31/12/20 THU. VERY COLD
今日係2020年的最後一日，都係要晨早流流返工，仲要好凍嗰隻，返去食咗個早餐就做嘢啦，話哂放咗兩日，又要清吓嘢！個心就已經飛咗去放工，冇嗟心機咁有嘢就做，午飯食咗個杯麵咋，出咗德福買嘢，返去後本來諗住hea住過，但都係冇得hea，不過反正都係做唔哂，急咩鬼，準時收工等老公嚟接我，先去長沙灣再買啲嘢，返去接埋啲細，送埋嫲嫲返去，就入Giv仔到，吹咗一晚水，講移民講是非，同場仲有Ben同休佢地，都吹得好開心！見到人地啲仔女仲咁細，我都甩咗不手身煮幾輕鬆，玩到1點先回家，車埋休佢地返青衣先，返去沖得涼都3點囉，好耐未試過咁夜！
2020年過去啦，所有唔好事都一齊過去，2021係順順利利的一年！
29/12/20 TUE WARM
今日又係WFH的日子, 所以瞓到10點幾先起身呢! 整得早餐比佢地食, 又要洗碗清潔等等, 做好佢今晚唔洗做! 跟住就開始hea啦, 同埋都幫仲爺睇一睇功課, 做埋啲網上功課, 檢查哂做齊啦就收工, 都冇咩方向要溫咩書, 算啦! 冇咩嘢搞就不如睇吓劇, 諗起DO姐之前講過套韓劇叫甜蜜家園, 係恐怖片嚟, 果然都真係好唔錯! 老公放工回來, 接我地出去食嘢, 食埋麥記隻新ice-cream就回來, 各有各做自己嘢, 老公瞓咗覺, 我就繼續睇劇, 子元做咗啲功課又睇機, 仲爺當然都係睇機啦! 到8點左右唔可以再睇啦, 我唯有停手煮晚飯, 由於都唔餓, 就食埋琴晚食淨的豬手, 煮個麵烚啲菜就得啦! 然後都係睇電視同做運動休息!
24/12/20 THU. COOL
今日感覺就好似返半日工咁，因為有得放早，仲要我返八點即係放三點，咁我食晏係1:30至2:30 ，真係返去洗個手就差不多收工啦！朝早都係如常咁返去食完早餐就開工，你有啲嘢做吓嘅，做唔到，又係時候食晏啦，邊食邊睇電視劇，食完梗係出去行吓啦，去咗德福行過圈又返返去，收工前竟然都有電郵要覆，搞到我蝕咗幾分鐘添！老公過嚟接我然之後一齊去咗MegaBox行，行完IKEA買埋晚餐的材料，總之就係過MegaBox行咗個圈都冇咩好睇啦咁就返屋企，等老公整平安夜大餐，因為樣樣野都要焗所以都用咗好長時間，先食晒個晚餐， 10點多佢就返工啦，我就同劇集的廣告時間先至慢慢洗碗，所以都10點幾先去沖涼休息真係好攰！
23/12/20 WED COOL
今日要開工啦, 反正都要做, 點都要開工架啦, 快啲做好佢! 返到去快食早餐就開工啦, 邊聽住電台邊做嘢其實都算幾開心, 最好其他人咩聲都聽唔到仲好, 唔想煩! 做到食完午飯就出去行街, 買埋明天早餐的麵包, 仲買埋子元佢地最需要的奶, 飲到好似飲水咁快囉! 下午都係忙忙咁做嘢, 比我預期中算快架啦! 放工老公過來接我, 因為佢地又出咗去買嘢呢! 接咗我就去長沙灣買晚餐, 簡單買4餸就算啦, 返去快手食, 因為已經好餓啦, 所以好早食完有好多時間慢慢做想做的事, 又唔洗睇功課溫書的日子原來係咁, 我覺得咁樣其實都幾好, 點解香港啲家長好似要讀多好多次書咁! 有時間我可以睇番套劇, 等今晚做嗰時可以同步追番!
11/12/20. FRI. WARM
返咗兩日工，又可以放假啦！一早起身返工，返去食埋早餐就開工啦，真係好忙好忙，基本上都冇停過手喺個位做嘢，食飯時終於有機會睇返男排女將嗰日未睇嗰part，跟住上咗德福買生日禮物俾老公，為安全起見琴日問咗佢想要咩款銀包，今日就可以即刻去買，佢要兩個高達款，同一個男裝款都會係咁上下價錢，咁佢鍾意就得啦！下午返去更加係冇停手咁做，成日都一個人睇晒個部門咁，真係好攰！五點放工老公來接我，因為佢個灣仔入境處攞埋子元本身嘅Passport，真係好彩一早去申請咗先，唔係而家公務員WFH真係咩都唔洗申請！返到去我負責搞掂埋仲仲啲功課，老公就處理佢個羊腩煲，嫲嫲都過咗嚟一齊食！第一次整羊腩煲都算OK啦，下次可以買啲真正羊腩部份切細啲就去整。今晚老公加班要返夜，所以佢送完嫲嫲返屋企就直接返工，我同仲爺梗係睇電視啦，我都有做運動㗎 ！
8/12/20 TUE WARM
今日嘛, 都係朝早起身做伴讀書童咁啦, 老公放工買咗早餐返嚟就出去剪頭髮, 仲仲上堂例牌發夢, 幫得佢幾多得幾多啦! 上完堂快啲捉佢做埋功課, 因為下午約咗JOE佢地去行城門水塘, 所以迫仲爺快啲做哂功課就可以好好出去! 先去君日食咗午飯, 跟住就車子元去補英文, 然後就直接去城門水塘, 老公渣到架車好入好入先泊, 因為原來都好多人嚟! 喺附近行住咁等Joe佢地嚟, 決定好行邊條路線就可以郁身啦! 向上行都真係要啲力氣, 不過就睇到靚景又幾唔錯! 不過要管住佢兩個行山邊, 真係好驚, 因為佢地可以掛住望景可以望唔到路, 要成日提住佢地! 到咁上吓就要調頭, 落番去水塘嗰邊行去水覇, 影吓相咁五點幾都要回程, 去接埋子元就去悅來食晚飯, 仲爺一痴埋梓行到就好嘈, 其實真係唔係咁好! 回家後做運動沖涼休息, 老公就9點幾要出門口返工啦!
