

今朝都係起身叫醒仲仲上堂，我就返工啦！逢去食完早餐就開工喇，朝早其實都冇咩特別，都係做吓嘢咁囉。午飯後上德福行過圈買埋嘢飲，跟住下晝就開始自由活動時間，因為我這三點就上咗去玩法，玩到放工先返，所以都係好事，打咗一個下晝機。放工返去又係時候跟功課，好在喺電話已經叫咗仲仲要自己做得幾多得幾多，所以返到嚟都算跟得快！食完晚飯溫埋中文默書執埋書包，跟住就大功告成可以休息吓啦！

10/5/21

 10/5/21     MON.    HOT

今曰都冇咩好寫，因為都係冇事發生！返到去先記得阿姐放假，咁更加唔想做嘢啦！午飯借啲二早出去，過咗Megabox睇咗陣又食咗豐富的IKEA，買埋餸回程，下午都係唔知做咗咩咁過！放工回來又要分身，又煮飯食又清潔又睇功課，仲爺唔合作嘛，咩電視都唔洗睇，做好功課瞓覺！

9/5/21

 9/5/21     SUN.    HOT

今日係母親節嘛，但都冇咩慶祝。8點幾起身，仲爺要踢波，去摩士比賽，有啲趕去到樂富先食早餐，點知都未入得，得個等字，老公夠鐘又要返去開門比人睇樓，所以睇仲爺踢咗陣就要走。我就見仲爺落場就拍吓片咁啦。中場又要去買嘢飲，原來家寶都揍咗兩個仔嚟踢，喺另一邊場，咪吹咗一輪水囉。點幾返屋企，買小食食咋，食完做功課的就做，老公同埋子元約咗人青衣踢波，我就揍仲爺區隊練波，然後喺葵芳會合食晚餐，食咗德國嘢，少少貴啦但母親節嘛！過葵廣掃多轉街就回家，時間關係打的返去，仲可以睇得切佢個toy story！

8/5/21

 8/5/21.     SAT.    HOT

星期六都算瞓到自然醒，子元補完習返嚟老公都未起身，又要諗食咩早餐，最終喺番美孚食就算啦，因為子元又要回來吹佢每大號，我就去咗超市入吓貨，然後回來捉仲爺使到一份功課，侷就要出門口去學音樂。我同子元喺屋企，突然又有人嚟睇樓，但都係運吉嘅，冇料到！我同笨元煮午餐，睇電視，因為有男排女將做。4點先開始溫，講到我口水乾，真係攰過自己讀！6點幾要出門口去換身分證，同埋嫲嫲去，換完去咗食母親節飯，喺悅來食打邊爐放題，都係平又好多又好亂嗰啲，真係好耐未食過！食完上樓幫大包裝個唔知咩，但最終都裝唔成！有行打的回家，快啲沖涼休息！

7/5/21

 7/5/21     FRI.    HOT

其實日曰都係咁過，有時都唔知寫咩好！跟住都係揍仲仲返學會然後返工囉，天氣咁熱行氣南涌站，真係幾辛苦，不過都唯有咁行。幫佢食埋早餐就開吓工，星期五真係好冇意志力開工，保險都唔知自己做過啲乜嘢，總之就有做吓嘢啦！午飯後都係上德福行過圈，下午返去都係無所事事，等收工。今日唔好煮飯，但返到去又要對住仲仲冇做過嘅功課，佢又係全個下午都唔做，跟住又同你講要睇電視，其實發火都好正常姐，我又唔係真係驚佢落街，講吓都唔得咩。講吓波嘅話，呢啲咪走去言論自由囉，佢自己鬧人就得我鬧話唔啱，又喺度多多道理！可惡！

6/5/21

 6/5/21     THU.    HOT+

又係要返工要返學的日子，揍咗仲爺返學又要行去南昌站，真係好攰！返到去整早餐，今日仲有自家製熱狗食！今日都係做足一日嘢，所以都冇咩好講！午飯後行吓街，放工要去球場同佢地會合。今日唔行啦，因為要去蒲崗村道，要上斜路真係唔行啦，反正有巴士上到去，要等子元踢埋都7點幾，仲仲又唔聽話，叫佢行又唔行洗手又唔洗，好可惡！最後去太子食咗花園餐廳就回家，又要趕埋功課等等，真係好磨人！

5/5/21

 5/5/21      WED.    HOT

今日要揍仲爺返學啦，所以又可以早啲返去整早餐！然後咪開工囉，又有一堆嘢要做呢！所以都冇咩好寫，午飯後去買定明天早餐，下午返去咪呆呆的繼續做囉！都冇咩心機，個雪櫃又壞又要整，啲仔又唔生性，其實我要求都唔係好高啫，真係咁難實行咩？所以返到去都係齊齊黑口黑面，其實冇必要我都唔想黑，但樣樣都做唔好咁，係想我點呢！

