31/12/18

31/12/18.   MON.    COLD

來到2018年的尾聲，仍是要返工的一天，早上叫醒老公駛番架車入嚟我就去返工， 朝早都係做吓嘢，時間都過得快，話咁快就食晏啦，吹吓水咁又等放工， 今日放4點都唔錯呀，臨收工前都做埋啲嘢，好頭好尾嘛！放工撘小巴可以去到奧海城同老公佢地會合，佢地去咗睇水行俠，咁我就直接過去，等佢地食埋嘢都5點多，若要睇煙花倒數就要出發去海運泊好架車霸咗位先，再去行商場囉，其實冇咩地方好行架，但為咗等時間過都要，其實Barry都跟埋嚟，但到我地行得咁上吓佢都係選擇咗返屋企， 因為倒數要等咁耐又真係有難度！我地就去大家樂食埋嘢然後行咗去中港城嗰邊，有個新嘅戲曲中心起得好靚又去八吓！行返返去時又喺馬路影吓相咁，然後10點幾就上去停車場等，果然係要有泊車先可以名正言順上去，等咗兩個鐘，期間都係要控制住佢兩個都攰架啦，不過喺嗰個位睇煙花倒數又真係好正！回程就辛苦，淨係塞出停車場都有排！

30/12/18

30/12/18.    SUN.    COLD

又到星期日，老公今日返全日，所以朝早起身已經唔見佢，瞓到9點幾自然醒，就叫笨元自己煮早餐先，等我梳洗完仲爺又起埋身先煮我地嗰啲，食完就執屋先，仲爺都係搞到周圍亂，又換埋仲仲張床單等等，跟住就同子元溫吓常識，點都要溫啲架啦，有幾個鐘都好啦， 中途又午餐啦，食完飯再溫到3點先出門口，去梓朗屋企開party，我只係覺得好嘈，大又嘈細又嘈，真係好煩！我地大人就吹水囉，時間都過得好快，玩到9點要閃啦， 撘番小巴再轉小巴超快返到土戈，沖好涼睇transfermer，又可以睇足一晚！

29/12/18

29/12/18.   SAT.    COLD

今日未夠8點就起身，因為9：10去睇戲，老公先去攞車再來接我地，去到買埋嘢食就入場，大黃蜂都幾好睇，不過始終只靠Bee去撐場係有難度！睇完行咗陣商場就去車攞番仲爺學嘢啲嘢，揍佢過海怡跟住我去食晏啦，再周圍行吓啦！買埋麥當勞就去接仲爺去踢波， 球場真係凍到一個點，凍死我啫！返屋企攞埋衫去接子元放游水，回來後意粉食，然後都係趕佢地快啲休息啦！

28/12/18

28/12/18.   FRI.    COLD

今日返多日工又放假啦，咁嘅日子點會有心機開工，加上係non peak的日子，我今日打咗大半日機，打到都唔想打！朝早食脆片做早餐唔掂，可能要加多片包先得！午飯後都係打吓機咁，下午啲時間過得仲慢，真係打足咁耐機，等到放工就照樣撘巴士返去，忍唔住食咗個杯杯麵，因為今晚又要等佢地唱完歌先食，本來只係諗住去食茶記，點知最終變咗打邊爐，夠哂滿足！

27/12/18

27/12/18.   THU.    COOL

又要返工啦，今日老公返兩更，辛苦哂啦！嫲嫲差不多8點前過到來接更，咁我就可以出門口返工，買埋早餐返去食完就開工，快快手基本上朝早都做好嘢，午飯後打吓機，下午就編埋1月份個更表，話咁快又一個月啦，好快又過年！唔覺唔覺做吓嘢又已經5點，差不多hea吓又放工，快快手返屋企開飯，不過嫲嫲真係煮得太多，要調節番佢煮少啲我就食少啲，飯後都係洗碗執嘢，仲爺今晚唔多合作，係要我片吓佢先安樂！沖完涼都冇咩陪佢玩，見佢跳繩咪就跳吓比佢睇咁佢又好高興，打暈咗佢就要教子元做讀書報告，快有快做的方法嘛豬仔！k.o.埋佢終於有自我時間呢！

26/12/18

26/12/18.    WED.    COOL

今日算係最後一日假期了，瞓到10先突然醒，子元要足球，大家快手起身執嘢出門口。因為預出足一日，所以都係要執齊啲！揍咗子元去球場我地先去食早餐，食完就去番球場等囉，一點多先走，趧唔切一齊過北角影Snoopy ，所以喺樂富行咗陣商場就車的地過九龍城碼頭，老公有佢返工，我地有我地撘船，我都係第一次撘咋！過到北角碼頭就已經係北角薈，梗係去影snoopy啦⋯⋯但原來好細，好快就影完，搵番條電車路就食少少嘢先，食完KFC就去摐電車過灣仔再撘船返尖沙咀，然後行去尖東，約齊四隻嘩鬼日式放題，係幾好食喎！食足兩個半鐘，再去影吓燈飾咁，行番碼頭撘6號返去，已經11點幾，妳攰啦！

25/12/18

25/12/18.    TUE.    COOL

今日係聖誕節，其實都係假期的一天啫，朝早瞓到10點幾起身，煮埋早餐叫老公起身，食完佢就去攞番車先，我都未諗到去邊，但最好選擇都係去睇戲，不過要買飛原來咁難，好在最終都找到荷李活廣場仲有啲位，咁就買定飛先囉，然後就出發去咗mega box，睇吓玩具等老公就要返工， 咁我就同佢兩個去再行吓食埋嘢，行商場行到夠鐘就去睇無敵破壞王，都真係幾好睇喎，睇完都已經7點幾， 返去煮埋晚餐食再沖埋涼都10點幾，快啲趕仲爺去瞓，叫笨元做埋功課就可以摺衫啦，等老公回來，又有宵夜食，肥死啦！

24/12/18

24/12/18.   MON.    COOL

今日平安夜，但都係要返工，係佢三父子就放假！所以叫咗老公起身泊番架車入嚟就極速返工，趕到一個點，58分先返到去！拍完卡先落去買早餐，食完就開吓工啦， 今日都係holiday mood架啦，午飯好多人都開party咁，我地幾個就出咗去食台灣麵！返到去都係等放工，因為今日放四點！而家今日都係咁追蹤住子元，因為我地又獨留又放佢自己出去食早餐啦，去補習啦，返屋企自己買埋飯盒食，返去做功課，然後再撘地鐵過海怡半島，對佢嚟講都真係算好遠！放工直接返屋企，收拾吓就等老公會合，揍仲仲去合唱團，跟住老公去深水涉買mon貼，然後同程家會合食晚飯，睇仲爺合唱團，話咁快又到我隻小豬合唱團啦，次次都諗起佢得粒公仔咁大時就去睇哥哥合唱團呢！唱完去麥記又食一餐先返去沖涼瞓覺！

23/12/18

23/12/18.    SUN.    COOL

今朝8點幾比仲爺嘈醒，老公先知醒要揍子元去比賽，但臨出門口先發現原來天雨關係取消了，所以可以喺屋企做吓功課，老公因為射波要去睇醫生，不過佢今日真係要睇，因為應該瞓扭頸嗰隻！我就煮早餐嗰兩個食，然後係咁執屋，反正都就過年都係要執架啦！又要子元做吓功課先啦，點幾終於忍唔住要出去食嘢，叫醒老公出去，去咗深水涉食嘢，點知仲爺瞓咗搞到我要抱住佢食，幾耐未試過，之後放番佢上車， 老公同子元去咗買game，跟住就去咗太子泊定車先再去行咗個圈先過去警察遊樂會，同konter的隊友BBQ，玩足一晚又落雨咁都幾煩，玩到9點幾要走啦，返去仲要沖涼執嘢等先有得瞓啦！

22/12/18

22/12/18.   SAT.    WARM

今朝雖然個人係10點幾先起身，但其實都早醒咗係咁發夢！食完早餐趕佢兩個做功課，仲爺做淨少少好快搞掂，子元就出去踢波前都未做哂，雖然假期仲有時間但我都係希望佢快手做好！中午後各有各捧仔，老公揍子元去比賽，我揍仲爺去音樂，但今日我比較燥，佢少少嘢就點著我個火，例如去到地鐵先話要VV，又要扭眼瞓又要唔瞓又要嫌三嫌四等等！最終學完音樂就去踢波，喺球場開始咗都掛住同梓行玩，我仲唔片佢仲係我嚟！片完咪好好囉，幾專心呀！等老公嚟接咗我地返青衣做節，又係咁食食食啦，仲爺都好快食哂啲飯，但玩嘅時候又係唔理大家仲食緊，拋哂嘢咁想比人鬧呢！8點幾閃啦老公去踢波， 我就返去搞掂佢兩個瞓覺，然後都係摺衫睇電視等等！

21/12/18

21/12/18.   FRI.    COOL

終於捱到星期五啦，今朝老公車我返工， 因為兩個細都醒咗，咁就一齊出門口！食完早餐就開工做吓嘢先，然後就開始hea做子元份專題的power point卟搭，原來要做起上嚟都幾吃力，咁就真係做咗我一日，好在阿姐今日下午閃咗，可以好放心咁慢慢做！放工等老公嚟接我返去仲爺合唱團，因為太肚餓都係要買啲嘢食咗先，等佢地唱完歌仔就返咗長沙灣晚飯才回家！

20/12/18

20/12/18.    THU.    COOL

今個星期真係過得好慢，今朝佢哋放假咁，老公一早落去攞車泊返入迴旋處，我就自己搭車返工，佢就陪仔繼續瞓！今個月好似啲嘢做極都做唔完咁，今日又係冇停過手咁，時間過得好快，午飯佢地話過工商食，就去試吓上次人地帶過我食嗰晚！下午返到去又係咁做，差不多放工前搞掂，彈閘但都好遲先返到美孚因爲冇車到呢，嫲嫲話食壽司咁就直接去曼山會合。食完返去沖涼休息，佢兩個砌Lego我執屋。終於打暈哂佢地可以hea！

19/12/18

19/12/18.   WED.    COOL

今朝唔想仲爺咁早起身，所以老公車咗子元返學就返嚟接更，點知仲爺未夠8點就起身，咁咪比藥佢食咗先囉！等老公回來我就返工，都有啲趕呀，食完早餐就開工啦，今日都係做吓吹吓休息吓，午飯後打吓機咁，今日係有好多嘢食囉，阿姐因為抽到獎請食tea，跟住又有人嫁女請西餅咁！放工返屋企就有飯食，嫲嫲出嚟煮飯，食飽又係洗碗清潔趕啲仔沖涼，比佢地砌咗陣lego就去瞓，仲爺唔砌埋要我幫佢齊！

18/12/18

18/12/18.    TUE.    COLD

老公生日快樂！雖然老公今日放假，但我要返工，其實都係幫唔到佢慶祝，只係晚上食餐飯！朝早都係送仔返學揍我返工啦，食埋早餐返去都係做做做，今日又係做極都未做得完咁，點解今個月好似咁忙咁呢！午飯去咗同OSO嗰邊一齊飲茶，兩位阿姐請，一齊食吹吓水咁幾開心！下午返去除咗做嘢都有無聊吓，又上咗去買清潔用品，放工前老公話仲爺發燒，叫我放工去法國醫院會合，去到我接更因為仲爺瞓咗，老公就去球場接番子元放足球，再回來揍番我地就去食佢餐生日飯！之前已找咗一間食意大利嘢，雖然食咗成千蚊但真係好好食好有水準！回家快手k.o.埋佢兩個啦！

17/12/18

17/12/18.   MON.    COLD

又要返工啦，今朝只係揍笨元返學，跟住老公就同我一齊返九龍灣，因為佢今日要去上堂，可以同我一齊食埋早餐，仲爺琴晚已經喺嫲嫲到啦！今日返到去都好似好多嘢做咁，全日都冇咩做自己嘢，午飯後睇吓劇，下午都係一路做，望鐘時已經5點多，幾誇！不過都放工即閃，老公嚟接我，返青衣接咗仲爺先，跟住諗住去接笨元去球場，點知佢同阿媽都記錯喺7點，最終去咗球場接番阿媽返屋企攞番隻篋，仲爺就瞓咗但都要捉佢落車，返屋企hea吓好過喺球場吹風啦！等老公嚟接我地食埋晚飯！明天老公生日雖然放假但我又要返工，晚上子元又要踢波，都冇咩地方去慶祝添，睇吓佢想食咩蛋糕就買比佢啦！

16/12/18

16/12/18.    SUN.    COOL

今朝老公要帶子元踢盃賽，基本上一朝早就出咗去，我就瞓到10點幾先起身，仲爺都唔知睇咗幾耐youtube，仲識得攞腸仔食飲奶，煮埋早餐比佢食，比佢玩吓玩到12點幾開始慢慢執玩具，因為下午要去琛琛生日會，所以仲爺都好合作，入到青衣城買埋禮物過去，真係3點玩到6點，有得玩魔術，又有好多遊戲玩，佢地就最開心啦，我最開心係有得食嘢呢！仲爺學玩魔術時真係好比心機，所以有得當住大家表演佢好開心呢！玩到6點影埋相就返上嫲嫲到，佢今晚喺到過夜，我就去海怡同老公佢地會合，食埋飯又返番屋企咁，其實對我嚟講都幾無謂！返到去都係睇吓電視瞓覺！

15/12/18

15/12/18.   SAT.    COOL

今日真係唔願起身，不過子元又要學英文又要畫班，所以都係要起身，搞掂出門口去食早餐，接送佢去學嘢，我就返去同仲仲做吓功課，等老公回來交換人質，佢去揍仲爺學嘢，我就喺屋企，主要都係做吓家務啦，同埋hea吓咁，等子元去埋游水，就同飯腳食晚飯，佢地話想食粥底火鍋就試吓啦， 海鮮真係好正，不過老公咁上吓要去踢波，得番我地繼續食，差不多點幾10點先返到去，沖得嚟再K.o.佢地都好夜，我都好攰了！

14/12/18

14/12/18.   FRI.    COOL

今朝7點幾先起身， 好在都趕得切返工，買埋早餐返去食，跟住都係做吓嘢又追縱吓笨元啦，仲要打埋今晚Christmas party講稿，午飯後都係做埋嘢等夠鐘就過去酒樓準備今晚party，先set好個背景等，又同男主持夾吓， 7點幾就可以正式開始，又係要做MC，我都真係MC命，不過都做咗咁多年，咩經驗都有都係咁做，咪又係介紹吓抽吓獎玩吓遊戲，都算係輕輕鬆咁玩，不過係咁講嘢個口都好攰！得23個獎75人爭，我攞到五百蚊百佳卷都算係唔錯啦！食吓抽吓玩吓咁就完場，未夠10點已散哂，我地返公司放低埋啲嘢就可以返屋企，老公已經揍好啲仔返屋企，我返到去都係快啲沖涼瞓覺啦，見到笨元返咗嚟我都開心哂！

13/12/18

13/12/18.   THU.    COLD

今日我算係冇咁緊張了，不過朝早起身都係忍唔住打比子元，好在佢已知醒，老師趕住叫佢地集合，講唔夠幾句又收線了！不過睇到佢個GPS都放心少少！返到公司唔知點解今日咁忙喎，總之又係令人唔順心啦，不過食飯前幫手去買明天Christmas party啲嘢，又去睇吓場咁，食完飯咪又開工囉，都忙碌呀！不過冇嘢係趕到要今日做完的，所以準時放工返青衣食埋飯揍仲爺回家，一對一佢真係好合作，等佢瞓覺我就試衫，最終都係著番黑色嗰件啦，唔好搞咁多嘢！明天我隻小笨元就返嚟，不過我要搞掂埋公司個Christmas party先可以放工呢！

12/12/18

12/12/18.   WED.    COLD

今日對我嚟講真係好大挑戰，因為子元三日兩夜廣州交流團正式開始，今朝6點幾就起身梳洗7點已經出門口，本來諗住食埋早餐先去高鐵站，但又怕唔識路等等，最終只係買咗包比佢地食就直接去高鐵站，7點幾到達後喺集合地點就係一直等啦，8點多先開始briefing，到真係派好飛入閘啦，我真係會好唔捨得架喎，會眼濕濕架喎，係咁影佢地相啦，終於入哂閘我地都要散，最終我請咗半個鐘CL，因為已經趕唔切9點返到公司，不過都趕到shuttle返去！朝早完全係心不在焉的狀態，因為一路都未收到子元報平安，到真係等到佢報平安啦我先叫做安心少少，但之後就開始係咁睇佢GPS去到邊，所以今日好似唔係好做到嘢咁！午飯同同事一齊出咗去食，一來慶祝12月之星，二來stella當聖誕禮物請我地食一餐呢！下午回去做咗少少嘢啦，又要開會傾星期五Christmas Party的MC！放工直入青衣食埋飯揍埋仲仲回家，都係如常咁ko佢，跟住就係等子元電話啦，知道佢地返咗酒店，但做唔到要喺大堂做埋功課先可以返房，好在子元能屈能伸啫，我問佢攰唔攰又冇嘢，不過係聽到佢係咁索鼻囉，廣州都幾凍吓，真係怕佢凍親呀！我呢兩日應該都係keep住係咁掛住個仔的狀態架啦，等佢星期五返到嚟我先可以放鬆！

11/12/18

11/12/18.   TUE.    COLD

今日都係咁叫大家起身返工返學啦，不過都係好趕囉，點先可以一朝早快啲呢！返到公司又要偷走落去買早餐，食完又開工啦，朝早都好忙吓，11點多又出發要去奧海城拜神，其實都係落去做陪襯啫，搞掂哂先12點多，有腳喺到一齊梗係唔返公司啦，喺到食埋飯先走，再去uniqo買咗幾件heat tech比仲爺，行去撘得地鐵返去都2點多，下午都係做吓嘢玩吓吹吓水咁啦！放工本來老公嚟接我，但因為交通問題實趕唔切，最終我去樂富同佢地會合，由於仲爺瞓咗，決定只留喺車等子元踢完波先買米線返去食，還要final執埋佢啲行裝，明天就小明上廣州啦，係我呢個阿媽最最最緊張囉，又好擔心， 樣樣情緒都齊呀！

10/12/18

10/12/18.   MON.    COLD

又到星期一要返工返學的日子，老公返早我又要忙碌！搞掂子元送佢出門口返學，又要搞掂仲爺返學，其實我都唔係遲出門口，但拖住佢行又要等地鐵咁，所以都遲遲地，穿巴又塞吓，57分先拍到卡，夠哂刺激！食埋個早餐就開工，做嘢公事又做吓自己嘢啦，午飯後都係打吓機啦，下午真係整埋啲相，放工返去老公仲末返，只係接咗笨元，還未接仲爺返嚟，所以我洗住菜先，等佢返嚟可以準備打邊爐，食得嚟洗埋嘢，又要教子元執行李等等，我差不多12點先沖涼，今晚又搞到好夜先有得瞓！

9/12/18

9/12/18.     SUN.    COLD

今日一早就要起身，因為子元要去踢波，老公又要返早，所以托咗朱欣送我地去，以為真係踢到10點散得，點知實時計20分鐘各上下半場，結果10：30先踢完，最唔扺係仲爺又話要便便，子元出場嗰一陣都睇唔到呢！趕住去公司親子聖誕party，11：20先趕到去，先登記咗就去玩咗一個攤位遊戲又上番去食嘢，冇枱冇櫈下再帶住佢兩個食都算係咁，見有魔術表演又睇埋攞埋禮物先再去玩攤位，跟住又返上去食多轉嘢，真係好食得呢！玩到兩點去埋廁所就過海運睇吓燈一飾才和老公會合， 又去咗睇朗豪坊嗰個，再行吓街，跟住就去深水涉買外賣回家㑡女，食完就有排先執好嘢瞓囉！

8/12/18

8/12/18.   SAT.    COLD

今日又係忙碌的一天，朝早8點幾起身佢地起咗身，但又係要人催先出得門口，揍咗子元去學嘢，我地就食早餐，跟住老公就車我去銘賢聽talk，點知仲爺開車冇幾耐就嘔，真係比佢玩死，好在仲有子元的後備衫換咗頂住先，但架車都係要抺架啦，叫做處理咗先啦！過到去銘賢竟然剛剛落閘，要上上層，我話已經有人喺入面都唔比入，咁我都上咗去先啦， 襯個校長講完嘢，子元又咁啱打比我，我就出去聽完電話再扮哂嘢話我老公喺入面，因為撞正我出咗嚟就閂咗門，咪叫佢地放番我入去囉，扮哂嘢！不過呢個talk唔聽都冇蝕，硬件軟件都唔掂，學校又唔識sale或者係冇嘢好sale啦，講吓有咩入學申請要求的資料都冇，叫人點去考慮呢，你又唔係神校！終於聽完就痴程生車返屋企，返去收拾啦又要出門口，帶仲爺去學音樂，我就食個晏行咗陣，睇吓有咩買，買埋麥當勞接仲爺就撘171返去，喺車瞓咗一輪，老公因為揍咗子元去比賽未返，本來諗住喺樓下等，但仲爺又急尿，最終返咗上樓先囉，然後交收完人質老公又帶仲爺去踢波，我返上樓就要執拾番個案發現場咁，真係好攰啦！6點幾老公打嚟話回來接我地同梓朗佢地一齊食飯，等嚟等去都冇位，最終去咗食泰國嘢，都算幾好食嘅，食到8點幾先返去， 老公又要去踢波，我趕佢兩個沖涼做功課溫書等等後，打暈埋佢地就摺衫，都已經12點幾，老公明明踢到11點咋嘛， 要差不多1點先返到，可惡！

7/12/18

7/12/18.   FRI.    COLD

今日氣溫由朝早好暖到晚上好凍，我帶咗衫都凍！朝早7點半先起身，所以捉得哂佢地起身就已經遲出門口，差不多8：55先返到去，再要偷走落去買早餐呢！今朝都係hea過，冇整過相，主要睇吓子元下星期交流團啲嘢，午飯前阿姐已經出咗去，我地可以早食早出去大昌行掃課，有開倉但我冇諗過自己買得咁行勁！同另外兩個同事買到換埋贈品呢，係架車仔可以拖啲嘢返去，但都好重好重，公司好多女人都出咗去掃貨，但係我地咁誇張就冇！分享完又要開工，都係做吓嘢又吹吓水咁啦，放工等老公嚟車我，主要係攞番啲飲品返去，車埋我去球場佢就約咗人食飯，我就喺球場坐咗2個鐘食西背風，等笨元踢完跟朱欣車返美孚，買埋嘢食撞埋仲爺就回家快食沖埋涼我已經好攰！

6/12/18

6/12/18.   THU.    WARM

今日仲爺直接去黃士心領獎，所以等老公放工回來就先送笨元返學再車我返公司，一齊食埋早餐我就返工，老公就揍仲仲去領獎！返去做吓嘢又hea吓咁啦，時間都過得慢咁架啦，午飯後都係打吓機，下午都係打機，間中又做吓嘢啦，放工返到美孚老公接埋我去葵興食晚飯然後返屋企， 笨元好攰咁，可能呢幾日透支得太多，今日就頂唔住！

5/12/18

5/12/18.    WED.    WARM

今朝都係咁返工啦，食埋早餐返去就開工，點都有啲嘢做吓，今個月算做得快喎，今日開始不情不願咁整相，朝早時間都算過得快，話咁快又食飯，睇吓機打吓機又開工，下午要開會，搞嗰份咩鬼內部傳閱的通訊，我都係比人擺上枱嘅啫，總之選一樣唔太吃力的去做咪算囉，之後出嚟都係吹水等收工！返美孚食香港地，順手去買埋公司Christmas party的禮物，回來後同仲爺沖埋涼，陪佢玩咗陣車仔，對好佢地啲功課，趕埋佢地去瞓覺我又可以休息，老公今晚都係返夜，又得我一個悶！

4/12/18

4/12/18.   TUE.    HOT

都12月啦，可以最高27度，咩天氣！朝早叫笨元攞張八達通比老公去嘟定，點知笨元就自己攞咗返學校，搞到我地要去學校找佢攞番，好在可以直去南昌站，咁都唔算好遲返到去！食完早餐就開工啦，一朝都就係到入job cert, scan job cert, 臨出去食晏時先去廁所咋，但就係咁佢地等我時又同阿姐一下已喺大堂等，總之就比佢地笑我篤屎累事啦，正衰鬼！去咗啟業食正記，都幾好食嘅，間中出吓去嘛，又行吓嗰個街市，好新鮮囉！下午時間過得好快，都係做咗啲專題，吹吓水食吓嘢咁！放工行過摩士接子元放足球，勁慢行加周圍睇嘢都係7點半唔洗就到！等佢放得嚟返到屋企都9點幾，食得嚟老公又要返工，趕兩隻嘢去沖涼拖埋地，再哄埋仲爺瞓覺，沖好涼真係要理吓笨元，佢條友以為睇就係溫書日，明天中進睇佢點算！