7/12/20. MON. WARM
今個星期有三日WFH，仲要係連續三日，真係令人覺得有啲興奮，不過出得嚟行預咗要還啦星期四返去肯定早餐死。唔理咁多啦好好享受下先啦，今朝叫我等佢哋上完上網貨先至出去，不過我同老公都靜靜雞出去食咗個早餐先，返嚟老公再補眠我就摺衫做吓家務咁，只緣一點先上完堂佢就馬上出去，因為佢要去睇鬼滅之刃個pop up Store，不過係要先去攞籌，好在只係個幾鐘就可以入去，咁就喺附近食咗午餐先，再去K11行一陣就落返去排隊，主力係梓子元興奮啫，我都有幫做嘢影吓相，投入吓！剪完最終買咗件T恤，其實我知佢仲有好多嘢想買，但係真係唔可以咁放肆囉。所以都管制着佢唔可以呢樣又買果樣又買。只係可以睇半個鐘就要走咁俾埋錢差不多時間去攞車就入沙田要買燈膽行咗陣IKEA。晚餐唔想煮喇去咗深水埗買食物，大家各自想食咩就買咩都幾方便。返到去就食晚餐老公今晚返夜，所以九點幾佢都要出門口啦！
5/12/20 SAT. COLD
今朝瞓到八點幾開始醒，因為今日唔使打返所以唔使一早起身，老公話要過去嫲嫲度幫佢鑽牆，子元話要去睇鬼滅之刃個賣嘢地方，所以九點幾出門口去嫲嫲度，整好埲牆就去食早餐。食完早餐我哋就出發，點知去到K11 ，竟然冇晒籌，因為九點就開始派，所以唯有放棄，諗住去海運睇吓買唔買到波鞋比子元，最終都係冇反而仲爺係咁影相，佢影得幾開心，不過張張都要戴住口罩真係夠晒特色。返屋企之前我去買餸，老公度湊細佬去學音樂，買完餸返去都係唔做家務，一路睇電視一路摺衫，跟住煲咗啲湯自己飲然後再整埋蘿蔔牛腩做晚餐，老公約咗人食晚飯，咁我就喺屋企睇住佢哋，晚上睇電視咁！
4/12/20 FRI. COLD
返埋今日又放假，真係好！加上今日阿姐請咗假，但我都好掛住做嘢嘅，邊有咁多自己野嘅。有啲趕咁出門口，好在仲有4分鐘先夠鐘，返到去淨係燒賣牛肉做早餐，食飽飽仲要開工啊，時間都算過得快！午飯同咗芳芳姐出去德福食上海麵，都真係幾辣！買埋雞蛋就返去公司啦，下午做咗一陣野，雖然未做晒，但都係傾吓先冇理由浪費咗啲自由時間！五點準時收工返去湊仔，因為老公返咗工，下午都係子元揍住仲爺就算啦！不過返到去都係要我鬧，因為又整到間屋亂晒籠，鬧完咪執好晒囉，咁我就可以好好去煮嘢，食完晚飯做埋運動沖埋涼都未夠9:30喎，真係太好啦！大家可以各自做自己嘢，10點幾開始講趕仲爺瞓覺啦，小笨梗係掛住打機啦！
29/11/20 SUN. COOL
今日10點先至起身，仲要比仲爺捉起身，佢話肚餓喎，咁咪快啲起身煮麵俾佢食啦，食完只係喺度打機完全咩都唔做，因為小笨去咗踢波，老公我去咗教會，所以我同仲仲喺屋企決定咩都唔做。都差不多兩點，老公打嚟問我去唔去食嘢，我哋先至換衫梳頭落街，去咗長沙灣食嘢，買埋餸今晚煮大餐，嫲嫲婆婆過嚟同仲仲慶祝生日，買齊餸返去老公就去接嫲嫲我哋再返上樓先。返到去仲要繼續返佢支電子結他，整完就要溫下書，雖然都唔知有冇試考，跟住Kam Ming公主好嘢人齊啦就可以開飯，今晚食海鮮餐有龍蝦伊麵，白灼蝦，蒸瓜子斑，仲有炒白菜。食飽飽洗碗準備切埋蛋糕，有細佬鍾意嘅瑪利奧呢，食完蛋糕佢哋都走啦！跟住都係清潔啊溫埋書做運動睇電視沖涼瞓覺休息啦！今個星期又開始返shift，我諗唔到星期一三五，都算唔錯啦！
28/11/20. SAT. COOL