4/5/21

 4/5/21     TUE     HOT

今日都係咁返工啦, 又要安頓好仲爺先出得門口, 返去整早餐啦, 今日食腸粉, 真係幾好味! 食完又開工啦, 今日都係係咁做啦, 午飯後上德福買吓麵包行吓咁, 又返番公司做嘢啦, 都冇咩特別, 做下又吹吓水囉, 本來阿姐去咗開會, 又上咗去玩花, 真係應該罷吓工, 但始終係趕工時段, 都係認命做嘢啦, 收到givens話佢地今個月20號走啦, 真係好快, 幾時到我地呢, 佢2月尾申請5月尾走, 前後都係3個月, 咁我諗我地8月應該都成行, 希望一切順利啦! 放工返到去又要做苦差, 睇功課溫默書咁, 其實真係好磨人, 大又好細又好都咁, 好似而家係我讀書咁, 或者係我迫佢讀書咁, 都唔知為咩, 其實都真係好攰! 老公去咗踢完波先回來, 其實我係咪應該都要培養吓自己的生活呢, 又係到迷失自我咁!

3/5/21

 3/5/21     MON     RAIN

今日又要返工啦, 不過仲爺就網課, 子元今日就放假, 所以都唔洗好早起身, 不過好早就醒咗, 係咁發夢未交齊資料, 真係好大壓力, 我自己都估唔到! 返到公司整早餐啦, 跟住就係做嘢啦, 月頭就係做唔停手, 不過時間亦過得快好多囉, 午飯冇帶飯, 見Joey一個就問佢一唔一齊出去食, 不如就再去食上次嗰間燒肉, 今次真係要食燒肉啦, 雖然要$118, 亦唔係好多肉, 但質素係得架喎, 早咗走出去食先食得切呢! 回來後又要開工啦, 明知放工前都清唔哂架啦, 但都冇所謂啦, 咪留番明天囉, 放工返去都係清咗仲爺啲功課先啦, 跟住食完飯要子元吸好塵抺好地再做好溫吓書啦, 佢又話有功課未做哂要做, 唉...都唔知佢點安排! 呢兩晚嫲嫲都會過嚟瞓, 唉.....一句講哂, 都係大包惹的禍啦, 都唔知可以講咩啦!

2/5/21

 2/5/21     SUN.    HOT RAIN

假期瞓到自然醒，但都只係9點咋。叫佢地起身，諗住一齊出去食早餐，但因為老公要等11點有人嚟睇樓，但子元又要11點半見家長，所以分頭行事，我揍佢地去食早餐，老公就喺屋企等。最終老公都趕得切來一齊見家長。子元成績表唔見很人就一早知，比人鬧吓都好，迫吓佢！見完回家就休息，但都要迫佢地溫習，仲爺溫默好似行刑咁，真係比佢激死！4點幾又趕住出門口去踢波，但仲爺又可以激嬲我，都係又溫唔到書，講嘢又唔經大腦等等！踢完波去咗奧海城食food court，行咗竹陣反斗城就回家，明天又要返工啦！

1/5/21

 1/5/21     SAT.    HOT

今日重點活動得一樣，就係申請BNO Visa，啲人講要做好耐我都半信半疑，但原來真係要而且精精上都好攰！朝旪倉完個早餐，同子元會合返屋企，執一執間屋等人睇樓，跟住就要開始申請，由11點多開始，搞到差不多7點先得，中途只係食咗半個麵，根來冇機會肚飯，來來回回4次終於入好哂，又要趕住出門口，子元要比賽，又陪佢到9點幾，先買米線返去食！

30/4/21

 30/4/21      FRI.    HOT

今日都係如常返工，hea住過我嘅happy Friday啦！揍咗仲爺返學就返工，返去做埋啲基本嘢就再找吓資料，都有做吓公事，午飯後漫無目的喺德福行吓，今晚又唔洗煮飯，放工直接去球場，老公揍咗佢地過去就約咗人食飯，咁我就要等子元踢完波，去食埋嘢先回家，我竟然大意到漏咗飯盒喺更衣室門口長櫈，唯有跑返去攞！回家後快手沖涼休息，好攰啦我！

29/4/21

 29/4/21     THU.    HOT

今朝真係激死，其實煮正常時間起身架啦，但啲大爺又慢，又攞漏嘢，本來諗住老公揍仲爺過去，但最終因為老公冇攞腰bag嗟都冇，要我揍返去，跑到隻嘢咁先趕到59分返到！跟住又到我要趕地鐵，真係好攰！返去出哂汗咁都幾辛苦，食埋早餐就開吓工，當知道阿姐下午放假，簡直放肆啦，又遲返又做自己嘢，幫仲爺處理好本普通話書同作業，因為有電子書，咁就自然有辦法！放工返去除咗食飯，都係捉仲爺做功課，佢又迫到我去爆發點，最後阿笨接咗手，我都唔理咁多，好灰！沖涼休息算！