3/12/18

3/12/18.   MON.    WARM

又到忙碌的月頭日子，今朝有老公車我地，所以可以好早返到去食埋早餐慢慢開工，不過一早都未做公事住，因為太多私務要做，過埋啲相等等，跟住又有好多人嚟打斷我，所以都預咗今日做唔哂啲job cert，午飯後還要做子元的專題，而家做人阿媽真係難，功課都要做埋！下午真係要努力啦，做得幾多得幾多！轉個眼就放工，老公話出去食，就去咗元洲試拉麵，好好食呢仲可以食埋雪糕！回家後都係沖好涼做家事啦，睇埋佢地功課，又睇吓子元廣州交流團啲嘢！

2/12/18

2/12/18.    SUN.    WARM

「今日我生日呀！」我今朝一早起身見到仲爺喺廳佢就係咁同我講， 見佢梳洗完換好埋衫喺梳化hea緊，真係無話可說！梗係走埋去摟住佢同佢講生日快樂，仲要話佢知你生日即係媽媽好辛苦生你出嚟，要多謝媽媽！全部人起床梳洗後就揍子元去畫班，跟住食埋早餐就去買生日會餘下的物資，主要都係飲品同魚蛋，醒起有百佳卷就返去攞，買齊接埋笨元就回家準備，又要同兩位少爺做埋啲功課先，但1點多要出發時子元都係未做得哂， 所以都係要今晚回來做，搬啲嘢落樓過到去都係點幾，提早攞到場可以unpack先，跟住就未停手咁set場，泵波啦貼上牆啦，再要落去買嘢食，有大包幫手好好，終於set好可以食嘢，然後都係吹水時間，原來我同呢班媽媽真係冇咁熟，始終都係同程家梓朗佢地多啲嘢講！吹到4：30就係切蛋糕啦，呢個環節都好攰，管好秩序又要影相咁，真係氣都冇！之後還有打皮納塔搶糖果，派氣球禮物等等，開心到不得了！不過執嘢回家都好攰，好在有兩家人幫手啫，最白痴係啲餘下的氣球Tie唔實飛走哂， 頂！返去放低嘢就同埋嫲嫲去食晚飯，回家同仲爺開盒啦，同禮物影張相可以分類放好哂，玩得嘅先比佢玩，沖埋涼老公又要返工啦，今個星期都返夜呢！

1/12/18

1/12/18.   SAT.    WARM

今日真係好忙，搞到我都好攰，朝早7點幾就要起身，出門口帶子元去數學比賽，好在今次個地點好近，只係去長沙灣，所以買埋個包做早餐就撘6號過去，喺南華天主教竟然撞到個中學同學，佢喺嗰到做牧文，傾咗陣咋，又要睇住細佬又要趕下一場，去黃棣珊聽講座！不過揍住仲爺去聽其實都幾辛苦，又唔想佢嘈佢又要嘈，你話幾煩！佢地幾個聽完上半場就要去聖母玫塊聽下一場，所以下半場就由我頂上，聽完馬上影相upload! 聽完就帶仲爺回家，快手做一做功課先去學音樂，揍到佢過去又要食午飯又要買嘢，喺個商場上上落落做齊嘢就接番仲仲，因為冇巴士就唯有撘番地鐵，我都知攰但喺地鐵瞓咗加上買咗咁多嘢，又要抱佢都幾攞命！老公喺美孚站接我地，車完我地去球場就返去準備明天生日會啲嘢，好在走時有joe車我地返嚟，去買埋米線晚餐就返去食嘢，笨元又唔見咗件風褸，真係比佢激死！老公帶咗笨元去踢波，我就搞掂仲仲囉，佢係咁為自己的生日會做準備好，真係好可愛！

30/11/18

30/11/18.   FRI.    WARM

今日都係咁返工返學啦，而家對子元自己返學已經叫做放心咗，可能真係要時間去適應！揍埋仲爺比嫲嫲我就返工，樓下買早餐，今日都係半hea狀態啦，唔算太忙，吹吓水做吓嘢上吓網又放飯，今日快食完跟ivy佢地去shopping，其實都係去日本城同麵包鋪，嗰間真係超多包選擇，買定今晚合唱團完之前食，下午都係等收工啦，暫時冇咩好做！放工過樂富接埋仲爺過小童，佢可以玩幾樣玩具先上合唱團，我地大人就傾project，等老公嚟埋就差不多放啦，喺美孚快食埋個飯就閃，因為明天又要數學比賽又要參觀學校咁，仲爺又要音樂又要踢波，老公又返早，好在有程生做uber司機啫，唔係點搞！

29/11/18

29/11/18.   THU.    WARM

今朝笨元就晨雞咁早出門口，佢話佢係英語大使要早啲返去準備，相反仲爺就抬都唔起，差不多全程服侍！跟住就同嫲嫲會合，其實咁揍仲爺返學都開心嘅，佢都好多嘢同你講！買埋早餐返公司，今朝都係冇咩做，阿姐出咗去之後我地又作反，吹水吹到完全冇理其他人咁，我就做埋常識專題囉，下午先開始做吓job cert咁，放工閃人返去揍笨元，因為佢喺學校踢完波就直接去補習，所以我去補習社接埋佢先返屋企，嫲嫲煮好飯有得食，搞掂哂啲嘢都9點幾，沖涼時見仲爺仲玩緊咪諗住沖完涼先比佢瞓，點知我沖完涼出來佢已經自己上咗床瞓，真係好可愛！笨元就做哂功課就比佢瞓，都11點囉！

28/11/18

28/11/18.    WED.    COOL

今日又係好hea的一天，朝早如常叫醒佢地返學，仲爺又賴床，要抬佢梳洗換衫出門口，有點趕交收完就返工啦，買埋早餐返去食，跟住都係打吓機做吓嘢咁，午飯大家各有口味，所以食完孤獨飯我就喺公司打機，同埋等電話，笨元星期六就要數學比賽，有咩理由仲未派准考證，搞到我又要去煩學校，頂！下午都係打機等收工，仲有做吓笨元個專題，今晚又要開會！放工等老公嚟接我，買埋飯返去同仲爺食， 老公就去球場等子元踢完波揍番佢，我同仲爺可以慢慢做好啲嘢，沖埋涼老公佢地返嚟就等笨元都沖埋涼可以開會啦，其實真係幾攰，佢地瞓哂我還要摺埋啲衫呢！

27/11/18

27/11/18     TUE.    COOL

今日都係冇咩做，朝早叫醒笨元返學又搞掂仲爺，還要叫埋嫲嫲，揍咗仲爺就返工，買埋早餐返去跟住就係hea啦，係呢幾日架咋，好快又做餐死，不過甘都幾好，打吓機咁又一朝，午飯睇埋劇集等等，但都係睇唔切！下午又係hea多過做啦，其實咁樣時間都唔好過架，不過周圍吹吓水咁啦，等到放工即閃，天雨關係子元足球練習取消，仲諗住早啲返青衣食雲吞，點知一上巴士就塞車，7：10先去到撘西鐵，足足1個鐘，再返埋青衣，老公帶咗仲爺嚟選蛋糕，又搞咗一輪，返到去再等雲吞食得都8點多，我真係餓到手軟腳軟！食到飽飽又鬧到煩啦，9點幾先返屋企，仲要買埋藥水比仲爺食，佢有幾聲咳呢！今晚真係勁眼瞓，我要早啲休息啦！

26/11/18

26/11/18.   MON.    COOL

又要返工返學啦，今日老公off，可以車我地，咁我又唔洗咁趕啦，但因為遲咗出門口，所以都係只可以喺樓下買早餐，食完又要開工，但呢幾日都係可以hea一hea，所以都係打吓機做吓嘢咁啦，午飯去咗買燒味飯，因為個飯實在係太難頂！食完剛好睇埋套黑騎士，下午都係吹吓水做吓嘢咁等收工，返屋企有飯食，洗完碗收拾仲爺個玩具，因為要留個位放lego嘛！子元自己去傾掂佢個專題啦，我唔想再理，不過佢地傾到差不多12點，真係好誇！

25/11/18

25/11/18.   SUN.    COOL rain

今日凍咗好多，瞓到10點先起身，梗係見佢兩兄弟咩都冇做啦，趕咗佢地入房我就梳洗然後煮早餐，今日食得簡單啲咋，跟住就係功課車輪戰，我真係好攰，不停要教又要催仲爺做，又唔想浪費時間，老公就因為唔夠人去咗踢波，頂！3點幾先返到嚟，又要去食嘢又要攞篋比阿媽又要去投票，真係好忙！跟住去咗海運行，睇玩具買禮物比仲爺，佢等生日禮物都等咗好耐，之前真係好少買嘢比佢！然後都係周圍行吓啦，去大家樂食埋打邊爐就回家，明天又要返工返學！

24/11/18

24/11/18.    SAT.    COOL

星期六都是學習日，今日8點幾起身，老公當然返咗嚟，咁梳洗好就捧笨元去補英文，我地就去食早餐，接番笨元就趕住去九華聽talk，主力都係我聽，子元都係想佢嚟睇吓個環境，但最估唔到個talk 係全英文，原來我啲英文都仲可以，但笨元就話佢聽唔明，頂....有冇咁難明呀，有時見佢啲態度真係好乞人憎，想佢眼光放闊啲啫都咁難咁！聽完其實都覺得冇咩機會，佢好公平咁show哂點計分去in 人，但就係咁更令我覺得冇咩機會！聽完行咗個圈就同埋炮哥去咗食晏，因為咁啱撞到佢帶勤少去聽talk，回家後笨元做功課溫習，我就執吓嘢摺埋衫，夠鐘就叫笨元去游水，我就自由吓！等老公揍埋仲仲回來可獎人揍埋笨元放游水去街！去左奧海城睇多拉A夢，順手食埋晚餐！9點多就要返屋企，因為老公今晚返夜，咁我地都係返去沖涼睇電視啫！

23/11/18

23/11/18.   FRI.    COOL

今日凍咗好多，我都要著番長袖著番褸！老公放工回來就揍佢地返學，攞埋個錢箱返去交！買埋早餐返去啦，跟住都係做吓公事又做吓私事，午飯好想出去行吓，所以快食完就跟埋ivy佢地出去，relax吓嘛！下午有得做埋評估，都真係有傾工作呀，重點係睇個分喺幾多，因為個分大約就係個bonus的人工數，3.2即係大約有3個月雙糧，咁我做得半年，按比例都應該有1.5！放工要避咗紅隧塞車，所以行去彩虹撘地鐵，阿姐聽到又跟咗我地行，真係唔係咁想囉，跟住咁人地點講佢啫！直接返美孚食飯，跟住就去小童仲爺合唱團，子元做功課，我同johnson傾project！返到屋企見到隻爛咗嘅相片CD，我燥到一個點，睇咩都唔順眼咩都鬧啦！放咗上網講咗叫做抒發咗，但我都冇理仲爺，笨元都受唔少，我掉哂出走廊啲嘢佢又要執，又要保住個細佬，襯我沖涼時快手搞掂咗個細佬，其實佢都真係乖架，但我發覺我真係有啲燥鬱，一係想係咁掉嘢一係想係咁大喊，完全控制唔到，好辛苦！

22/11/18

22/11/18.   THU.    COOL

今日老公放假可以揍仔返學，我就輕鬆啲啦，仲爺又唔洗咁早起身，我仲可以去工商食埋早餐先返工！本來今日做評估架，但阿姐又有嘢做結果冇做我，可惜，咁我咪繼續做我嘅嘢囉！午飯後睇埋嗰少少黑騎士又要開工啦，出埋啲notice，又做埋屋企張schedule，又到放工時間啦，買咗個暖爐要入沙田攞，所以老公嚟接我，攞完去ikea食埋晚餐就回家，老公要趕工埋個錢箱明天交功課，我就睇埋佢兩個啲功課再沖涼，老公10點到又要出門口返工， 我就執個錢箱個手尾，因為老公係整咗分類錢箱個內裝，我要同佢做裝飾，今次都算喺咁裝佢裝到一間屋咁，我真係覺得好靚！

21/11/18

21/11/18.    WED.    COOL

今日都係咁揍仔返學啦，夠哂時間返到公司食早餐，然後都係做吓嘢啦，出嚟出去都出唔到啲notice 咁，話咁快又食晏，食完就睇埋套黑騎士啦，下午要開chrismas party個會，其實都唔係咩難事，因為我走唔甩地又要做MC，雖然都做咗十年八載MC，不過今次又完全唔同呢，但我估都係咁做啫！傾到3點幾，出去做嘢同吹水囉，因為阿姐又閃咗，真係唔應該今日開會，浪費哂！放工前終於出齊哂啲notice，放工可以準時走啦，返青衣食埋飯先去揍子元，佢今日去踢區隊！估唔到仲爺喺巴士瞓咗，去到長沙灣放佢落地都唔醒，最終都係要抱！再撘巴士返到去快手沖好涼比仲爺瞓覺，再要搞掂子元開online meeting，而家啲細路返學返到好似返工咁，真係人都顛！終於搞掂哂佢就瞓得，我就要幫佢upload埋啲嘢上去先得呢！

20/11/18

20/11/18.    TUE.    COOL

今日都係如常咁老公返早我搞掂哂兩隻豬返學啦，今次又到攞漏電話又要返轉頭，激死！趕到地鐵返去都要8：50先返到，梗係上去拍咗卡先落去買早餐，就係去7-11買早餐時，一轉身竟然見到位元堂鄧小姐，佢都奇怪點解呢個時間會喺呢到見到我，咪話佢知我轉咗工囉，做咗好多年都係咁話啦，佢都例牌咁答轉吓環鏡都好！返上樓食埋個早餐就開工，其實都有嘢忙架，又到編更的時間，做做吓又有其他嘢做，又有私事等等，真係迫到人透唔到氣！放飯時kiki打嚟呻，都要聽吓佢嗰邊點，其實都係佢當時同我講一樣，唔好等啦走啦！餘下時間追埋套黑騎士，下午又開工啦！又未做哂嘢就放工，唯有明天繼續！子元今晚踢波，老公話直接去九龍仔球場會合，我見去到球場都係坐，不過就試吓行過去啦，開住個google map慢慢行，都有少少行錯咗路咁，都係1個鐘左右就到，其實都真係幾顛呀！等佢踢完波就喺九龍城食埋晚餐回家，好多嘢趕住做，笨元又係咁激我，重點係要佢解決問題唔係製造問題囉！跟住又要趕功課啦，我都覺得佢近來完全唔夠時間做嘢，個問題喺邊呢，真係嘢太多定佢能力唔夠呢，我都好困惑！

19/11/18

19/11/18.   MON.    COOL

今朝又要揍仲爺入青衣，條友慢吞吞我又矇矇吓，搞到真係勁趕囉！買埋早餐返公司食又要開工，隻手臂都仲痛緊，但都要做嘢架啦，今朝公事又忙私事又忙，幫阿媽print台證，手腳又慢咗真係做得慢啲，轉個頭又午飯，食完都係吹吓水咁啦，淨係搞掂子元個專題都夠我煩！下午真係要做嘢啦，不過阿姐晏啲又出咗去，搞到大家又吹水囉！放工直接回家，快手趕仲爺去做埋啲功課，食完飯洗好碗就趕佢地去沖涼，仲爺今日好合作，沖完涼我話你可以自己畫畫，佢又真係好乖咁喺房畫，等我沖好涼佢就刷牙等我講故事瞓覺，仲執好哂間房！跟住同子元對一對功課，睇吓個google classroom點搞等等！老公話佢同同事食埋宵夜先返，咁我咪又係一條友頂哂啲嘢，佢搵多啲錢返嚟啦！

18/11/18

18/11/18.   SUN.    HOT

今日老公返早，所以朝早我都係一個服侍佢兩位，9點幾都要起身，煮早餐食完就開始有點亂亂地，子元要做啲嘢好多，又要溫默書又要做專題咁，仲爺又要玩玩具，但都局佢做埋少少功課先得，混混頓頓咁我又等到老公放工回來先去食嘢，去咗深水涉掃街先再去九龍城，本來想去比佢地租單車踏吓，但70蚊個鐘喎太貴啦，啲單車又唔係新淨！於是去咗九龍城廣場行吓，去附件食埋嘢就返球場，今日同蘇sir 嗰隊踢呀，我地輸咗2-1，不過都踢到火藥味，球員有唔啱推我地啲人，但球證又係新仔唔敢出紅牌，搞到咁火藥，之後蘇sir都係messager同我講唔好意思又吹咗一輪水！回家時買咗麥記，最主要子元想食但搞到我都食埋一份呢！沖好涼打暈埋佢地沖涼，睇埋ironman個尾都瞓啦！

17/11/18

17/11/18.   SAT.    WARM

星期六我好似都係火氣比較重，因為對住佢地兩個總係有千萬樣嘢激我！早上起身明明就係要去補英文，但永遠都係唔梳洗好先，都係要我三催四請，總係遲咗少少先得嘅！食完早餐返去同仲爺做功課， 今日算做得快咗架啦，12點多就做好有得玩，今日老公放假可以揍仲爺去學嘢，我就同子元喺屋企，等佢做好功課就出去食午飯，本來喺惠康諗住買完嘢就返去換床單，點知因為要攞個放得又高又入的麵爬高了一點就跌落嚟接傷咗隻手，又流血又瘀哂咁，結果咩都做唔到，唯有教笨元做埋啲專題，但5點佢又要去游水，做唔得幾多！本來諗住去買餸架，但老公又打嚟叫我返屋企收貨，最終我都係唔再出去啦，屋企有咩煮咩食啦！之後老公去踢波，我對住佢地本來都冇咩，但當發現子元泳衣泳褲都唔見哂漏哂喺泳池時，真係火到一個點，去泳池找又已經閂咗門，唯有明天再去找，但我真係好嬲，佢仲有啲咩係可以整唔見嘅呢！

16/11/18

16/11/18.    FRI.    COOL

終於到happy friday啦，朝早都係趕趕忙忙咁叫佢地起身返學，揍埋仲爺入青衣我就返工啦，今日其實都冇咩趕忙嘢做，所以都係有嘢埋嚟就做囉，午飯後都係吹吓水咁，下午阿姐又出咗好，好free呢，真係等放工咁！子元踢完學界打嚟話腳痛，可唔可以唔練konter，咁你講到腳痛我可以點呢，於是只係叫阿媽揍咗佢返美孚就算，奶奶就冇煮飯，話出去香港地食，食完佢就返屋企，我就揍住佢兩個去小童，仲爺上合唱團，子元就做功課，但佢個態度勁衰拖慢哂個進度，佢覺得去小童係玩唔係做功課，呢樣真係要鬧囉，返到去又未做明天補習啲功課，真係比佢激死！返到去屋企都迫我發脾氣，先係一返去見個鞋櫃門爛咗，跟住就係我張床有仲爺啲玩具，跟住就係笨元唔識解決問題反而製造問題！我覺得我近來又燥咗，可以點呢！

15/11/18

15/11/18.    THU.   COOL

今日又要揍仲爺入青衣，子元今日記得拍卡我就放心啲！買埋早餐返公司食，今日堅係冇咩做，但朝早點都要找啲事做吓，午飯今日有得去海景房食，不過都係吹吓水睇吓電視啫！下午都係hea啦，全部大粒連阿姐們都出哂去，我地就真係放監，係咁上網睇嘢，放工返去有咖哩飯食，仲爺又話自己做哂功課，原來又係未做哂，下次都係唔好信佢，靠自己睇穩陣啲，笨元又係咁，對功課先見佢又係有份數冇做， 唉。。。就嚟激死我啦！

14/11/18

14/11/18.   WED.    COOL

今個星期又係過得好慢咁，可能閒啦就會覺得時間難過！今日老公放假，可以車我地返工返學，咁我就唔洗咁趕，朝早返去都要找啲嘢慢慢做吓，終於振捱到午飯，都係食吓飯睇吓機吹吓水啦，下午無無聊咁過完，跟住就收工返長沙灣，子元要踢波嘛，今朝又踢比賽今晚又練波，都係嗰個場！我就食完飯返阿媽到攞埋嘢就回家，以為要同仲爺博鬥啦，點知佢出奇地合作喎，搞掂哂話瞓就瞓話刷就刷牙，真係估佢唔到！

13/11/18

13/11/18.   TUE.    COOL

朝早又要催仲爺出門口又要整飯比笨元帶真係好忙，交收咗仲爺又要趕返工，明天都係要再早啲，因為真係趕唔切車，要返上樓拍咗卡先落去買早餐，今日都係hea做，午飯去海景房食又有電視睇，下午預備定早走，其實都係要揍笨元去踢波，真係好大工程，叫嫲嫲揍咗佢兩個出嚟樂富同我會合，再行過去九龍仔，老公都好堅持子元自己行過去係冇問題， 唉！其實佢真係未大個到咁！仲爺就不停激我，叫佢唔好做佢就係都要做，返到去屋企叫佢郁佢又唔郁，我諗以後真係狠啲對佢算，唔洗手下留情！

12/11/18

12/11/18.   MON.    WARM

又要返工返學啦，今日老公仲要返早，所以送子元出咗門口我又要快手搞掂仲爺入青衣，返工有點遲，好在還趕到班車，喺樓下買個早餐就要返上去開工，忙忙吓又一朝啦，午飯出咗去食，都有啲貴呀但一次半次出去食都可以的！下午返去都係咁做吓嘢，但主要吹水講電話，因為收到個消息，舊公司個會計今日都比人斬埋走，即走嗰隻，嗰條PK真係仆街到一個點，不過算啦離開根本就冇損失，只係覺得有啲可惜啫！放工返去長沙灣食日本嘢，梗係同嫲嫲一齊啦，老公送咗我地返屋企，沖好涼同仲爺溫埋書，笨元就迫佢自己溫，希望佢默書唔好出事啦！

11/11/18

11/11/18.   SUN.    WARM

今日老公返中，所以我地早上一齊活動，下午返去我就要同佢兩個換季！朝早子元去畫班，我地就等接佢放，期間上咗阿嫲屋企攞嘢食還有利是，今年生日撞正阿婆咩，所以都冇同佢慶祝！等子元放咗學就去咗深水涉行，本來主力想買佢個小息袋，但因為睇唔啱反而買咗好多生日會用品，行到12點幾返去咪買少少餸再返去執衫囉！老公就返工啦，我就困獸鬥咗一日，主力只係睇電視執衣櫃，煮咗兩餐佢地食咁啦！

10/11/18

10/11/18.   SAT.    COOL

星期六都係忙碌的學習日啦，8點多就要起身，9點子元補英文，我地就去食個早餐，然後到仲爺返去做功課，例牌激到我嘔血啦，但都叫做喺出門口學音樂前做哂，我仲對埋子元啲功課添，老公揍完子元回來就送我地去地鐵站，我又要揍仲爺去學音樂，食個午飯行咗陣就返去接佢，又要去葵興踢波，今日全撘地鐵慢慢行都早到，換好衫臨開始又話要疴屎，但因為得蹲廁，條友蹲蹲吓又疴尿，真係比佢玩死，條褲濕哂，搞到我又要洗褲吹乾比佢著住先！踢完撘巴士返去，快手沖個涼又落去接子元，近近地去咗食米線咋，然後就返屋企沖涼睇電視！

9/11/18

9/11/18.  FRI.    WARM+

終於捱到星期五啦，今個星期唔知點解過得好慢，朝早都係如常咁返工啦，食埋早餐返上樓啱啱好， 跟住都係開吓工又抖吓咁啦，今個星期都係唔多想做嘢，所以啲嘢拖得耐咗！午飯後都係打吓機啦，跟住就又開工，捱到放工老公揍埋兩個過嚟九龍灣，諗住比佢地行吓街，難得笨元唔洗踢波，不過仲爺8點又要去小童合唱團，所以都係睇咗一陣咋，佢學嘢笨元喺小童玩我地大人就吹水，跟住等放學就去食飯，吹吓水咁食到10點幾先散，回家要快手k.o.佢地，我先有時間做吓嘢呢！

8/11/18

8/11/18.   THU.    WARM

今日係康傑故事親子活動，所以請咗兩個鐘假返去講故事，一早叫醒哂佢地出門口，先揍咗子元返學，再直接入青衣，去太興食個早餐先返學校，但都等到9點先入得去，又要跳早會操又要介紹自己咁，搞一大輪先入得去，不過都唔緊要啦，今年仲爺都K3，上到小學冇呢啲嘢玩架啦！我地真係只講故事咁簡單，唔似得有啲家長又帶哂樂器又禮物咁，一來我真係冇準備，二嚟其實都唔需要啦！講完老公就車我返公司，趕到10點前拍卡唔洗蝕15分鐘嘛，真係飛咁滯！其實今日冇咩趕嘢做，所以只係好hea咁做photo report就算，打住機拖長嚟做，午飯去咗E房嗰邊食，海景房嘛又有電視睇，幾好呀！下午都係咁啦，只係覺得時間過得好慢但又諗唔到可以做啲咩囉！係仲爺間中send個msg嚟講吓嘢咁真係幾搞笑！捱到放工又彈閘，同放工腳一齊走，返去巴士總站時接埋子元上樓就準備開飯，跟住都係睇功課做家務啦，兩隻豬都攰啦，未夠10點都瞓哂，我沖好涼又可以休息啦！