今日係仲爺期待已久的生日會，不過都要等到夜晚，早上的活動都係會照常。今朝好傻仔咁以為要返工6:57扎醒咗仲諗緊死啦下1秒又諗到今日係星期六喎，不過已經瞓唔番！起身後叫佢哋快啲梳洗，出門口去畫班同埋補習，我同老公就去食早餐，接晒佢哋之後本來諗住出車，點知有架私家車加價雞記擋住晒北極都冇人理，於是老公就1823，不過好在最尾㗎雞記都駛走，我哋都出到車帶走去九龍灣買嘢，今日洗咗好多錢，但都係要買嘅嘢，子元啲長袖衫全部都唔啱，快手買幾件比佢，嗰間新嘅運動舖仲有好多嘢買，所以細佬同子元都買咗件外套！然後去咗UNIQLO但都買唔啱，最後上咗無印反而有收穫，行返過馬莎買今晚整威靈頓牛肉的食材，最後仲喺Sara買埋衫褲比子元跟住就回程啦，老公車左我同笨元返屋企，佢就揍仲爺去學音樂，我就返屋企摺埋啲衫，子元食完飯都要溫書啦！都五點幾老公返嚟車我去買咗蛋糕，接埋朗同仲爺過嚟一齊玩，老公就係咁煮嘢食，我做手術啦咁等張家溫家程家佢地到，可以吹水食飯慶祝仲仲佢嘅生日！全晚都係好嘈咁，老公係咁整嘢食，我哋就係咁吹水，切埋蛋糕，佢都玩到差不多12點先至想散場，不過仲爺話佢好開心。
26/11/20 THU COOL
終於捱到星期四, 返多一日就放假啦, 朝早都係趕趕地咁返工啦, 跟住就返去食早餐, 朝早的日子又係過得太慢, 雖則係有嘢做, 但都係手版眼見功夫, 冇咩難度, 11點幾已經肚餓, 但今日冇帶飯, 所以去買咗個飯團, 加埋個牛骨湯麵, 但原來對我嚟講都係唔夠飽, 放工後撘巴士時已經餓到頭暈冇力, 所以落車就要快手去買嘢食先, 順手買埋奶呀飲品等等! 返到去又唔洗咁急煮飯, 因為阿媽又唔喺到食, 嫲嫲又未到, 子元又去咗踢波, 所以8點先嚟煮飯, 但都等唔到子元一齊開飯, 佢9點多先返到嚟呢, 我地都洗哂碗囉! 佢食完就做功課, 我就做埋運動沖涼, 仲爺同嫲嫲慢慢睇電視, 因為老公明天返早, 所以嫲嫲今晚要留宿, 方便明天照顧, 因為我地個個都一早出哂門口, 好難獨留仲爺喺屋企咁耐!
23/11/20 MON. WARM
今日第一日返八點放五點，但七點出門口原來都有啲趕，明天真係唔再行快兩步。不過八點返到去真係好正，可以有好多時間食下早餐Hea下咁！今日啲時間好似好已經唔使咁，唔係做咗好多嘢又已經過咗好耐，轉個頭已經食飯啦。今日冇帶飯同左Joey媽媽出去食，佢哋送今日佢K3媽媽派位放榜，都算成績唔錯！去咗德福食韓國嘢，吹吓水咁都幾開心！下午返到去坐兩個半鐘嘅五點就可以放工啦，放工時間個天仲光真係幾好！返到去都係食同鍾意睇吓啲功課啦因為嫲嫲煮飯，點知無端端嫲嫲話三姑姐好似走咗，我以為咩走咗，原來係新聞早兩日報道過有人燒炭，佢叫大包去問緊，點知係真，唔好一個，係帶埋兩個細路一齊，唉⋯⋯聽到咁都唔知可以比咩反應，雖然都好多年冇聯絡，但個心都係會唔舒服！但就唔想比大細寶知，始終佢地都冇咩印象，唔好要佢地明咁多嘢住！食完飯清潔完都係做運動沖涼睇電視休息吓，唔洗趕溫書默書係輕鬆啲！
22/11/20 SUN HOT
星期日但未夠9點就醒咗, 有啲蝕咁! 不過都hea到10點幾先出到個門口去食早餐, 為咗等子元有時間溫書, 食完早餐就返屋企, 本來好地地, 落車時我開咗子元嗰車門佢又唔郁, 個門又差啲撞欄, 咁仲爺咪叫囉, 佢又開仲爺車門想中佢咁, 我一秒著火, 你都唔睇清楚就出手想點呢, 我火到走咗, 佢又係都要叫返去, 但最終返咗上樓我都係出咗去, 去咗百佳買嘢, 反正都要入吓貨! 又撞到Lolita, 吹咗一輪水先走, 返到去咪當冇事發生囉, 最好笑仲爺問, 點解你去完百佳返嚟就冇事, 我話係呀, 女人買完嘢就冇事架啦! 等笨元溫咗書, 2點幾出門口去睇剛SIR甲組的比賽! 都幾緊張! 睇到4:15要閃, 仲爺深水涉區隊要選拔, 佢都踢得幾好的, 主力都係想佢減吓肥啫! 溫祉朗都有去選, 佢就係想個仔郁吓啫! 踢完等子元返去沖埋涼就去食晚飯, 明天開始又要轉換新Mode, 仲仲網課, 子元要自己返學, 我就要返8-5, 老公就揍仔!