28/4/21

 28/4/21     WED.    HOT

今日返工差不多完全做自己嘢，因為根本真係冇咩公事可以做，大家一齊hea！所以只能愉景新城跟住部門跟住開始，我喺度睇吓屋，真係幾多租盤，但價錢都係貴！午飯後上德福買餸，下午返去都係hea同打機，等放工時間最難捱！放工返去阿媽就閃，例牌投訴吓仲爺，跟住我就煮飯啦！食完一口氣做好清潔，執埋仲爺功課手尾，但佢都拖到11點幾先瞓，激死！

27/4/21

 27/4/21     TUE.    WARM

今朝真係好餓，所以食多咗個通粉做早餐！做好基本嘢就開始做自己嘢，上網係咁爬文，check清楚仲欠啲文件，完全冇理過阿姐喺唔喺到！放飯食飽又去德福買麵包買雞蛋，下午返去梗係冇做自己嘢啦，不過隔離行一係AL，一係突然SL，搞到我地又要做埋佢地嗰份囉。放工返去教仲仲使功課，嫲嫲就宴好飯，子元去咗踢波，9點幾先返嚟。唔係仲爺明天放假，我實唔會放過佢啲功課，甩甩漏漏咁！

26/4/21

 26/4/21     MON.    WARM

終於要返工啦，叫醒仲爺準備上網課，我就趕住返工啦！返到去都係快手整早餐食，然之後開工，放咗兩曰假都有好多嘢要清呢，今日基本上係冇停過！午飯Ivy分咗啲廚餘的炒米比我，偍原來真係好唔夠食，不過又唔知想食咩，唯有出咗去買餸先，買多份飯團回來食！下面忙碌中煮可以做吓自己嘢，好快又放工，返到去阿媽就返屋企啦，咁我咪煮飯囉，今日冇咩功課跟，可以輕鬆吓先。

25/4/21

 25/4/21      SUN.    WARM

話咁快又假期尾聲，明天又要返工啦，今朝9點多就起身，煮好早餐換床單摺衫，洗衣機好忙咁不停洗。本來我都冇咩，但侷兩個開始唔識幫手，老奉我做哂時，火起！仲爺仲衰叫極煮唔溫書，又迫我用到走人呢招，一直嬲到老公回來出門口去球場都仲火架！仲爺練完波就去咗食撒利亞，然後我同仲仲回家，老公同子元又去咗踢波啦。

24/4/21

 24/4/21     SAT.    HOT

又係一個如常的星期六！朝早要預備接黃老師電話，家長日都變咗電話模式，其實都冇咩好講，反正又冇考過試！跟住就出去食早餐，老公要揍子元去比賽，我就買餸同仲爺返屋企，又到發火時間，我已經比咗成個鐘佢玩，我睇完空間改造王，佢都係叫多半每鐘籫肯入去做埋作文，其實迫佢佢係寫到啲嘢，但我又要執好屋先出得門口，有人又嚟睇樓，結果爆佢爆到出門口，咩都唔識攞咁，激死！過到去好在都夠時間比佢食埋嘢先學音樂，咁就到我去食嘢去行吓，好叻咁嗟都冇買！返到屋企好攰，瞓咗喺梳化瞓到6點，老公叫我起身煮飯，咁一齊煮好倉完，佢同子元又出去踢波，我就清潔收拾做運動沖涼！

23/4/21

 23/4/21     FRI.    HOT

今日子元13歲生日啦，咁就13歲！今朝真係放假，揍哂返學就同老公食早餐，因為諗唔到做咩，老公就話去按腳，但食完早餐都未開，所以返屋企先，10點幾先出去，試咗一間新嘅，不過我都係好唔受力，所以按完都係好痛！唔想返完屋企又返去接放學，所以去咗Aeon行吓街，兩個人靜靜地行吓都幾好！接完放學去君日午飯後就回家，老公瞓覺子元打機，我就同仲爺做功課，趕到5點先做完出得門口，約咗嫲嫲同大包去荃新打返邊爐，試咗間新嘢，都好多嘢食，好快都食得好飽！食飽就去咗放血，又去掟彩虹夾公仔，攞咗好多獎品呢！9點幾買埋蛋糕回家，老公同子元去咗契爺到攞禮物，我同仲爺就返去沖好涼等佢地回來，趕得切12點前影相切！