7/11/18

7/11/18.    WED.    WARM

今朝老公返早，要自己揍仲爺入青衣，跟住再返工，今日都趕唔到用晨早優惠，返到去先買早餐，跟住都係做吓嘢又hea吓咁啦，午飯前比官生落咗去「斬叉燒」，其實都係去食吓燒味，聽佢地講吓嘢吹吓水，但真係悶悶地架，差不多1點先返得上去，阿媽又打嚟問入台證嗰啲，但我都未有時間去了解！唯有下午有啲時間就幫佢處理吓，不過下午都有人激我，有個盤物管又嫌油缸啲相點唔好，但你成日追番啲舊嘅我可以點呢，最終我都同對家條𡃁仔爆粗，嚇親人呢，佢話同我對話咁耐覺得我係好斯文，但聽到我都爆粗就知我已經忍無可忍！放工去長沙灣會合食個飯，老公車我同仲爺返去，子元就踢波，返去沖好涼我就同仲仲做埋啲功課再溫過吓英文，老公回來k.o.埋佢地就自由吓啦！

6/11/18

6/11/18.   TUE.    WARM*

今日已經冇咁忙啦，朝早都係如常返工返學啦，但去唔切食早餐，只係買7仔外賣！之後都係開工啦，keep住有嘢做咁其實都幾夠皮！午餐同咗個監督去樓下飲茶，佢好客氣係都要請，咁我見今日個飯真係一般，所以就去飲啦！下午回來都係做啦，做到夠鐘就放工， 喺車同咗kiki傾電話，佢又要呻呢，不過今次真係好變態，原來新請嗰個FC係都係痴線架，會發脾氣掟文件架，跟住已經完全比嗰邊洗咗腦，最仆街係佢地蝦amy的程度去到開佢電腦睇佢電郵，洗佢電郵，仲衰到整亂佢張枱，又唔係亂哂但就係擺明郁佢啲嘢囉！其實咁可唔可以告佢呢，佢地話應該係老細默許個FC咁做，但真係好變態囉，咁樣點返工呀，成日比人威脅咁！返到去肚有啲痛又想休息吓先，所以抖到咁上吓先煮晚飯，大家都唔餓，嫲嫲又唔食閃了，於是我就只係煮咗菜同雜丸麵，跟住就係做如常嗰啲嘢，終於K.O.哂佢地就可以休息吓啦！

5/11/18

5/11/18.   MON.    WARM

話咁也又星期一，又要返工返學，朝早條大腸粉一早起咗身，咁咪急急趕咁出門口囉，都唔明佢咁急做咩，搞到我又要早早叫埋仲爺起身，又唔記得叫老公攞埋八達通去拍卡！突然又醒起唔記得借圖書仲爺的家長講故事，今日要交書返去嘛，好在喺笨元個櫃找到一本啱先頂到！返到公司都係8點半，去食埋個早餐都仲有時間慢慢行返去，今日都算少番啲嘢做架啦，起碼冇咁急，但都令時間過得好快，一早又要上網㩒銘賢information day的飛喎，轉個眼就已經放飯，食完就吹吓水休息吓咁，下午阿姐自行放早，大家就可以輕鬆啲啦！放工回家睇仲爺功課，迫佢做好埋先，嫲嫲煮好飯就食飯洗碗吸塵抺地囉，都搞到9點多先沖涼，笨元又乞人憎咁唔喺法定時間做好哂啲嘢，成日都拖我啲練習，明天考數，同佢對時發現錯漏百出，我都唔知臨急臨忙可以點， 唉！不如我死咗佢好過啦，咩都唔洗理！

4/11/18

4/11/18.    SUN.    COOL

今日都係遇咗做溫書日架啦，朝早瞓到8點幾9點，老公話出去食早餐，順手幫程生泊番架車去停車場，條友琴晚扭親腳呢，撘的士去睇醫生，因為扭親右則口渣唔到車呢！咁食完就返嚟溫書啦，不過又要等佢做埋功課做埋練習咁，都12點多先再同佢溫，唔覺唔覺原來3點幾4點，真係餓啦要出去搵食，老公去長沙灣攞車，見到樓下有得玩咩嘉年華，於是帶佢地落去玩吓休息吓，順手等老公攞車回來，跟住去咗新世紀，睇咗一陣玩具咁大把，見已經五點多不如午晚餐一齊食，去咗食牛涮窩呢！真係食到好飽，食完就閃冇再睇玩具，反正呢個場都冇咩睇！回家沖完涼都冇得睇電視， 因為要幫笨元繼續溫埋下半場，主要再問吓書寫生字咁，溫到九點幾終於完成啦，起碼我覺馥至冇咩書可以問！我叫做可以休息吓咁囉，不過都係要k.o.哂佢地，接埋衫睇吓電視呢！

3/11/18

3/11/18.    SAT.    COOL

今朝子元要足球比賽，所以老公一早同咗佢出去，我就同仲爺hea 到9點幾先起身，慢慢煮早餐，今日好想試吓整pancake，跟足包裝袋寫去整真係成功喎！執埋嘢都11點先開始捉仲爺做埋啲功課，好在嫲嫲琴日同佢做咗大部份，咁我都係執埋個尾，起碼寫生字嗰啲已經完成，不過都做到12點幾，又要出去學音樂，老公同子元踢完波就帶佢去英華聽talk，我就等仲爺學完嘢做去會合，睇佢地食埋嘢先交換人質，老公今次到帶仲爺去踢波， 我就同子元返去溫書，其實上星期都溫得八八九九， 今日都係做練習，睇吓佢仲有咩唔識，可以再溫！等仲爺踢完波就出去食晚飯，都係附近食咋，因為輪到老公去踢波，我就同兩個返去打暈佢地，明天繼續閉關，好在老公明天放假，可以揍住仲爺，唔洗好似上星期咁一邊溫一邊鬧仲爺！

2/11/18

2/11/18.   FRI.    COOL

今日真係有啲凍，朝早明明都準時起身架啦，但等得老公揍咗笨元返學回來接我地都搞到8：15先上到地鐵，只能返到樓下買飯團，點知連燒賣都冇，激死！最終係上去拍咗卡再落嚟買囉， 跟住都係做嘢啦，都唔明點解咁多嘢做，好在阿姐話ivy請咗假怕我一個做唔哂啲job cert，所以要stella佢地幫手，最終我都係比咗樣簡單啲的工作佢，入number同蓋印，咁我都要教佢做，都係教啲簡單嗰種！今日都係做呀做咁啦，食飯放工都差啲唔知，回家路上又塞車，返到去一陣奶奶就揍仲爺去小童，我就同子元喺屋企中hea 到夠鐘先去接仲仲，同程家晚飯，10點幾先返屋企，快手沖好涼睇明珠劇集呢！

1/11/18

1/11/18.    THU.    WARM

今朝老公又做柴可夫，實哂我地出去，不過返到公司都係唔夠時間過工商食早餐， 又要食7仔！今日真係忙到甩轆，ivy真係返唔到，所以我係要做埋佢嗰份，加埋自己嗰啲，真係夠哂攞命！午飯後一齊上咗去再睇嗰間消毒用品，佢地好似唔洗錢咁買咗好多，咁當然都係有幫人買的！下午我終於有時間去處理job cert，要做多一步原來都要用多好多時間！放工前叫做處理咗大部份架啦，我已經覺得自己好快手，放工回來有飯食，食完快手沖涼，對好功課打暈埋佢地又要摺衫了！今日好忙時突然收到話子元有得去廣州交流團，但佢又冇回鄉證，老公仲要請日假幫佢搞！

31/10/18

31/10/18.    WED.    COOL

今日朝唔知做咩呆呆地，亂鬼哂啲嘢，首先明明笨元係唔洗帶飯因為考試前放早嘛，我就蒸哂入哂盒先記得， 痴痴地！跟住就係揍咗仲爺入青衣後，竟然當咗自己喺美孚上車，冇去南昌站轉車，結果喺奧運站就要行大運咁，又趕唔切去工商食早餐，只可華御結！今日都多嘢做，因為ivy終於病假完返工，咁就要入埋啲job cert，但佢話明天可能都要請假，咁我就要幫手做住啲本來佢做嘅嘢先，忙忙碌碌咁時間好快過，午飯後上咗樓上買開倉嘢，所以話邊到都有開倉，只係買咗消毒用品！下午都係做嘢啦，放工去南昌站等老公嚟接我，因為我今晚想去AEON掃吓貨，回家都冇同仲爺睇吓書， 簽咗佢功課就算，因為要幫子元溫書，又搞到11點多先可以睇吓電視摺埋啲衫休息吓！

30/10/18

30/10/18.   THU.    WARM

今日老公返早，所以我同笨元一齊出門口，喺地鐵站就佢返自己返學，我揍仲仲入青衣同嫲嫲交收！今日仲早到8點半就返到宏天，過去工商食埋早餐返工！今日其實都係冇咩做，所以朝早偷偷摸摸咁過埋要曬啲相，午飯快扒後就行過mega Box買常識練習，反正都要用就買啦，再行番返去，其實都幾遠！下午scan埋啲作業print比Loletta，原來阿姐今日出去，下半晝自由了，得番2個admin人喺到看門口，不過都係做自己嘢等收工啫，返到去比埋啲練習Loletta吹咗陣水，跟住就返去煮飯，等佢地返得嚟都差不多9點先食得！跟住都冇咩時間睇功課溫習，好在之前進評我已經溫得八八九九啫！

29/10/18

29/10/18.   MON.    COOL

今日開始涼咗啲，所以要著多件衫！朝早早咗起身就可以趕佢地早啲出門口，連帶老公都早咗揍笨元返學， 我又早咗返工啦！過去工商食埋早餐就返工，今日算係閒，打咗大半日機，係間中做吓嘢啦，成日都冇咩做係有啲悶，間中悶吓OK的！午飯吹吓水咁，下午做吓自己嘢，過吓相咁， 等到放工又嚟狂跑追車，其實都幾搞笑！返到美孚老公接埋我入嫲嫲到食飯，又可以食到飽飽啦！回家後快手k.o.埋佢地又休息吓啦，笨元開始半進入青春期咁，都唔知點搞！

28/10/18

28/10/18.    SUN.    COOL

今日我主力留守大本營，朝早老公揍子元去踢波同數學比賽，我就同仲爺喺屋企做功課，叫佢寫字慘過咩，幾辛苦先做埋嗰一半，唉！我煮住早餐嚟叫佢做算，否則連早餐都冇得食，跟住繼續做啦，叫做喺老公回來前做哂，出去奧海城食咗飯，睇玩具都冇時間，老公都車唔切我地返屋企，咁唯有自己撘地鐵囉，返到去正式開始得溫書都已經四點，不過期間仲爺都係咁入嚟搞搞震，溫到差不多6點幾要放飯啦，去咗大家樂食，仲去麥記排埋雪糕先返屋企， 沖完涼k.o.埋佢兩個就睇電影，有套韓國電影幾正！

27/10/18

27/10/18.   SAT.    WARM

今日真係節目豐富，夠哂我攰！朝早子元學英文啦，8點幾不得不起身，我竟然發夢喊哂，個夢係老公激到我喊囉，可惡！揍完佢回來就要做功課了，不過仲爺都係無法喺去學音樂前做好功課，子元就叫做搞掂同溫吓書咁啦，真係分身乏術！差不多一點就要帶仲爺去學音樂，我就自己食嘢行吓街，接番佢又要準備下場去踢波， 一時間諗唔到可以直接撘地鐵去葵興咪唔洗咁趕，不過喺巴士佢可以食嘢瞓覺，咁之後就有力囉，係我辛苦啲，又要轉車又要行，不過睇佢地踢又真係幾好笑嘅，回家好辛苦咁撘到46X，等仲爺沖個涼再接埋子元放游水，就同程家晚飯吹水！回來後都係沖涼同k.o.佢地我就可以自由了！

26/10/18

26/10/18.    FRI.    WARM

又到happy friday啦，今朝都係如常咁返工返學啦，買埋早餐返公司，都係做吓嘢咁，以為今日可以好閒，點知朝早都未停過，攞命！午飯終於有房食飯，可以吹吓水等等！下午都係做嘢囉，阿姐出咗去我地完全放縱咁做自己嘢，我就搞緊k3的grad dinner， 諗諗吓比人尤其是下半班話事就好易出事，所以都係出吓手穩陣！一路吹到放工，要去球場接子元，本來諗住撘巴士，但落到樓塞哂車咁，最終行咗上地鐵站撘車，去到都係7點多， 係行過去一般遠啦，去到都係等啫，好在回各有人車我地去地鐵站，咁就可以食咗嘢先去接仲仲， 子元又係食麥記，我就去咗買米線，不過去到小童都未放，我就快手食埋先接仲仲，可以問吓ms fan仲爺唱成點囉，回家後都係快手沖涼瞓覺， 老公約咗人食飯，仲夜過放工返！

25/10/18

25/10/18.    THU.    WARM

今日只係返半日，因為下午要去覆診，但返一個朝早啫，都好似咁多事發生咁，不過大公司有大公司好，我呢啲小職員，錯極都唔會關我事囉！朝早因為老公返培訓9：30，所以可以揍哂我地返工返學，不過揍咗笨元同仲爺後，去宏天嗰程又係錯路，搞到我食早餐要食得好趕，54分先返到去呢！本來都係正正常常咁做嘢，諗住編埋水更的表再出埋通告就做吓自己嘢，等下午收得工啦！點知就整單‘大小姐’單位job cert不清問題，講到尾都係口講口賠出事囉，我最讚成black and white架啦，你冇email真係好難叫咁多個部門咁多人去跟清嗰件事喎，所以都係煩架啦，尤其煩到阿姐，真係未死過，話知你咩經理呀！結果我又要吹水放風等等，做好公事嚟都食飯啦！放埋飯就閃人去覆診，2：30到去到登記咗真係早啲有得睇，個醫生見你都係為咗嚟攞藥啫，就不如大家都快快手手，攞埋藥都唔洗3：15我已經上咗巴士， 想去接埋子元放學，又怕時間趕唔切，但最終剛剛好去到，本來諗住去食啲嘢但佢又話唔餓，咁咪直接返屋企囉，喺樓下見letty佢地仲玩緊就去join吓，我順手可以同Loletta 吹吓水，冇一齊揍校車少咗時間吹水添！返上樓笨元還要做功課，條友又成日話要抖，結果出去食完飯回來咪比我片囉，又話有畫未交又未有時間做練習，真係好想片爆佢！最終老公同佢做埋幅嘢我就迫佢做練習囉，仲爺又冇溫書，只係睇咗功課就算！

24/10/18

24/10/18.    WED.    WARM

今朝都係如常咁揍仔，老公又係做uber啦，買埋早餐返公司食就開工啦，非常充實的一日，又係吹吓水又做吓嘢咁，阿姐今朝心情唔靚，馬上掛起黑色暴雨，佢一閃大家可以鬆一鬆！午飯去咗emax食，因為佢地唔食今日個牛，咁間中出去食吓嘢都係可以！下午都真係忙，趕住出埋啲通告先掂！放工快閃，今日冇慢D跟住， 真係一去到巴士站就有車，接埋仲爺去婆婆到就開飯，都係7點幾啫，食完飯又要返去比佢兩個做吓嘢，其實都好似溫唔到咩書咁， 我係咪應該唔好咁集中淨係溫書呢！

23/10/18

23/10/18.   TUE.    WARM

今日仲爺返9：30，所以老公揍咗子元返學後就回來接我地，仲爺揍埋我返工，一齊去對面工商食埋早餐先閃，臨走係到扮哂唔捨得咁，頂佢唔順！今日工作都算忙，諗住可以慢慢做，午飯立食吹水打吓機等等，跟住就開工啦，點知下午有個煩人上咗嚟，水缸啲嘢其實好簡單，但遇著啲煩人，博炒唔想做就煩囉，開咩鬼嘢會啫，搞到我要出絕招叫Stella打入嚟找我救我出去！我真係有嘢要做架，檢查埋出齊notice未，又要入埋啲job cert呢！臨放工嗰條神又嚟搞事，問呢樣嗰樣，08分啦我完全唔想理佢，閂機攞袋準時閃，芳芳姐已經倒數緊！今日架巴士又遲咗，不過我同Tim 就試咗紅磡站上車同尖東站上車，都係撘到嗰班啫！回家可以慢慢煮飯，因為老公揍哂兩個去踢波，9點先回來食飯，飯後只係沖涼瞓覺，因為我都睇好功課，我都係時候休息！

22/10/18

22/10/18.   MON.    WARM**

又星期一又要返工返學啦，今朝都係老公做uber咁揍仔返學啦，我見返到公司都係8：35啫，不如去工商食早餐啦，點知等lift時勁多人，好在趕到58分拍卡啫！返到去真係未停過咁做，都唔知點解咁多嘢做！午飯咪吹水食飯囉，下午又係做，放工準時收工可惜巴士唔生性勁塞，7點幾先返得到去，好彩老公今日請咗假，返到去已經有飯食，跟住都係日常事，打暈哂佢地就自由可以睇電視啦！

21/10/18

21/10/18.    SUN.    WARM

星期都唔一定有得瞓晏啲，8點幾就比人嘈醒，hea到9點幾起身梳洗煮早餐，笨元話佢溫咗英默，咁老公今日又返中，都想出去行吓，於是直接出咗街先，諗唔到去邊嘛老公就話去荃灣，有商場又有遊樂場，休息吓再返去做嘢！2點前老公就車咗我地返嚟，去買埋餸就返去煮烏東食，然後迫隻大笨開始做嘢，仲爺就例牌搞搞震啦，做咗數學同中文同視藝，我都要煮飯，放佢休息吓，食埋飯又要睇全美一丁先瞓！仲爺又激我，叫佢郁全部都唔郁，真係令人好挫敗！

20/10/18

20/10/18.   SAT.    WARM

今日都是學習的一天，朝早幾唔願都要起身，笨元要去補英文，我地就去食早餐再攞埋佢個書包等等，再接佢去學畫班，跟住我地就返屋企，我想執好個廚房，之前完全冇理一排好多嘢都亂哂，所以到咁上吓仲爺去埋學音樂時，我就可以再執，子元回來做功課後，我就摺衫，係幾悶的一天，但日子就係咁過，做到咁上吓我同佢溫一陣書先再做，黃昏時份又要去游水啦，跟住我連膠袋都執好埋，等老公同仲仲踢完波回來接埋子元，又去同飯腳程家開飯啦，跟住老公去咗踢波，我就同佢兩個返去沖涼休息，再對吓啲中文練習，唯有都係咁溫！

19/10/18

19/10/18.   FRI.    WARM

今日是公司玩fun day，又話唔辛苦，我攰到想死呀！朝早笨元返到學校又唔打好卡，搞到我要打電話返去問，正麻煩友！喺美孚食埋早餐就撘車去九龍塘會合入西貢，去到先要分組，我的組員其實唔錯，分完組就設計組旗，然後就開始第1個遊戲，用水管運波，但我地輸咗囉，因為太衝動了！第2個遊戲用咗黃牌，其實都唔易玩， 係用4舊𥖁但要5個人踏住過，點知我地用咗黃牌就真係贏，不過用咗好多體力，跟住玩多一個用腦的遊戲，就係1-30要拍哂，我地只係輪咗0.04秒咗好唔扺！食完午飯竟然要玩中心定向，咁就跑咗個幾鐘，不人發揮不同功用，最終我地呢我地都WIN埋，有好多獎品呢！之後大老闆過埋嚟吹水做埋啲靜態嘢就可以閃了，還要去球場接子元，等到8點幾，再返美孚買晚餐接仲爺，9點幾先返到屋企，沖好沖涼再食麥當當，我真係攰到唔想郁啦！

18/10/18

18/10/18.    THU.    WARM

今日返一日明天又有活動不在公司，都唔知係咪玩嘢，今日好鬼忙，仲諗住今日可以做吓自己嘢呢！朝早唔洗咁早叫仲爺起身，因為佢去參觀下午才返學！咁我就等老公揍咗子元返學返嚟接更我就出門口返工，返到去基本上就未停過，真係好陰公，嗰隻神係咁過咯煩住哂！午飯又要立食啦，食完又要返埋位hea, 下午又係做囉，好在放工前應該清嘅都清哂，彈閘返去青衣接仲仲，子元就喺屋企等我，因為阿媽揍咗佢返屋企啦！今晚好簡單咁食罐頭湯通粉咋，阿媽食埋先走，之後我都係快手執嘢k.o.佢地可以休息了！

17/10/18

17/10/18.   WED.    RAIN

今日重陽節，都係一日假啦，朝早9點幾起身，梳洗好出去食早餐，今次好彩聽老公話出去食早餐， 因為佢落去攞車時啱啱開始抄牌呢！食完早餐去尖咀攞埋之前換咗個水牙線就返屋企，同仲爺做埋功課，又要同笨元對功課，再要溫埋書真係夠哂攰！因為約咗梓朗佢地出去玩，所以都要努力做好嘢，過去搵佢地再食啲嘢先出發，但因為落雨，本來想去大尾篤但最後都要轉場，找個有室內地方的BBQ場， 最終去咗大覧嗰邊，每家都係4百幾玩咗5個鐘呢！大人邊燒邊吹水，中童就梗係打機啦，細嘅去咗放電，玩到十點幾先返屋企，快手沖涼瞓覺！

16/10/18

16/10/18.   TUE.    WARM

返埋今日又放假，但今日香港交通又玩嘢，一朝早新聞話地鐵三條線都有限度服務，好在西鐵冇事，不過路面交通都出事，好在今日老公係放假，揍完子元回程已開始塞，所以我上西鐵都遲咗，不過都撘到8：40嗰班shuttle，返到公司都係hea吓又做吓嘢咁啦，午飯因為飯房比人用咗，我地就喺櫃上立食囉，吹住水咁幾開心呀！下午都係做吓嘢啦，又執吓相咁啦，過番落hard disk再睇吓曬邊啲！放工快手撘巴士返屋企，因為怕地面交通再受影響！返到去等緊打邊爐，本來老公話要去踢波，但因為落雨唔踢啦，所以都係如常咁喺屋企的程序！

15/10/18

15/10/18.   MON.    WARM

又要返工啦，不過星期三有假放，星期五又要去fun day，好在都唔算好忙啫！朝早仲爺玩哂嘢哎，又唔起身又唔梳洗換衫，又激到我爆發咗，最後仲遲咗出門口，激死！又冇DOO八達通又趕唔切早晨優惠，可惡！返到樓下買早餐囉，今日都係做吓嘢又hea吓咁，時間都算過得幾快，放工本來約咗同事一齊試撘完巴士轉西鐵時，紅磡定尖東站快啲上到車，但佢彈唔切閘，慢一班lift過唔到馬路就追唔切車囉！今日架車勁快完全冇塞，唔洗6：30我已經到尖東，返到屋企都未夠7點，食得飯嚟睇功課溫書又係唔多夠時間，好似搞到好夜咁！

14/10/18

14/10/18.   SUN.    COOL

今日都係幾唔開心的結婚週年，兩個人架嘛但基本上一朝早開始都見佢唔到咁，一朝佢就帶咗子元去踢波，我就同仲爺單對單，等佢起咗身煮早餐食埋都10點幾，開始做埋啲功課先，但都做到佢地返嚟都未做完，之後我就開始進入自我毀滅狀態，陸生第一時間入咗房瞓，子元又未做起功課，我都唔知可以點，等極佢都未得咁，我就越來越失落，好似街又唔會有得出，又冇得食晏，今晚佢又去踢波，佢今日專登請假好似係為咗去踢波水，根本唔係為咗咩日子咁，所以我開始情緒不停咁down落去，到一個點佢地兩個細覺得有問題去叫醒個daddy去處理，但佢都係怪我，其實我都係唔鐘意咁，屋企啲嘢有得唔理嘅咩，書有得唔溫嘅咩，呢啲喺咩道理呀！咁最終都冇再溫出咗去，一來真係要食嘢，二來咁嘅心情下再唔離開只會惡化落去！所以先去咗食嘢再出咗街，去到mega box再找地方食咗嘢先再行吓ikea，我已經好攰，好辛苦捱到回家可以休息了！

13/10/18

13/10/18.     SAT.    WARM

今日上半日要去處理埋阿婆的事的下半場，8點幾起身梳洗，過長沙灣食埋早餐同阿媽會合就過大酒店，今朝仲爺都算合作， 由於重陽關係自己渣車過唔到去，所以最後決定我代表上山就算，老公同兩個細閃先，一來一回喺牛頭角散，我都趕得切過長天聽talk，都覺得呢間學校幾啱笨元，不過可以睇多幾間再睇埋成績配合先有得傾！聽完參觀完老公嚟接我地返屋企， 佢就揍仲爺去踢波，笨元去游水，我就返屋企休息吓先，煮啲嘢食摺埋啲衫，夠鐘就去接子元，約咗飯腳程家晚飯，遠少少今晚去葵興食，竟然撞到王曈，芷悠妹佢地喺隔離枱，真係世界真細小！飯後回家要笨元瞓覺真係好煩，成日掛住睇電視，你話點算！