18/11/20 THU. WARM
今日子元唔洗返學，所以淨係揍仲仲，就可以返工，買埋飯買埋午飯盒，返去食完早餐就要開下工，但其實都冇咩野講，所以都係睇吓幾又做吓嘢，另外都係睇吓英國嗰邊資料，都要諗吓plan B location，午飯後去德福買餸，下午返去整咗陣口罩食下野咁又放工啦，返到去基本上都冇休息乜滯，又要煮飯又要睇功課，不過今日好快手， 9:30佢哋就上晒床瞓覺，子元應該真係好攰，我都未同仲爺講故事，就見到佢已經瞓咗，幫佢差電話先見到有message，其實都知佢唔想去英國㗎啦，但要睇吓點樣說服佢呢個係為佢哋好嘅方法，朋友仔當然重要，但過多10年佢就明白朋友都一定要成日見先keep到，但靚仔冇咗就冇咗俾人拉咗就拉咗冇人知嚟緊會變成點，出面個天空咁大佢哋真係有權利去睇清楚！
27/11/20 TUE. WARM
今日剪完本來係陸運會，但係取消咗，唔見咗返去聽音樂會到10點就放學！叫咗佢返屋企溫書㗎唔知佢最終有冇做到啊！我哋就照常返工返學啦，返到去食完早餐就開始做吓自己野，點知突然間有好多嘢做，搞到我變咗好忙碌！午飯後，上咗德福行吓，下午返去仲沉醉左喺WhatsApp’s到，因為有個group講開移民啲嘢，但嗰位朋友講到模棱兩可，總之就帶偏激成份，平時我都好少出聲，但真係忍唔住要駁嘴！放工直接去咗荃灣，同老公會合，揍仲爺去眼鏡舖攞眼鏡，從此又多咗一個四眼肥仔！去球場等子元踢完波，差不多九點先至有得去食晚餐，緊緊地喺樂富食大家樂就算，返到去屋企老公收到朋友電話又要去幫人做通渠，佢連渠王都撈埋！我就快手同佢哋對功課啊沖涼等陣趕佢哋去瞓覺！
15/11/20 SUN. WARM
今日真係有啲悶悶不樂，可能又係漫無目的掛！朝早瞓到10點多，起身梳洗叫埋子元起身，煮早餐食完都11點幾。落咗去惠康睇吓仲有冇野買，因為開埋今日就執笠。12點幾老公嘈左重嘢返嚟，因為時間比較尷尬都冇咩地方好去，子元又話兩點要返學校參加活動，老公又要返工，去咗長沙灣買咗啲嘢同食午飯，老公就車我哋返屋企。返去睇電視睇到三點幾一定要捉仲爺溫書啦，但今日佢又完全相反，中文默書溫極都溫唔到，搞咗個幾兩個鐘，我又嬲咗幾轉！子元仲衰，冇問清楚係玩到幾點，原來學校六點先放，咁佢邊時間溫書啦，真係激死我！7:00開始煮晚飯，今晚食埋幾隻大閘蟹所以食咗好耐，仲要清潔，講佢哋去瞓，真係夠晒多嘢做！
14/11/20 SAT. COOL
星期六朝早都好忙碌，起身湊佢哋去畫班同補習我同老公就食早餐，10點幾接番佢哋兩個，跟住就過荃灣。先去驗眼，我都估到仲爺應該走唔甩㗎啦，果然要戴眼鏡啦，真係要啲時間接受呢個現實，子元算係保得住清白子區，一隻眼冇事一隻眼有八鬆啲，可以唔使陪眼鏡住，希望呢幾年keep得住就應該冇事㗎啦！配完眼鏡，先去咗幫子元買冬天嘅恤衫，跟住佢去咗快手剪過頭髮，然後要返屋企啦，又要準備仲仲過去學音樂！學員返到嚟都五點多，俾佢抖一陣子元又去學畫畫嘅時候就做功課啦，今日唔知係咪食錯藥，仲爺功課做得又好又快！等佢做完七點幾然後就去接子元順手買埋晚餐回來食，食完都係咩都唔做，睇睇吓電視就瞓着咗，咁就沖涼休息啦，仲爺都好乖冇再睇機只係去咗畫畫！
7/11/20 SAT. WARM
今日都係一個冇咩特別的星期六，早上比兩位少爺叫醒，然後就揍佢地去補習同畫畫，我同老公就去食早餐， 然後去咗759行陣就接番子元返去做功課， 再去接仲爺放畫班，就揍佢去剪頭髮，我都順手剪埋，都一年幾冇剪過，係時候要剪吓， 草咁樣！剪完回家老公快瞓一陣，我同仲爺做陣功課，1:45叫佢地出門口， 我就可以自由吓，食住人蔘雞湯睇Harry Potter， 摺埋啲衫就休息吓，子元都好識嘆，又唔多努力溫習咁仲要瞓咗個幾鐘晏覺， 服咗佢，教極都仲係咁！5點幾老公揍番仲爺回來，我又要教功課同煮晚餐，等笨元畫班回來食！老公今晚返夜，10點多又出去，我就做埋運動沖涼！
4/11/20 WED. COOL
難得今日老公車我返工，因為佢要去將軍澳上堂，咁就車我地返去囉，食埋早餐先返公司！下午又係要溫書，我真係唔多想，可以放假都唔想，因為真係會顛！早上要趕工，我都算唔係打好多機架啦，真係會做吓嘢！放工即閃返去阿媽到食埋飯，然後就揍仲爺返去開工，初頭都可以，不過數學係最快令我著火的一科，因為佢真係完全冇logic，根本唔係教唔教學唔學嘅問題，而係教唔明，子元出咗去踢波後，我係顛咗幾次，因為佢真係又冇心機又冇腦，我係去到失控咁喊，因為我真係唔識教，我係變咗痴線咁，唔係打係恐嚇嗰隻，因為我嗰時真係完全控制唔到自己，好辛苦！老公佢地終於返到嚟，我係煮好飯嘅，但真係無法食先，所以都等埋佢地先食，之後都冇做啲咩啦，真係去到極限！
28/10/20. WED. WARM