22/4/21

 22/4/21     THU     HOT

今日放假, 因為下午book咗要去做TB Test, 咁朝早都係要一早起身揍仔返學, 然後同老公去咗食早餐, 再去埋銀行, 搞掂咗個海外戶口啦, 好似好難咁, 但有工作人員幫手喺手機整就好快搞掂, 叫做又做好咗一part嘢啦! 跟住就返屋企啦, 摺好埋啲衫, 再一次檢查下午去做TB Test啲文件, 12點幾就出門口去接仲放學, 老公就負責去買定飯先, 等我接咗佢地回來就食飯, 快手搞掂2點前就要出門口, 好在係去尖東啫, 真係要過海應該飯都食唔切! 去到登記要係咁填表啦, 然後就係等啦, 寫明由登記開始要等兩個鐘, 因為真係太多人, 全間都係做簽證驗身, 好誇張! 等到3點幾終於到我地, 其實照肺片唔係好耐, 仲爺又唔洗照, 跟住又係等啦, 等見醫生, 個醫生都係機械人咁, 問同樣的問題問4次, 把聲真係機械人咁, 都幾得人驚! 好在仲爺冇當場問點解, 唔係尷尬死! 出去比埋錢就走得, 老公話好似去咗青山咁, 護士又黑口黑面, 照X光嗰個又係, 醫生又怪! 比幾千蚊佢真係感覺不良好! 分頭行事, 我揍子元去球場, 老公去朗豪坊攞餅, surprise 子元嘛, 等佢練完波可以同啲隊友慶一慶祝, 都幾開心呢! 喺深水涉食晚餐, 亂入咗間台灣嘢, 好好食喎, 食咗當去咗台灣呢! 回家後回歸現實同仲爺趕功課, 仲慘, 真係火起架, 叫做11點多做完囉, 明天子元正日生日啦, 我地都攞咗假, yeah!

21/4/21

 21/4/21     WED.    HOT

今朝同老公一齊揍仲返學，佢就成日自己行，一係快一係慢，都唔係一齊行嘅！跟住佢就去食早餐再睇跌打，我就返工囉！今日都忙碌呀，明天起放兩日喎，點都要趕吓工！收到明天做TB test嗰到話要有證件相，所以都係午飯時間上去德福影咗佢好啲，因為我嗰張真係唔係正式證件相。下午返去做好嘢就上吓網，準備收工！返到屋企又發顛囉，樣樣功課煮未做，其實下午老公做咗啲咩呢，若佢覺得「叫」咗仲仲使就work，就真係太不負責任！結果做足一晚，又遲瞓，又令我火到故事都唔講，日日都鬧同一堆事，係咪應該要罰吓令佢有警惕！

20/4/21

 20/4/21     TUE.    WARM

今朝叫醒仲爺上堂我就返工，返去整得早餐嚟食又要開工啦！朝早都唔吹咁多水啦，廢事又比阿姐覺得我地成日吹水，午飯食咗麵咋，跟住又上德福行！下午返嚟又入房扯口罩囉，可惜阿姐原來上去調理農務，入咗房又做唔到自己嘢！放工返到屋企又要執功課教功課，食完飯休息吓洗碗清潔完又要趕，仲爺先肯瞓！

19/4/21

 19/4/21.    MON.    WARM

又要返工啦，老公今日請咗假，佢就喺屋企瞓覺啦，子元揍仲仲去婆婆屋企上網課，侷就返學，我就返工，食埋早餐建要開始辦工，煮有啲嘢做吓，但星期一時間都係過得慢，午餐跟大隊叫咗南記，估唔到仲有平，為番個米線21蚊咋，真係好抵！食完上德福行，買蛋買麵包！下午都冇咩心機做嘢，同Ivy吹吓水啫，阿姐又喺到話叫我地記得要處理埋啲廢口罩，佢自己吹水都成粒鐘架啦！放工直去荃灣同老公會合，佢地已經影完證件相，去掟完公仔，直接去食嘢！食完行咗陣Donki就回家，收拾收拾吓咁趕哂佢地瞓我先做運動沖涼休息！

18/4/21

 18/4/21     SUN.    WARM

今朝11點先被叫醒，老公返咗教會，兩隻豬又唔早啲叫醒我，因為通常食完早餐先做嘢，所以咪唔叫我囉，咁就唔洗做功課住，可惡！所以梳洗後我唔煮早餐呀，做好功課先啦，出古惑呀啦！子元都係呀，又唔溫書，一樣冇得食。睇吓老公幾點返，就叫佢買飯返嚟食，慳番唔洗出去食，咁可以繼續溫書，老公就瞓覺，我就同仲爺溫默書，到4點多換衫出去踢波，我就摺埋衫諗住早啲同子元行去球場，點知落到樓老公打嚟話有人上來睇樓，咁又要招呼，都係嗰句，希望成功啦！同老公地會合就過九龍灣，本來想去Mega Box睇高達，但喺food court食完同子元睇完褲都8點，所以都係返屋企，要睇chill club頒獎禮！