12/10/18

12/10/18.     FRI.    COOL*+

今日係請咗日假，因為晚上要去阿婆的白事，不過一樣係要揍仔返學，所以都係一早起身，只係今日可以揍仲爺返學，真係好耐冇揍過佢返學，覺得有啲怪怪地咁，同老師傾咗一陣，就返出長沙灣食早餐買嘢等等好忙咁，返到屋企好多嘢做，因為仲爺琴晚尿床，又要幫佢洗過哂啲嘢，然後又要出去接番仲爺放學，去食完飯就返屋企做功課，不過唔陪住佢做， 第一份都仲可以，第二份已經好慢，但我又要摺衫喎，所以根本配合唔到，3點幾又要叫醒老公準備出去接子元放足球，然後直接去大酒店，去到兩個細唔洗換白衫，咁都方便啲！跟住都係換衫上孝再做吓儀式又坐吓門口位咁啦，時間都算快過，佢兩個都算合作，因為有機睇嘛！9點幾搞掂一齊出去食埋嘢就回家，還要車阿媽同阿妹返屋企先，兩位少爺已經暈哂，搞掂哂佢地我先沖涼瞓覺，已經好攰了！

11/10/18

11/10/18     THU.    COOL

今日真係涼咗好多，朝早都要著長袖呢！早咗出門口可以試對面工廈的早餐，$24真係好抵食，堂食埋先返公司，今日唔算忙架啦，反而時間過得慢，終於到放飯，但今日要同阿姐一起食金飯去飲茶呢！下午都係邊做邊吹水邊計住幾時收工啦！返到屋企就有飯食，不過之後辛苦啲啦，仲爺功課又未做好，子元書又溫唔好要我跟，激死！

10/10/18

10/10/18.   WED.    WARM

終於捱到星期三啦，其實今個星期已經閒番好多，返到去都係食埋個早餐就開工，不過都係吹吓水又做吓嘢咁，主要做埋啲photo report，滅蟲組有個甚麼產品介紹會，我梗係唔去啦， 一來真係有嘢做， 二來下午又要出去黃金嗰邊開會！午飯同pest team食完就直接入黃金，都3點到先開到個會，不過其實唔係開咗好耐，所以今日係賺咗可以做早放工！返到去美孚老公去地鐵站接我，然後返去齊齊做功課，5點幾子元又要去補英文，跟住又要去踢波，節目太豐富呢！我同仲爺一齊食完飯睇佢踢咗陣波就閃了，返去沖涼玩陣瞓覺！

9/10/18

9/10/18.    TUE.    COOL

返工都係做嘢啦，今日都係老公揍我地返工返學，不過我淨係去到地鐵站啫！買埋早餐返公司食啦，然後都係做吓嘢又吹吓水咁囉，午飯食白汁意粉，其實幾好食呀，點解咁多人都唔食呢，咁唔好SAI啦我帶返去比笨元明天帶飯！下午都係做嘢囉，時間都算過得快，放工今日撘shuttle去九龍灣，因為要去摩士同老公佢地會合，但我都冇即去球場，去到咪又係等不如行吓街先，不過都忍到手冇買嘢，幾叻！踢完波8點幾先閃得，去食埋嘢返屋企，老公同我地上咗樓捉咗仲爺去沖涼又要返工啦，我今日就勁眼瞓，要早啲瞓！

8/10/18

8/10/18.    MON.     WARM

今日又要返工啦， 朝早比老公玩死，佢又遲咗返到， 子元又心急要返學，所以等到7：20就出門口，真係佢出咗去都冇1分鐘老公先打嚟，我已經叫唔切子元去迴旋處等啦，好在老公喺地鐵站前接得切佢呢，揍完子元返學先回來接我地，車我去地鐵再揍仲爺返學！今日唔算太忙，所以時間就冇過得咁快啦，放工回家就等老公煮埋飯有得食，洗碗抺地後還要同仲爺溫習，其實只要比心機教仲爺係OK架，而家子元靠星期日溫書都可以，閒日佢都忙，做好功課都可以了，今晚又要趕視藝啲功課，老公又返夜，所以食完飯就教佢做，搞到10點佢就返工，子元又畫到11點幾呢！

7/10/18

7/10/18.   SUN.    WARM

今朝瞓醒時已經差不多10點，快手煮早餐食，跟住就係睇功課溫書，你叫啲男人同細路溫書，難度旨數同叫太陽由西邊升起一樣！結果我都係兩邊走啦，好在笨元都大部份自己處理到，但今年我真係唔敢放手，呈分是很恐佈的東西呢！仲爺嘛只有佢迫瘋我，佢係唔會被迫得到的！搞到差不多兩點終於可以閃，入咗元朗玩，本來諗住去埋濕地公園，但因為5點就收真係唔多夠時間，於是只去了放船仔，不過老公找錯咗公園，應該係天水圍嗰個先有放船仔池，結果喺元朗公園就放咗車仔先囉，再入去放船玩公園，去食埋晚餐就回家了，老公又要踢波又要返夜，明早才見到啦！

6/10/18

6/10/18.   SAT.    HOT

星期六又係學習的日子，朝早起身見子元喺到睇機即刻片佢囉，寫咁大隻字喺板都冇用啦，都係唔去做補習的功課，快手趕佢入去做再梳洗出門口，落到樓接到月希佢地一家，都係出去食早餐，於是送咗子元去補習我就同仲爺去麥當勞找佢地食早餐吹吓水咁，夠鐘揍番笨元就回去做功課，真係做足兩個鐘先做完，我好攰囉！又要趕住出去學音樂，子元就自己等daddy返來買嘢佢食！我就約咗joyce去食午飯，又係吹水講人壞話，接埋仲爺就返屋企，仲爺去踢波，子元去游水，我就摺衫， 等子元游完水老公嚟接埋我地去葵興同梓朗佢地食雞煲，好正呢！回家快手沖涼休息了！

5/10/18

5/10/18.   FRI.    WARM

到星期五啦，今朝如常笨元自己返學，我揍仲仲入青衣然後返工，本來以為今日可以閒啲，點知都係咁忙，都好嘅時間過得好快！午飯又話去樓下買燒味飯，因為職工有半價，20蚊一個雙拼喎，扺到爛！下午都係趕吓工啦，冇人打電話嚟嘈住哂就好快！放工去樂富等老公嚟pick up我，去到球場仲爺繼續搞搞震，我地就打住機等笨元跟完波就去食KFC才回家！

4/10/18

4/10/18.   THU.  WARM

今日都係忙足一日，時間過得好快！朝早子元都係自己出門口返學，我個BB真係大個仔啦！搞掂埋仲爺我都要出門口，順利揍咗去比嫲嫲我就返工，今日試咗7-11個早餐，不過不失啦！做足一朝冇停手，好快又食午飯，去咗E-max食，但真係只夠時間食，想行吓行都唔夠時間！下午又係趕好手上的工作，放工前完成到唔錯啦，準時彈閘返屋企，老公仲未揍仲仲返嚟，所以返嚟煮得飯都8點先開飯，不過可以食飯前k.o埋仲爺的功課！睇哂延禧先洗碗抺地，仲爺攰到一蓋被就瞓咗，好好笑！

3/10/18

3/10/18.   WED.    HOT

今朝笨元試吓自己返學，其實佢應該可以，大個仔啦，我都要啲時間接受佢長大！我就搞掂埋仲爺揍佢去青衣站交收然後返工，今日真係未停過手，除咗入機外唔知點解仲有咁多人打嚟話有問題，講真我係officer嚟架咋，呢啲咁深嘅問題我係唔會解決到架，可惜我個經理係廢，唯有再向高一級求救囉！午飯比人霸咗間房，搞到要喺位食，激死！下午時間過得勁快，轉個眼又收工，快閃返到屋企都係7點，老公已經差不多煮好飯，飯後洗碗抺地睇埋電視再搞掂埋啲功課！

2/10/18

2/10/18.    TUE.    WARM

又要返工啦，今朝新嘗試要同埋子元早啲出門口，因為唔再撘校車了，原來笨元真係行得好快，我拖住仲爺真係追得好辛苦，不過明天都要早啲，因為笨元53分先返到學校，相對嚟講真係算遲！揍咗仲爺去同嫲嫲交收就可以返工啦，今日都忙忙碌碌架，不過係忙得幾開心嘅，舒舒服服咁做好應做嘅嘢又收工啦！老公過嚟接咗我返屋企先，佢再去番球場睇笨元踢波，我就要抬番隻喺車已經瞓咗的仲爺返屋企煮飯，個豬仔真係係咁煩，咁我咪邊睇番琴日嗰集延禧邊煮囉，不過仲爺冇咩胃口食得好少咁！等老公佢地返嚟食埋飯又要洗碗抺地，睇埋功課堅攰！

1/10/18

1/10/18.    MON.    HOT

最後一日假期啦，朝早做好嘢先可以出去玩，9點幾起身煮早餐，叫佢地食完就開始睇吓功課等等，又要溫書呢，唔問都唔記得過兩日要默書，快手叫佢溫埋，點幾出得去啦，先去食午餐先，都係過長沙灣食，老公又話要去買隻船仔去放，所以去咗深水涉買完先入大埔，泊好車就去海濱公園，由於電池叉唔夠，只係玩咗一陣就收皮，咁就去咗海邊，笨元呢啲pre teenage年紀真係好煩，成日黑口黑面咁！又冇話冇得租單車，咁都要等埋daddy嚟先得架，等吓都唔得！終於租到單車可以出發，踩咗去唔係好遠啫，不過老公要踩家庭車辛苦啲囉，子元踩住架兩轆轉個眼已經唔見咗，喺盡頭玩到咁上吓就回程，老公叫我踩我堅係控制唔到！返到去心血來潮入咗去大尾篤行咗個圈，再玩埋BBQ，不過仲爺又係唔聽人講啦， 老公叫住佢唔到掂個炭爐佢就係要掂落去，咁成餐飯就喺到喊住咁，隻手浸住冰都喺到都衰聲衰氣咁真係給好煩，返到去沖涼都係咁，真係聽到人心都煩埋！終於K.O.咗佢我當自己可以休息架啦！

30/9/18

30/9/18.    MON.    WARM

今朝8點幾醒了，見老公瞓咗喺梳化就叫佢入番房瞓，跟住瞓到10點多先起身，兩個淨係掛住玩，咩都冇做，到我煮早餐都冇人幫手，真係火都嚟埋，近來我堅係燥咗好多，都唔知點解！終於完成個早餐，跟住又唔知要搞咩，想print嘢又print唔到咁，笨元又教極都唔明視藝點搞等等，所以點幾先出門口，老公話去沙田，食完嘢想去行一田，但原來都未裝修好，所以一路行咗過去睇ikea啦，度吓位點整仲爺出年間房咁啦！晚飯去咗試程生上次提過嗰間大排檔都唔錯，回家後k.o.咗仲爺叫做可以休息吓！

29/9/18

29/9/18.   SAT.    WARM

三日假期的第一日，和平時的星期六一樣，都係一朝早起身笨元去學嘢，我地食早餐，然後去接番笨元返屋企齊齊做功課，老公就補眠，做到12點幾仲爺都完成啦，我諗住摺衫摺到咁上吓時間先叫老公起身車我地過去南區，仲爺學音樂，點知佢話子元要去踢波，咁我又要自己揍仲爺撘地鐵，其實真係幾攰，因為要全神睇住佢嘛！過到去時間剛好，揍咗仲爺入去我就先上aeon買咗香薰油先，然後就去大家樂食lunch，最後去咗watson行吓等夠鐘，買埋麥當當就去接仲爺啦！說服佢撘171回家，反正今日唔洗趕，喺車到偷偷咁食埋佢個麥記就瞓咗，仲要我抱佢返屋企，攰死我呢！返到去比佢玩到夠鐘就去游水，晚飯去咗葵芳食韓燒，我仲去葵廣買咗套衫，$80咋抵到不得了！回家後都係沖涼瞓覺！老公今晚都係返夜，明早又可以街街了！

28/9/18

28/9/18.   FRI.    WARM

Happy friday啦，真係好開心，放3日假嘛，老公又返夜又放紅日咁，基本上可以陪我地放假！朝早揍完子元撘校車，最後一日撘啦，因為下個月就唔撘啦，原來又會有啲唔捨得架！老公7點半未夠已經返咗嚟，喺迴旋處等我地，快手搞掂仲爺出門口，不過時間尚早可以一齊食個早餐先去撘車，如常返到公司，朝早又係搞黃金的job cert，基本上玩到下午呢，跟住又要出去試吓配key，但都係白行一趟，不過有得出街行吓幾好！今日收到正式的staff card啦，感覺很實在，這樣的office，這樣的衣著，心口掛著大公司staff card，覺得自己走得好啱！阿姐5點多閃了，我地又開始作反，吹水食嘢周圍行咁幾開心！放工時收到kiki msg，跟住就講電話啦，講吓佢地嗰邊而家幾慘，佢地真係越來越變態，偏幫之餘係唔講道理嗰隻，又開始想迫人走，唉！吹到差不多8點先返上樓，老公揍咗佢兩個去球場，咁我可以慢慢煮飯啦，9點多先返到嚟食，我已經食先啦，9點幾老公又要返工啦，我就要k.o.哂佢兩個之餘仲要洗碗抺地等等！好攰好勞氣呢！

27/9/18

27/9/18.   THU.    HOT

終於到星期四，捱多日又放假啦，老公放假可以揍仲仲返學，我又唔洗一早出門口，車埋我去地鐵站老公先揍仲爺返學，返到公司食埋早餐就開工， 朝早搞咗一朝都係做黃金啲job cert，真係煩死人！午飯後都係打吓機啦，下午又開吓工休息吓咁，時間其實真係好快過！放工返美孚，本來老公話佢煮，但嫲嫲又話出嚟食粥，咁咪又出去食囉，反正老公今晚返夜，明天可以送飯比子元就算！返屋企沖好涼睇電視，好在仲爺明天生日會唔洗做功課，咁又可以休息吓！

26/9/18

26/9/18.   WED.    HOT

今日忙足一日，時間幾快過呀！朝早搞掂哂啲細返學就返工啦，忙忙亂亂咁又一朝，午飯後都係打吓機，下午必需要出哂啲notice先得，所以都要快手啲！放工即走都撘唔切嗰架巴士，搞到7點多先返到去，老公話出去食米線，食完仲爺就跟住我，老公揍咗子元去踢波，我仲要上阿嫲到出埋糧比工人！最搞笑係荔天大谷嗰邊有條家教會的人喺到問啲家長電話，但最終比我地串番轉頭，做咗咁多年同級都唔知邊個打邊個家長，唔抵串咩！老公車我同仲爺返屋企先，咁我就可以睇埋延禧啦！仲爺喺梳化瞓咗，所以好快搞掂佢，到笨元都係要對吓功課，真係溫唔到書咁！

25/9/18

25/9/18.   TUE.    HOT

今日中秋翌日，放假一天，不過老公都係要返早，所以一早出咗門口，我瞓到8點幾9點先起身，因為11點幾要去阿媽到食飯，所以都冇煮早餐，唔係去到又唔肯食飯！梳洗完就局佢地快啲做功課先，仲爺雖然唔多功課但都難做，所以11點要出門口都係未做完，咁就食完飯回來再做，然後自由時間，我就邊睇廷禧邊摺衫，等老公放工嚟接我地，出咗旺角買波鞋比子元又掃吓街買嘢食咁，晚飯去咗森記同嫲嫲佢地做節，食完就回家休息，大家都好攰啦玩咗幾日！

24/9/18

24/9/18.   MON.    HOT. RAIN

今日返工雖然只係放早兩個鐘，但都真係好似咩都做唔到咁，因為又要切生果又走嚟走去，所以都係留番星期三先做啦！午飯追咗半集延禧咋，明天放假希望有時間追到！下午時間真係過得勁快，轉個頭又話4點，老公嚟接我，佢肚餓要先去食啲嘢先再接仲仲，點知出車到彩虹就收到阿媽電話，醫院打嚟話阿婆情況轉差，應該差不多走，要去見最後一面，咁我就叫阿媽照出門口先，唔洗理笨元，我地去接佢就可以！接咗笨元返美孚放低嘢換件衫再執埋今晚去公園啲嘢就入沙田，其實入到去阿婆都已經走咗，但醫院都會比你啲家人見哂先，跟住就等pack埋落去就可以走，其實都係一個解脫嚟嘅，都呢個年紀呢個身子，對大家都係好事！完成了就返長沙灣，阿媽本來仲話返去煮，但都7點多啦，出去食算啦，找個餐廳叫老公去會合，食完就去美孚同子元的同學會合，佢地就玩足兩個鐘，大人就傾足兩個鐘，攰到一個點，回來仲要沖涼收拾先可以瞓！

23/9/18

23/9/18.   SUN.    HOT

今日係期待己久的海洋公園之旅，仲爺一早就走嚟床邊問我， 今日係咪去海洋公園，都要快手起身搞掂出門口，先去食個早餐，跟住就直接過海，9點半未夠已經到，去埋個廁所就去集合等啲組員到，我好好彩算係最早派哂飛嗰個，可以入去同老公佢地會合，不過已經又熱又攰！先去睇魚魚過吓冷河先，子元開始係咁影相的年紀，喺海洋館係咁影，跟住去亞洲動物天地又影，我地旨在有冷氣，因為之後去威威天地就得個熱字，玩咗個優先限定的bb版鬼屋，睇吓Hello Kitty咁囉，然後就喺附近玩，撞到相熟同事一齊玩咗陣再去坐覧車，再去食埋午餐先散， 跟住就去玩吓攤位遊戲，估唔到中咗兩個公仔，啱哂佢兩個啦，又要過吓冷河就梗係去睇企鵝啦，仲爺睇得好開心，但到咗佢冇得玩激流時又喊，我今次預備好點都唔會濕咁多呢！之後子元又話要玩鬼屋，明知係入去比人嚇但其實我都好驚，結果好辛苦咁完成咗，仲爺本來冇咩，但玩完出去佢又喊，完全唔知佢想點！最後撘番車落山就再去玩威威天地掟公仔，比我掟中咗個hello kitty，可以送比姑姐呢！跟住去咗睇場show，好好睇係講鬼同天使一齊呢，睇完影埋相就去食cake啦！ 最後玩到8點先走，攰爆！返長沙灣食餐好，但仲爺瞓咗冇食，返到去先食少少嘢！

22/9/18

22/9/18.   SAT.    HOT

今朝老公8點幾都未返到，打電話又唔聽，真係嚇死我，好在最後都打到比我話放工，咁我就要自己揍佢兩個出去補英文，再等老公嚟接我地去食早餐，接番子元就去超市，做埋仲爺的功課，要去超市買嘢影相，搞掂完就返去同笨元溫書，再做仲爺功課，老公教仲爺做功課咪一樣咁火！跟住就揍仲仲去學音樂，子元就去區隊踢波！帶仲爺去學音樂真係好夠攰，返到嚟仲要迫佢做埋啲功課先去游水，跟住約咗敏瑩子慧佢地晚飯，吹完水飯後去攞埋仲爺件華服就返屋企沖涼執嘢瞓覺！

21/9/18

21/9/18.    FRI.    HOT

今日老公返全日，係今朝7點返到明早7點，頂兩更多差不多2000蚊喎，加油呀！搞掂兩隻豬返學我就返工啦，今日遲咗出門口返而撘到平時班車，可能因為嫲嫲早咗到掛！食埋早餐又開工，今日又要切生果，真係切到驚！午飯後跟Ivy佢地去行街，仲食埋雪糕！回來後又開工囉，今日應做的都做哂啦！放工彈閘好順𣈱咁返到美孚，但到佢地出嚟會合出得好慢啦，本來想去食上海嘢，但根本等唔到位，咁就去咗食元氣囉，然後行返屋企，沖完涼捉佢兩個做埋少少功課先瞓，我就自由時間！

20/9/18

20/9/18.    THU.    HOT

今日開始大長征，朝早要捉埋仲爺起身落樓，因為老公返咗工，返上樓快手搞掂埋就出門口，不過嫲嫲唔知醒，所以8：05先接到仲仲，我就要趕車，好在都上到8：40班車，順利返到公司！食埋早餐就開始做嘢啦，今日都係有嘢就做，唔洗急最緊要快！午飯睇埋套延禧，仲有薑醋送飯，幾好！下午又要切生果，好忙碌呀！再做吓嘢咁又放工啦，快手返到嚟就趕佢地入房做功課，仲爺唔願做架，但喺我嚴刑之下又點會有得偷懶，計埋食飯洗碗等等10點都完成哂可以瞓，跟住又要跟笨元啦，11點多才有得沖涼，我都話我勤力過7-11架啦！

19/9/18

19/9/18.    WED.    HOT

今日老公放假，所以仲爺返學部份外判咗比佢啦，我夠鐘就返工啦！返去食埋早餐就開工，不算太忙但亦冇咩閒過，午飯佢地話叫外賣咁就叫啦，間中試吓都可以嘅！食完吹吓水咁又開工啦，下午的下半段好多人都出哂去開會，所以我地得番兩個人留守，各自做嘢夠鐘就彈閘啦，等穿巴上得地鐵都過咗半個鐘，其實真係好誇！過到長沙灣老公佢地都係啱啱到，去茶記食晚飯，仲爺又食到好似迫佢咁，子元就食極都唔飽！夠鐘佢就落去踢波，我地就過咗AEON shopping，然後返去接番佢，返到屋企快手沖涼，仲爺明天參觀不用交功課，但都要佢襯我沖涼時寫英文生字，條友仔係進步咗，寫到臨尾嗰行可以唔睇咁巴閉！終於K.O.哂佢地都仲要摺衫先有得瞓呢！

18/9/18

18/9/18.    TUE.    WARM

今日做半日FTM，因為停課所以朝早要揍住啲仔，中午等阿媽過嚟先可以返工！琴晚半夜笨元嘔，老公執咗好耐都冇入嚟瞓，今朝又一早出咗門口返工， 我8點幾起身就已經心情唔好，因為佢地啲壞習慣又出哂嚟，散到一地玩具，笨元又只係睇電視！於是叫佢地執番正啲嘢我就煮早餐囉，完成哂都10點幾，因為要三催四請先郁！跟住就要睇子元的功課，係我比嗰啲功課，真係要做個表嚟管住先得，再對番未做嗰啲！12點幾婆婆過到嚟我就返工啦，返到去忙足咁多個鐘，admin得番一半人，梗係忙啦！放工買餸回家煮好飯等佢地踢完波返嚟食，不過真係太夜，要再度吓應該點做！搞掂哂佢地沖涼瞓覺！

17/9/18

17/9/18.   MON.    WIND

今日真係夠哂精彩，琴晚老公要揍哂佢地入去先係啱，所以今朝我咩都唔洗理，自己搞掂出門口，但原來要喺呢種環境下返工，遇正常時間係唔夠，用咗個幾鐘先返得到公司，好在今日係唔計遲到，咁就冇事啦！返到去先食早餐，真係做嘢都10點啦，做到午飯後就食飯睇劇等開工！得到消息又可以早走，梗係叫老公早啲嚟接啦，早到接完我都未夠鐘食飯，所以去咗九龍城廣場行吓，跟住先去食打冷！幾經辛苦送咗嫲嫲返青衣再返屋企，又收到炮哥whatsapps去幫社區執垃圾！我就打發仲爺休息呢！

16/9/18

16/9/18.    SUN.    10號風球

又係星期日先嚟打風，今次個風真係好大，差不多8點起身仲未見老公回來，馬上打比佢，因為下一更的同事仲未返到，佢地要8點先走得，咁我照樣起身梳洗，因為兩個嘢已經起咗身，不過瞓得唔好所以冇咩精神，老公回來後本來佢想瞓，但我真係需要佢煮埋早餐先，我教仲爺做埋功課，咁食完早餐做好埋嘢我又要睇子元功課，之後仲要摺衫等等，其實幾時都咁多嘢做！冇再同佢地溫習，3點幾煮埋午餐，都係食餃子麵咋，跟住都係hea住過，子元就係咁打機，但都比我趕咗入房溫吓英默！晚飯老公煮，由於風球走得好快，明天應該已3號返工， 但小朋友就講咗唔洗返學，所以最終決定咗送哂佢地入嫲嫲到，本來我係唔想，怕佢兩個嘈住嫲嫲休息，但冇法我明早真係唔可以喺咁惡劣的交通情況入到去！出到街先知個情況有幾誇張，馬路好多位都有樹，要行北橋先入到去，揍咗佢地入去我地就回家休息了！

15/9/18

15/9/18.    SAT.    HOT

今日節目豐富，朝早又要7點幾起身，因為子元要返學校做服務生，仲爺就10點先過去小一生活體驗，於是子元快食咗個包做早餐就要開工，我地就慢慢去嘆個早餐，再買啲嘢先就去學校登記，去一間好熟的學校開放日感覺好怪架，不過我又想再聽吓有咩新嘢，公平啲亦應該比仲爺去吓體驗日！聽到12點幾接番哂佢兩兄弟就要趕下場，仲爺要去學音樂，子元就同daddy食埋午飯先返屋企！今日堅係攰喎，學完音樂回來，我除咗煮飯同揍佢地去游水外咩都冇做過，真係唔願做，仲要喺梳化瞓埋！揍仲仲去游水時順手去買吓食物，下星期子元要帶飯，都要預備定！揍咗佢地返去煮埋飯食就洗碗睇電視，老公今日踩兩更，要明早才回來，今晚又得我自己一個瞓啦！不過明天老公全日都在家，可以陪住都係好！