今朝真係差啲比仲爺玩死，行到出圖書館嗰頭先話急popo，好在有廁所處理咗佢啫，唔係都唔知點死！佢遲我又遲咗，不過都冇所謂，點都唔會遲到呢！返去食埋早餐咪開工囉，但其實都冇咩趕忙，所以都係打吓機多，有嘢埋嚟咪做囉！加上今日返半日，下午要返去溫書，所以更加冇咩動力！返去前要買埋餸，返去又食埋飯咁，所以都3點先開始溫，查實我都係冇上過堂冇讀過啫，history呢家嘢我都真係冇讀過，咪又係要教，真係好難撈！溫到差不多6點要去煮飯，老公係揍咗仲爺返嚟呀，跟住佢咪去咗瞓覺囉！我煮完飯先叫佢地，食完休息夠大家都要郁啦，但笨元開始冇動力啦，溫溫吓又話點都記唔到， 唉。。。你考唔係我考呀，教我可以教但記我幫你唔到架，頂埋明天啦！
14/10/20. WED. WARM
今日係14週年結婚紀念日，點都要係咁二慶祝吓，雖然都係晚餐食特別啲就算，但都係慶祝呀！早上如常老公返工，我揍仔返學，今日7點就出門口，可以慢慢返去唔洗趕，仲爺還買到早餐！我就行去南昌站，買埋早餐就返工啦，返去都係做吓嘢又打吓機咁啦！午飯後上德福買晚餐材料，難得精緻一餐嘛就去咗瑪莎買料，煮個靚西餐呢！下午就認真做吓嘢先，放工快手返去就煮大餐，老公揍咗仲爺去踢波，差不多9點先回來呢！仲爺還做了送花仔，送咗向日葵比我，18年啦，我都唔知講過幾多次，問老公幾時再送花比我，但原來要等咁耐先有呢！開得飯啦，最欣賞餐飯嘅都係笨元啦，食哂！清潔完最大工程就係仲爺做埋啲功課，做到11點幾先搞掂，佢真係做得好慢，攞我命！終於有時間同花花白酒影吓相，出咗post，可以去沖涼了！
13/10/20. TUE. 8號風球
平白得來的一日假期，昨晚已知今日有機會8號風球，所以都遇咗唔洗返工返學，不過呢樣就唔關老公事，所以佢都係要一早起身，我就閂哂啲鬧鐘再瞓，9點幾起身，仲爺又要入嚟痴一輪，搞到10點先正正經經起身煮早餐食，食完hea到11點幾就捉佢地溫書，笨元真係唔識點溫中學啲書，所以都要好長氣咁guide住佢！仲爺就好努力亦見佢進步咗，咁佢溫好明天的默書就算了！差不多3點先溫完一科geog，就叫老公回來一齊出去食嘢算！落樓順路去找找仲爺隻拖鞋，因為佢去完廁所出嚟好型咁踢隻拖鞋入房，結果直接飛咗出窗，真係好好笑，但仲爺就好傷心，上咗車之後仲喊，真係估佢唔到！好在食完嘢又冇咩，回家老公就瞓陣，我又要開工，今次溫中史，仲爺就比咗份英文佢做，因為唔睇住佢其實得佢自己溫唔到啲咩出樣！7點幾叫醒老公去接埋嫲嫲，去咗大窩口食晚飯然後上去睇埋個屋裝成點，真係細到一個點！同埋真係裝到好奇怪，咩都大大舊，算啦都唔係我住，唔理啦， 快啲睇完就回程啦，明天要返工返學呀！
12/10/20 MON. WARM
今日子元唔洗返學，所以朝早唔洗理佢，揍咗仲爺返學老公就車埋我去車站我就返工啦！返去食埋早餐就開始做吓嘢，都唔算好忙，可以吹吓水慢慢做！午飯食住個好美味的蘿蔔牛腩河，真係好正！飯後去德福買埋麵包做早餐就返去啦，下午自閉中，做住嘢又打住機又吹住水咁，喺網上吹水呢！所以時間都算過得好快！放工前大家都努力咁祈求明天8號風球順利掛到2:30後呢！回家後就有飯食啦，老公上堂前會整好餐飯呢，食完清潔完就睇功課，仲爺都算合作，尤其佢自己整咗張獎勵紙之後，真係有盡力呢！最好笑我做運動佢又要做，但個樣真係好好笑囉！沖涼休息打機，完全諗住明天唔洗返工咁！
5/10/20 MON RAIN
今朝真係估佢唔到， 7點多出門口時竟然落狗屎，真係大雨到你唔信嗰隻，臨出門口時個天黑到變番夜晚咁，上到車基本上已經倒水，送到子元去校門算係安全到達， 到仲爺啦校門塞就遇咗，因為校車喺門口落，啲小朋友冇遮，姨姨要一個一個運送入去，真係有排塞，我送咗仲爺入去，反正都濕，就幫手遮埋其他小朋友入去，最終我就濕到內膽都濕哂， 幾經辛苦返到公司，第一時間換衫換鞋先有時間整早餐呢，用埋風筒吹乾個人先可以做嘢呢！今日啲時間過得快到呢，因為又得番我地兩個人頂成個部門，隔離行唔係AL就病假，真係玩死我地！午飯後上咗德福主力係想買包，點知又走咗去買bra，必需品嘛都要平買！下午返去啲時間真係過得好快，轉個眼就放工，返到去就有飯食，然後都係要清潔完就教功課，小二冇得唔理， 中一更加，真係好攰， 大人細路都攰！
4/10/20 SUN HOT
假期的最後一天了, 感覺是失落, 可能呢幾日都冇咩做過嘢, 無無謂咁浪費咗掛, 但呢個環境都冇咩好做, 太矛盾了! 早上記得要出佐敦攞埋子元嗰本作業先, 唔係冇得交! 出得去就喺嗰頭食埋早餐, 本來都冇咩, 但叫咗嘢食先嚟咗個乞衣咁上吓物體, 臭到呢, 唯有快快手食完就走, 跟住就直接返屋企啦, 都幾無奈吓, 因為跟住就咩地方都冇去過, 困獸鬥喺屋企, 仲爺要溫默書, 子元好多功課未做, 真係做足一日都未做完, 抑死呀, 之前係病但好番啲都唔快快做, 今朝又掛住睇機, 咪搞到夜一夜囉! 晚飯老公接埋嫲嫲再去愉景買咗牛陣返嚟打邊爐, 咁我個假期就過咗啦, 月頭返去又忙到PK!