17/4/21

 17/4/21     SAT.    HOT

星期六梗係瞓夠先啦，子元去咗補習，我地就去食早餐，買吓嘢咁先返去，睇完空間改造王就捉仲爺使功課，但做得唔多，又要出去學音樂，咁就可以休息吓，摺埋衫，睇住花姐error遊咁，煮埋午餐同子元食，都冇做咩啦，hea吓算啦！老公買咗嘢返嚟食，跟住佢地就出去踢波，我只係叫仲爺做多咗一樣功課咁大把，又掛住睇電視，睇到老公買宵夜返嚟，食飽就安心瞓覺！

16/4/21

 16/4/21.    FRI.    WARM

今日子元變咗網課，所以我就湊仲返學啦！返公司整早餐食，然後又扮吓開工咁啦，因為真係幾冇嘢做，所以都係打吓機睇吓嘢咁就過咗一日！午飯後上咗德福行過圈，喺UNIQLO見到有西褲，子元又話佢嗰條唔啱，不過都係要佢真人試過算好買！下午都係仲係吹吓水，時間真係過得好慢，放工行過去球場，等子元踢完波先可以去食飯，所以我都係食啲嘢先好啲。食完老公就返工，我哋就返屋企。返到去本來都冇乜嘢，但子元發現咗仲仲攞咗佢啲Lego去玩，兩個就嗌交，我又發火，大家有好唔開心啦😫，其實成日都係咁，真係好攰佢哋究竟明唔明要點相煮嘅！

15/4/21

 15/4/21     THU.    WARM

 今日都係咁返學啦，6點個iPad喺到響，應該係仲爺唔知幾時較咗啦，咁又嘈醒咗我，可惡！梳洗又慢吞吞咁，都遲咗出門口架啦！返到公司食個早餐就開工，做自己嘢，阿姐朝早唔喺到嘛，但快樂嘅時光過得特別快，好快放飯佢就返，可惜！飯後去德福行過圈，下午返去真係要開工，偍都做吓自己嘢囉，老公今晚又同子元去球場，再直接返工，所以今晚又見佢唔到啦！放工返去嫲嫲煮咗飯比我地食佢就走啦，所以都係睇功課食飯清潔然後又係做功課，仲爺做功課真係令人好難受，又話要睇電視又話廣告先做，真係想煎巴佢！到瞓覺之前，又話玩埋先又未執嘢，總之就多多事實，今晚忍唔住片咗佢鑊甘嘅！

14/4/21

 14/4/21     WED.    HOT

今日仲爺要返學啦，應該係好事嘅，但醁返學即係好多嘢都要做，要默書要做齊功課，仲辛苦！出門口時先發現仲爺對白鞋真係著唔到，唯有著住街鞋先！返到公司就蒸腸粉食，但Ivy病假，要找人食埋佢嗰份！然後今日咪好好做嘢囉，反正都冇人吹水，不過就好悶囉！午飯後上德福行，買咗牛油果🥑做早餐！下午都係聽住收音機做嘿囉，時間都係好難過！放工返到去都係難過，仲爺好多改正未改，雖然老公煮咗飯但都幫唔到幾多，個人都係好down，因為好辛苦，都唔知自己點解要咁過日子，之後仲喊到顛咗，因為真係覺得好失敗，啲仔完全唔生性，我可以點呀！

13/4/21

 13/4/21     TUE     HOT

今朝只係叫醒仲爺返學, 所以都唔算太趕, 返到去都係整早餐食咁啦, 今日都係唔多想做嘢, 都係lazy架啦, 但點都會盡量做囉, 但都係吹吓水咁, 午飯Joey冇人一齊食咁啱我又冇帶飯, 咪同佢出咗去食間韓國嘢, 又抵食又夠大喎, 下次可以帶老公一齊嚟試! 食完都要返去啦, 下午阿姐唔係到, 做得更少嘢, 而家每日都係度日如年咁, 真係想快啲過去呀, 離開呢度先可以重新開始! 學校有學校的麻煩, 子元學校真係好煩, 定係而家啲中學係咁, 係咪覺得個個都大把錢, 老母唔撚洗做, 日日陪住個仔返學, 全天候24小時陪讀呢, 呢頭話大個仔架啦等佢地自己嚟, 嗰頭又出eClass話冇交功課呀請督促貴子弟, 咁搞真係精神分裂囉, 仲有局你參加課外活動, 係幾千蚊一個course囉, 冇錢可以申請減免呀, 但要攞綜援咁先可以申請, 已經屈咗我幾千, 而家又幾千, 我一定反呀, 反正讀埋呢學期點都要走! 火完返到去又要執仲爺啲功課, 明天真係要返學啦, 都冇返咁耐, 真係唔多想返囉, 反正返嚟都冇咩意思! 晚飯後清潔完都係要搞掂完佢地先有得休息, 真係好攰!