14/9/18

14/9/18.    FRI.    HOT

又到happy friday啦，近來返工覺得開心咗，唔知係咪唔洗迫車呢，西鐵轉穿巴真係好快好方便，返到去食完早餐就開工，而家都係做公事多，唔能夠太揚咁私務，10點幾11點開始切生果，中秋果籃都係要admin做，切咗8個梨4個火龍果，手都軟埋！午飯後撩佢地行街，因為唔想同阿姐同一個空間！下午都真係開始忙吓相咁，大家又講吓風球咁，話咁快又放工， 去樂富等老公嚟接我，然後去球場等子元踢完波就食飯返屋企！

13/9/18

13/9/18.    THU.    WARM

以為今朝會keep住3號風，點知又變番1號波，仲要勁快落埋，要等仲爺食埋早餐先同佢落迴旋處，我都有啲趕，車埋我去都仲要跑啦！買埋切早餐又要食華御結！轉咗新office其實我覺得幾好，好似冇咁悶囉！午飯後又去咗e-max行，食咗麥記雪糕！下午都係做吓又hea吓啦，阿姐走咗又可以free，放工老公嚟接我，去咗德福食飯睇玩具，仲仲玩POPO又冇得疴又整濕褲，又要等老公去攞嚟換，等我買埋平嘢就返屋企啦！

12/9/18

19/9/18.   WED.    WARM

今朝都要快快手趕佢地起身返工返學啦，我都等唔切仲爺食埋早餐一齊出門口！今日仲早咗返到去，食埋早餐就要開工啦，但都冇咩可以做，因為都唔齊相冇得做，激死！跟住點都要找啲嘢做吓，唔係時間好難過呢！午飯一齊入房食，好在唔洗食孤獨飯，吹吓水講吓壞話咁又要開工，其實我覺得過咗嚟呢邊好似多咗人同我講嘢咁，唔知係咪耐咗覺得我都講得吓嘢呢！放工又要快閃了，都要1個鐘先返得到嚟，食飯洗碗睇住電視咁抺埋地，同仲爺溫心又爆佢，實在係激心，一埋枱就眼瞓，真係好想打佢一身！差不多11點先有得去沖涼，唉！

11/9/18

11/9/18.   TUE.    WARM

今日都係如常咁返工返學啦，預到撘shuttle的時間其實好鬆動，不過我竟然唔記得買早餐，所以唯有到樓下才買華御結囉！今日都係忙忙碌碌咁好充實，時間過得好快，午飯佢地入咗房食又唔叫我，不過算啦入到去都係食完各自修行，本來我都諗住喺到hea就算，但食完得番阿姐喺到喎，我仲唔借啲二閃呀，於是出咗去行吓，過e-max嗰邊原來好多嘢睇好多嘢食，真係有排發掘！下午又係勁忙囉，轉個眼已經放工， 今日只係返美孚，所以冇咁趕，早一個站落巴士感覺上真係行少啲喎，返到去快手同仲爺睇一睇功課執好嘢就出去接笨元放踢波， 喺樂富KFC完就回家沖涼瞓覺！

10/9/18

10/9/18.   MON.    HOT

今日開始返新office，有個住附近的同事約咗我去美孚站一齊撘西鐵，條友出名遲到其實我都有啲擔心，最終等到佢8：07先衝落去月台，好在趕到08分架車，不過去到紅磡又要找找個shuttle喺邊都用左啲時間，好在都快手搵到，上到車38分就已經返到去，今日好多人都好早，大家都要試清狀況呢！打好水沖好咖啡， 一朝早都喺到忙忙亂亂咁！今日午飯叫到會齊齊食，邊可以吹吓水咁比你地開心埋今日啦， 明天開始要食孤獨飯啦！食完收拾好又去吹吓水先開工，下午時間都過得好快！放工同Ivy一齊彈閘，撘巴士轉西鐵再轉東涌線再轉巴士，返到上巴士站接仲爺都7點半，可能有機會再夾要嫲嫲揍仲爺去機鐵站，咁我返到屋企唔洗咁趕啦！今晚返到嚟仲要煮晚餐，8點半先開到飯，食完沖埋涼諗住順利同仲仲溫完書佢10點可以瞓，就係一溫書就攰，又激到我發顛，唔好話我點解要發顛，只要你諗到佢咁樣點上小學時你就冇得放棄， 子元係幫我執手尾囉，我同佢溫埋書都11點多佢先有得瞓！

9/9/18

9/9/18.    SUN.    WARM*

今朝老公揍仲仲去足球班試腳，咁我就同子元喺屋企， 梳洗後煮麵食，然後就邊簽通告睇功課同睇廷禧攻略！差不多要追3集幾，所以都睇到11點幾老公佢地返嚟先完！同仲爺做埋啲功課，子元就做咗細佬份咩鬼標語設計交咗佢，反正都唔會勝出架啦！搞掂哂啲嘢就出去食午飯，近近地都係去長沙灣食，然後去咗玩遊樂場，但南昌街嗰個都係麻麻地好玩，於是去咗奧海城，可以睇玩具可以睇書可以玩遊樂場等等！晚上約咗程家晚飯，熱烈歡迎程生返香港嘛！回家後快手沖涼休息啦，子元係都要睇埋明珠套戲先肯瞓！

8/9/18

8/9/18.    SAT.    HOT

好耐未試過星期六要返工咁，仲要返全日返咁耐，真係命都冇！7點幾起身叫埋佢地搞掂出門口，老公今日全職揍仔啦！返到去買咗燒賣牛肉早餐快食，跟住就返上去報到，其實到咗都唔算有咩要做，等搬運公司嚟到睇住啲工人做嘢啦，之後都有幫吓手，包吓電腦同倚等等加快進度，做到1點工人們去食飯咁我地都食飯啦，同埋好似話啲嘢未到齊宏天嗰邊都唔比開箱住， 真係估佢唔到想點！最後我地食完飯返上去等全部嘢齊哂就過宏天可以開箱啦！uppack比想像中攰，其實我冇嘢要uppack架，除咗自己嘢外， 但都要serve 埋admin嗰邊架嘛，所以都好多嘢做， 因為唔清哂嘢阿姐係唔會放人走，所以要更快咁幫佢地手，係咁問呢箱放邊，快啲幫佢上咗佢，再襯佢地冇咩要我地做時就uppack埋自己嘢，完成自己後再清埋大圍嘢，7點幾時終於局阿姐要放人，因為已經冇嘢再關我地事要uppack! 等老公嚟接埋我就去食晚飯，最終去咗深水涉食咗間越南嘢，快手回家沖涼休息！

7/9/18

7/9/18.    FRI.    HOT

今日都係返半日，朝早搞掂笨元仲爺返學就出門口，買埋早餐返去，牛頭角的最後一天了，返到去只係做啲基本嘢，跟住就開始最後packing，後座位AGM一路都唔見佢返嚟pack嘢，唯有幫佢pack咗先，跟住再admin嗰邊briefing 埋明天點搬嘢等等，最後12點幾我開始pack埋麗圌腦啦，1點老公準時嚟接我返長沙灣食咗午飯就去荔天聽talk，邊聽邊吹吓水等等時間都快過，去課室聽埋中英數科老師講嘢，再同老師交代吓子元情月況，又要趕下場，接番子元再送佢去球場先，跟住就入青衣，到聽仲爺嗰邊的talk，今日真係夠哂充實， 食咗啲嘢就過去，今次去南分校嗰邊，但個位真係勁難搵囉，聽talk聽到9點多都未完，不過都只係講小一啦，我都唔洗聽啦，所以都走先，廢事要佢地三個等我，出長沙灣食埋嘢就回家啦，明天要OT搬office!

6/9/18

6/9/18.   THU.    HOT

今朝子元又要趕校車，叫咗佢快手啲啦，跟住到仲爺又話要疴屎，真係搞佢唔掂，我趕住出門口啦，唯有叫老公搞掂埋佢，我要趕返工啦！返到去其實都未有機會做咩，又要幫admin嗰邊手貼吓嘢等等，跟住又做吓自己嘢，之後重新pack過啲嘢，加多個箱，食完飯打吓機咁又開工，今日大家執嘢執到好似明天就走咁，好誇張！放工直接入青衣食飯，子元就喺婆婆到去球場踢波，我就食完飯先出去球場接埋子元返屋企，今日真係好熱，返去快手沖涼同佢兩個溫埋書就趕佢地去瞓，但笨元又話肚餓，搞到我又陪佢食，肥死！

5/9/18

5/9/18      WED.    HOT

今日都係咁返工返學啦，揍咗笨元上校車時間多咗可以早啲出到門口，所以又早咗返到公司附近可以買豐富早餐食！全日都係做吓job cert又去can吓咁啦，都唔係閒架，有嘢做時間係過得快好多，午飯後要幫吓admin做啲搬office 準備，放工直接返屋企，仲爺已經過咗去幸福邨同梓朗爸食埋飯就踢波，不過我一放工打比佢時就話之前找唔到電話，因為比仲爺收咗喺床，激死！食完飯等電話嚟就出地鐵口接番我隻笨，始終夜晚黑嘛自己行入去唔安全！返嚟沖好涼捉佢地瞓覺！

4/9/18

4/9/18.   TUE.    HOT

今日到仲爺最後一年的幼稚園生活開始啦，今年唔可以揍佢返學其實係覺得有啲可惜架，但為咗搵食冇辦法啦，揍咗子元上校車就返上去叫醒嗰兩位起身，仲爺都算合作，因為基本上我處理好佢咁滯嘛，不過食早餐都快手，算係一個好開始啦！老公送咗我去地鐵站佢就揍仲仲返學啦，我等埋佢張學校相就可以出post，早咗出門口仲可以去大家樂買個豐富早餐返去慢慢食！不過之後就激氣囉， 咪又係嗰條神囉，總係要激我！叫我地入去房問呢問嗰樣，其實得佢一個唔明流程咋嘛，唔好扮嘢啦，我真係好期待佢自我閃靈，唔好喺到獻世！今日入咗一日job cert，九龍啲job cert好似入唔完咁，只好做吓抖吓又幫兩位經理處理吓搬啲嘢！時間過得好快，放工直接返屋企，嫲嫲係都要出嚟煮飯，其實我同仲爺簡單煮麵食都可以，到我洗完碗睇個雪櫃又一堆嘢喺到，有人可能會覺得有人服侍埋你仲想點，但所謂一家一主，我都想自己地方自己管，自己雪櫃自己fill，有時買堆嘢返嚟擺到過期又掉為咩呢，點解佢屋企咁亂咁多雜物咪就係咩都買咋嘛，我而家真係好奉行簡約斷捨離，但可以點呢，因為冇得出聲，唯有頂多一年，或煮run熟咗返學mood後真係唔洗嫲嫲出來煮飯！

3/9/18

3/9/18.    MON.    HOT

終於開學啦！6點幾又要起身啦，快手搞掂子元出門口，今年又要提早上校車，不過撘今個月啫就算啦，嚟緊要補課都唔撘校車啦！同loletta吹水吹到7點幾先返上去梳洗出門口返工，買埋早餐返去食完就開工啦，今日完全未停過手，除咗油同蟲，我仲要入埋九龍區，真係夠哂皮！午飯食完都即刻出去做嘢啦，快啲做完快啲收工！去長沙灣同老公會合，今日深水涉區隊選拔，hugo都選就一齊陪佢，齊齊食完飯去選，睇咗陣就先帶仲仲返屋企，明天佢要返學啦，都係早啲返嚟準備吓好，我又可以睇延禧呢！老公10點多先返到嚟，快手沖好涼仲有好多嘢做呀！

2/9/18.

2/9/18.   SUN.  HOT

今日老公返中，所以朝早都可以出吓去，瞓到10點多先起身，其實都醒醒地架啦，但真係唔想郁住囉！起身煮埋早餐食老公就去攞車，我地就換衫等等，諗唔到去邊呀，所以去咗mega box行吓算，方便老公之後返工，我地亦撘地鐵返到去！去到都係行吓買吓嘢，要幫仲爺買under wear呢，又睇吓玩具咁！老公去咗返工，我就同佢兩個去咗食午飯，平平地佢地又食得開心梗係麥當勞啦，跟住就行去撘地鐵返屋企，都係困獸鬥咁啦，預備定晚飯啲嘢，都係咁hea吓煮飯食沖涼休息啦！

1/9/18

1/9/18.   SAT.    RAIN

今日差不多落足一日雨，人都冇咩心機，朝早8點多起身，跟住就出去食早餐，因為車泊咗喺長沙灣就過去食啦，跟住就要去泳池，子元參加咗白豚的比賽，都係比佢攞吓經驗啫，不過現場都真係又亂又人多， 幾辛苦呀！10點去到等到差不多11點先游得，以為條友可以攞啲名次，點知都係得個吉，不過算啦都遇咗架啦，12點多游完就過海到仲仲去學音樂，我地就食埋午餐買吓嘢啦，返屋企後老公就瞓覺，我就同子元對吓練習，仲爺玩玩具，子元去游水，跟住仲爺都去游水我就買餸，不過都解凍唔切嚟煮，不如出去食，試咗長沙灣間新嘢，但所謂正宗餃子都係唔正宗！食完老公就去踢波，我地就返屋企沖涼睇電視！

31/8/18

31/8/18.    FRI.    RAIN

又到星期五啦，朝早夠哂刺激，老公好心車我返工，但同平時一樣時間出門口都冇用，因為周圍都塞車，最終仲要停到老遠我跑返去拍咗卡先落去買早餐呢！跟住都係做嘢啦，時間都過得好快，午飯後打吓機，但下午開始勁忙，明明做好哂嘢架又一大堆job cert再出現，但我4點多又要去sit in個油缸會喎，咁梗係攞咗OT先啦，反正放工都係去球場等笨元，不如今日做好哂嘢下星期再對付另一批job cert！結果做到6點幾都做得完架啦， 慢慢等到夠7：10先拍卡走，去到樂富都係7點幾，又廢事去球場找佢地，所以喺商場行，但邊有咁多嘢行，最終找到地方食飯就攞定位等佢地，仲同另一個隊友一齊食，本來都冇咩，反而係做泊車優惠時話過咗10點就冇得做優惠，激死！返到屋企都燥燥地，沖完涼K.O.哂佢地可以休息先叫做好啲！

30/8/18

30/8/18.   THU.    RAIN

今日時間終於過得快啲，6點幾子元個電話無端端響，雖然老公係要起身啫，但都係有問題嘛，於是等子元起身我就叫佢問番嗰位同學做咩咁早打嚟，但重點都係唔可以一早打比人又唔係咩重要嘢囉，我都教訓咗佢啦，你話我小人都係咁話，順手教埋子元，佢地開始個個都有電話就要教佢地點用，等嫲嫲過到嚟我就出門口，返到公司食埋早餐就開工，今日都算忙，咁總好過等時間過！午飯後收到Amy佢地send咗張相嚟，原來係我琴日cap的圖，但係係佢地print out咗加咗啲字上去再放喺大咪姐張枱，後來先知kiki今日放假，佢地就亂嚟，我都真係冇心架，不過大咪自己有錯在先應該會心虛，未必會告狀的，其實kiki都好走啦，當初又係佢勸我走，其實佢都可以好似我咁積極啲去搵，世界咁大無謂困喺到！下午都忙忙碌碌架，放工老公嚟接埋我就去九龍城食晚餐，食埋甜品添呢，送埋嫲嫲返去就返屋企，都係沖涼睇電視休息啦！

29/8/18

29/8/18.   WED.    RAIN

今日要揍埋子元返學校踢波，條友又慢吞吞啦，搞到好趕囉， 只可以返到公司樓下買三文治！今朝都係冇咩做，其實時間係勁難過架，午飯後打吓機，下午做好嘢開始攞箱pack嘢，反正冇咩做咪pack住先囉，下星期又忙啦！放工彈閘即返屋企，因為老公要OT，我又要返去處理吓佢兩兄弟的爭執！仲爺就比我片穫金，一來佢唔執玩具，二來佢講唔聽嘛，唔理哥哥說話整爛玩具，所以都要罰吓，我表面上係掉佢啲玩具，其實係掉佢啲垃圾啫，但佢已經喊得好淒涼，佢呢啲品格係要教訓吓！喊完咪又係照顛，老公早咗可以回來，打亂咗我洗碗抺地的程序呢！等佢送嫲嫲返去我就快手做好嘢打暈埋仲爺，子元又同同學whatsapps搞到差不多11點先瞓！

28/8/18

28/8/18.   TUE.    RAIN

今日老公放假，佢揍仔我就自己返工，子元7點幾就起咗身，要咁早時佢又唔郁喎！買埋早餐返去食完扮工啦，今日真係冇咩做，朝早做完基本嘢就開始hea，到午飯食飽又係打機囉，下午時間更難過，過完相落hard disk，我索性找延禧攻略的文字版劇透，睇到放工叫做過得易啲！放工即閃過咗球場，笨元開始番晚間練習，仲爺被留在青衣，等我地踢完再入去接埋佢同嫲嫲去食晚飯，食完送咗嫲嫲返屋企就快快回家，還要睇我唯一有機會睇的J2韓劇呢！

27/8/18

27/8/18.   MON.    HOT

又要返工啦，今日老公返中，叫佢唔洗車我地出去，我同子元自己撘地鐵就得，不過都有啲趕，子元有時都係太慢，返到學校又唔記得打比我，搞到我要麻煩蘇sir呢！買埋早餐返公司，今日堅係冇咩做，時間仲難捱，朝早都可以聽吓收音機，午飯後都係打吓機，下午偷偷咁打咗一個下午機，放工彈閘返屋企，試吓撘小巴啦，但因為要等好耐先有車所以都係唔值得撘！返到去勁肚餓囉，今日午飯太少啦！返去食得飯洗埋碗睇吓電視咁，9點幾先捉佢地去沖涼，打暈埋仲爺又要同子元吹吓水，跟住仲要做埋啲家務！

26/8/18

26/8/18.   SUN.    HOT

今日老公要揍子元去踢波，所以我同仲爺喺屋企， 瞓到9點幾10點都要起身啦，因為仲爺攞唔到奶要我幫佢，咁我就自己煮嘢食囉，之後佢有佢睇ipad，我有我話追番延禧，12點幾就開始做吓嘢，打掃吓地方摺吓衫，仲爺就自己玩！等到2點咾公都未返到，仲爺肚餓頂唔住，我就煮咗啲粉佢食住先，諗住等老公佢地返嚟沖好涼就出去食嘢，點知去得荃灣仲爺已經瞓咗都冇咩食嘢，去攞咗到會就去青衣城集合入馬灣，康傑小聚會嘛，今次馬灣個會所都好大，卡拉ok房又獨立又有麻雀房，一句講哂正呢！去到班細路已經第一時間落水，仲爺玩玩吓甩咗水泡浸親，好在有爸爸喺水中馬上去救他囉，真係比佢嚇死，條友真係完全唔驚咁只係好委屈話個水泡甩咗唔係佢除！老公睇住佢之後我地幾個女人去咗麻雀，主力想玩個自動枱囉！開餐食完嘢又要切蛋糕，不過我都冇食到，因為班細路搞壞咗部機，又要去修理呢，但都係老公先搞得掂！影好大合照夠鐘散啦，返到屋企先紅雨算係咁啦！

25/8/18

25/8/18.   SAT.    HOT*

今日瞓到9點幾10點先起身，煮早餐食完就hea吓啦，本來諗住找地方去吓，但出得門口都12點多，都係直接揍仲仲去學音樂啦，不過去到香港仔嗰邊又早咗喎，於是就叫老公唔好咁快入去住，試吓去鴨利州個海邊八吓，見到有街渡就一齊撘吓囉，比佢地體驗吓又幾好玩，跟住快食個午餐就去海怡學嘢，我地就去咗萬寧嗰啲shopping，仲買埋水樽㖭！回程塞咗一輪車，老公送咗我地返去就出去踢波，笨元去游水仲爺自我娛樂，我就煮定晚餐，因為今晚諗住食粥！本來想追埋嗰幾集延禧，但真係追唔切，所以都係欠一集！Barry上埋嚟食晚餐，好在都夠嘢食，之後3位男士係咁打機，仲爺就係咁自己搵嘢玩，睇哂兩集延禧就捉仲爺瞓覺然後沖涼休息！

24/8/18

24/8/18.   FRI.    HOT

終於到happy friday啦，真係好開心，係因為星期六日都有得放定我真係咁唔想返工呢！今朝等嫲嫲過到嚟就揍埋子元出門口，佢有佢撘巴士過婆婆到，我有我返工，今日完全唔幫佢通知阿媽，佢應該handle得掂！今日帶咗蛋糕返去做早餐，沖杯咖啡又唔洗錢啦！今日都冇咩做，所以過得好hea，又冇咩人吹到水，食飯時都叫做有人講吓嘢啦，下午仲悶等時間過，到後段我見大家都好hea，就齊齊上吓網睇吓嘢囉！放工彈閘去長沙灣同老公佢地會合試間新嘢，一般啦係啲餸有啲新款！食完返屋企換好衫， 老公送咗嫲嫲返屋企就返來同我地去球場，今日冇落雨啦可以跑兩個圈踢一陣，我同仲爺回來沖涼休息先，老公同子元繼續練習！

23/8/18

23/8/18.   THU.    RAIN

今朝架地鐵真係玩嘢，觀塘線真係堅唔掂，去到彩虹站塞咗5分鐘先郁，仲要咩鬼電力故障，好在我今日真係咁啱早咗出門口，唔係實遲！路上買咗燒賣食咋，好早就肚餓，不過真係冇時間比我好好休息啦，係咁做呀做，午飯時終於可以吹吓水打吓機，真係悶到死死吓，下午啲嘢做得七七八八個人都輕鬆啲，又處理埋請假嗰啲，7號應該可以去聽talk，仲仲的小一試驗班又15/9先係，唔洗怕我去唔到！放工齊齊彈閘，去咗青衣城食，送咗嫲嫲返屋企我地就返去，老公話同佢地去踢波，返去換咗鞋去到球場都未跑到一個圈就落大雨，等極都唔停，但行咗一陣佢就停，頂！返到去咪快手同佢地沖涼囉，個個濕水鴨咁！

22/8/18

22/8/18.    WED.    HOT

今日真係好勁忙，朝早嫲嫲過咗嚟睇住仲爺，我就揍埋子元一齊出門口，佢返學校踢波，但條友又唔記得打電話心我，搞到我又打比蘇sir， 又打返學校，幾唔好意思， 原來因為返到去已經開始咗，所以佢連電話都冇打比我就開始練，但我會唔放心架嘛，正衰仔！返到去食完早餐就開工，一路做到午飯就去同炮哥，may佢地食午飯吹吓水！下午4個鐘我真係冇停過，放工前叫做完成到我想做嘅，馬上彈閘去aeon同老公佢地會合，食完飯買咗咗少少嘢就帶子元去打鼓，老公就送嫲嫲返去再嚟接我地，返屋企要執好屋真係好攰！終於打暈哂佢地可以好好休息！

21/8/18

21/8/18.   TUE.    HOT

今朝自己撘地鐵返工啦，老公同仲爺都未瞓醒，笨元又去咗camp！買埋早餐返工，今日都應該要做吓嘢啦，追吓佢地更表，不過今日唔係咁有mood，自己都唔知點解，或者真係找唔到一份真心喜歡的工作掛，加上咁多規則，真係有時令人透唔到氣！午飯後都係打吓機，下午只係執油缸表都執到個人呆呆地，要搵人吹吓水先過得日神！放工即閃返阿媽到食飯，今日係我舊曆生日嘛，家人就會同我食餐飯切個蛋糕呢！跟住老公同笨元去咗踢波，我揍仲仲返屋企先啦，我返工衫咁叫我去球場做咩呢，返嚟沖個涼問吓仲爺想玩咩，佢想我睇佢表演但又要怕羞，好好笑！

20/8/18

20/8/18.   MON.    WARM+

今日又要返工啦，朝早等嫲嫲嚟就出門口，子元就返學校練波，仲爺瞓到9點先起身喎！返到公司食完早餐咪開工囉，朝早都係有嘢做吓，午飯後就真係悶死，完全冇咩做，時間勁難過！幾辛苦先捱到收工，老公嚟接我，去咗深水涉食，笨元下午已經入咗camp, 佢最鍾意的NURF GUN camp喎梗係啦！食完嘢食埋糖水就送嫲嫲返屋企，返到去睇埋延禧攻略先沖涼，仲爺初頭玩得好嘈， 比老公鬧完咪入房畫畫囉，真係畫得進步咗好多， 沖完涼k.o.埋佢又自由時間！