2/10/20 FRI HOT
今日其實都算幾hea過, 瞓到十點幾仲爺嚟叫我地起身, 但我又捉佢去溫埋英默先出去食嘢, 子元又話想食啲嘢先, 咁我又好忙咁啦, 結果差不12點幾1點先出去食嘢, 子元隻腳都係好痛, 老公就話佢係發骨節, 但見佢行又行唔好咁, 都仲要咁迫佢好似唔係好啱囉! 食完嘢去咗Aeon買咗少少嘢就返去, 攞埋嘢就揍兩隻豬去咗晴晴屋企, 我就去咗買餸, 預呢幾日都喺屋企食呢! 返咗屋企吓衫休息吓, 5點幾就過去晴晴家, 其實可以唔洗咁早過去的, 不過喺屋企都冇咩做呢! 過到去都係吹吓水睇吓叫咩外賣, 等齊人8點幾先開飯呢! 仲爺又玩到唔願走啦, 但我地已經11點先散場架啦喎! 笨元都係唔舒服, 睇嚟佢真係隻腳好炎, 快啲好番啦!
1/10/20. THU. HOT
今日係4㬛餐期的開始，都幾hea過架，瞓到10點幾仲爺入嚟叫我地起身， 出得去食早餐都已經12點幾，諗唔到食咩，近近地都係去長沙灣食茶記咋，再近近地去咗行轉Aeon，我買咗個snoopy月曆呢！老公送咗我地返去佢都返工啦，冇咩特嘢要做咁就齊齊hea吓啦，到4點才叫仲仲入房睇功課，子元喺梳化瞓咗就由得佢先啦，點之之後佢話佢有燒， 嘩！而家咁有燒好驚架嘛，唯有叫佢食必利痛先，再沖個涼去休息，我估計係因為佢琴日踢完波腳啲肌肉發炎，因為佢行到好似跛嘅咁，食咗藥瞓咗出到汗就冇咩啦，等老公回來先出去食飯，去咗大角咀食越南嘢，然後返咗長沙灣荔天附近個公園仔賞吓月啦，又有得玩遊樂場， 加上仲爺今日個浴衣look真係好正呢，玩到11點多要回程啦，返去快啲沖涼瞓覺啦！
30/9/20. WED. RAIN
今朝又係一早起身揍仔返學啦，見到仲爺入學校個樣真係好可愛， 睇住佢個背影都覺得佢好悠閑咁，真係好好笑！老公車到我去南昌站就回家，咁我又好早就返到公司， 好蝕咁添！朝早做吓嘢就開始剪job cert， 咁又一朝啦！午飯做個節啦，叫咗外賣一齊食，今次食西餐我食左burger，又真係幾好味喎！本來諗住食完上market place買餸，佢地提意買牛陣外賣，為番起個一個餐都係$104，但夠哂3個人食， 自己加啲嘢就得，結果我真係加咗兩個烏冬同餃子就飽到食唔哂咁滯！下午剪足一晝，好眼瞓！終於捱到放工啦，見到周圍都塞就撘地鐵啦，返到去阿媽就走啦，咁我就煮飯啦，子元踢完波都返嚟！食飽都冇力清潔啦，好眼瞓要瞓陣先沖涼！
27/9/20 SUN HOT
今朝都唔算瞓得晏, 9點多就醒了, 等老公上埋堂就諗住出去食早餐, 但又要整埋個網上銀行喎, 可能係我太唔識搞呢啲電腦嘢, 搞到我都炆! 終於搞掂咗可以去食嘢啦, 時間關係要去荃灣食, 食完行埋荃灣廣場同Aeon呢, 不過個人都攰, 所以都唔算行得好enjoy! 老公返公前車咗我地返去, 因為遲食早餐嘛, 又可以慳番一餐, 摺哂啲衫, 4點多先落去一人買咗一份燒賣魚蛋食就當一餐, 再去惠康買嘢, 都係啲飲品呀麵呀嗰啲啦, 攞到手都軟! 回家後等佢地沖咗涼, 擺好買返嚟啲嘢, 兩條友又睇機, 我就準備吓晚餐咁, 都係提唔起心機同佢地溫習, 煮好飯食埋飯清潔完都要stop佢地睇機, 不過都係停唔到子元架啦, 比多次機會佢先, 真係大個仔唔想好似小學雞咁同佢溫書, 反而就去咗同仲爺溫, 希望子元今個星期開始做到我教佢的溫習方法啦!