12/4/21

 12/4/21      MON.    WARM

又要返工啦，真係得個肉體返工！朝早好早就醒咗，但都瞓番到鬧鐘響先起身，要快手捉佢兩個起身梳洗，送佢地出門口先，我就慢慢嚟，不過都好早出門口，返去整埋早餐就做嘢囉！有嘢做時間好過啲，午飯食麵食餐肉咋，跟住上德福行個圈囉， 下午回來都係做嘢啦，好快都放工，返到去就有得食，但煮得太少，又冇得帶飯！之後老公同子元去咗踢波，我清潔完就同仲爺跟吓功課溫咗陣書，然後就睇電視啦，你局佢狂溫都冇用，要多啲學識睇開啲，FF吓個未來先掂！

11/4/21

 11/4/21     SUN     HOT

今朝起身心情本來都幾好, 但兩隻嘢成日都觸及我底線, 成日為啲小事喺到嘈, 人生係唔公平架啦, 做大係咁架喎, 係要讓係蝕架啦, 獨享咗咁多嘢咁多年, 細嗰隻又係唔抵爭, 成日老奉咁, 所以係冇解決方法! 最終都係要出門口, 但我又唔知死咗幾多細胞! 出去同老公會合食嘢, 然後過咗油塘, 子元話想去嗰間奇趣天地買figure, 咁就過去囉, 反正都諗唔到地方去! 買吓嘢行吓咁, 最終老公佢地都買到新crose對鞋, 佢話再唔買就碎啦喎! 之後就返屋企, 本來話有人嚟睇樓, 但都唔知係邊個記錯時間啦, 返得去都係趕唔切, 冇法啦冇緣份! 跟住老公就帶仲爺去踢波, 我就喺屋企摺埋啲衫, 子元明明話做哂功課, 但執執吓又執到啲嘢未做, 激死! 等佢搞掂埋就出去會合食晚餐, 簡單地去咗食粥咋, 百幾蚊就食到飽飽, 返到去染埋個頭髮先沖涼, 明天大家都要返工返學, 但都係十一點多都未瞓囉! 

10/4/21

 10/4/21     SAT.    HOT

今日瞓到9點幾，要即刻起身，因為要接子元放補習，然後去踢波，我地就幫佢攞釋個袋返屋企，返到去啱啱settle好，老公就話講到12點9學音樂，結果又要即刻執嘢出門口，過到去學嘢時，我就冇得食住午餐等佢，於是唯有周圍行吓睇吓，咁都冇買到野算好叻！切咗仲爺買埋午餐就返屋企，返得去都已經三點有多，買嘢頭一陣基本上又要出去踢波，不過同佢做功課太慢，搞到又遲先去到球場，好彩今日冇咗開始，咁先唔係遲好多，又要換新嗰套波衫，用咗好多時間。踢到六點多直接過樂富同老公佢哋會合。佢哋又踢到九點，我今日淨係出出入入都唔知幾多次。等佢哋踢完波去大家樂食埋個晚餐就返屋企休息啦，我真係好攰！

9/4/21

 9/4/21     FRI.    WARM

今朝Ivy買咗麥記，咁就happy Friday吓，食食吓又醒起要book老公佢地換身分證，又要搞一輪先繼續！之後都係輕鬆做吓嘢先，Kiki打嚟又傾咗陣，睇吓我地過英國嗰啲搞成點。午飯後去咗EMax徰咋，下午回來其實可以自由嘅，反正阿姐放假使咩煮得，但又真係冇咩自己嘢做，咁就邊做近打吓機囉。放工返去接更，嫲嫲就可以返屋企，子元去練波，老公放工又直接過埋去，我就揍仲爺去合唱團，最後一堂啦，都唔再參加！等程家攞番子元幅畫比看就返去煮飯，等老公揍仲爺回來食，廚餘系列雪櫃有嗟就食嗟！做好哂清潔都11點，快手趕仲爺去瞓我就沖涼。

8/4/21

 8/4/21     THU     WARM

今日阿姐雖然放假, 但都係要做嘢, 所以冇咩意思! 返到去食完個早餐咪做吓嘢囉, 其實都係唔知自己做咩咁, 聽住收音機咁, 夠鐘放飯咪食飯囉, 食完咪洗碗, 因為得番一個洗手位, 所以我去咗廁所洗就算, 最怕等! 然後就上德福行, 因為都唔知行咩好, 就去咗打吓書釘囉, 反正有本書想睇! 下午返到公司本來都唔想做嘢, 但又怕之後趕唔切交貨, 所以都係做吓又打吓機咁啦, 反正都冇咩自己嘢要做! 夠鐘就放工, 回來後就自由時間吓, 因為只係叫仲爺溫默書, 睇佢個勢都係唔識架啦, 唔想sai力, 琴晚已經用哂啲能量嚟教功課, 我而家冇咩好力, 所以今日罷工一天! 只係食飯休息打機, 咩都唔想做!