19/8/18

19/8/18.    SUN.    RAIN

今日老公要返早，我就瞓到8點幾9點起身，煮咗早餐佢地食，我就開始休息吓先，可樂上咗嚟玩咗陣就開始執嘢，我今日目標係要執好房嗰堆裝修餘下的雜物，叫咗老公好多次佢都係唔理咁唯有自己動手，終於比我執得整整齊齊，個房又多番兩尺！蒸咗啲燒賣一齊食，跟住就問老公好唔好去接佢放工，再趕佢兩隻嘢快手執嘢行趕巴士，頭站撘到尾站的6c，撘到仲爺都暈咗，去到食完嘢就去咗牛棚藝坊到睇吓，跟住食埋支雪條就返青衣，原來嫲嫲今晚約咗食飯，老公又冇講，好在我冇約人啫！返去等埋大包回來先開飯，期間我喺佢地部ipad發現仲爺自拍唱歌的片，馬上過咗落手機再放上YouTube,因為真係勁似人地youtuber拍片上網咁囉，好好笑！食完飯本來仲爺要喺青衣過夜，但因為佢唔肯，最終都跟我地返去，明天嫲嫲過嚟算！

18/8/18

18/8/18.   SAT.    WARM

今日早午晚佢地都有嘢學，所以基本上都唔洗旨意去街，朝早揍咗子元去學畫班我地就食早餐，跟住就等夠鐘啦，然後返咗屋企，老公又瞓覺，兩隻仔就玩，我就邊摺衫邊睇埋嗰幾集延禧，1點先叫老公起身揍仲爺去學音樂，局住要行西隧，仲仲學嘢時我地就食咗野先， 揍佢走時順手買埋麥當當比佢喺車食就可以， 回來後我就係咁執佢兩個的書櫃，仲有十多日開學啦仲唔執嘢唔掂！等佢兩個學完游水就去咗食晚飯，試咗間新嘅車仔麵，去松記食埋糖水都唔洗2百蚊，回家沖涼瞓覺睇電視！

17/8/18

17/8/18.   FRI.    RAIN

又到happy friday啦，但今朝早真係唔多happy, 好彩聽子元話有帶遮，未去到地鐵已經大雨，去到牛頭角仲死，塞死咗個出口，幾辛苦用咗差不多5分鐘先出到去，跟住見得番6分鐘仲唔跑呀，好彩之前見唔對路已經買定三文治，唔係早餐都冇得食呀！今日冇咩做，所以咪聽吓收音機囉，午飯後就打吓機，下午都係做吓嘢時又打吓機又聽吓收音機囉，幾辛苦先捱到放工彈閘！返去食壽司，老公買咗平壽司，食完就出去小童幫程家報名，佢三父子就去踢波，等我報完就去揍番仲仲，佢兩父子繼續踢，我同仲仲返屋企沖涼休息！

16/8/18

16/8/18.   THU.    HOT

今日終於正常咁返到工啦，買埋早餐返去食，試咗間新嘢的早餐，又平又好食，明天再去試！返到去都係做吓嘢啦，午飯後打完機，就要出去買嘢， 準備下午的茶聚，又要買生果，又要買嘢飲同零食，跟住同事一齊去做苦力，買完返嚟仲要洗，做好功夫真係要4點，食得嚟執埋嘢都5點，不過仲有時間做吓嘢，夠鐘放工就彈閘返屋企食飯，然後要去小童幫仲爺報名合唱團，但因為唔洗比錢住所以可以即走，要等試咗音先比錢！會合埋老公就返屋企，沖涼做埋啲家務打機休息！

15/8/18

15/8/18.   WED.    HOT

今日真係夠哂攰！不用返公司，出去直接做嘢！約咗9點3喺油塘，真係撘地鐵可能仲快，因為唔識路，大劑到渣咗去東隧口，冇得返轉頭，唯有喺入口前跳車，最慘我真係未嚟過呢到，好在我明白路在口邊，找到就問跑快兩步趕到9點3前去到，老公就局住走一轉港島，跟住嗰三個鍾都係企喺到，上倉睇住佢地搬嘢等等，有個運輸先生嚟上板落貨，等齊就入元朗碎紙，12點幾入去，先食咗嘢先再睇住佢地碎好，期間負責影相，搞掂哂其實都係兩點幾，同事話去食一間叫華嫂的，真係幾好食架喎！食完我地仲睇埋屏山文物徑先走，車番我去最近的地鐵站，我撘西鐵勁快就到，返去沖乾淨涼就等老公嚟接我，去咗大角咀食嘢，又食......真係肥死！跟住去咗AEON入貨，又到周三特價日嘛！送埋佢地返屋企就回家，老公又要返工啦！

14/8/18

14/8/18.   TUE.    3號風球

今日3號風球，笨元唔洗踢波，本來我叫老公唔洗車我返工架啦，等佢兩個瞓晏啲，但佢又話架車泊咗喺樓下，都係要出車，所以唯有叫醒佢地起身出門口，今日又試行新路，但原來行官塘繞道都係唔work，去東九龍返工真係麻煩！今日都忙忙碌碌啦，時間都過得快，午飯後都係打吓機啦，下午閒吓又吹吓水，阿姐通知我10月又要去咩鬼fun day玩team work嗰啲活動，是但啦都冇得選擇，最唔開心係荔天開放日可能撞正公司搬運日我要返工， 堅係灰！放工又彈閘，返美孚食飯，嫲嫲佢地出咗嚟去食上海嘢！食完送嫲嫲佢地返屋企，我就趕回家追電視劇，好耐冇追劇呢！子元去咗小童營前會，仲仲又要跟埋去接，回來先沖涼捉佢去瞓覺！

13/8/18

13/8/18.    MON.    WARM

又要返工啦，今日有老公車我返工，不過西九去東九真係行邊都塞車，加上要揍咗子元去學校先更趕！都叫做趕得切啦，買埋個包就返上去開工，不過朝早都係好hea，仲可以聽吓收音機先，午飯後打吓機又要開工，下午有嘢忙吓時間都過得快，放工等老公來接我，返去換咗衫先再去小童接笨元，簡單啲去食粥就返屋企睇電視，再沖涼K.O.埋笨元仲仲就要填埋子元星期三覆診張問卷，真係填咗好耐！

12/8/18

12/8/18.   SUN.    RAIN

本來今日係諗住去海灘，但天氣所限都係去唔成，又1號風球又雷暴咁點去，所以瞓到10點多， 老公去攞車，梳洗完就出去食早餐，試咗間新嘢好好食又唔貴喎，可以再試！跟住去咗悅來酒店間玩具店，因為老公唔知幾時應承咗仲爺要買車仔，最終買左一盒5架只售68元的車仔，抵啦！跟住去荷李活廣場，點知想買鞋嗰間冇咗，咁行完就去找有crose的商場，食埋嘢買埋行咗陣再買材料，今晚老公煮飯！返去準備材料休息吓等食飯，然後都係洗碗抺等趕佢地沖涼瞓覺！老公今晚返夜，要明早才見到佢啦！

11/8/18

11/8/18.   SAT.    RAIN

今日老公返早，我就瞓到9點幾10點先起身，仲爺走入嚟錫醒喎幾開心，笨元又識去煮早餐，雖然都係要教但都叫做肯去做！食完就開始hea， 不過都叫佢地換番自己張床單，我都換好咗開埋機洗，再整少少午餐啦，只係整番早日食淨的意粉咋，跟住我就趕住帶仲仲去學音樂，子元留守大本營！去到學音樂出面有得打書釘，仲要有得睇我近來最鍾意追的陪月血淚史，接番仲爺返美孚買埋麥當勞返去一齊食，子元就去游水，老公就瞓覺，仲爺就玩玩具，我就執子元的書枱，夠鐘揍埋仲爺去游水，佢要我入去睇佢一陣就唯有去啦！條友仔真係完全唔怕水，服咗佢！再去八埋子元游成點，黃sir 話佢游得好好多進步咗架啦！返上樓再收拾吓又要去接佢地，叫醒埋老公出門口，近近地去咗荃灣咋，食咗food court睇咗陣玩具就走，又要返嚟睇9點半明珠呢，做佢4隻荒失失企鵝呢！我就做到好夜先瞓！

10/8/18

10/8/18.    FRI.    RAIN

生日快樂呀！都好耐冇試過生日都返工，話哂新工唔敢咁樣請假，反正都冇地方去，所以咪照返工囉，老公今朝唔知醒射咗波，咁佢就車咗我返公先再送子元去球場，不過塞車都幾趕吓！返到去都係做嘢啦，不過今日唔算有咩做，所以下午飯後開始吹水等放工，今日仲要有得tea 喎，本來都擔心食得飽晩飯食唔到，但老公話去嗰間餐廳要walkin，要等到9點先有得食， 於是去咗行吓商場先囉，差不多9點返去等，等緊時撞到冼爸出嚟，原來佢地剛食完，後來先知佢同大仔都係今日生日，早知可以一齊慶祝！食物一般啦係蛋糕好食，不過食得太多都飽！車埋嫲嫲返屋企就回家，仲爺仲有生日卡比我添，最驚喜係攞衫時睇到櫃有禮物，係老公買的snoopy車，仲有子元用喺miss Yu到的印仔換咗支哈哈笑筆比我，真係幾感動，全部都咁愛錫我！

9/8/18

9/8/18.   THU.    HOT

今日嘛心情又好似好番啲，朝早都係咁起身梳洗出門口啦，笨元就撘巴士去婆婆到，買埋早餐返去食完又開工啦，今日冇咩忙所以都周圍吹吓水，午飯悶到想落去買雪糕食，但麥記都好多人排放棄了，下午冇哂人，所以都係吹水等收工，然後直接返屋企，今日都見唔到仲爺，真係掛到我今日喺公司都想喊，幾日冇見就咁我都覺得自己好笑！買埋餸返屋企煮意粉食，食完都係抺埋地就沖涼，子元又話想玩大富翁咪陪佢玩，難得有時間，但條友仔唔輸得的性格到玩都係咁，擲到個數知要罰錢就想偷偷再擲，咪丙佢囉！玩到11點再執得嘢嚟，老公放工回來佢先瞓呢！

8/8/18

8/8/18.   WED.    HOT

又係平凡的一天啦，朝早起身得我同笨元，揍佢一個站佢就自己行返學校，我就買早餐返工啦，今日可以偷雞聽吓收音機，但都係聽唔到幾多嘢，算啦！今日冇咩做，但嗰條冇用人都係咁激我啦，真係勁唔想理佢，我EQ其實一般架咋，唔好惹我！午飯後都係休息吓，下午都係做吓嘢又打吓機等收工！放工返阿媽到食埋飯先，因為老公今晚約咗人食飯，仲爺又要留宿青衣，試吓撘小巴返去原來都好快喎，不過遲啲搬去九龍灣都冇咩得至撘！食埋飯洗埋碗等笨元睇埋電視先走，返嚟都係睇電視沖涼休息咁啦！

7/8/18

7/8/18.    TUE.    HOT

今日都係咁如常返工啦，揍埋笨元一齊撘地鐵，佢就去球場我就返工，撘到去九龍灣時竟然撞到商會其中一個會員，同佢打個招呼咁啦！買埋早餐返公司都係做吓嘢囉，今日唔算有嘢趕，所以可以休息吓打吓機又再做吓咁，午飯後都係打機啦，下午又係做吓玩吓咁啦，終於捱到放工啦，返青衣食飯，睇吓我隻小仲仲，本來佢又要跟我地走啦，但我又耍佢叫佢畫生日卡比我先肯唔走咋陰公豬！叫老公車咗我返屋企先再同笨元去打鼓，我就邊睇電視邊打掃，做埋Exercise先沖涼，仲要摺衫呢！老公佢地10點多返到嚟，笨元又係咁睇電視，咩都做得好慢呢，雖然仲有大半個月假放但都要收拾吓啦！

6/8/18

6/8/18.   MON.    HOT

又到星期一啦，又要返工的日子，今日有老公車我返工放工，真係幾舒服呢！仲爺都有一齊揍我，跟住佢就同daddy二人世界，我就要努力工作啦，日程地做咗嗰啲嘢啦，見冇咩做咪做咗photo report先囉，午飯後都係打吓機咁啦，下午淨係搞掂OC的photo report都玩足一個下午！放工彈閘都冇咩意思，因為老公揍得子元去小童再嚟揍我真係好遲！本來想買餸煮飯老公又話唔好，所以等埋子元先去食飯呢！過到長沙灣仲撞到程生，兩架車好似反斗車王咁，老公閃佢前燈，佢就著一吓死火燈，真係好鬼無聊！食埋晚飯泊好車去惠康行個圈買咗啲嘢就返屋企，做吓運動又可以再食！

5/8/18

5/8/18.   SUN.    HOT

星期日嘛梗係瞓晏啲，醒的時候都差不多10點，老公放咗工返嚟，兩隻仔起哂身，捉佢地梳洗好食埋早餐就出街，老公話去玩具街行吓，買咗啲沙灘用品，老公又買咗張吹氣床返公司用，跟住行玩具街行咗好耐，又買咗玩具，不過實在係太平啦，幾十蚊有交易邊到搵！然後去咗食啲嘢又食埋豆腐花，跟住就入去將軍澳行吓，都係想去遠啲啫，順手找找梁小姐，睇吓嘟妹落唔落到嚟同仲爺玩吓！咁佢真係嚟到喎就喺商場玩咗陣，又再去遊樂場玩，我就真係熱到死死吓，佢地都仲有衫換，我地就臭住咁食埋飯返屋企呢！

4/8/18

4/8/18.    SAT.    VERY HOT

今日真係好熱，老公朝早返咗嚟都喺廳開咗冷氣瞓，等我地梳洗完就揍子元去畫班，然後就食早餐，跟住無聊去咗新建的蘇屋邨望吓，啲路都唔同哂，老公見到有個甚麼小白屋文物館，於是就去睇吓，原來係其中一部份當年阿嫲嗰隻Y型的一part，我地咪行上去八吓，真係咩兒時回憶都返哂嚟，影咗兩張相都走，因為仲爺冇拖住行又跌到，成個patpat都係泥，好在車上有衫啫可以換！返去屋企攞埋spare衫就去接笨元，直接過荃灣剪頭髪，剪完都12點幾，老公送我地去地鐵站我就揍仲爺去學音樂，佢就同子元食午飯然後返工，我地又獨留啦！過去食埋午飯仲爺先去學嘢， 我又去咗行aeon囉，3點接番佢就返屋企，買埋餸先，返去我要休息吓，揍埋仲爺去游水我又要返去準備晚飯啦，煮完食埋又要洗又要抺地，終於ko咗仲仲我先可以沖涼休息！老公今日又返中又返夜連踩兩場，明早才回來呢！

3/8/18

3/8/18.    FRI.    HOT

今日終於都到星期五啦，揍埋笨元一齊出門口佢就自己去球場，我就返工啦，食埋個早餐等開工，因為未有嘢可以做住！到有嘢做時又令我火起，都唔想再講啦， 總之同啲冇腦嘅人做嘢真係命都短幾年！食完飯都冇喺房打機就出咗去做埋啲嘢，因為我怕做唔切，我要今日做好哂先得！不過比我預期快做好嘢，之後阿sir又萬歲喎，食得開開心心咁，放工叫老公嚟接我，因為攞咗啲衫比笨元仲仲佢地，返到屋企有飯食，食完就洗埋碗抺埋地，嫲嫲睇埋大結局先走，老公車佢返屋企之後就返工， 我就k.o.埋兩個細可以休息！

2/8/18

2/8/18.   THU.    HOT

捱到星期四，今日都多嘢做，時間亦過得快，朝早返去用咗一朝搞掂哂蟲的job cert，午飯後就打吓機啦，下午再繼續努力執埋啲尾，又打吓機咁啦， 係冇得聽收音機仲有少少唔開心啦！放工當然彈閘啦，但點都唔夠同閘嗰三位快，最好笑係個AGM話我地做咩好似鬥快咁！過到葵芳老公佢地已經去了餐廳，仲諗住上去個新遊樂場睇吓係點！去咗食德國嘢，不過唔係叫咗好多，陣間可以再去葵廣食過，我就買咗啲衫同裙，但返去試咗有啲唔啱，蝕咗添！仲爺今晚要去嫲嫲到過夜，佢又一副好慘嘅樣，下星期仲要瞓4日，點算！

1/8/18

1/8/18.    WED.    HOT

今朝真係冇咩Mood, 連衫都著得好求奇，結果返到去就出事，又話條褲唔啱又話聽收音機，真係好煩！其實做到嘢就得啦，同著咩有咩關係呢，聽住收音機仲有精神做嘢，又有咩問題呢，一句講哂就係煩啦！搞到我今日都冇咩心情， 偏偏又多嘢做又冇機會又冇人比我呻，呢吓先係最辛苦！咁時間都要過嘢都要做的，咪係咁做做做囉，終於等到收工啦，返青衣食飯，兩隻仔又喺到嘈嘈閉啦，食完飯食埋個蛋糕就回家，返到去又要趕鴨咁k.o.佢地啦， 仲爺今晚可以返嚟瞓佢就好開心啦，所以呢啲都係呆佬認親人呢！

31/7/18

31/7/18.   TUE.    HOT

老公今日返早，所以我又要揍笨元一齊去球場，今日遲咗少少就地鐵都慢哂，好在買得切早餐啫！返去食完早餐就開工， 清吓email啦， 午飯後仲有飯後果，有好多龍眼食呢，下午入住一部份job cert先，咁今個星期唔洗入得咁趕嘛，咁就已經夠一個下午了，不過5點幾已經hea緊預備彈閘！返到青衣本來老公話佢去踢波，點知又見到佢喺到， 佢話太多人踢唔去踢喎！咁食完飯睇埋電視預備走囉，仲爺唔肯喺嫲嫲到瞓要跟我地走，但真係唔可以，明天冇人揍佢呢！見住佢咁真係好陰公！

30/7/18

30/7/18.   MON.    HOT

今朝老公放7點，本來佢返來就接更，不過兩隻豬醒哂咁就不如一齊送我返工先再去食早餐啦，我過到去買咗大家樂返上公司食，佢地就喺附近食，我介紹佢地去炮哥話好食嗰間，竟然真係撞到喎！今日基本上冇咩做，所以都好free咁做自己嘢，可以聽住收音機咁就冇咁悶！午飯後都係打吓機啦，下午都係聽吓收音機打吓機上吓網，過幾日又忙啦，而家就hea吓啦！放工老公嚟接我，子元喺小童打緊NURF，咁我就返去換件衫先再接佢出去食飯，仲爺下午已經被放咗喺青衣，咁我地就去食米線才返屋企啦！

29/7/18

29/7/18.   SUN.   SUNNY

今朝老公唔知幾多點返到嚟，總之我地瞓到9點幾，我起身煮早餐比兩隻仔食，老公放咗工食咗先返嚟， 所以唔洗理佢由佢瞓吓，等兩位大爺都做好功課我地就出街，臨時決定去沙灘，所以都要去添置番啲沙灘用品先得，近近地喺AEON買埋食埋個lunch, 入青衣接埋嫲嫲就出發啦！本來諗住去黃金海岸但老公話不如去十一咪半睇吓，咁又泊到車只係要行遠少少，不過人少好多喎，於是就喺到落腳啦，set好個營兩隻豬已經走咗落水，梗係要影吓相先再同佢地玩水玩沙啦，走上走落咁都幾攰架，玩咗一輪水就到玩沙，跟住先好玩因為子元話要游去浮台，咁我冇咩裝備，所以都係留番比老公同佢去，點知仲爺又喺我未預備好之下游咗出去，所以都要陪佢去，就係呢個浮台夠近我先游過去咋，坐到回番氣就游番上岸囉，跟住都要開始執嘢啦，老公去攞番架車過來先，跟住我就執咗啲嘢去硬地，然後帶佢兩個去沖身，老公慢慢搬啲嘢上車，最後我沖好身就走得，去咗深井食埋晚餐，本來諗仲爺放喺青衣，但最終係佢唔肯喺嫲嫲到過夜！返到屋企十萬樣嘢要洗，搞掂老公瞓咗陣先返工，我地就梗係休息啦！

28/7/18

28/7/18.    SAT.    HOT

今日老公放假，不過朝早佢要揍笨元去畫班，我就瞓到9點多才起身，梳洗完等佢嚟揍我地去食早餐，然後去接番子元街街，我見反正都要過海，咁就不如去times 睇超人特攻隊的展，等佢地影吓相，1點多要閃了，仲仲要學音樂，我地就快食個午餐，行吓aeon咁囉，夠鐘揍番佢地就返屋企，做功課玩吓咁又去游水，我就去買餸老公就瞓咗，佢今晚要返夜就由得佢啦， 食埋晚飯都係咁做埋啲家務沖涼，老公10點到出門口返工，仲爺就瞓覺笨元就要睇電視，由佢睇埋明珠套卡通先瞓囉。

27/7/18

27/7/18.    FRI.    HOT

今日精神好少少，所以返工時都冇咁辛苦！朝早未天光又醒咗一次，瞓得番都算係咁，夠鐘起身叫醒埋笨元又要快手搞掂出門口，我又要趕返工呢！揍埋笨元一齊撘地鐵，佢喺樂富落車我就繼續返工，食埋早餐就開工啦， 今日都有嘢做吓冇咁悶，午飯後都係打吓機啦，然後繼續開工，做好嘢就放工返青衣食飯，睇埋電視就揍我嗰兩隻好嘈嘅寶寶返屋企，沖好涼睇電視休息！

26/7/18

26/7/18.   THU.    HOT**

今朝仲仲瞓到豬仔咁八點都未起身，我唔理佢地返工啦，今日只係返半日但超冇嘢做，悶到一個點！買埋早餐返去食，聽住收音機都覺得一時間過得好慢，掌握到啲嘢後其實好快完成，今朝啲時間真係超難過，午飯提前食咗就閃，2點要去到覆診，不過有老公嚟接我就快好多， 可以返屋企換埋衫先過去，睇亦都好快，個醫生好似主力開藥比你就算咁！今次原來係睇普通科，又平10蚊又唔洗比藥錢，等老公嚟接我返屋企就同仲仲做功課，跟住就做吓家務，等笨元補完英文就去食嘢，近近地去長沙灣食完就送嫲嫲同仲爺返屋企，咁就尤一日。

25/7/18

25/7/18.   WED.    HOT

今個星期真係過得好慢，而家先捱到星期三， 朝早三隻嘢都瞓緊，所以冇理佢地就搞掂出門口，買埋早餐返去食，朝早都有做吓嘢，不過我呢啲咁有效率的早兩日都做好哂呢轉應該要做的，所以今日都好閒呢！午飯後都係打吓機啦，下午啲時間過得勁慢，幾辛苦先等到收工，老公嚟接我，去咗mega box行，又可以食嘢睇玩具去Aeon，真係一次過滿足哂三個願望！行到9點幾送埋嫲嫲返屋企就閃了，笨元唔知去宿營宿成點呢，見少一晚有啲掛住佢添！

24/7/18

24/7/18.   TUE.    HOT

今個星期好似過得好慢咁，今日先星期二，朝早發咗個夢好得人驚，搞到我係咁喊！但喊完又瞓番，鬧鐘響先起身，叫醒埋笨元就快手出門口，一齊撘地鐵去到樂富，笨元就自己行過去球場，我叫佢到咗打比我，今次就冇唔記得啦，返到公司都係做嘢啦，今日真係要邊聽住收音機邊做，因為好攰咁，勁想瞓，要聽吓嘢個人醒啲嚟做嘢，忙忙碌碌咗一日，放工過荃灣，去咗食牛牛窩，再行多陣商場就返去，沖完涼打暈埋仲爺就叫笨元執埋明天去camp啲嘢啦！

23/7/18

23/7/18.   MON.    RAIN

又要返工啦，朝早只係顧子元一個就出門口，所以都好快手，買埋早餐比佢，上咗巴士我就閃，條友又唔記得打電話比婆婆，真係比佢激死！返到公司食埋個早餐就開工啦，好充實，好快又放飯，食完就返自己位睇埋套劇，跟住又開工囉， 忙忙碌又放工， 準時閃人返美孚，老公同笨元喺青衣城等我，仲買定麥當當D24榴槤雪糕等我，真係好正呀！返嫲嫲到食埋晚飯，睇吓我隻小仲仲點搞事囉，佢喺嫲嫲到應該瞳瞓得好開心啦，冇諗住要返屋企都可以！咁我地就返去，好好睇吓子元的練習做成點，又迫佢要再plan好啲，唔將planning變成習慣，以佢啲咁冇系統的腦袋嚟講，會愈來愈難handle呢！

22/7/18

22/7/18.   SUN.    HOT

今朝瞓到差不多9點先醒， 兩個細醒咗，老公返咗，等我再hea吓就起身煮早餐佢地食，然後去咗圖書館，等老公可以靜靜地瞓吓，12點幾回來叫醒佢出街，諗住今日去睇snoopy，過到太古城先食咗嘢先，然後排隊去睇同影snoopy啦，係好得意嘅但可惜冇錢買，睇吓影吓相咪算囉！跟住就去咗超市買嘢，咁先可以免費泊車嘛，終於買到啲唔太貴又夠價錢，仲要唔係周圍有得買的，搬完上車就去咗公園玩，到5點幾先閃，去接埋嫲嫲食晚飯，送埋隻仲爺比佢就回家啦，今晚仲仲喺嫲嫲到過夜，因為明天老公要返早，我又要返工，冇人揍佢！