26/9/20 SAT HOT+
今日好攰呀！可能真係太多嘢做，身體上又唔多舒服咁，更加辛苦！早上起身起叫醒哂佢地出門口，一個補習一個畫班，我地食完早餐就去咗銀行，問吓開戶口啲嘢，但因為時間關係都冇時間開住！子元補完習就閃人，車返我去畫室佢地就去konter練跑，揍咗仲仲返去我就休息吓，咩都唔做只係打吓機！因為下午又要去長天聽家長會，真係好傷神的！3點開始聽到5點幾，中間有休息嘅，但都係好攰，見到班主任，正班主任都好正常，副嗰件真係又長又沉氣，悶到一個點！搞到Overttime， 阻住人地下場活動嘛，要買埋pizza再去Joe嗰到吹水會，細嗰兩個真係好嘈，吹到10點未夠走人啦，我今日真係好攰呀！
25/9/20 FRI HOT
終於捱到星期五啦， 今日仲要冇咩做，悶到一個點，簡直有啲浪費時間！早上有擔心子元知唔知醒返學，咁都好好佢自己搞掂哂， 真係大個仔啦！我就如常返工啦， 返去食埋早餐就開始無所事事啦，因為真係要做嘅嘢都做哂啦，真係打機都打到悶，又要留意住阿姐行開行埋咁，都幾攰吓！午飯因為冇帶飯，同咗Joey出去食米線，吹吓水咁啦！下午回來又係悶，聽住收音機都覺得悶，死未！真係好難捱咁到咗放工，撘巴士返去，但因為見子元仲喺摩士，老公又話美孚塞車，我見下兩個站落車可以join到佢地就落車過去停車場找佢地，因為子元漏咗pat喺球場又要去找，搞咗一大輪先走得，返得去都7點多，上樓放下嘢又要出發， 先去接咗阿嫲再去阿媽到做節，以為都係咁食餐飯，原來有人物要登場，阿妹個新男友終於上水面啦，都好嘅，終於有著落囉！食完飯食吓水果咁，9點幾先返去，快快手手捉佢地去瞓啦，明天又係大把嘢做！
21/9/20 MON. RAIN
又到星期一要返工啦，今日轉返返九點，所以唔使咁早起身出門口，但最終都係8:30左右就返到去，蝕咗添。返到去都係食早餐啦，然後做下野吹吓水，午飯後就上咗德福買嘢，好忙碌咁又要換月餅，又要買麵包又要買雞蛋，仲要落住大雨，雖然全程都唔怕濕，但估唔到場雨好襟落，一直都放工都未停過，仲要越落越大，加上今日開始又要放返6:00 ，而且周圍唔係炒車就係塞車，梗係唔搭巴士啦，但行去啟德站果斷路已經足夠令人濕晒，不過我就冇乜所謂嘅。返到屋企都差不多七點，佢哋仲以為我去咗惠康買嘢，邊買得到啊濕到隻狗咁！食完飯都唔係照常咁洗碗，估唔到仲爺驚我得閒得滯，冇拖地水入廚房時，一嘢倒到全個廳都係，結果抹到隻野咁，全個梳化底都濕晒，唯有當大清潔啦！所以今日都冇做運動啊我已經夠晒啦。沖完涼睇埋功課可以自由，老公上完堂就出咗去做埋運動先返嚟！
18/9/20 FRI HOT RAIN
今個星期的時間好似過得快咗好多, 都好, 開始習慣番日日要返工! 可能今日唔太忙, 可以好好做自己嘢! 返到去都係食蛋做早餐啦, 然後咪做吓嘢囉, 不過都係吹水多架啦! 今日食飯時間都食咗好耐, 因為叫咗樓下酒樓的外賣, 半價嘛, 三百幾蚊食到飽, 仲可以連籠上, 幾搞笑! 食完又吹水咁, 兩點幾先開始做吓嘢, 但我都係打吓機咁啦, 不過都有事要忙吓! 放工就先去7-11換我的Snoopy環保袋, 終於換到Snoopy個頭嗰隻啦, 仲要換齊兩款, 咁可以停啦! 返到屋企先睇仲爺功課, 然後咪開飯囉, 兩兄弟都係咁, 啲功課甩甩漏漏, 激死我! 真係要出禁機令先得啦!
15/9/20. TUE. HOT RAIN
今日都係唔算好多嘢做，如常咁返工啦，但返到去就話跳咗電，蒸唔到蛋，食咗第二啲早餐呢！跟住都係做吓基本嘢，然後就再做自己嘢囉，但真係好肚餓，原來雞蛋係飽肚啲架喎，午飯後都係出咗德福，買咗餸咁啦，勁大雨都唔去得邊！下午大家都要開會，咁我就可以聽咗do姐找資料，所以時間過得勁快！放工快腳返去，就揍埋仲仲入青衣啦，因為子元入咗去踢波，不如順手喺嫲嫲到食埋飯啦！咁我又慳番唔洗煮！入到去就等開飯，真係好開心！食完就hea到8點幾先走，啱啱好趕到巴士，所以返到嚟都係9點，做埋運動先沖涼，慢慢做吓自己嘢，趕埋仲仲去瞓，唔比子元打機佢就係咁睇電視，執埋明天返長天考分班試啲嘢就趕佢去瞓！
5/9/20 SAT. HOT
今個星期六終於有啲似回復到疫情之前，因為仲仲可以去學畫畫又可以學音樂。所以8:00就要起身，等佢哋食埋個早餐就去學野，子元補英文，仲仲去畫班，我同老公就去食早餐。本來落大雨諗住Konter唔使練波，點知10點幾又出太陽，咁老公接咗子元就去踢波，搞到我喺美孚行返去畫室接仲仲，都要行咗半個鐘真係有啲攰。返屋企Hea到咁上下，兩位臭男就返嚟，到點幾鐘又要出門口，仲爺去學音樂，子元就自己係屋企搞掂。我都好耐冇湊個仲仲學音樂，去食埋個午餐，行咗陣$12店就接仲仲，搭地鐵返屋企。Hea到六點幾七點先至煮晚餐，都係簡單西餐啦！清潔完做埋運動就沖涼休息啦！