7/4/21

 7/4/21     WED.    WARM+

今日終於要返工，真係好唔想囉，但都係要返架啦，唔係可以點呢！返到去冇心機到連早餐都唔想諗食咩，但都係要食架，落去買7-11啦！跟住就要開工啦，一邊入一邊聽收音機，算係做得輕鬆，都做咗幾㐿，已經麻木！午飯出咗去自閉食super sandwich 然後買埋蛋就回去，下午煮係做啦！今日堅係心情唔好！！返到屋企又發癲啦，仲爺自己開過電腦，又出現怪嘢，又發火囉！叫佢執好嘢準備開飯，先發現根本冇做功課咁滯，都唔知應該話邊個，應該做嗰個又唔做，應該幫嗰個又唔幫，咁我做番囉，但就會全晚黑面架啦！其實真係好無助，根本就係無限loop！

6/4/21

 6/4/21     TUE.    HOT

今晚係最後一日復活節假，節目係愉景灣玩沙！約咗11點幾先喺美孚集合，我地仲去咗長沙灣食埋早餐先集合，子元了要跟埋一齊去，咪由得佢囉，有時都係要玩吓！入到愉景灣都12點幾，馬上set嘢比佢地玩，天氣都算唔錯，有太陽又有風！睇住佢地玩咁囉，一時又話要玩遊樂場，真係玩死大人！老公2點左右就要返去，因為4點又有人嚟睇樓，子元都跟埋出去，因為今晚要踢波嘛！跟住我同程生就去買麥記，又人多又要等，返得去開餐都3點幾，又要帶啲細去洗手，真係行到腳軟，食飽佢地又玩，我地可以輪吓更揍，都係好事可以休息吓！玩到5點幾襯佢哋未返齊，我同晴媽搬哂啲嘢上行人路慢慢執，來來回回好多次終於洗乾淨哂物資同人，6點幾回程！返去洗嘢洗人執嘢囉，叫老公等子元踢完波買嘢返嚟食，明天又要開工啦！

5/4/21

 5/4/21.    MON.    HOT

今日係仲爺期待咗好耐，睇多啦A夢同婷婷佢地上來玩的日子，所以佢今朝好乖咁早啲起身做埋運動先，再等9點我地起身，梳洗完出門口去葵芳食早餐，再去戲院等入場，因為大家想睇嘅戲唔同，所以子元就同daddy睇哥斯拉，我就同仲爺睇多啦A夢，真係好好睇喎，好笑又感動，唔蘞明但又有鋪排！仲爺係咁抺眼淚，好可愛！睇完就回家，先食嘢，攞埋蠔買埋料今晚party，就回家啦，老公洗好冷氣先整嘢食，4點幾有人嚟睇樓，我同程生帶哂啲細路落遊樂場玩，老公話佢就力sell，做埋sales嗰份！返上嚟啲細又玩，我地就叫嘢食預咗6點幾去攞，我同程生行去攞，回來差不多齊人就開蠔食，大家都好食得，仲話8人餐多喎！笑笑說說咁又吹咗一晚，老公到咁上吓出咗去踢波，佢地玩到10點幾都走，約咗明天入愉景灣玩！

4/4/21

 4/4/21     SUN.    RAIN

假期過得特別快，咁就已經第三日，之前兩日都係hea過，因為老公忙於領洗的事，今日到仲爺領洗啦，子元又要足球比賽，唯有分頭行事。我瞓到10點幾先知醒，好在係朱因䢬來車我地，唔係實遲！將軍澳呢個場真係唔係一般人嚟到，吊腳到一個點！老公仲以為今日係熱，所以帶哂凍飲，點知又大風，又落毛毛雨！由12點去到，其實只係踢兩場，但最尾3點幾先走呢！朱因車我地去到奧海城，咁就去食埋嘢，三餐當一餐，因為我今朝只係食咗8粒燒賣咋！去咗元氣食，快快手手囉，然後都係巡咗個圈，子元又話好攰，嘩就返去啦！我都好攰啦！