21/7/18

21/7/18.   SAT.    HOT

星期六真係好可以瞓晏啲，今日瞓到10點幾先捨得起身，難得又咩都唔洗學，出去食埋早餐老公就返嚟通埋個廚房水喉，1點多我就要帶仲爺去學音樂，海怡半島真係好遠，一來一回一學埋嘢已經3個鐘，回程時買麥當勞一齊食，老公返咗工，子元自己喺屋企都有兩個鐘呀，不過都開始要架啦，5點子元就去學游水，仲爺就6點先學，我去咗買餸同喺圖書館睇吓書咁，夠鐘過去接番佢地就返去煮飯，三十蚊就餵飽大家啦！跟住都係洗碗抺地沖涼瞓覺囉，臨瞓先發現仲爺搞過我啲Snoopy，激死！比我罰佢冇得講故事，但又喊哂咁喎， 於是罰佢面壁一分鐘囉，呢條友唔罰唔得！

20/7/18

20/7/18.   FRI.    WARM

今日又到星期五， 不過今個星期晚上掛住睇電視都瞓得唔夠，所以今日個頭都痛， 飲咗咖啡都唔夠頂！今朝自己搞掂就出門口，買埋早餐仲買埋書展飛，放工入去目標為本！今日都忙忙碌碌呀，朝早要對好哂個schedule有冇漏有冇錯，午飯後仲忙咁，都唔知自己做咗啲咩，只知道要找埋資料陣間書展用，放工即閃過灣仔，買咗個飯團買咗支水，跟住就去灣仔啦，車程上幾辛苦，因為肚餓又唔食得嘢住，終於捱到出閘就邊行邊食，一路上都有點不守規則走快線，用最短路程入到去會場，通知程太我到咗，但都各自行事中，今年需要買的書少咗好多架啦，一來部份經程太嗰邊團購咗，一方面選咗啲精要先買，所以都唔算太誇張，買到一半時程太叫我會合去買常識作業，咁就開始之後幾間都集體買啦，多啲折扣嘛，最後幫子元買咗兩本植物大戰彊屍啦，仲爺就買咗故事書，咁就離場，我自己都冇行過嘢，出年我真係想自己睇吓嘢呀！老公佢地全部入咗元朗，叫我入去同佢地會合去食B仔，咁咪抬住十斤書入去囉，今日車程都用咗三個幾鐘，攞命！去到B仔我真係當晚飯，食完回家啦，兩隻豬都瞓哂，我都勁攰了！

19/7/18

19/7/18.    THU.    WARM+

今朝出門口三隻嘢都未起身，所以都準時8點多都出到門口，唔算太趕！返去食埋早餐就開工啦，今日唔係太多趕忙嘢做，不過就要group吓啲資料，遲早都要做好嚟服侍班人，咁見得閒就做吓先啦！午飯後都係打吓機啦，跟住又開工啦，不過都有邊打機邊做嘢，其實定時定候做好嘢就得，冇人話你唔做嘢或者唔知自己要做咩咁，我覺得好充實好自在！放工閃人返去食飯，洗碗打掃再趕佢地去沖涼瞓覺，跟住就同子元執吓啲書，明天放工應該會去書展入貨，適量買啦，大約23本左右啫，比起上年36本真係少咗好多！

18/7/18

18/7/18.   WED.    WARM

今朝都唔係好遲出門口啫，但都真係趕爆，早餐都買唔切要返上去打咗卡再出去買！今日都忙忙碌碌呀，朝早偷偷地聽住收音機開工，其實都work喎，反止都做到口野啫！跟住就到午 飯時間啦，放飯後都係打咗陣機，下午又開工啦，準時返工梗係準時收工，夠鐘即閃，老公話去青衣城食飯，咁咪直接撘巴士過去囉！佢今日去咗睇醫生冇返工， 因為皮膚敏感好痕！食完去埋食雪糕就返屋企啦，老公就同子元去練體能，我就同仲爺喺屋企，沖好涼出嚟佢又差不多瞓咗，真係好鬼可愛！

17/7/18

17/7/18.    TUE.    RAIN 3號風球

今朝只係仲爺要返學，所以可以7點幾先起身，我搞掂叫醒哂佢地我都出門口啦，冇理佢地啦，等得嚟我實遲到！買埋早餐返去食，然後咪開工囉，朝早都有嘢做吓，不過今個星期都係比較閒架啦，享受吓啦！午飯後都係打吓機啦，不過部機真係好快冇電，要搵日去換電先得！放工返到去嫲嫲仲煮緊飯，但笨元8點要去小童營前會，所以食完飯我就同佢地出去先，嫲嫲執埋嘢佢自己閃！喺小童等時仲爺就可以玩吓玩具囉，返到屋企快手捉佢地沖涼瞓覺，我都要自由時間要休息！

16/7/18

16/7/18.     MON.    WARM

又要返工返學啦，笨元今日返埋就放暑假，仲爺就要返多日，我冇等仲仲搞掂出門口，因為佢兩父子實在太慢，我自己搞掂出門口先啦！返到去飲埋杯咖啡就開工，朝早都比較有嘢做，午飯後就好自由，我嗰邊冇哂人，咁我咪打吓機，執吓老公個schedule 囉，返工的日子咁亂笨元又要學嘢，真係要個表清清楚楚寫清佢send番比相關人士！放工返屋企食得飯，同埋要趕佢地執嘢等等，嫲嫲用完個洗手盤又塞，講佢又話唔關佢事， 真係好惱人呢，唯有叫老公處理，但我都襯落樓同佢地跑時去買咗梳打粉，希望搞得掂！

15/7/18

15/7/18.    SUN.    RAIN

今日難得老公放星期日，但竟然係咁落雨，所以都要搵定室內節目，遇咗今朝去睇蟻俠早場，真係扺好多呀，仲爺有pop corn食都好合作，冇周圍走冇話要走！睇完行吓商場去咗掟銀仔，玩埋今次又要停月一排啦， 跟住就去食啲嘢，泊到標位喎仲唔用到盡，食完嘢行咗千色店，老公買到個腰包啦，睇咗好多間見呢個係最化算！然後行天橋行返去又再行過， 但喺荃新天地有得打機時笨元玩唔到個賽車又喺到發脾氣，好乞人憎！再行埋荃灣廣場就走啦，都差不多4點，返到去老公瞓覺我就睇住佢兩個，喺到砌琴日買的Lego ，陪仲爺砌咗一輪先入去幫佢執工作紙，明天要帶返學！7點幾叫老公起身煮飯，差不多9點先有得食，跟住都係沖涼睇電視囉，笨元睇埋世界杯上半場先瞓！

14/7/18

14/7/18.   SAT.    RAIN

今日又係落咗全日雨，仲要係時晴時雨嗰隻，朝早8點多起身就煮丁麵做早餐然後笨元去學英文，我地就去荔天買書，然後攞返屋企先再去接子元，跟住出咗尖沙咀，本來我係想去睇sailor moon，但原來未有，咁笨元佢地就去咗睇Lego ，仲要買埋嗰隻啦，因為嫲嫲比咗錢佢地買！咁再去the one行完就快食午餐過海啦，不過都係遲到啦，真係趕唔切！等仲爺上完堂就返去買餸執屋，因為約咗裕智佢地游水後上來食飯。接游水時真係好大雨，我都要抱住仲爺先掂！回來煮埋啲飯開餐啦， 大嗰兩個食完就打機，九點幾趕先肯走！咁我都可以沖涼打暈佢地！老公今晚睇埋波先返！

13/7/18

13/7/18.    FRI.    RAIN

今日真係好好雨水，落咗一日雨，朝早叫醒哂佢地起身返工返學，仲爺都係跟車入青衣， 我就準時返工啦！今日其實唔算太忙，係朝早多嘢要清番佢，午飯後都好閒，仲可以填埋仲爺張申請英華的表格，編吓更咁！係編老公同子元嗰啲呀！放工過悅來食泰國嘢，食完返屋企換衫出去踢波，我就跑步，今晚都跑到8個圈！返上樓快手沖涼啦， 到我沖完出嚟，仲仲已經喺梳化瞓咗， 好搞笑囉比人放哂啲電！

12/7/18

12/7/18.    THU.    HOT

今日老公放假，但要叫哂佢地起身出門口都幾辛苦，尤其仲仲要瞓起上嚟係會唔肯起身的，捉到佢地身梳洗快手出門口，都算趕得切返工，買埋早餐返去食，跟住就開工啦，今朝都有嘢做架，重點喺唔應該我做的我係唔會做！午飯後就出去咩鬼溝通會，有得痴車坐梗係扮哂嘢死跟啦，只係用要同上司吹水換嚟慳番腳骨力同埋車錢，都幾抵！過到去都係hea住咁等夠鐘啦，有嘢食又唔敢食咁多啦，捱到5點收得工，直接可以返屋企， 換好衫去愉景新城同老公佢地會合食晚飯，佢地已經玩咗一輪啦，食完拉麵就返屋企，因為笨元玩完遊樂場就係咁咳， 唉！又係咁！本來要練波架，點知突然落雨，所以只係找志遠喺樓下打吓乒乓波咋！9點多返上來沖涼休息！

11/7/18

11/7/18.    WED.    HOT

今朝都係如常揍仔返學啦，程生佢地遲咗啲， 所以我都有少少趕！ 返去食埋個包做早餐就開工，又唔算好忙，做應做嘅嘢囉，話咁快又放飯， 食完都係打吓機啦，跟住都係做嘢同whatsapps吹水囉，仲爺group到竟然吹緊選中學，幾誇！放工直接返青衣，老公喺地鐵站接埋我上去，食飽飽就閃啦，老公又話要返去同笨元加操，不過佢又唔係跟琴日個做法，結果我冇跑到囉，浪費哂啲時間， 同仲爺返去沖涼再打暈佢先， 跟住就要摺衫啦，兩日冇摺再唔摺就死火！

10/7/18

10/7/18.    TUE.  HOT

今日都係忙忙碌碌啦，朝早笨元終於要返學，起身搞掂佢地出門口，8點多送埋仲爺上程生車就返工啦，返去食埋早餐又開工， 都係幾充實，加埋我喺谷到吹水吹升中啲嘢，時間過得更快，午飯後打吓機又夠鐘，下午繼續做嘢，放工老公嚟接我，同埋嫲嫲去咗九龍城食青真牛肉館，跟住就返屋企啦，老公話要同子元加操，咁就一齊去球場啦，我都可以順手郁動吓跑吓步，不過子元啲體能真係好差，我都跑唔過！同仲仲去遊樂場玩多陣就返屋企先，快啲沖好涼打暈埋佢，跑完攰到咩都唔想做！

9/7/18

9/7/18.    MON.    HOT

話咁快又星期一， 仲爺今朝要返學，7點幾起咗身叫佢地快快快，真係令人好心煩，如果淨係我出門口其實係好夠時間的，買埋早餐返去食，又係時候開工啦，有嘢做時間真係過得好快，轉個頭又食晏，今日冇打機，因為要過番啲相落外置hard disk，下午又開工啦，同樣時間過得好快，抬頭已經4點幾，話咁快又放工，回家吃晚飯，今晚老公煮，因為約咗barry佢地上嚟食，吹吓水睇吓屋咁，又傾吓佢地想裝修啲嘢，唔覺唔覺都10點幾先捉到仲爺去瞓覺，沖埋涼睇電視又一日。

8/7/18

8/7/18.    SUN.  HOT RAIN

今日天氣時晴時雨，真係同我心情一樣， 朝早9點幾10點先起身整得早餐食本來老公去攞車就可以去泳池， 但我只係同佢講話個洗手盤塞，又冇叫佢即刻通，點解又唔識睇時間呢，11點多先攞到車返來，泳池收12點咁點去游水呢，本來我堅係火架，但最終比我諗到解決辦法，就係先去咗行吓商場， 食啲嘢老公先車我地去泳池，我地3個自己游佢就返工囉！近近地去咗荷李活廣場咋，都係周圍行吓再去麥當勞食啲嘢就過泳池，玩到4點幾先捨得走，我真係夠哂攰！換好衫返到屋企都5點幾，同子元check吓啲練習嚟緊出年點買，就煮晚餐佢地食，仲爺食食吓又瞓啦，硬係要激人！洗好碗抺好地打暈埋仲爺就可以沖涼休息了！

7/7/18

7/7/18.    SAT.    HOT

今日真係熱到一個點， 所以個人都燥㡳啲！朝早8點多起身，又要煮定早餐快食完子元去學英文，等佢學完接埋佢去畫班，我地就買埋餸返屋企休息吓先，12點再去接仔，本來諗住一齊食個晏先過去同仲爺學音樂，但接得嚟都12：50點趕得切，所以叫老公送我地去地鐵站， 過到去喺美心快食完仲爺就學嘢，我地周圍行吓啦，去萬寧睇咗有咩啱買，返美孚先再買啦！接番仲爺返去買埋嘢就返屋企， 子元夠鐘就去游水，仲爺都係， 晚飯係食冬瓜湯飯，真係幾好食架喎！晚飯後又要出動到衣架先肯執好啲玩具，真係令人好顛！終於打暈佢可以自由吓！

6/7/18

6/7/18.    FRI.     HOT

今朝又係趕頭趕命，好在都趕得切，買埋早餐返去食，然後開工啦，樣樣做吓咁，又比個AM叫咗去傾吓嘢，其實好多嘢都係佢唔明啫，我做得一個月都明好多啦，係佢要努力就真！做到食晏就睇埋未睇完的J2劇，下午又努開工，放工去球場會合，點知原來係去九龍仔，但我已經上咗地鐵，唯有叫老公再去地鐵站接我啦！等佢地踢完先知去酒樓食飯，同剛sir慶祝生日，食到10點幾睇埋波先肯走，嘈到人地酒樓都怕咗！返到去仲爺都瞓咗，搞掂都冇得睇魔女的法庭，唯有做埋自己嘢瞓覺！

5/7/18

5/7/18.    THU.    HOT

今日都係忙忙碌碌啦，因為要做番琴日啲嘢，所以朝早都好忙，等佢地搞掂出門口原來都幾趕，返去食咗個脆片做做餐，然後就努力開工，飯腳同事今日出去食，所以我就自己喺位食，再打陣機做埋啲嘢！下午相對地冇咁忙啦，做吓停吓準備收工，放工就返屋企，臨返到地鐵站老公話要去買學生計算機去考試，好在比我找到文具店有，跟手我就返屋企，嫲嫲已經煮好飯，食完抺埋地就叫佢地沖涼，本來諗住同仲爺溫英文，但真係會令人發顛！最終我就好傷心咁入咗房，仲瞓埋！

4/7/18

4/7/18.    WED.    HOT

今日要返甚麽迎新日，都係要一早出門口，因為老公去子元水運會做義工家長，所以都係一早出門口，咁我就要交仲爺比程生帶返學啦，我就撘西鐵去尖東，今日要喺尖沙咀中心上堂，都知道悶架啦，不過都算可以啦，都係困一日喺嗰到啫，又有飯食，上吓又休息吓咁，捱到6點就走得，返去都係管好仲爺，嫲嫲煮好飯食啦，沖好涼就捉仲爺溫書，真係好辛苦，佢條友咩構造架，溫書就眼瞓， 呢一刻好好下一刻又唔知佢想掂，我真係想死！K.O.哂佢地就摺埋啲衫睇電視！

3/7/18

3/7/18.   WED.    HOT

今日都係哎揍仔校車，老公放假可以揍仲爺，不過我一樣都係咁趕， 買埋奶返公司沖嘢食就開工， 遇咗今日勁忙， 朝早都仲可以，但一返咗job cert基本上就冇停過，午飯後本來都想繼續做， 但都係長命功夫長命做啦，休息吓先算，下午努力做到收工都未完成哂，明天又要去迎新日所以都係要等到星期四先再續啦！放工返去等開飯，老公煮飯嘛，我就幫仲爺溫習，因為蔣老師打嚟話仲爺英文考得太差，幫佢補一補考，叫我點都再同佢溫吓書，唉！細仔就係咁慘，不過仲爺真係要比心機啲，佢太冇心機學習，得番一年就上小學，到時點算！終於搞掂可以沖涼休息！

2/7/18

2/7/18   MON   HOT RAIN

今朝瞓到10點多, 但係有代價, 因為叫個10歲睇住個4歲半, 其實只係可以確保安全咁大把, 實會有啲唔知咩手尾要執, 所以一起身又搞到我發哂火, 又令我情緒落谷底, 真係好辛苦! 幾經辛苦叫做平伏番啲, 食埋早餐就出門口, 去Mega Box同佢地影恐龍, 仲爺睇得開心啲! 點幾喺八方雲集食個午飯老公就車我地去番德福佢就返工, 我就陪佢地睇咗一個鐘玩具先拉得郁佢地走, 返屋企前喺街市買少少餸, 返去都係邊休息邊預備晚餐, 今晚整雞麵佢地食得好開心呢, 梗係啦用哂一隻雞喎! 8點幾K.O.埋仲爺可以靜少少!

1/7/18

2/7/18.   SUN.    HOT

今日瞓到9點幾老公叫我起身， 到佢煮好早餐先叫我食啦， 跟住就揍子元去打鼓啦， 今日真係好熱， 熱到一個點就係一室外就熱嗰隻， 等佢打完鼓就去咗荃灣行吓，食埋個午餐老公送我地返去佢就返工， 由於太熱我都唔想出去，返到屋企就做吓家事啦， 想佢地執好啲玩具好耐， 尤其是仲爺嗰啲， 又要換吓床單咁， 就一個下午了， 晚飯煮咗咖哩咋， 仲要冇咩餸，見個雪櫃有咩就煮咩，仲爺幾衰話：媽媽你知唔知我唔食蕃茄架！不過都比我迫到佢食！晚飯後打掃埋就打暈仲爺沖涼休息！

30/6/18

30/6/18   SAT   HOT SUNNY

今日朝早煮咗早餐就齊齊食埋, 然後子元去學英文, 等我收拾好才同老公會合, 本來仲爺話去遊樂場, 但實在太熱, 玩咗一陣已經頂唔順, 入咗西鐵站涼冷氣, 一齊去接子元, 近近地去咗D2行吓咋, 又有機可以打喎幾好呀, 12點揍子元返學校預備佢個童樂童歡, 我地就揍仲爺過南區學音樂, 本來早咗諗住去附近遊戲室玩吓, 但佢又瞓咗喎, 咁差不多都要叫醒佢去食啲嘢先學嘢, 然後我地都係行吓12蚊點啦, 夠鐘接番佢就返屋企, 老公話眼瞓要瞓陣先, 咁我就出去接子元放飯時間, 同佢喺四小龍食個飯就送佢返學校, 我地家長們就排隊等入場, 未夠7點已入得場, 最麻煩係仲爺都要飛, 好在程家佢地買咗貴飛, 可以攞嚟求救用, 帶哂佢地入嚟! 內容其實都係睇嗰啲嘢, 子元的話劇喺尾二, 真係等得夠耐, 子元都做得唔錯, 佢隻灰太朗好可愛! 睇完就快閃去咗食粥, 平靚仔快, 因為老公趕住返去睇波呢!

29/6/18

29/6/18   FRI   HOT

今日都係如常返工返學, 捉仲爺起身揍埋笨元就送埋仲仲上程家校車啦, 都有點趕返工, 買咗個早餐食, 返到去都係做嘢啦, 唔算太忙所以時間又慢咗, 午飯後都係打吓機, 跟住又開工, 入嘢真係要超用腦同好有偵探頭腦, 因為啲嘢成日都唔齊要喺到推理, 死未! 放工直接過球場, 仲爺被老公留咗喺嫲嫲到冇得出嚟, 等子元踢完波都8點幾, 去長沙灣快食個晚餐就去接仲爺返屋企, 沖好涼就K.O.哂佢地. 又係時候計吓數, 點解咁多年啲收支都係平衡唔到, 我已經慳到一個點, 但啲錢都係唔夠洗!

28/6/18

28/6/18.    THU.    HOT

放咗日病假返去， 都唔算好多嘢做，朝早都係咁送哂啲仔返學我就返工啦，買埋早餐返去食，然後就開工囉，忙吓又抖吓咁，午飯後都係打吓機啦，時間都係咁過！下午都係做吓嘢咁啦，開始多唔同嘢做， 時間又係過得好快！老公話要OT但都係佢去接子元喎，所以我就放工直接返屋企啦，我返得去都7點多佢都仲未接到子元， 所以搞到返得嚟食飯都8點多，係咁二同仲爺溫咗陣書， 食完飯叫老公早啲送嫲嫲返屋企， 我就洗碗抺地K.O.埋仲爺然後沖涼摺衫自由時間！老公明天返早所以一早瞓咗！

27/6/18

27/6/18   WED   HOT

今日請咗病假, 因為真係喉嚨痛, 係咪都要睇醫生, 咁梗係要請假啦, 朝早送咗子元校車, 就揍仲仲返學, 然後去食個早餐, 本來諗住喺青衣城睇醫生好快, 點知等咗兩個幾鐘, 而家睇個醫生真係好辛苦! 過去揍埋仲仲放學就返屋企等, 等老公接埋子元敏瑩送咗兩位小姐返屋企, 我地去食埋飯就返屋企, 我需要返去瞓, 果然藥力足以令我喺佢地又嘈, 樓下又裝修下都瞓到, 好在較咗鬧鐘, 5點幾起身, 準備同老公兩個出去食自助餐, 係用上次Annual Dinner的贈卷呢, 係用埋呢次架咋! 估唔到係甜品最好食, 飽到上頭頂呢! 返去接更打暈埋佢兩個就沖涼休息食藥瞓覺!

26/6/18

26/6/18.    TUE.    HOT

今日要自己返工，因為兩隻細預咗同佢地睇醫生，所以唔會返學， 我就7點幾先起身， 但全世界都未起身， 無謂因為要車我返工就全部人起身啦，所以我都係快手搞掂自己出門口，有少少遲啦但都趕得切，買咗三文治返去食，不過其實有啲貴，所以我都係快啲買啲福麵返去焗嚟食算！琴日趕起哂通告，所以今日算自在好多，慢慢打吓機都仲得！午飯後就打機等夠鐘，下午開始由喉嚨痛變成周身骨痛，問咗同事如何請病假，咁或者明天要請一請先，休息吓嘛！放工返屋企嫲嫲煮好飯，其實都算好幸福架啦，執好屋飯，食完洗碗抺地，快手KO咗細佬先，食咗藥早啲瞓啦，然後都係執埋啲手尾，沖好涼hea吓，趕埋子元去瞓就自由了，老公今個月返中， 晚上基本上我係一打二了！

25/6/18

25/6/18.    MON.    HOT

又要返工啦， 今日老公放假，佢車埋我去地鐵站返工， 不過都有啲趕，所以只係買咗三文治食咋，返到去食飽就要開工啦， 除咗去廁所真係冇停手呀，做到食晏就食個好一般的飯， 然後打吓機咁又開工， 再睇鐘已經4點幾， 都話充實到一個點， 做到夠鐘就放工， 老公嚟咗接我， 約咗休食晚飯， 去咗愉景新城，食嗰間好味的西餐， 吹吓水咁， 食完去埋掟彩虹就返屋企， 已經差不多十點， 快手K.O.佢地瞓覺， 我地仲有好多嘢做咁呢！

24/6/18

24/6/18.   SUN.    HOT

今日其實過得唔係咁開心，不過日子都係會過的！朝早瞓到9點多要起身了， 梳洗好就出去金園食早餐，然後子元就去打鼓，我地就喺旺角行咗陣， 等佢學完近近地去咗奧海城行吓， 老公今日返中， 所以點幾就要送我地返屋企，佢就返工！ 去街市買埋午餐晚餐的材料， 接埋spencer返來打機， 子元有機打就咩都唔理， 呢樣真係最唔好， 細佬好慘架嘛， 咩都冇得睇又冇人陪佢玩，叫佢瞓又冇可能， 我就辛苦囉要係咁睇住佢，我都想做吓嘢，又要煮午飯呢！所以全日我都唔開心呀，個人悶悶不樂咁，仲仲都好啲，同佢講完識氹番你，總之我真係最唔鍾意打機打到冇時冇侯的人啦，而家只係開始，唔管住就只會更沉迷！晚飯後到9點真係要趕Spancer返去啦，明天大家都要返學呢！

23/6/18

23/6/18    SAT   RAIN

今日真係充實的一天, 因為陸生返早, 佢兩個連續咁學嘢, 我由8點起身就開始揍東揍西, 9點子元學英文, 我就同仲爺去食早餐, 跟住就去找有冷氣的地方等放學, 然後又要下一場, 去畫班! 要等個幾鐘喎點過呢, 返咗西頓攞番封reference letter, 再吹咗一輪水到12點多就行返過畫室接子元啦, 因為到仲爺學音樂, 過到去都點半, KFC快食個午飯就去學嘢, 我就行12蚊店囉, 夠鐘就接番仲爺返屋企, 子元去咗游水時又要趕仲爺去做功課, 老公返咗嚟但其實冇咩幫過手, 所以呢啲時候我又成日諗起家寶講嗰句假單親, 有時真係覺得好似, 真係由早到晚都係我一個做哂全個家GE嘢咁! 6點跑住咁抱埋仲爺趕去泳池, 佢去游水時就去咗買餸, 返去煮飯時陸生終於做番樣嘢, 去泳池接佢兩個上嚟! 食完飯都叫得郁佢吸塵抺地, 沖完涼佢就去瞓, 因為夜啲要睇波喎, 我就唔知做咩都係忙忙碌碌咁, 洗呢樣洗嗰樣, 因為我唔做, 間屋應該會變垃圾屋都冇人理!