3/9/20. THU. HOT RAIN
今日繼續係要返工架！不過返之前仲要去抽血驗，入去又要探熱我又超標，又要等， 抽血時又抽嚟抽去都抽唔到，真係好麻煩！最終搞掂走得老公車我地去食早餐， 仲爺可能早起又話頭痛又話肚痛，見佢冇嚟精神個樣真係好嚇人，好在之後都冇咩啫！返到去都係做嘢啦，午飯後點都出吓去，留喺公司總係會覺得蝕咗！去咗德福快行買咗包比佢地做早餐等等，下午返去都係做吓嘢時又打吓機，時間都算過得快，放工返去又有飯食啦， 食完咪都係清潔吓睇吓電視，最悠閒的時間！今日仲爺好聽話，又唔睇機又係咁幫手做嘢，仲話去瞓就瞓，可能今朝頭痛真係令到佢好唔舒服，所以都好合作，又好可愛咁呢！
27/8/20 THU. HOT
返埋今日又放假啦，今朝老公去咗買麥當勞比佢哋食所以遲咗返嚟，喺樓下先見到佢，我就帶咗啲白麵包返去食麥皮，好大反差。食完早餐就開工啦，都係做吓嘢吹吓水咁啦，食完午飯見仲有時間就出去行吓，好過喺Office又要聽電話又要開門，咁咪食咗好似冇放過lunch！唔想熱唔想行所以搭shuttle上德福，去咗A1買麵包明天做早餐，仲買咗隻小丸子甜品試吓，又幾好味喎！下午返去做埋啲job cert，所以都忙忙碌碌咁，話咁快又放工，老公來接我去買埋飯再返屋企。子元下午去咗蘇sir屋企玩，佢就開心啦打咗成日機。返嚟食完飯都係休息吓Hea下咁，九點幾老公就返工！
26/8/20 WED HOT
今日又係work from home的日子啦, 瞓到9點多起身煮早餐啦, 老公就食咗早餐先返嚟架啦, 我就整蛋治同仲仲食, 之後都係做吓家務咁啦, 等子元上完網課就出去, 先去幫阿媽整番好兩個櫃輪, 然後就去食嘢, 老公帶咗我地去食間新嘢, 都係小店嗰類啦, 好好食又唔係, 但都唔算話太貴! 食完就去荃灣, 子元的校服要車校章, 又話要買短褲咁, 真係大得快, 又高咗咁! 買完返去開始捉仲爺做功課, 我就又開moveright個網嚟睇英國啲樓, 比老公一齊睇吓! 晚飯老公煮, 我覺得真係煮得好味過我呢! 飯後都係睇吓電視休息吓咁啦, 9點幾老公又返工啦!
22/8/20. SAT. HOT
今日仲爺7點幾就走咗入嚟想救番佢隻被扣留的跳跳虎，但就搞到我醒咗，之後雖然瞓番但都係瞓得唔好！10點幾起身後，老公因為要上堂， 上足一日，所以冇得出去食早餐，咁我又想去惠康入貨，所以捉埋兩隻嘢落去就幫手，買得好狠，用咗現金卷都要補三百幾，真係好誇張，不過幾個星期冇入貨，就係糧盡架啦！返到去放番好啲貨都放咗好耐，等老公落堂就出去食午飯，順手去攞番cube cube！之後就直接回家吽咗一個下午，咩都唔想做唔想郁！係摺咗啲衫咁大把，等老公落堂，就出去買pizza回來食，等緊攞pizza時去咗萬寧又入貨！回家食完嘢就又係吽囉，呢啲日子除咗吽仲可以做咩！
15/8/20 SAT. HOT
星期六日可以瞓到自然醒，老公放工返嚟瞓到10點幾先至起身，要出去食早餐買糧食啦，先去瑞士咖啡室食咗個早餐，等架車洗好玩埋軚，就去街市買嘢，本來諗住買啲河粉今晚食埋啲牛腩，心血來潮見到有雲吞皮，就買咗半斤返去試吓包雲吞，當然仲要買菜買肉啦。返得去都點幾鐘，老公揍仲仲去學音樂，我同子元就喺屋企，兩點幾開始就整雲吞，最大工程係切菜，切細菜切碎再渣乾水再要撈肉加味，都包好再落水煮熟埋，原來都要幾個鐘，真係好費時的食物，不過喺疫情時候呢個就係最好消磨時間嘅活動。食晒啲雲吞，仲有老公買咗火腿返嚟配哈密瓜，嘩就當晚餐啦！睇吓電視做吓運動，沖涼後趕埋啲仔去瞓，又係時候休息，又過咗一日啦！
14/8/20 FRI. HOT
今日又係Work from Home，其實都冇咩work過，瞓到10點幾先起身，梳洗完收拾下計劃今日出去幫子元買埋啲書，所以都要準備定啲文件，仲要過長天交埋啲通告。不過首先去咗食早餐先，食飽先有力做嘢，去到佐敦排隊等買書，折咗之後千幾蚊啫，識人攞二手書真係好重要。本來買完書諗住返屋企，但醒起子元真係冇校服，就去咗奧海城望吓，最終都只係買到條西褲，可能白恤衫真係要去校服公司先至買得到。喺奧海城行左一輪，三點幾就返屋企啦。之後都係休息吓準備吓晚飯，今晚整蘿蔔枝竹牛腩、仲有蘑菇焗薯仔。食飽都係清潔睇電視做運動沖涼休息，老公今晚都要返夜，九點幾就出咗門口啦。