3/4/21

 3/4/21     SAT.    HOT

今日都係冇咩特別嘢，老公一早又要去教堂，子元去補習，我同仲仲食完早餐就做功課，等老公中場休息就回來找我們食晏，約咗去葵芳會合，因為仲要買戲飛。點知老公搭嗰㗎地鐵，訊號故障行得勁慢，等我哋出門口去到地鐵站等咗一輪佢架車先到，過到葵芳，食咗嘢先，然之後同阿哥去買手機殼，跟住去戲院買飛，本來諗住同仲爺買白色恤衫，點知都係冇，咁老公我趕住返去攞嘢返教堂準備領洗，我哋就過D2，因為伍老師喺嗰度擺咗檔口，所以過去探吓佢。之後子元自己返屋企先，因為佢又話腳痛。我就同仲爺去買衫，但都係買唔到，但就買咗好多其他嘢。6點幾先返到屋企，叫仲爺自己做功課都係sai氣！我就煮晚餐啦，嗰隻笨淨係識得喺床打機！今冕食雞湯麵，我煮覺得正！

2/4/21

 2/4/21      FRI.    HOT

今日一個字，悶！冇出過街，老公又出咗去一日，準備領洗啲嘢，要去教堂，所以我都冇咩地方好去，食完早餐睇完電視，捉仲爺做功課，真係最辛苦，1點又做反斗車王，已經比佢一路睇一路做，之後英文數學更慢啦，教到火起！子元5點幾出咗去踢波，老公7點幾打返嚟話頂唔順要逃走，咁佢就買埋晚餐回來吃。到沖哂涼仲爺又掛住打機，我就叫佢去刷牙瞓覺，佢係走咗入房，唔知做咩，原來今日學咗寫便條，佢就寫咗封道歉信，睇見都唔知笑唔笑好，佢就喊住咁摟住你，死未！

1/4/21

 1/4/21      THU.    HOT

終於捱到放假前一日啦，今朝唔洗理佢地，快手好多，返到去食早餐啦，Ivy蒸咗好多燒賣牛肉，我又買咗粥喎，所以食得好飽，但本身呢幾日腸胃麻麻，所以成日都胃頂頂咁，但都支持到！今日始終係月頭，有嘢做吓時間都過得快好多！午飯食咗牛骨麵咋，已經夠晒知幾頂胃！去德福買吓嘢，今次買咗條波褲比子元，見佢啲褲好爛呢！下午返去都係做嘢啦，不過今日最神奇嘅事件就係我隔離位BD個𡃁仔腹痛，痛到行唔郁架啦，最終叫咗白車，真係第一次見識到。完成哂就做番自己嘢，慢慢入吓JOB CERT都係好！放工本來諗住返屋企，老公又話要出去買衫，最終喺荷里活商場會合，等子元踢完波就去樂富食晚飯，回家後快沖涼，終於嘔到，舒服好多囉！

31/3/21

 31/3/21       WED.    HOT

今日都係返工，𣎴過因為子元要返學，冇人喺屋企睇住仲爺，我必需確保老公放工回程中我先可以出門口，所以又遲啦，又要跑，出到一身汗咁，好易攝親！返去食埋早餐又係hea，時間難捱，有嘢做時已經慢慢做，午飯後上德福，喺uniclo  買咗件Snoopy衫，$99啫真係好靚！下午悶到差啲瞓着，我都知好過份架啦，不過真係好攰！放工啊，行到過球場，仲要等瞓完車復原磅先有得食飯，我已經覺得背脊好痛，應該係今朝出汗攝親，唯有快啲食埋晚餐返去食藥沖涼，叫做好啲，返埋聽日就放假啦！

30/3/21

 30/3/21     TUE.    HOT

今個星期明明只係返四日，唔知點解都覺得啲時間過得好慢，返到去整早餐，食完咪開下工囉。不過真係冇咩做，所以都係打下機打發下時間，跟住都係等食飯啦，食完咪想德福行過圈囉，又真係冇咩買，準時返到上去，又係時候諗吓有咩做啦，阿姐去咗參加調理農務系活動，我哋就放肆足兩個鐘，吹水打機不在話下，簡直係咩都唔做，等佢返嚟先至開工，已經拖慢啲嘢來做，但都係做得好快。放工前老公打嚟，問可唔可以做到查冊，咁我即刻問Ivy一齊處理，都算好快手咁就整好喇，希望層樓真係賣得到啦！今日剪唔踢波，咁就梗係行過去球場同佢地會合。中途當然要去食下野啦，今日食嗰個尖椒真係辣到我辣足幾條街，不過又食得好滿足。去到球場都係吹吓水等佢哋踢完，就可以去食晚飯啦，近近地喺九龍城食茶餐廳，真係好好味呀！食完都已經九點幾，老公就直接返工啦，我哋就等巴士返屋企。返到去快手沖涼就休息，明天佢哋仲要上堂返學。