22/6/18

22/6/18   FRI   RAIN

今日都係咁揍哂啲仔返學我就返工啦, 都係食脆片啦, 慳嘛! 跟住又係一日的忙碌啦, 而家的日子好充實, 好快就一個星期咁! 午飯後都係咁HEA吓吹吓水, 食完飯就一繼續工作, 轉個頭就放工啦, 準時夠鐘好走人, 唔好蝕比佢, 過球場會合! 本來老公話要OT, 搞到接子元放學嗰到亂哂大龍, 好在最終Loletta都幫到手接咗先, 老公再去會合佢地! 等子元踢完波就入青衣接番仲仲, 再去食啲嘢先返屋企, 咁啱見到長沙灣有間食店有波睇咪喺嗰到食囉, 睇到巴西嗰場臨尾10分鐘, 就係最精華嗰到, 89分鐘巴西先入波, 真係唔睇開場都冇問題! 返到屋企仲爺已經瞓咗, 又唔沖涼瞓覺!

21/6/18

21/6/18.    THU.    HOT

今日老公放假，所以可以揍仲爺返學，咁我就唔洗咁趕囉，佢車埋我去地鐵站先入青衣，我返到去食鮮奶脆片做早餐，不過唔知係咪個早餐呢，成朝個肚都喺到怪叫咁，呢排腸胃都麻麻地！今日都係忙忙碌碌啦，時間過得特別快！午飯後都係打吓機，下午又繼續努力，真係做足一個下午呀， 放工都遲咗走， 蝕咗添！老公接完仲爺喺美孚站接埋我，返去就煮飯，我就同仲仲睇功課，食完咪洗碗抺地囉，跟住都係沖涼打吓機咁啦，話咁快又一日啦！

20/6/18

20/6/18.    WED.  HOT+

今朝仲爺要去參觀，搞掂佢兩個就返工啦， 今日帶咗三文治咋！食完嘢就要開工， 真係開始忙啦，不停有嘢做，充實到一個點， 對我嚟講真係好夠皮， 午飯後都係休息吓啦，下午又繼續，原來真係會做唔完嘢， 但又唔急到要明天交， 所以大家都係好準時走的！放工去咗Aeon會合，要周三特假日嘛，食完蒸飯咪去入貨囉， 跟住車埋嫲嫲返屋企就回家了， 各有各做好嘢沖涼休息，我今日都好攰啦！

19/6/18

19/6/18   TUE   WARM

放咗3日假真係超唔想返工, 但鬼叫你窮呀頂硬上, 朝早如常揍咗兩隻返學我就返工, 今日都有啲趕, 所以只係買咗三文治咋, 今日都真係好忙, 開工後我第一次望鐘已經差不多1點, 你話係咪好忙! 但只係係咁出EMAIL咋喎, 冇法啦怕有錯驗屍咁驗呀! 午飯後hea完又繼續努力, 一做又做咗兩個鐘先停一停, 今日真係夠哂充實! 放工老公嚟接我, 去長沙灣買埋藥比兩隻細, 兩個都有咳, 葉醫生又放假, 冇辦法唯有食藥房藥! 跟住去咗美孚大家樂食烤雞, 返屋企都係兩隻細沖涼啦, 我要落樓買包明天子元整午餐盒! 跟住同仲爺做埋功課, K.O.埋佢做埋運動我先沖涼休息! 

18/6/18

18/6/18.    MON.    HOT

今日係端午節嘛，應該游龍舟水，但點解變咗踢波呢，仲要踢盃賽，即係要五六個鐘嗰隻，加上老公返早，基本上一朝早已經係我一個頂，起身後就要捉佢地收拾好嘢，再整早餐比佢地食，今日應吓節蒸艐食，然後就到仲爺做功課，起碼要遇番個幾鐘，果然快極都真係做到11點幾，執埋嘢換埋衫12點多出到門口，今次個場喺牛皮沙，真係夠哂遠，撘46X轉49x，喺正門口落，熱到溶之旅開始，先係安頓好子元，再帶仲爺去食晏先，佢又要食麥記但我又唔想食， 於是先買麥記再去一粥麵，買好嘢又要返轉頭攞，唯有比仲仲自己喺一粥麵等我囉，食完又要返番去地獄熱啦，睇吓佢地踢波時又要顧住仲爺其實都幾攰，老公嚟到都唔係好睇住佢，不過係陪佢去隔離食個tea，又要返去繼續，入到決賽爭第一可惜輸了，咁亞軍都好啦，頒埋獎都7點先走得，去曼山食壽司返屋企沖涼休息！

17/6/18

17/6/18   SUN   HOT

今日係父親節,冇咩特別慶祝活動, 朝早仲爺6點幾突然喊醒,搞到我又醒咗要睇吓佢! 之後瞓番都瞓到亂七八糟, 9點幾起身, 覺得都唔夠時間, 因為11點要去到學鼓, 但要自己撘車去嘛, 又要煮早餐執嘢等等, 結果遲咗出門口, 搞到11點3先到呢! 子元學鼓我就帶仲爺行吓街囉, 都係喺番附近行吓就算啦, 夠鐘接番佢就撘巴士返去, 快煮個午飯食完又要趕去足球比賽啦, 其實只係去樂富啫, 但又要行過去等等, 拖埋仲爺又要趕時其實都幾辛苦, 所以我揹咗佢行上斜嗰段, 真係唔郁唔知身體好啦, 我都算係幾好體能架啦! 去到球場差不多開始, 不過頭場佢都未有得踢, 老公唔洗3點半已經嚟到! 帶唔夠設備真係差少少, 明天去牛皮沙都要預備夠嘢, 唔係咁多個鐘都唔知點過! 3場win 哂都算唔錯, 分吓獎品咁, 5點幾我地就返青衣, 去青衣城行咗陣先返去食飯, 真係夠哂飽! 返屋企睇電視, 等11點睇德國呢!

16/6/18

16/6/18.   SAT.    HOT

今日都算好充實，朝早7點幾就起身，因為要去睇恐龍嘛，早場果然係細路睇，仲爺今次都算合作架啦， 全場都冇咩搞事！睇完就去荃灣攞埋IKEA的櫈，再去比仲爺試吓嗰張床啱唔啱，跟住就去長沙灣食午飯，然後就返屋企攞埋學音樂啲嘢，老公車我地去地鐵站，然後接埋庭軒就返去打機，我就同仲爺去學嘢，老遠去到海怡嘛，等佢時我就去咗shopping囉，然後撘巴士返屋企，未出鴨脷洲已經瞓咗，抬到我隻嘢咁！5點子元游水，6點到仲爺，游完就去阿媽到食飯，食完回來睇波，阿根廷點解會和波， 唉！

15/6/18

15/6/18   FRI   WARM

話咁快又到happy friday, 今日都算不過不失啦, 朝早揍咗子元校車就吹咗幾句水先返上樓, 快手搞掂嘢叫埋兩位陸生起身就出門口, 其實返到去都算趕趕地, 因為要買早餐, 最終都放棄咗想試嗰間台灣嘢! 返到上去都冇咩做, 因為教我做嘢嗰個今日請咗SICK LEAVE所以我冇嘢好做住! 咁就做吓自己嘢先囉, 之後都係跟吓嘢咁啦, 有咩就mark下方便跟! 下午要跟更表編更, 終於有啲嘢忙吓, 但忙完又開始悶, 時間都幾難過! 捱到放工就直接過球場, 先接埋仲爺, 因為老公有老公踢波, 子元有子元練波, 咁我唯有揍住仲爺啦, 終於踢完啦, 喺KFC食埋晚飯就閃了, 回家KO哂佢地就可以休息吓, 但都要摺衫囉!

14/6/18

14/6/18.   THU.    WARM

今朝竟然同仲爺著錯運動服， 明明諗住星期四， 但對手就攞咗運動服，撞鬼！都冇辦服啦都落咗樓， 冇時間返去換，交咗比程生就跟車順路跳車撘地鐵，然後買埋早餐返去食都8：50啦！跟住都係hea吓先啦， 襯未有嘢做住嘛！然後要學埋另外啲嘢，又用一日時間消化吓先！午飯後都另一個同事吹吓水，佢啱啱放完產假返嚟，所以都係傾生仔啦！下午真係開始工作，初期實係唔熟架啦，神仙咩， 慢慢了解同找資料囉，唔明就問，寧願問清楚好過做錯！放工前散埋SDM簽完的文件，準時6：10閃人，返到去睇功課等食飯，因為見到cube cube又見到警車，真係嚇一跳，好在冇事， 咪叫老公落嚟搞掂佢先囉！食飽飽就洗碗吸䴤味地，搞掂埋仲爺就沖涼，然後同子元睇埋卷， 今日一次派哂4科，夠哂刺激， 咁佢都可以啦， 係數學差3分就日A， 咁咪可以攞到禮物囉！中文88英文87數學82常識93，我對自己有交代啦！今晚世界盃開鑼，我部電視比乍霸咗，冇得睇j2套劇，明天再喺手機補睇囉！

13/6/18

13/6/18.   WED.    RAIN

今日真係要早起身，因為子元唔洗返但仲爺要返，所以要先揍子元去婆婆到，再揍仲爺去元州交收比程生我先可以返工，估唔到架6號咁快，可以唔洗10分鐘過到去，買埋麵包子元自己上樓，我交埋仲爺比瑩婆， 我就勁快返到公司，仲買埋個早餐返上去慢慢食！跟住今日都係冇嘢做，可能因為要做的都過哂今個月期，下個月又未到，冇得做住！午飯後續hea，幾經辛苦捱到放工， 返美孚同嫲嫲大包佢地一齊試新的打邊爐，真係超好食！食完去Aeon佢地買埋嘢就走，我只係陪啲約睇玩具囉！返到嚟仲要沖涼做功課，兩個搞到差不多11點先瞓呢！

12/6/18

12/6/18.   TUE.   RAIN**

今日已經8：05就出門口，但真係實在太多人，地鐵亦太慢，所以都好趕，仲要喺原味作家買咗個生米的飯團，激死！朝早返到去都仲係hea， 所以時間過得好慢咁，午飯後都係打吓機啦，下午等有關同事得閒就開始教我要做啲咩，淨係聽同抄其實都好攰，了解完都差不多5點，都係時候休息吓啦，6：10準時收工，回來就同仲爺睇功課， 子元同同學仔打咗一日機，開飯先停一陣， 食完飯又再打過， 呢啲就係試後生活囉！我就洗好碗打掃埋趕哂佢地瞓覺才沖涼睇電視休息！

11/6/18

11/6/18.   MON.   HOT

今日開始就要返工啦，真係要連續返5日啦，朝早送咗佢地返學，去巴士站交收埋仲爺就去撘地鐵，咁就真係夠哂早，快手喺原味食埋個早餐先返上去，其實今朝都真係冇咩做，又未有code所以咩都唔關我事，但今日星期一要開大會，所以勁多人係到出出入入，搞到我好難做自己嘢！午飯後飯腳們瞓哂覺，我咪自己打機囉，下午開咗code，有電郵啦開始有啲嘢做，又學吓運送不冋文件去不同人到，不過重點都係人太多，真係好嘈！夠鐘就即閃， 老公嚟接我去mega box， 都係買吓嘢食吓嘢咁啦，9點幾返屋企啦，仲要對功課沖涼等等，好在11點前搞掂可以邊摺衫邊睇電視！

10/6/18

10/6/18.    SUN.  HOT

今日又係得我一個揍仔啦，堅係攰！瞓到9點多起身，又係比仲爺播ipad嘈醒，跟住咪整早餐食完，執嘢出門口囉，兩兄弟今日都要踢波但又唔同時間喎，真係攞我命！仲爺踢完都係12點，但子元踢1點，嗰一個鐘真係唔知可以去邊， 最終只係找有冷氣的地方hea住先，夠鐘放低佢，我就同仲爺去食晏，然後去咗阿媽到hea， 佢又唔係屋企喎，唔理啦上去同仲爺沖個涼，開行冷氣休息吓先，差不多2：30就去球場接番子元，佢又好似唔多舒服咁去咗抖， 總之比佢飲咗凍𡌂寸阿sir 講埋嘢就去買八方雲集然後返屋企，沖個涼捉咗仲爺去瞓覺，等佢陣間有力游水！我就預備今晚的晚餐，老公瞓夠覺就去踢波，我就接番佢地回家煮埋個晚餐，如常地K.O.埋佢地就摺衫休息！

9/6/18

9/6/18.   SAT.   HOT

今朝瞓到9點多先起身，老公已經返咗工，嗰兩個就喺廳搞事啦，等我起身後就煮少少嘢食，再出去玩吓遊樂場， 但我要買咗咖啡先嘛，點知買完等攞飲品時，企咗喺玻璃趟門等時，有人開門嗰吓仲爺比個門夾住隻手再推走咗，真係嚇到我死，好在都冇事咋，不過個門係有問題，嗰個位會有人企喺到等飲品，點可能係咁可以開閂門！去完遊樂場就再去惠康入貨，返屋企就催佢地沖涼，我又要執番好啲貨又要煮少少嘢食，差不多1點先出門口啦，點知部lift去到地下時唔開門，好在有少少逢， 咪係咁用手拉開囉，終於開得到啦即刻跳出去啦，馬上叫管理些搞啦啦！子元就去咗Barry 屋企， 我就同仲仲去海怡學音樂囉， 學完過跑馬地睇子元比賽，佢地三組都win咗第一，好勁！跟住我地就過咗荃灣同嫲嫲佢地食放題啦，barry一齊嚟埋，食到9點幾返到屋企，快啲沖涼瞓覺啦， 好攰！

8/6/18

8/6/18.   FRI.    RAIN

今朝只係揍子元就得，因為仲爺已經喺青衣，果然仲係3號風球唔洗返學，咁搞掂子元我就返上樓搞掂自己然後食個早餐就返工，但原來比我想像中人多，所以遲咗少少，我都知第一日唔好遲，但真係冇諗過返工時間牛頭角人多到咁！今日預咗係冇嘢做，首先填好咗表格先，然後就執吓枱，放番少少自己嘢，星期一可以攞齊嘢過嚟！終於等到放飯時間，我部門的小姐請埋我一齊去會議室食飯，公司有埋午飯供應，唔算太差喎，今日食京都肉排+烚菜，食完吹吓水咁，2點又開工啦，我就繼續執文件再睇吓電腦的資料啦，然後就係等放工，成日記錯自己放5：30呢，又要習慣吓！放工閃人去樂富，去球場會合，等子元踢完波就返咗長沙灣食嘢，然後就返屋企， 今日都好攰啦，好在可以休息吓，星期一再戰！

7/6/18

7/6/18.  THU.  RAIN

今日老公都放假，唔洗咁趕又有人照應，幾好！早上都係揍子元校車再揍仲仲啦，食埋早餐去睇早會操，就係睇早會操睇到抄咗牌， 唉！都冇辨法啦，照去荃灣睇戲，點知又塞車喎，幾驚去到冇得睇，係遲咗10分鐘左右啦，但都有得睇呀，好似冇上集咁好笑但整體都係好！完場就趕去接子元先， 再返去接埋嫲嫲先去揍仲爺，點知個豬仔見到我嚟接佢就擺出一幅唔鍾意ge樣，原來係因為我嚟就會有投訴比我知，所以佢咪怕囉，佢帶啲玩具返咗去所以啲玩具要坐監，又喺廁所玩水，唉！唔怪得佢咁怕我嚟接佢啦！跟住去咗青衣城午餐，然後送咗嫲嫲返去先就返屋企做功課，子元就做數，仲爺做好功課比佢玩，做到7點幾先搞掂入去找嫲嫲，再去咗ikea晚餐，因為我地要買嘢，完成任務就返荔欣攞仲爺行裝，掛咗3號風球，我明天又要返工，都唔知點揍仲爺，所以都係放佢入去瞓！咁我和子元返去就沖涼執嘢等等，明天真係要返新工啦，好緊張呀！

6/6/18

6/6/18.   WED.    RAIN

今日又要程生過來車我地入青衣啦，老公一早返咗工啦，揍哂佢地返學就閃了，仲爺先好笑，今日冇得睇早會操嘛，佢知道咗開始嗲仔，係咁拖住我唔放，真係可愛到不得之了！返美孚食埋個早餐就去買餸然後返屋企，整吓嘢差不多時間就落去接子元校車，然後開始一天的困獸鬥，溫一陣就煮午飯先，食完就再繼續啦，今期啲嘢都算幾難咁，因為要分胎生卵生，跟住又地球咁， 溫書的時間過得好快，話咁快老公就同仲爺返嚟， 煮飯食埋打掃等又要睇功課，再同子元溫音樂啦，10點幾才放佢去瞓我先自由啦！嗰吓先睇到隻bear覆我msg ,我又係衰今朝whatsapps佢一句miss u so much， 但我真係比佢嗰日的flirt搞到亂哂，真係好辛苦，我點都要抒發咗佢出嚟，佢覆唔覆好我都要抒發！結果佢只係覆咗我一啲唔關痛癢的話，咁既然你當初都唔理我心情咁flirt我，我亦都唔怕flirt番你轉頭！再唔處理好我真係會痴線架！

5/6/18

5/6/18    TUE    RAIN

今日係考試的第一日，盡可能提佢小心小心架咋，朝早要快手出門口去程家樓下滙合轉車，揍咗佢地入去就同程太去樓下快食個早餐再上去睇早會操，仲爺見到我有睇佢好開心架！返美孚買埋餸就返去準備定午餐料，接埋子元校車就返上去炒埋個飯，因為12：30要去補英文，所以要早啲食飯，佢去咗補英文我就唔知去邊好，先去快圖美曬埋啲相，點知就開始落大雨，但我又要返過荔枝角，預備下午去舊公司攞票，但勁大雨就真係濕哂，過咗四小龍買杯啡坐咗個幾鐘，終於上得去攞，吹咗幾句入埋票就返去接笨，回家休息一會食個tea就再做練習，我就休息吓啦，跟住都係日常咁煮飯等等，打暈佢地就可以自由啦！

4/6/18

4/6/18.  MON.  HOT

今日係一個新開始啦，話哂都做FTM喎， 幾日咁多啦！朝早都係要一早起身送校車，然後老公車我地過程家到轉車入青衣，仲仲入咗學校我就喺出面等，等睇佢跳早會操，不過有啲悶囉， 冇咩識聲GE人嘛，睇到尾時仲爺終於見到我同佢say bye啦， 晚上返到去佢仲講話見到我添！睇完早會操就返美孚，去食個早餐先，然後就去買餸，跟住可以返屋企了！約咗barry， 要麻煩佢借燙斗比我燙新的返工衫，攞齊嘢落去佢到，佢有佢做公事，我有我燙衫啦，其實都冇咩，flirt嘛都算係有吧，但都係一個可以接受的範圍，我同佢相處一向都係咁架啦！差不多時間就返上樓預備午餐，請埋佢上嚟食，子元放咗學就校車自己上樓，食完嘢抖吓開始溫習，uncle barry好仁慈咁話5點多帶佢去食tea， 所以溫到咁上吓時間就落去大快活食吓嘢先返去再溫囉！到6點幾我都煮飯啦，老公7點幾回來食埋飯就打掃啦，佢話今日好頭痛，所以基本上冇幫手過啲咩，我真係做到隻嘢咁！終於K.O.哂佢地就有自由時間啦，都係摺衫睇電視啫，腦海嘛都係今日的事啦，我又要點時間消化吓才可以！

3/6/18

3/6/18.  SUN.  HOT

今日老公又放到假又係星期日，真係要好好把握，朝早兩隻細一早就起咗身，不過我都冇理瞓到9點，起身快煮早餐就食埋再叫老公去攞車，先揍咗我同仲爺去球場， 佢再送子元去打鼓！我就喺球場吽1個鐘，有yoko喺到吹水，時間都好快過，踢完波一齊食埋飯先散，跟住返屋企就先搞掂仲仲的功課， 再輪到子元，溫得咁上吓醒起未簽手冊，簽嗰時先發現佢被寫手冊話常識堂時不守紀律，聽佢講完根本係好小事，只係喺老書枱等改習作時用筆劃白板， 頂， 真係好小事囉，個常識老師出名搞唔掂班上秩序架啦，同時六七個又出位又搞嘢咪㩒鐘叫人囉， 真係好鬼麻煩！搞到我又要用時間作文咁交比兩位大人，又同Mr So交代吓吹吓水，期間子元就做番欠我的練習， 做到7點幾8點先出去找地方食飯，近近地去咗新都會， 食吓行吓再買多咗兩件衫裙，返新工著嘛！回來都10點幾， K.O.埋佢地就自由吓囉！

2/6/18

2/6/18.   SAT.  HOT

今日真係最後一日返呢間公司啦， 13年咁就過咗， 我都由少女變咗師奶， 過咗去就唔需要回頭， 前面有更長路等我呢！今朝主要揍子元啦， 老公一早返咗工， 我就揍子元去英文補習， 喺地鐵口遇到個同學， 請佢幫手帶上去我就行少啲，買埋早餐返公司開工，深哥已經到咗等我， 係開埋啲票print 埋地址比佢啫， 睇得出佢好唔捨得， 就連華姐都唔捨得架， 應該係得老細冇啫，佢想除之而後快好耐！10點幾等子元自己撘地鐵過來，佢有佢做練習，我有我自由，上吓網整埋佢個暑假更表，臨尾清哂電腦所有log in同上網痕跡囉，真係咩都消失哂啦，放手啦！帶子元同仲爺會合就過海怡學音樂啦，行吓AEON12蚊店，接番仲仲就喺美心食晏， 然後返長沙灣同老公會合， 返到去hea到5點幾開始溫書，老公要打暈仲爺，咁都好有時間同子元温書溫到8點幾我地再出去，約埋嫲嫲近近地去青衣城食晚飯，回家後仲爺又竟然肯再瞓喎！

1/6/18

1/6/2018   FRI   VERY HOT

今日感覺真係好似最後一日啦, 因為枱頭啲嘢基本上已經執哂, 會又唔洗我開啦, 因為啲高層全部都唔喺到, 咁咪做吓自己嘢囉, 午飯去咗同SALES飲茶, 講吓老細佢地壞話囉, 都暢快的! 食到2:15先返上去, 返去見到大老闆娘喺到但都唔怕啦, 佢都冇出聲啦! 下午都係冇咩講啲咩, 大家係講明唔講呢啲嘢架嘛, 到放工嗰吓都盡量keep住唔好有分離感! 老公帶咗子元去踢波, 仲爺喺嫲嫲到留宿, 咁我就叫咗個同事陪我去行葵廣買新衫, 唔覺唔覺行咗差不多兩個鐘, 都只係買咗3件咋, 唔敢買太多, 睇吓人地係咩style先再添! 過球場同老公會合, 去咗深水涉食嘢, 跟住就返屋企啦! 摺好衫都仲好精神咪打吓機囉, 老公攰瞓先, 我就hea 到1點先瞓!

31/5/18

31/5/18   THU   VERY HOT

今日老公放假, 不過我都係咁早起身架啦, 整好午餐比子元送校車, 仲爺冇跟落嚟因為有老公睇住, 吹水吹到8點先返上樓, 老公已經準備好出門口去攞車, 仲爺今日去聽音樂會返下午, 所以食完早餐一齊揍咗我返工佢兩父子就二人世界, 我就繼續返工囉, 今朝要面對工作分配部份, 其實都冇咩好驚, 我已經寫得好詳細啦, 有啲嘢唔係要執住你隻手先識做嘛, 要搶的你都搶哂去做, 點會唔識做! 叫埋總監佢負責寫reference letter, 基本上都冇咩嘢搞! 午飯個個都冇帶, 於是一齊出去D2食, 試咗間新嘢, 真係唔錯喎! 返到去下午開始執吓嘢啦, 其實你話好多嘢執走又唔係, 但都要D時間, 收拾物件亦收拾心情! 放工後叫老公同子元上嚟幫我攞嘢, 其實嘢就一箱啫, 反而有幾袋膠袋紙袋, 之後裝修完都冇攞番走! 落到樓嫲嫲同大包都喺到, 咁早就去食大牌檔, 都唔算太餓架! 食完返屋企, 叫佢兩個沖涼, 我就hea住打吓機, 然後咪睇埋電視8:30先沖涼囉, 仲爺唔洗做功課, K.O.埋佢就同子元睇功課同練習, 錯好多又唔係, 只係又錯唔小心囉! 10點幾K.O.埋佢本來應該摺衫架啦, 但我眼瞓到一個點…喺梳化已經瞓咗, 所以連J2套劇都冇睇就去瞓啦!